Иванов: Против мене се води хајка и линч со нарачани лажни искази


Скопје, 7 декември, 2018 - 20:13 (META) 

Претседателот Ѓорге Иванов демантира дека на 27 април планирал да прогласи воена состојба и дека наводно под притисок на меѓународната не го направил тоа. Претседателот во обраќањето рече дека против него се води хајка и линч со очајно смислено сценарио со нарачани лажни искази и генерирање лажни вести.

– Ако УБК се дрзнува без никакви основи да ги следи активностите на мојот кабинет и да ме става мене како претседател во службени белешки кои опишуваат непостоечки настани, се плашам од помислата што сè се случува во оваа институција и како се креираат извештаи со фиктивни извори за да се постигне определена цел. Со планиран истек на калисфицирани податоци се гради лажна перцепција за на крај да се конструира судско-полициски случај – рече Иванов.

Тој потврди дека генералниот секретар во неговиот кабинет, Борис Јосифовски, на 27 април минатата година бил во седиштето на ВМРО-ДПМНЕ. Кога почнале настаните во Собранието рече дека веднаш го повикал Јосифовски да го свика кабинетот.

За советникот за национална безбедност Синиша Алексовски, пак, рече дека тој ден тргнал на службен пат кон Вашингтон.

– Му реков веднаш да се врати од Истанбул и по полноќ околу 1 часот пристигна, сите извештаи што ги има ги има пратено на обвинителството – рече Иванов.

Тој вели дека во неговиот Кабинет на 27 април никогаш не се разговарало, ниту се размислувало за прогласување воена или вонредна состојба.

– Ги отфрлам и сите шпекулации дека меѓународната заедница вршела каков било притисок врз мене да отстапам од некаков наводен план за прогласување воена или вонредна состојба. Во овој момент, јавно ги повикувам странските претставници да излезат и да ги посочат тие кои ми вршеле притисок. Сценарио за воена и вонредна состојба немало, освен ако во Република Македонија не функционирал паралелен врховен командант на вооружените сили и паралелен Генералштаб на Армијата на Република Македонија – рече Иванов.

За сведочењата на дел од обвинетите за настаните на 27 април кои посочија дека наводно во кабинетот на Иванов се разговарало за прогласување воена состојба, Иванов рече дека таквите искази се лажни.

– Деновиве сме сведоци дури и на лажни искази дадени во судскиот процес за настаните од 27 април. Прво, сакам да укажам дека за давање лажен исказ пред суд, кривично се одговара. Второ, ги охрабрувам сите оние кои ме обвинуваат слободно да се обратат до надлежните институции, Министерството за одбрана, Армијата на Република Македонија, Агенцијата за разузнавање, Управата за безбедност и контраразузнавање и други институции кои се споменуваат, и да побараат веродостојни информации за планските и дневните активности на секој старешина, командант и војник. Овие институции треба да одговорат на прашањата каде биле одговорните лица на 27 април или претходно, и дали постојат какви било административни записи за подготовки на некакви сценарија за воена или вонредна состојба – рече Иванов.

Иванов потврди дека поранешните министри Миле Јанакиески и Владимир Пешевски биле во неговиот кабинет за консултации во врска со процесот за помирување.

Иванов не го коментираше бегството на експремиерот Никола Груевски.


Шекеринска: Втора година по ред буџетот за одбраната расте, 135 милиони евра за 2019


Скопје, 23 ноември, 2018 - 14:01 (META) 

Mинистерката за одбрана Радмила Шекеринска на денешната прес–конференција го образложи буџетот за одбраната за 2019, кој по десетгодишниот пад, втора година по ред е во нагорна линија и оваа година изнесува 135 милиони евра.

„Лани, буџетот за одбрана порасна за 15 процнети, а зголемувањето за 2019 во споредба со ребалансираниот буџет за 2018 изнесува над 33 проценти. Следната година освен петпроцентното зголемување на платите на припадниците на АРМ, исто толкаво зголемување ќе има и на платите на вработените во министерството“, рече Шекеринска.

Таа додаде дека Владата не отстапува од планот за зголемување на буџетот секоја година за 0,2 процентни поени од БДП и дека тоа се покажува и со буџетот за 2019 година.

„Буџетот е развоен и реформски, со намена за подобрувањето на опремата, на условите за работа на припадниците на АРМ, а е и во поддршка на остварувањето на стратешката цел на Македонија, членството во НАТО“, додаде Шекеринска и посочи дека една од поголемите категории во буџетот е ставката за стоки и услуги, односно 30 милиони евра за набавка на униформи што е во тек, но ќе се исплаќа од следниот буџет, делот од испораката на чизми, храна, резервни делови, за обуки и школувања за припадниците на АРМ.

Поголем пораст на средствата е предвиден во делот на капиталните расходи за опремување и модрнизација на Армијата, каде после долги години нивно одржување на ниво од 10 проценти од одбранбениот буџет, следната година тие ќе изнесуваат 15 проценти, односно над 20 милиони евра.

„Зголемениот буџет ќе резултира со квалитативно зајакнување на персоналот, опремување на АРМ согласно НАТО стандардите и подобрување на условите за работа на припадниците на Армијата“, рече министерката и образложи дека зголемување за 85 проценти има во делот на логистичката поддршка на АРМ, додека цели 59 проценти изнесува зголемувањето на ставката за опрема и модернизација утрвдена со Стратегискиот одбранбен преглед 2018.

Износот за одржување на борбената и неборбената техника на Армијата е зголемен за 125 проценти, со што директно се влијае на подобрувањето на борбената готовност на АРМ.

Министерката информираше дека продолжува придонесот на Македонија во меѓународните мировни мисии и дека за следната година е планирано зголемување на македонското учество за 25 проценти.


И со зголемен буџет, на АРМ ќе и треба најмалку една деценија да се доопреми


Скопје, 30 октомври, 2018 - 10:31 (META) 

На АРМ ќе и требаат најмалку четири години за со најавените буџети, кои ќе се зголемуваат, да го купи само минималниот неопходен број на оклопни транспортери, а најмалку една деценија за да ја купи сета потребна опрема, покажуваат пресметките направени врз основа на постоечката формација на АРМ и проекциите на Министерството за финансии во Фискалната стратегија за 2019-2021 година.

Владата на седница на 25 септември ја прифати информацијата за планирање на опремувањето и модернизацијата на армијата на Република Македонија во предлог-буџетот на Министерството за одбрана за периодот 2019 – 2021 година.

„Приоритет во опремувањето и модернизацијата имаат декларираните сили за НАТО/ПзМ (Партнерство за мир) активности прифатени во рамките на НАТО Процесот на планирање и преглед (PARP), вклучително и Лесната пешадиска баталјонска група како најголема декларирана борбена единица со која Република Македонија придонесува во НАТО базенот на сили“, соопшти Владата.

По овој документ, Министерството за одбрана треба да почне да планира повеќе пари за опремување во буџетот за следната година, кој се подготвува. За опремување треба да бидат наменети 20 отсто од парите за одбраната.

Според Фискалната стратегија на Република Македонија за 2019-2021, министерството за финансии предвидува дека буџетот на одбраната, кој сега е 106 милиони евра, ќе расте по околу 200 милиони денари или 3,2 милиони евра годишно во следните три години. АРМ, според овие проекции, во следните три години ќе има околу 65 милиони евра за нова опрема од сопствениот буџет. Но, одбраната до 2024 година треба да добие двојно повисок буџет, кој треба да изнесува 2 отсто од бруто домашниот производ, со што за опремување ќе бидат наменети по околу 40 милиони годишно.

За да ја опреми само Лесната пешадиска баталјонска група, на АРМ и требаат меѓу 34 и 40 пешадиски борбени возила или оклопни транспортери. Според сегашните цени, еден чини меѓу 2,5 и 3 милиони евра, но само како платформа, без целосно вооружување и опрема. Оклопните транспортери само за еден баталјон би чинеле меѓу 80 и 120 милиони евра, или во најевтината варијанта на АРМ би и требале најмалку четири години за со својот буџет да ги купи само транспортерите за еден баталјон.

За целосно да се опреми сегашната механизирана пешадиска бригада на АРМ, која има четири баталјони, ќе бидат потребни меѓу 136 и 160 оклопни транспортери, што би чинело од 340 до 480 милиони евра само за платформите-возилата без вооружување.

Покрај оклопните транспортери или пешадиски борбени возила, според Стратегискиот одбранбен преглед усвоен во јуни, на АРМ и требаат и тактички комуникациски систем, инженериски машини и опрема, опрема за сајбер-одбрана, воени транспортни возила, орудија за посредна огнена поддршка, индивидуална и колективна опрема за атомско-биолошко-хемиска одбрана и балистичка заштита, опрема за извидување, разузнавање, набљудување и определување на цели, комуникациска опрема…

Според овие проекции, АРМ би можела сама да ги опреми декларираните единици со буџетите за следните десет години. Но, не и целата своја формација.


Од 16 години во мисии во странство, АРМ осум години била во врвот


Скопје, 22 септември, 2018 - 15:02 (META) 

Македонската армија не само што веќе 16 години учествува во операции надвор од територијата на државата, туку половина од својот експедициски стаж го минала како една од водечките земји според процентот на вооружени сили ангажирани во борберни операции надвор од својата територија, покажуваат податоците од  Канцеларијата за односи со јавност на Генералштабот на АРМ.

АРМ своето експедициско искуство го почна во 2002 година, со симболичен контингент од двајца старешини во операцијата ИСАФ во Авганистан. Но, од 2006 година, македонската војска надвор од територијата на државата испраќа повеќе од 4 отсто од вкупниот број на припадници на армијата, процент кој се намалува дури во 2015 година, кога завршува операцијата ИСАФ.

На врвот на својата активност, во 2008 година АРМ имала 444 свои припадници во четири мисии во светот, предводени од НАТО, ЕУ или Обединетите нации, или речиси 7 отсто од вкупната бројна состојба во тој момент.

АРМ држи уште неколку статистички рекорди во своите операции во странство. Во 2008 година, со мисиите во Ирак и Авганистан, Македонија беше трета земја, по САД и Британија, според процентот на војници во борбени мисии надвор од својата територија. Според силите распоредени во тие две операции апсолутен лидер беа САД, Обединетото кралство учествуваше со околу 6 отсто, а АРМ со околу 4 отсто од вооружените сили.

За споредба, со исклучок на САД и Велика Британија, членките на НАТО во борбени операции просечно испраќале околу 1 отсто од своите вооружени сили.

Во 2010 година АРМ стана и трета земја, повторно зад САД и Британија, според процентот на војници ангажирани во мисијата ИСАФ. Таа година во мисијата во Авганистан учествувале 407 македонски војници, или околу 6 отсто од бројната состојба на АРМ во моментот.

Истата година и официјалните статистики на НАТО ја рангираа Македонија во врвот на листата на учесници во ИСАФ, овој пат според бројот на војници во однос на популацијата на земјата. На таа листа Македонија беше четврта, по САД, Обединетото кралство и Данска.

Статистички, до денес половина АРМ веќе учествувала во мисии. Според министерката за одбрана Радмила Шекеринска Јанковска, досега повеќе од 4.000 војници биле во операција во сранство.


АРМ по пет години ќе го достигне буџетот што го имаше од пред десет години (инфографик)


Скопје, 16 септември, 2018 - 10:00 (META) 

Македонија до 2024 година ќе го зголеми буџетот за одбрана на 2 отсто од бруто-домашниот производ за да ја исполни препораката од НАТО, усвоена на самитот во Кардиф, Велс во 2014 година, земјите членки во следните десет години да го достигнат тоа ниво на финансирање на одбраната. Но, со зголемувањето на буџетот на 2 отсто од БДП одбраната, всупност, ќе си ја врати стапката на буџет што ја имаше до пред десет години, покажуваат статистичките податоци.

Според податоците на Светската банка, Македонија од осамостојувањето до 2008 година секогаш за одбраната издвојувала околу 2 отсто од бруто-домашниот производ, освен во кризната 2001 година, кога одбранбениот буџет бил 6.1 отсто од БДП.

Од тогаш, буџетот на одбраната почна нагло да опаѓа, за по 2014 година да падне под 1 отсто од БДП, а дури годинава повторно да се искачи на 1.1 отсто.

Намалувањето на армискиот буџет предизвика низа последици во вооружените сили.

„Несоодветното финансирање во последната декада резултираше со негативно кумулативно влијание врз способностите и капацитетите на АРМ. Финансирањето во минатиот период беше едвај доволно за да се одржуваат средствата со кои располагаме, но не и да се опремуваме и модернизираме во согласност со планираното. Моменталната состојба во АРМ е одраз на недоволни инвестиции во одбраната во подолг временски период“, стои во Стратегисткиот одбранбен преглед, документ за оценка на состојбата и проекција за развој на одбраната, кој беше усвоен во јуни годинава.

Со преполовен буџет, Министерството за одбрана во минатата деценија трошело 69 отсто од буџетот за персоналот, околу 20 отсто за функционирање, одржување и за обука, и околу 11 отсто за опрема и модернизација. Стандардната структура на буџетот според параметрите на НАТО е до 50 отсто за персоналните трошоци, трошоците за операции, одржување и обука до 30 отсто и 20 отсто од буџетот за опремување и модернизација.

Постојаното постепено зголемување го најави министерката за одбрана Радмила Шекеринска Јанковска уште при усвојувањето на државниот буџет за оваа година.

– Посветени сме на зголемување на финансирањето во одбраната. Буџетот во 2018 година е за 14 отсто поголем од претходната година. Во текот на следните три фискални години (2019, 2020 и 2021), буџетот на одбраната ќе се зголемува за по 0,2 отсто од БДП, со намера да се исполни препораката на НАТО од 2 отсто од БДП до 2024 година – најави министерката.

foto brit emb foto uk gov Овој текст е подготвен во рамките  на проектот „Поддршка на демократските вредности и промени во општеството преку новинарството“ финансистан од Владата на Обединетото Кралство, со поддршка на Британската амбасада во Скопје. Мислењата и ставовите наведени во оваа содржина не ги одразуваат секогаш мислењата и ставовите на Британската амбасада/Британската Влада.

 


Васко Ѓурчиновски е новиот началник на ГШ на АРМ


Скопје, 17 август, 2018 - 11:39 (META) 

Со Указ на претседателот Ѓорѓе Иванов генерал мајор Васко Ѓурчиновски денеска е назначен за нов началник на Генералштабот (ГШ) на Армијата на Република Македонија. Неговото назначување беше соопштено на централната прослава на 18 Август – Денот на АРМ, на која учествуваат државниот и армискиот врв, претставници на дипломатскиот кор.

Ѓурчиновски доаѓа на местото на генерал-потполковник Методија Величковски, кому му истекува тригодишниот мандат. Новиот началник на Генералштабот на АРМ досега ја извршуваше функцијата постојан воен претставник на АРМ во седиштето на НАТО во Брисел.

Генералот Ѓурчиновски беше командант на Здружената оперативна команда, највисокото тело во АРМ, а претходно беше и командант на армиските специјалци и аѓутант на претседателот Иванов.


АРМ утре го одбележува својот празник, во Скопје ќе има артилериски плотуни


Скопје, 16 август, 2018 - 17:00 (META) 

Армијата на Република Македонија (АРМ) утре ќе го одбележи својот празник, 18 Август – Ден на АРМ, со свеченост на платото пред зградата на Министерството за одбрана и Генералштабот, како и со артилериски плотуни од касарната „Илинден“ во Скопје.

На централното одбележување, кое ќе почне во 10.30 часот ќе говорат претседателот на државата и Врховен командант на АРМ, Ѓорге Иванов и министерката за одбрана Радмила Шекеринска.  На свеченоста се поканети и премиерот Зоран Заев и министри, претседателот на Собранието, Талат Џафери и пратеници, како и поранешни министри за одбрана и началници на ГШ, пензионирани генерали на АРМ, амбасадори и воени аташеа од странство, но и други високи гости.

На свеченоста, претседателот Иванов, со Орден за воени заслуги ќе ги одликува Првиот механизиран пешадиски баталјон од Првата механизирана пешадиска брига, како и Баталјонот за врски. Исто така, ќе се изврши унапредување на старешини и врачување на плакети, значки и благодарници на организации и поединци.

Попладнето и вечерта, пак, по повод Денот на АРМ ќе се испукаат артилериски плотуни од касарната „Илинден“.

Првин во периодот од 15 до 18 часот утре, ќе се изврши пробна артилериска стрелба со еден истрел од шест артилериски орудија, а во 19 часот ќе се изврши почесната артилериска стрелба, со 10 плотуни од артилериски орудија.


Иванов го назначи генералот Нуредини за нов заменик-началник на генералштабот на АРМ


Скопје, 15 мај, 2018 - 14:09 (META) 

Врховниот командант на АРМ, претседателот Ѓорге Иванов, го смени заменик-началникот на Генералштабот, бригадниот генерал Мухамет Рацај, објави „Порталб.мк“.

Информацијата ја потврдуваат и од кабинетот на претседателот, од каде велат дека декретот за смената на Рацај бил објавен во „Службен весник“.

„Да, информациите се вистинити и декретот е објавен во „Службен весник“. Рацај е разрешен, а Азим Нуредини е именуван на негово место”, потврдиле од кабинетот на Иванов за „Порталб“.

Инаку, Рацај на позицијата заменик-началник на Генералштабот на АРМ дојде на 18 август 2015 година.

Бригадниот генерал Нуредини, кој го заземе местото на Рацај, претходно беше началник на Здружената оперативна команда. По потекло е од Битола, а завршил Воена академија во Белград. Чинот бригаден генерал го доби во 2015 година. Одликуван е со медал на ИСАФ за учество во мировна мисија.


Шекеринска во Стејт Департментот: Македонија е подготвена за членство во НАТО


Вашингтон, 28 април, 2018 - 12:21 (META) 

Министерката за одбрана Радмила Шекеринска на вториот ден од официјалната посета на САД се сретна со заменик – помошникот на секретарот за одбрана Лора Купер и со високи официјални лица во Стејт Департментот.

Како што соопшти Министерството за одбрана, на средбата со првиот заменик – помошник секретар во Бирото за европски и евроазиски работи на Стејт Департментот, Елизабет Милард, министерката Шекеринска ги образложила аргументите поради кои Македонија го заслужува членството во НАТО – зголемувањето на буџетот и платите за Армијата, одбранбените реформи, зголемувањето на бројот на војници во мисијата во Авганистан, но и на поширок план – враќањето на критичките и слободни медиуми, владеењето на правото, активната транспарентност на која се обврза Владата како една од алатките против корупцијата.

Високата претставничка на Стејт Департментот Милард, се посочува, оддаде признание за напредокот, кој го постигна земјата само една година по кризните настани во Собранието, и потенцираше дека САД се силен пријател на Македонија кој одблизу го следи и поддржува прогресот на земјата.

Во Стејт Департментот министерката Шекеринска се сретна и со заменик – помошник секретарот Метју Палмер, кој истакна дека работите во Македонија се одвиваат многу бргу, а земјата е подготвена не само да биде членка на НАТО, туку членка која активно придонесува во Алијансата.


Состојбата со водостите критична, можни се поплави во неколку котлини


Скопје, 6 март, 2018 - 9:52 (META) 

На седницата на Управувачкиот комитет за справување со кризи, била согледана состојбата со водостоите на реките низ целата земја, при што членовите констатирале дека ситуацијата е најкритична во Северозападниот регион, во Пелагониската котлина, како и во Градот Скопје.

Имајќи ги предвид најавите на Управата за хидрометеоролошки работи за нови врнежи од дожд, Управувачкиот комитет за справување со кризи на  седницата донел неколку препораки, меѓу кои и итно чистење на каналите.

„Дирекцијата за заштита и спасување (ДЗС) веднаш да ги стави во функција сите водни пумпи со кои располага, со цел нивно користење и справување со настанатата ситуација на територија на општините од Полошкиот, Пелагонискиот и Скопскиот регион. Дирекцијата за заштита и спасување согласно склучените договори за ангажирање на градежна механизација од приватни фирми, доколку оцени дека е потребно, да ја ангажира оваа механизација, согласно потребите и приоритетите на погодените општини“, велат од Управувачкиот комитет.

Според податоците од надлежните институции, значително се зголемени водостоите на реките Вардар, Црна, Треска, Сатеска, Радика, како и на реката Пчиња. Поплавувања се регистрирани во горните текови на Вардар, Црна и реката Треска и нивните помали притоки.

„Во општината Јегуновце е поплавена поголема површина на земјоделско земјиште. Но ако и натаму се зголемува нивото на реката Вардар, институциите констатираа дека и дел од куќите може да бидат поплавени. Исто така, во Гостиварското село Форино, вчера биле поплавени дел од куќите и подрумските простории. Регистрирано е и клизиште на патот кај тетовското село Ново село. Дел од подрумските простории во пониските делови на градот Струга биле поплавени во текот на денот, поради високото ниво на подземни води. Исто така, поплавено е и обработливо земјоделско земјиште поради излевање на реката Црн Дрим“, се вели во соопштението од Владата.

Во Кичево, поставен е одбранбен насип со вреќи со песок и механизација по течението на реката Зајашка. Има и помали излевања на реката Вардар во Скопско.