!Во периодот што претстои работиме на воведување систем за пристап и за претплата. За начинот на пристап и за претплатата ќе информираме дополнително. Содржините на „Мета“ до тогаш се слободни за преземање со задолжително цитирање и атрибуирање.

Шекеринска: Сметаме на нашите стратешки партнери за членството во НАТО


Скопје, 13 септември, 2017 - 15:47 (META) 

Македонија смета на своите стратешки партнери, особено сега кога работиме забрзано и искрено за членството во НАТО, истакна министерката за одбрана, Радмила Шекеринска, по денешната средба со командантот на Националната гарда на Вермонт, генерал-мајор Стивен Креј, кој е во официјална посета на Македонија.

– Македонија – членка на НАТО е заедничка цел зашто служи на двата крупни интереси – стабилен регион, но и стабилни и безбедни граѓани на Република Македонија. Нашата определба за членство на Македонија во НАТО ја докажавме и преку нашето постојано учество во меѓународните мисии, вклучително и со мисијата во Авганистан, кое го продолжуваме и ќе го зголемиме. Ја покажавме, исто така, и во заедничката вежба што ја имавме со воените сили на САД ова лето на Криволак – изјави Шекеринска, посочувајќи дека повеќе од 4.500 војници на Амијата на Република Македонија учествувале во заедничките активности со Националната гарда на Вермонт.

Генералот Креј истакна дека од 70 партнерства на националните гарди на САД во светот, партнерството на Националната гарда на Вермонт и на АРМ е еден од најуспешните примери на соработка која има неограничен потенцијал.

– Стратегиското партнерство е навистина корисно за двете земји и ние сме горди за сè што успеавме да обезбедиме за Македонија, меѓутоа и за искуството кое ние го стекнавме овде во Македонија – рече командантот на Националната гарда на Вермонт.

Тој порача дека интеграцијата на Македонија во НАТО е дел од целите на партнерството и дека во текот на посетата ќе се разговара за активностите што ќе се преземаат следните години, и за помошта во однос на членството во НАТО и за другите цели на државата.


Шекеринска и Бартол го честитаа Денот на независноста од врвот Мусица кај Крушево


Крушево, 8 септември, 2017 - 15:52 (META) 

Министерката за одбрана, Радмила Шекеринска, и морнаричкиот капетан Горазд Бартол, шеф на Канцеларијата за врски на НАТО, денеска од врвот Мусица на Бушева Планина им го честитаа 8 Септември, Денот на независноста, на сите граѓани на Република Македонија.

Придружувани од амбасадорите на ЕУ, Самуел Жбогар, на Обединетото Кралство, Чарлс Герет, одбранбени атаеши во Македонија, членовите на планинарското друштво „Ристо Карпуш“, голем број граѓани на Крушево денеска беа дел од настанот „Заедно кон врвот“ кој се организира по повод Денот на независноста.

– Дозволете ми на граѓаните на Република Македонија да им го честитам 8 Септември – Денот на независноста и да посакам следните 26 години да имаме поголема благосостојба и стабилност. Во 26-те години независност поминавме низ добри и тешки моменти, но покажавме дека кога се има иста цел, кога сме упорни и истрајни, таа цел е достижна. Денеска ни треба заедништво околу нашата заедничка стратешка цел – членство во НАТО и во ЕУ – рече министерката.

Морнаричкиот капет Бартол го честиташе Денот на независноста и изрази уверување дека сите 29 земји членки на НАТО ја поддржуваат Република Македонија да стане 30. членка на Алијансата.

– Вашата земја помина избори, има нова влада и нови идеи. Имам чувство дека вашата земја е решена да продолжи на патот кон членство во НАТО и во ЕУ. Можам да ве уверам дека сите 29 земји даваат поддршка на вашата земја и со нетрпение очекуваме вашата земја да стане 30. членка на алијансата. Мојата канцеларија е тука да ви помогне – рече Бартол.


АРМ учествува во гаснењето на пожарот, Владата апелира да не се шират дезинформации


Скопје, 31 јули, 2017 - 23:16 (META) 

Портпаролот на Владата, Миле Бошњаковски, вечерва во изјава за медиумите, од името на Владата апелира до граѓаните да не шират непотврдени информации во врска со пожарите кои се активни.

Тој информираше дека двата хеликоптери на АРМ биле на располагање цело време и дека тие сè уште се ангажирани по барање на Дирекцијата за заштита и спасување и учествуваат во гаснење на пожарите во Требовље, а од денеска и во Брезница.

– Во текот на денешниот ден активирани се дополнително два пешадиски вода од четвртиот баталјон на АРМ од Кичево кои се веќе на терен. Таму се наоѓа и командантот на Здружената оперативна команда (ЗОК), генералот Зоран Милевски. Вкупно има 60 офицери и војници на АРМ кои на терен се справуваат со гаснење на овие пожари – изјави Бошњаковски.

Портпаролот информираше дека на владината седница првата точка на дневен ред било тоа да се свика Управувачкиот комитет за координација и управување во системот за управување со кризи. Одборот во кој членуваат владините министри за одбрана, внатрешни работи, транспорт и врски и здравство, како и директорот на ДЗС, вечерва одржуваат координација на ова тело, а, според Бошњаковски, уште ноќва ќе преземат активности за ситуацијата да се стави целосно под контрола.


Иванов – Бејли: Потребен е нов импулс за членството на Македонија во НАТО


Охрид, 13 јули, 2017 - 14:52 (META) 

Претседателот на државата, Ѓорге Иванов, денеска во „Вила Билјана“ во Охрид имал средба со амбасадорот на САД во земјава, Џес Бејли, на која истакнал оти очекува дека ќе продолжи американската поддршка и ангажман околу членството на Македонија во Европската Унија и во НАТО.

„Македонскиот претседател истакна дека е неопходно да се создаде нов поттик и дополнителен импулс за членството на Република Македонија во НАТО, посочувајќи дека реализација на нашата евроатлантска интеграција ќе придонесе за долгорочен мир, стабилност, безбедност и за просперитет на целиот регион“, стои во соопштението од кабинетот на Иванов за средбата.

Бејли на својот твитер-профил напиша дека имал „конструктивна средба со претседателот Иванов во Охрид“ и дека „партнерството помеѓу САД и Македонија останува цврсто“.

Иванов и Бејли размениле мислења и за соработката на полето на безбедноста и на одбраната, преку реализација на заеднички обуки и вежби за припадниците на Армијата на Република Македонија (АРМ) и војската на САД. Во овој контекст, било поздравено учеството на АРМ на мултинационалната вежба „Сејбер гардијан 2017“, а било разговарано и биле разменети информации и за претстојната вежба на АРМ и на Армијата на САД во Европа, „Драгон рајд“, која ќе се одржи од 28 јули до 8 август, на воениот полигон Криволак.


Владата бара продолжување на кризната состојба до крајот на годината


Скопје, 28 јуни, 2017 - 13:39 (META) 

Собранието утре на пленарна седница треба да гласа за предлогот на Владата за продолжување на кризната состојба, која беше воведена во август 2015 година поради мигрантската криза и големиот транзит на мигранти и на бегалци низ територијата на државата.

На 30 јуни истекува важноста на одлуката за продолжување на кризната состојба, што беше донесена во октомври минатата година, а со новиот предлог Владата бара нејзино продолжување до 31 декември 2017 година.

„За да се обезбеди континуитет во вршењето на активностите од страна на силите на Армијата на Република Македонија и на безбедносните сили на Министерството за внатрешни работи, во функција на обезбедување, заштита и на чување на државната граница, Владата на Република Македонија ќе побара од Собранието на Република Македонија да ја донесе предлог-одлуката за изменување на одлуката за одобрување на продолжување на рокот за постоење на кризна состојба поради зголемен обем на влез и на транзитирање на мигранти низ територијата на Република Македонија и да го одобри продолжувањето на рокот за справување со кризната состојба, во времетраење до 31 декември 2017 година“, стои во предлогот.

Кризната состојба поради мигрантската криза беше воведена кон крајот на август минатата година, кога десетици илјади мигранти од подрачјата зафатени со војни на Блискиот Исток и во Северна Африка транзитираа низ територијата на земјава на пат кон западноевропските земји.

Собранието на барање на Владата неколкупати го продолжуваше траењето на кризната состојба.


Шекеринска: Ќе се залагам за поголем буџет на АРМ и за партиите да се држат подалеку од неа


Скопје, 6 јуни, 2017 - 16:24 (META) 

„Силно ќе се залагам за зголемување на буџетот на АРМ и за подобрување на професионализацијата во неа. Армијата да биде забрането место за сите политички партии, вклучително и за партијата од која доаѓам“, нагласила министерката за одбрана, Радмила Шекеринска, на денешната средба со началникот на АРМ, генерал потполковник Методија Величковски, соопшти Министерството за одбрана.

Министерката му порачала на генералот Величковски дека стои на располагање и дека ќе има блиска соработка, која ќе биде во интерес на Армијата и на Владата на Република Македонија.

–  Тука сум за да се вратиме на нашата определба за членство во Алијансата, за да направиме вистински реформи, реформи што ќе бидат корисни за сите – нагласила Шекеринска.

Министерката се осврнала и на основните потреби на припадниците на АРМ, како што се опрема, униформа, чизми и друго, и додала дека ќе сторат сè за да најдат решенија за искористување на домашните компании, што ќе влијае и на подигнување на домашната економија.

Величковски ѝ го честитал на Шекеринска назначувањето на функцијата министер за одбрана и изразил задоволство што Министерството за одбрана добило влијателен министер во ликот на првата жена на таа функција.


Иванов бара Нухиу да ја појасни изјавата за сценарио за воена состојба


Скопје, 12 мај, 2017 - 18:34 (META) 

Кабинетот на претседателот Ѓорге Иванов попладнево го повика министерот за внатрешни работи, Агим Нухиу, да ги појасни податоците и информациите искажани вчера во интервју за телевизија „Алсат-М“ за постоење на сценарио кое би послужило како повод за прогласување на воена (член 124 од Уставот на Република Македонија) или вонредна состојба (член 125 од Уставот на Република Македонија) од страна на претседателот и употреба на АРМ, поврзани со насилниот влез во Собранието на 27 април 2017 година.

Во соопштението се нагласува дека со лажни вести некој сака да наштети на угледот на претседателот на Република Македонија.

„Кабинетот на претседателот на Република Македонија смета дека во јавноста постои опсесија со лажни вести да се изврши делегитимирање на институциите, односно на претседателот на Република Македонија“, се вели во реакцијата.

Нухиу синоќа во интервју за телевизијата, повикувајќи се на гласини, посочи на наводен план за ангажирање на Армијата за време на случувањата во Собранието на 27 април.

– Има гласини што сè уште не можам да ги потврдам дека полицајците се повлекле во вршењето на законските обврски, затоа што слушале од други дека треба да чекаат уште малку за да може потоа и претседателот на државата да дава наредба за излегување на војската, да се прогласи вонредна состојба и така натаму, но овие се прашања кои ги има во рамките на службите во МВР, но не сакам да потврдам такво нешто затоа што се уште ги немаме аргументирано – изјави Нухиу.


Хеликоптери ги исплашија скопјани, од Генералштабот велат дека е вежба


Скопје, 4 мај, 2017 - 12:35 (META) 

Хеликоптери на АРМ околу пладне исплашија скопјани, откако триесетина минути летаа над централното подрачје на Скопје. Се јавивме во Генералштабот на АРМ, од каде ни кажаа дека нема причини за паника, бидејќи не станува збор за никаква вонредна ситуација, туку во прашање се редовни вежбовни активности – и на пилотите и на други припадници на АРМ.

Тони Јаневски, началникот на канцеларијата за односи со јавноста на Генералштабот, објасни дека покрај пилотите, вежбовни активности имаат и други припадници на армијата, но не потврди дали станува збор за војник или за некаква опрема на војската закачена со сајли за хеликоптерите.


На оклопен транспортер на АРМ му откажале сопирачките, па направил карамбол


Скопје, 24 април, 2017 - 17:03 (META) 

Основното јавно обвинителство – Скопје соопшти детали за денешната сообраќајка кај наплатната рампа Сопот, во која се судриле три воени возила и биле повредени пет војници.

Според јавниот обвинител што извршил увид, несреќата се случила кај наплатната рампа на автопатот Скопје – Велес, кога на еден од оклопните транспортери во колоната возила на АРМ му откажале сопирачките, па удрил во оклопен транспортер пред него, кој бил застанат. Тој транспортер удрил во друго возило, „ленд ровер дефендер“.

Во верижниот судар се повредени еден офицер и четворица војници на АРМ, на кои помош им била дадена во Општата болница во Велес.

Според извештајот на јавното обвинителство, причинета е незначителна материјална штета, а дежурниот јавен обвинител издал наредба за вонреден технички преглед на моторните возила што учествувале во несреќата.


Гори шума во близина на воените магацини на полигонот Пенуш


Штип, 30 март, 2017 - 17:43 (META) 

Стотина војници на Армијата на Република Македонија (АРМ) и пожарникари од штипската противпожарна единица се обидуваат да го изгаснат пожарот, што денеска околу пладне зафатил околу 50 хектари нискостеблеста шума во близина на воениот полигон Пенуш.

Пожарот е меѓу селата Софилари и Драгоево, а непристапниот терен и силниот ветер го отежнуваат гаснењето на огнот.

Дополнителен проблем е што пожарот се доближува до воените магацини во Пенуш. Жителите стравуваат дека пожарот може да се прошири на планината Серта, на која секоја година пожари уништуваат неколку десетици хектари млада шума.

Пред три години, во ова подрачје во пожар изгореа 500 хектари шума, а интервенцијата на надлежните за ставање на огнената стихија под контрола траеше три дена.