!На 1 февруари 2017 година, заврши промотивниот период на слободно користење на содржините на „Мета“. Во периодот што претстои го воведуваме новиот систем за пристап и за претплата. За начинот на пристап и за претплатата ќе информираме дополнително

Изложба за Борис Чипан, основоположник на заштитата на македонското градителско наследство


Скопје, 30 март, 2017 - 11:05 (META) 

„По трагите на еден модернист“ е насловот на изложбата за познатиот македонски архитект Борис Чипан, по потекло од Охрид. Вечерва во 20 часот, во  Музеј на град Скопје, изложбата ќе ја отвори проф. д-р Минас Бакалчев, декан на Архитектонски факултет при УКИМ.

Изложбата се содржи од материјали од професионалната оставина донирана од семејството Чипан на Музејот на град Скопје. „Збирката на архитект Борис Чипан“ содржи повеќе од 500 предмети, меѓу кои оригинални проекти, цртежи, скици, студии, ракописи, белешки, фотографии, исечоци од весници, дигитални записи, награди, плакети, книги и други предмети.

На Борис Чипан, автор, меѓу другото, и на проектот за објектот на МАНУ во Скопје, му припаѓа едно од најзначајните места во историјата на македонската современа архитектура. Како творец, еднакво суверено се реализираше во областа на архитектонското проектирање, заштитата на градителското наследство, архитектонското образование и архитектонската публицистика.

Борис Чипан (27 март 1918 – 31 март 2012) е роден и израснат во Охрид, градот кон кој чувствуваше огромна љубов, од кој ја црпеше инспирацијата и на кој му се навраќаше целиот свој живот.

По дипломирањето архитектура на Техничкиот факултет во Белград, се враќа во Охрид, а работи и во Битола и во Охрид и се смета за основополжник на заштитата на македонското градителско наследство.
Од 1949 година е првиот директор на нововостановениот Републички завод за заштита на културно-историски споменици.

Чипан е еден од првите ентузијасти кој работеше на конзервацијата на „Света Софија“, катедралниот храм на Охридската архиепископија, како и на „Света Богородица Перивлепта“ и на многу објекти од градската архитектура во Охрид.

Надвор од Охрид, работеше на конзервацијата на црквата „Свети Пантелејмон“ во Нерези, Даут-пашиниот амам и Куршумли ан во Скопје, како и на многу други објекти.


Почина истакнатиот архитект Славко Брезоски


Скопје, 8 март, 2017 - 16:25 (META) 

На 95-годишна возраст, вчера починал архитектот проф. д-р Славко Брезоски, еден од најзначајните автори на поствоената македонска архитектура, кој во последниот период беше во фокусот на јавноста поради противењето на изменувањето на изгледот на Стоковна куќа на плоштадот Македонија, која е изградена по негов проект.

Славко Брезоски припаѓа на првата генерација македонски архитекти школувани во Белград и во Загреб (заедно со Пота, Жупан, Пецовски, Ќосевски, Маленкова, Галиќ и Шеќерински).

Роден е во Галичник во 1922 година, а дипломирал на Архитектонскиот факултет при Техничката висока школа во Белград во 1950 година, под менторство на професорот Милан Злоковиќ. Работел како професор на Архитектонскиот факултет во Скопје во периодот од 1969 до 1987 година, на Катедрата за проектирање општествени згради.

Творејќи во знакот на модерната, архитектот Славко Брезоски е автор на голем број значајни градби, меѓу кои се Соборниот храм „Св. Климент Охридски“ во Скопје, Стоковната куќа и Комунална банка во Скопје, Работнички дом (Дом на синдикати) во Скопје, амбасадата на СФРЈ во Бразилија, хотел „Славија“ на Попова Шапка, хотел „Неда“ во Галичник, спомен-дом на Шамарица во Хрватска и многу други.

Добитник е на први награди на повеќе домашни и меѓународни архитектонски конкурси. Носител е на наградите „11 Октомври“ на Република Македонија, „13 Ноември“  на  Град  Скопје,  наградата  за животно дело и за особени достигувања од областа на архитектурата и на градителството „Андреја Дамјанов“, признание за исклучителен придонес во развојот на инженерската струка во Република Македонија од Комора на овластени архитекти и овластени инженери на Република Македонија.

Комеморативната седница ќе се одржи на Архитектонскиот факултет во Скопје в петок, 10 март, со почеток во 11 часот, а погребот е закажан за 11.30 часот в сабота, на градските гробишта во Бутел.