Сипаниците може да го одложат почетокот на второто полугодие


Скопје, 11 јануари, 2019 - 14:34 (META) 

Министерството за образование и наука ја следи ситуацијата со епидемијата од сипаници, во координација е со министерствата за здравство и за труд и социјална политика и врз основа на состојбата на терен, ќе одлучи за евентуално одложување на второто полугодие, кое по правило треба да започне на 21 јануари, изјави денеска министерот за образование Арбер Адеми.

Во МОН потсетуваат дека согласно Законот за основно образование, при запишувањето на детето во прво одделение родителот е должен да достави потврда за примените задолжителни вакцини за детето, издадена од надлежна здравствена установа.

– Според тоа што ќе го имаме на терен, ќе преземеме мерки во пресрет на второто полугодие. Ќе биде преземено тоа што е неопходно од наша страна како надлежна институција. Треба да водиме грижа и за следење на воспитно-образовниот процес во основно и за вакцинацијата на нашите деца. И во постојниот закон е предвидено дека при упис на децата во основно, нивните родителите треба да докажат дека биле вакцинирани – рече Адеми.

Членот во законот со кој се предвидува задолжително приложување потврда за примени вакцини, го има и во новиот Закон за основно образование кој е во фаза на изработка, а ќе биде ставен и на јавна консултација.


Екстерното се укина, државното никако да почне


Скопје, 16 ноември, 2018 - 9:24 (META) 

На почетокот на оваа учебна година, заменик-министерот за образование и наука Петар Атанасов најави дека државата ќе спроведе тестирање на државно ниво кое треба да ги замени екстерните тестови.

Првото тримесечие од оваа учебна година измина, а сè уште е неизвесно од кога би почнало да се спроведува ова тестирање.

Министерот Арбер Адеми досега не ја информирал подетално јавноста во врска со оваа новина, а не одговара ниту на нашите телефонски повици.

За „Мета“, Атанасов вели дека има волја и кај странците и кај одговорните во Државниот испитен центар (ДИЦ) ова тестирање да се реализира.

– ДИЦ е расположен да понуди и има капацитет, да работи на идејата „Национално тестирање“ бидејќи тие ја работат и матурата, а и странци се заинтересирани да ни помогнат. Во моментов тие анализираат, се бараат одговори зошто имаме слаби резултати на ПИСА и на другите меѓународни тестови. Тешко е да се одговори кога ќе започне да се спроведува. Треба да се има предвид дека сите масовни тестирања се прескапи и пресложени – вели Атанасов.

Во овој момент нема тестирања во образованието освен државната матура и влезни тестови во некои училишта што се полагаат при упис.

– ДИЦ треба да предложи, и ние како министерство, со закон треба заеднички да го спроведеме националното тестирање. Јас сметам дека не смее тоа да се реализира секоја година и не смее да се спроведува секаде. И се разбира, тоа треба да постои за потребите на политиките на министерството, а не да влијаат резултатите на успехот на учениците – додава тој.

Атанасов во септември првично изјави дека се планира учениците да бидат тестирани двапати во текот на основното образование. Еднаш во четврто одделение, а вторпат во деветто одделение. Ваков модел се спроведува во Словенија.

Во Македонија до минатата година имаше екстерно тестирање, кое поранешната министерка за образование и наука Рената Дескоска го укина. Сите оценки беа впишувани во свидетелствата, дури и единиците, кои исто како и другите оценки влегуваа во просечниот успех.


Атанасов: Учебниците доцнат, но не се потпирајте само на нив


Скопје, 10 септември, 2018 - 10:28 (META) 

И оваа учебна година започна без учебници во основното и во средното образсование. Добар дел од оние од лани и од изминатите години се стари, искинати, мрсни, ишарани и оштетени, па родители по социјалните мрежи реагираа дека сами ќе купат нови комплети бидејќи е невозможно да се учи од партали.

По неуспешниот обид за ова да поразговаравме со првиот човек на ресорот образование во државата, Арбер Адеми, кратко интервју за „Мета“ даде неговиот заменик, Петар Атанасов кој е само втора недела на функцијата.

Повторно нервози за родителите и децата кои или немаат воопшто учебници, или пак, оние кои ги имаат, се за во канта. Зошто?

– Секоја година има по некој застој, проблем, некогаш причините се субјективни, некогаш објективни. Но затоа на тоа работат многу комисии, цела педагошка служба, издавачки куќи, печатници, тендери. Една недела сум заменик-министер. МОН напорно работеше да изготви измени во многу учебници. Одлуката е дека првите три одделенија многу скоро ќе се распределат по училиштата.

Ќе бидат ли во иднина поквалитетно изработени и ќе продолжат ли да бидат бесплатни во наредните години?

– Политиката на Министерството за образование и наука наназад со години е дека треба да има бесплатни учебници. Сето тоа предизвика државата да треба да издвојува многу финансии за таа намена, но во секој случај, политиката на бесплатни учебници за сите ученици продолжува. Ќе настојуваме да бидат што подобри во однос на квалитет. Моја интенција е во пониските нивоа на образование учебникот да биде главно помагало, но во секоја наредна година, мора да се изнаоѓаат и нови алатки и извори на информации. Учениците неопходно е сами да учат, да експериментираат и да истражуваат.

Во средно стручно образование, ретко каде има учебници по стручните предмети. Што ќе преземете во врска со овој долгогодишен проблем?

– Запознаен сум со проблемот. Каде што има мали тиражи и мала популација ученици, како што е тоа во средното стручно образование, нема мотивација кај добрите експерти и професори да изработат учебник. Затоа планот е да ги мотивираме повеќе. Кога предметите се поопшти, полесно е да се изработи учебник, но тоа е потешко кога се работи за стручен предмет. Се надевам дека со професорите кои се професионалци во одредени области ќе изнајдеме решение за проблемот со недостиг од учебници во средното стручно образование. Од друга страна, овде е и дуалното образование, како еден од начините да се воведе што поголема практична работа за учениците. Јас сум поборник на тој систем, но и сум поборник да има повеќе инвестиции во средните училишта. Не само да добијат учебник, туку и да се овозможат повеќе ресурси, да се купи опрема, помагала, за да може да има во самото училиште практична работа. Учениците мора да се обучуваат за конкретни професии. Мора да се намали јазот меѓу теоретското образование и работното место. Тоа е заложба на МОН тој јаз да биде што помал. Така ќе има подобра понуда на пазарот.


Во новата учебна година со корегирани 22 учебници


Скопје, 31 август, 2018 - 15:13 (META) 

За учебната 2018/2019 Министерството за образование и наука низ училиштата ќе достави 22 корегирани учебници, а од оваа учебна година сите учебници што бесплатно им се даваат на учениците ќе бидат достапни и во слободнна продажба, по истата цена по која ги откупува министерството, рече на прес-конференција министерот Арбер Адеми.

Станува збор за учебниците по математика од прво до деветто одделение, учебниците по природни науки од прво до шесто одделение, потоа тие по биологија од седмо до деветто одделение. Корегирани се и учебниците по хемија и по физика за осмо и деветто одделение.

Министерот Адеми појасни и дека сите ученици од прво, второ и трето одделение ќе добиваат нови комплети учебници секоја учебна година.

– Во тек е процесот за изготвување на нови 31 учебник за стручно образование – изјави Адеми и информираше дека од оваа година за првпат се воведува италијанскиот јазик како втор странски јазик во средното образование.


Адеми најави реконструкции на училишта и домови и изградба на нови објекти


Скопје, 31 јули, 2018 - 15:13 (META) 

Министерот за образование и наука, Арбер Адеми, денеска најави реконструкции на училишта и ученички домови, како и завршување на започнатите реконструкции на студентскиот дом „Гоце Делчев“ во Скопје, но и изградба на нови училишни објекти.

Ќе се вршат реконструкции на училишта или изградба на нови училишни објекти во општините Боговиње, Студеничани, Демир Капија, Чаир и Струга.

Предвидена е и комплетна реконструкција на Ученичкиот дом кој е во склоп на средното земјоделско училиште „Кочо Рацин“ во Свети Николе, како и на зградата на училиштето. Ќе се менуваат и прозорците и вратите на средното училиште „Ѓошо Викентиев“ во Кочани, а во средното училиште „Гостивар“ во Гостивар ќе се врши реконструкција на системот за греење и реконструкција на покривот на спортската сала.

Како што објасни министерот за образование и наука, до септември годинава се очекува да завршат градежните и реконструктивните зафати на блоковите В и Г на студентскиот Дом „Гоце Делчев“ во Скопје, кои се почнати во мај минатата година.

На почетокот на следниот месец ќе почне и постапката за набавка на нов мебел и душеци за потребите на 18 ученички домови.

Министерот Адеми очекува со почетокот на новата учебна година да бидат  готови спортските сали во четири основни или средни училишта во Бедиње, Кавадарци, Гостивар и Камењане.


Адеми – Бејли: Комплексноста на ситуацијата бара брзо решение за излез од кризата


Скопје, 13 април, 2017 - 12:56 (META) 

Комплексноста на ситуацијата во Македонија, во регионот и пошироко, во Европската Унија, налага земјава што побргу да најде излез од политичката криза, „користејќи ги расположливите политички и институционални капацитети, за враќање кон реформскиот курс“. Ова го истакнал вицепремиерот за европски прашања, Арбер Адеми, на денешната средба со амбасадорот на САД во земјава, Џес Бејли.

Околу актуелната политичка состојба во земјава, Адеми нагласил дека Македонија останува на стратешката определба за членство во НАТО и во ЕУ.

„Нема и не размислуваме за друга алтернатива… Улогата на актуелното и на секое идно политичко лидерство е да работи на остварување на тие стратешки приоритети и да ја следи волјата на мнозинството граѓани“, рекол Адеми, стои во соопштението од неговиот кабинет за средбата со Бејли.

Вицепремиерот за европски прашања ја истакнал и важноста на САД како стратешки партнер на Република Македонија, нагласувајќи ја нивната поддршка од осамостојувањето до денеска, како еден од главните промотори за членството на земјава во евро-атлантските структури.

„Тој, исто така, се заблагодари за помошта што континуирано повеќе од 25 години ја добиваме преку УСАИД, за спроведување на клучните реформи во однос на демократизацијата на општеството, економскиот пораст и на подобрување на квалитетот на образованието“, се вели во соопштението.


Хан ја предаде донацијата од ЕУ на граничната полиција и на ЦУК


Скопје, 10 февруари, 2017 - 12:46 (META) 

Еврокомесарот за проширување и за добрососедска политика, денеска во Министерството за внатрешни работи ја предаде донацијата од 33 теренски возила наменети за зајакнување и за модернизирање на капацитетите на македонската гранична полиција и на Центарот за управување со кризи (ЦУК).

Хан, во своето обраќање по повод примопредавањето на донацијата, истакна дека таа е силен знак за блиската соработка меѓу „семејството на Европската Унија и Македонија во справувањето со најсериозната бегалска и мигрантска криза со која се соочи Европа“.

– Европската комисија стои покрај вас и ќе продолжи да биде покрај вас и во иднина. Мигрантската криза помогна да се илустрира како вашата земја, но и целиот Западен Балкан, е дел од европската целина и како се работи заедно во справувањето со предизвиците – рече Хан.

Министерот за внатрешни работи, Агим Нухиу, заблагодарувајќи се за донацијата, истакна дека таа ќе ги зајакне капаицитетите на граничната полиција во справувањето со предизвиците од мигрантската криза, меѓународните закани и со меѓуграничниот криминал.

Директорот на Бирото за јавна безбедност (БЈБ), Митко Чавков, нагласи дека МВР и македонската влада за време на мигранстака криза покажале солидарност и дале значаен придонес во делењето на одговорноста со Европската Унија и со меѓународната заедница во справувањето со овој феномен.

– Оваа донација не само што значи поддршка туку е и мотив за понатамошно ангажирање во решевањето на овој проблем, особено на меѓуграничниот криминал и криумчарењето мигранти – рече Чавков

Вицепремиерот за европски прашања, Арбер Адеми, истакна дека иако движењето на мигрантите сега е под контрола, сепак ситуацијата и понатаму е неизвесна, а соработката е најдобар одговор за сите предизивици. Тој нагласи дека мигрантската криза покажала дека Македонија и другите земји од регионот треба што поскоро да станат дел од ЕУ и од нејзините безбедносни капацитети.

Директорот на Центарот за управување со кризи (ЦУК), Агрон Буџаку, рече дека секоја помош придонесува за зголемена ефикасност на институциите и дека Македонија ќе даде пример како се бранат и се чуваат европските вредности и како се спроведуваат правото и правдата врз оние што ја злоупотребуваат и сакаат да остварат корист од човечката несреќа.

На свеченоста по повод примопредавањето на донацијата беа присутни и претставници на дипломатскиот кор во земјава.

Инаку, станува збор за донација на 33 теренски возила од марката „сангјонг рекстон“, во вредност од околу 800.000 евра. Од нив, 31 се за потребите на граничната полиција, а две се за Центарот за управување со кризи.


Вицепремиерот Адеми на средба со еврокомесарот Хан


Брисел, 28 септември, 2016 - 20:42 (META) 

Заменик-претседателот на Владата задолжен за европски прашања, Арбер Адеми, денеска се сретна со еврокомесарот за проширување и за соседска политика, Јоханес Хан.

На средбата, соговорниците разговарале за повеќе актуелни теми поврзани со европската интеграција на земјата, особено за политичката состојба, изборниот процес, поддршката од Европската Унија и за миграцијата.

Како што информираат од кабинетот на Адеми, тој го информирал Хан за реализацијата на обврските од договорот од 20 јули кои се услов за организирање на демократски и веродостојни избори.

Двајцата соговорници ја поздравиле и оцената на политичките лидери за исполнување на условите за спроведување на изборите во декември, како позитивен чекор кон разврска на долготрајната политичка криза во земјата.

Комесарот Хан ја истакнал и потребата од континуирана и соодветна политичка и институционална поддршка за работата на Специјалното јавно обвинителство.

Двајцата соговорници разговарале и за неопходноста интензивно да се работи на спроведување на реформските приоритети, со оглед на тоа што се однесуваат на области кои се клучни за владеењето на правото, особено делот на судството и јавната администрација, целосно спроведување на Охридскиот договор.


Експертите на ЕУ дале насоки за санирање на штетите од поплавите


Скопје, 15 август, 2016 - 15:57 (META) 

Питер Глерим, лидерот на тимот експерти на Европската Унија кои минатата недела пристигнаа во земјава преку Механизмот на ЕУ за цивилна заштита, на денешниот втор координативен донаторски состанок за поплавите, меѓудругото ги презентирал „советите кои се однесуваат на листата за потреби, геохидролошките проблеми и проблемите со канализацијата, како и начините на кои тие ќе се решаваат и ќе се санираат штетите“ од невремето.

Состанокот, како што соопштуваат од кабинетот на вицепремиерот задолжен за европски прашања, Арбер Адеми, се одржал во Секретаријатот за европски прашања, а на него покрај Адеми и Глерим, учестувала и шефицата на УНДП во земјава, Луиза Винтон.

„Вицепремиерот Адеми истакна дека целта на овој состанок е да се добие појасна слика за целокупната донаторската поддршка која до овој момент е обезбедена од страна на билатералните партнери, за која првично се разговараше на минатонеделниот состанок. Питер Глерим информираше за улогата и поддршката која ја обезбедува Механизмот за цивилна заштита, координацијата на помошта која веќе е добиена и помошта која дополнително ќе пристигне, а ги презентираше и советите кои се однесуваат на листата за потреби, геохидролошките проблеми и проблемите со канализацијата, како и начините на кои тие ќе се решаваат и ќе се санираат настанатите штети“, стои во соопштението од кабинетот на Адеми.

Вицепремиерот на состанокот им се заблагодарил на сите донатори за нивната поддршка и ги охрабрил „редовно да ја пријавуваат помошта која ја донираат, со цел да се добие посеопфатен преглед на донираната помош“.