!Во периодот што претстои работиме на воведување систем за пристап и за претплата. За начинот на пристап и за претплатата ќе информираме дополнително. Содржините на „Мета“ до тогаш се слободни за преземање со задолжително цитирање и атрибуирање.

МВР бара помош од граѓаните за пронаоѓање на тројца насилници од 27 април


Скопје, 17 октомври, 2017 - 12:14 (META) 

Министерството за внатрешни работи, по претходно одобрение на јавен обвинител, на својата интернет-страница јавно објави фотографии од три лица кои се бараат во врска со насилствата во Собранието од 27 април годинава.

Од МВР наведуваат дека станува збор за лица кои се важни за постапката.

„Ги повикуваме сите граѓани што имаат какви било сознанија за лицата, за тоа веднаш да ја известат најблиската полициска станица, да пријават на телефонскиот број 192, да ја употребат апликацијата „Пријави сомнително лице“ на официјалната веб-страница на МВР или да пријават во Јавно обвинителство“, стои во соопштението на МВР.

Инаку, вчеравечер, по наредба на јавен обвинител, извршени се претреси и уапсени се пет лица, осомничени за учество во насилствата во Собранието на 27 април.


Голема акција за апсење во Хрватска поради аферата „Агрокор“


Загреб, 16 октомври, 2017 - 11:41 (META) 

Уапсени се четворица од поранешните клучни раководители на концернот „Агрокор“ во Хрватска, во акцијата што почна рано утрово, а во чии рамки е претресена и „Кулмеровата палата“ во Загреб, сопственост на основачот на „Агрокор“, Ивица Тодориќ.

Според информациите во хрватските медиуми, Ивица Тодориќ не е во Хрватска.

Уапсени се поранешниот шеф на финансии на „Агрокор“, Иван Црњац, поранешниот член на надзорниот одбор на концернот, Томислав Лучиќ, поранешната членка на управата на компанијата, Пирушка Цањуга, и поранешната потпретседателка на „Агрокор“, Љерка Пуљиќ.

Според Државното јавно обвинителство, се води голема истрага под сомнеж за стопански криминал и за фалсификување. Издадени биле повеќе од 60 налози за претрес, а во акцијата се вклучени повеќе од 300 полицајци, велат неслужбените информации.

Во седиштето на „Агрокор“ веќе неколку месеци се државните обвинители и форензичари, кои ја проверуваат документацијата поради сомнежите дека финансиските извештаи и биланските на „Агрокор“ биле лажирани, односно дека концернот вреди 290 милиони евра помалку од тоа што се прикажувало.

Владиниот повереник за „Агрокор“, Анте Рамљак, минатата недела поднесе кривична пријава против одговорните во оваа компанија поради неправилности во работењето, утврдени со ревизијата на финансискиот извештај. Ивица Тодориќ веднаш потоа објави дека ниту едно евро не е отуѓено или скриено.


Акција на турската полиција за апсење на 70 војници поради поврзаност со Ѓулен


Анкара, 10 октомври, 2017 - 12:00 (META) 

Турската полиција денеска почнала акција за апсење на 70 војници обвинети за поврзаност со имамот Фетулах Ѓулен, кој живее во САД, а кого властите во Анката го обвинуваат дека го организирал минатогодишниот обид за воен удар, јавуваат турските агенции.

Акции против приврзаници на Ѓулен во Турција се спроведуваат речиси секој ден, веќе 15 месеци, а само минатата седмица беа приведени околу 800 лица.

Ѓулен досега ги демантираше сите обвинување дека стои зад обидот за воен удар, кој се случи во јули минатата година.

Цел на денешната полициска акција, која, според агенциите, се спроведува во градот Конија, во централниор дел на Анадолија, и во уште седум провинции, се и двајца полковници, седум капетани и 36 поручници.

Шеесет и двајца од осомничените се припадници на турското воздухопловство, а некои од нив се и пилоти. Полицијата врши претреси во нивните домови и на работните места.

Повеќе од 50.000 лица во притвор го чекаат судењето против нив поради повразност со Ѓулен, а 150.000 лица се отпуштени или суспендирани од работните места во јавниот и во приватниот сектор.

Обидот за воен удар во Турција се случи на 15 јули минатата година, а во судирите загинаа 250 лица.


Уапсено уште едно лице осомничено за поврзаност со нападот во Лондон


Лондон, 17 септември, 2017 - 10:10 (META) 

Британската полиција уапсила уште едно лице под сомневање за поврзаност со бомбашкиот напад што се случи во петокот оваа недела, во метро-станицата Парсонс грин во Лондон, јавува „Би-би-си“.

Станува збор за 21-годишно момче, кое синоќа било уапсено во западен Лондон. Осомничениот бил однесен во полициската станица во јужен Лондон, каде останува во притвор.

Вчераутро, во пристанишниот град Довер, полицијата уапси 18-годишно момче кое, исто така, се поврзува со нападот во лондонското метро.

Полицијата вчера почна претрес во куќа во Сунбери, кој, како што пренесува „Би-би-си“, и понатаму трае. Куќата му припаѓа на повозрасен брачен пар, познат по прифаќањето на стотици деца, вклучувајќи и бегалци.

Заканата од терористички напад во Велика Британија и понатаму е на највисоко – критично ниво, што значи дека постои реална опасност од напад.

Во детонацијата на импровизираната експлозива направа поставена во лондонското метро повредени беа 29 лица.


Германија најави воведување мерки против Турција


Берлин, 20 јули, 2017 - 19:58 (META) 

Германското министерство за надворешни работи ќе издаде безбедносно предупредување до граѓаните на Германија кои планираат да патуваат во Турција. Ова е една од мерките против Анкара што денеска ги најави шефот на германската дипломатија, Зигмар Габриел, по апсењето на активисти за човекови права во Истанбул, од кои еден е германски државјанин.

„Имајќи ги предвид зачестените случаи на произволни апсења на германски државјани во Турција, ние не можеме поинаку да реагираме, туку да издадеме предупредување на германските граѓани кои планираат да патуваат во Турција“, рече Габриел, пренесува ХРТ.

Покрај предупредувањето, тој најави дека Германија во иднина нема повеќе да дава гаранции за странските инвестиции во Турција и дека заедно со европските партнери ќе ја преиспита претпристапната помош на Европската Унија за земјата.

На изјавите на Габриел веднаш реагираше официјална Анкара. Ибрахим Калин, портпарол на турскиот претседател, Реџеп Таип Ердоган, ги оцени како неумесни изјавите на шефот на германската дипломатија, додавајќи дека се наменети за внатрешно-политичка употреба, алудирајќи на парламентарните избори во Германија, закажани за септември оваа година.

„Остро ги осудуваме изјавите во кои се тврди дека (германските) државјани кои патуваат во Турција не се безбедни. Тоа воопшто не е вистина“, изјави Калин.


Обвинителство: Разбиена досега најголема организирана група за криумчарење мигранти


Скопје, 11 јули, 2017 - 13:50 (META) 

Основното јавно обвинителство за гонење организиран криминал и корупција извести дека во текот на вчерашниот ден била спроведена координирана акција со МВР против организирана група за криумчарење мигранти, на подрачјето на повеќе населени места.

Притоа, по поднесената кривична пријава од МВР за 23 лица, од кои еден малолетник, а четворица државјани на Албанија, Обвинителството за 22 лица донело наредба за спроведување истражна постапка и до судијата за претходна постапка при Основниот суд Скопје 1 поднело барања за притвор. За малолетникот е поднесено барање за поведување подготвителна постапка и исто така е побаран притвор.

Тие 12 лица што се вчера приведени добиле 30-дневен притвор, а едно лице куќен притвор. Другите 10 лица се во бегство.


Се апсат десетици лица во две турски министерства поради наводна поврзаност со Ѓулен


Анкара, 6 јуни, 2017 - 14:11 (META) 

Обвинителството во Анкара издаде десетици наредби за апсење на вработени во две турски министерства во рамките на истрагата за организацијата ФЕТО на проповедникот и опозиционер Фетулах Ѓулен, јави турската телевизија „Си-ен-ен Турк“.

Наредби за апсење се издадени за 30 вработени во турското Министерство за образование и за 17 вработени од Министерството за транспорт, навигација и за комуникација. Осомничените лица се корисници на мобилната апликација „бајлок“, што се смета дека била користена за комуникација меѓу организаторите за подготовка и за реализација на обидот за државен удар во Турција во јули минатата година.

Турските власти сметаа дека обидот за преврат на 15 јули е извршен од организацијата ФЕТО на муслиманскиот проповедник Фетулах Ѓулен, кој живее во САД. Ѓулен ги отфрла обвиненијата.


Превентивни апсења во Франција поради страв од терористички напади


Париз, 22 декември, 2016 - 9:56 (META) 

Француската полиција спроведува „превентивни апсења“ и поставува бетонски бариери на божиќните базари, стравувајќи од терористички напади во земјата, слични на неодамнешниот напад во Берлин.

Портпаролот на француската влада рече дека се контактирани божиќните базари за да се спроведат сите безбедносни мерки, вклучувајќи проверка на багаж.

Во Франција во напади на исламистите во изминатите две години беа убиени повеќе од 230 лица, а повеќе од една година на сила е вонредна состојба во земјата.


Европската Унија ѝ порача на Турција да си ја заштити демократијата


Брисел, 8 ноември, 2016 - 17:56 (META) 

Европската Унија денеска оцени дека загрижува неодамнешниот развој на случувањата во Турција и ја повика оваа држава да продолжи со политичкиот диjалог со опозицијата и да ја заштити својата демократија.

Во соопштението на високата претставничка за надворешна политика и за безбедност на ЕУ, Федерика Могерини се вели дека иако државите членки на ЕУ ја препознаа потребата Турција да преземе соодветна акција при обидот за пуч, сепак ја повикуваат да ја заштити парламентарната демократија.

Тие ја повикаа Турција да ги почитува човековите права, владеењето на правото и правичното судење што се во согласност со посветеноста на државата како кандидат за членство во ЕУ.

Турција вчера реагираше на пратениците на ЕУ во Анкара поради критиките за чистките во државните институции по неуспешниот обид за пуч на 15 јули.

ЕУ ја критикуваше Турција поради апсењето политичари од Народна демократска партија.


Oбвинителството го потврди координираниот лов на терористи со Албанија и со Косово


Скопје, 8 ноември, 2016 - 11:01 (META) 

Координирана антитерористичка операција деновиве е спроведена во Албанија, Македонија и во Косово за апсење на лица, осомничени за регрутирање борци за Исламска држава од Балканот. Според информациите што вчера ги објавија албанските и косовските медиуми, осомничените, наводно, планирале и терористички акции на Балканот.

Од Јавното обвинителство за „Мета“ го потврдија учеството на македонските власти во антитерористичката операција и најавија повеќе детали за акцијата во текот на денот.

Вчера албанската полиција соопшти дека во соработка со обвинителството за сериозен криминал уапсила четири лица од албанска националност, а операцијата била изведена во Тирана, Скадар, Дебар и во Елбасан.

Властите во Приштина истиот ден соопштија дека во рамките на операцијата на територијата на Косово биле уапсени седум лица. Јавното обвинителство на Косово потврдило дека осомничените биле во контакт со други радикални исламисти во регионот.

Во Македонија изминатата година Јавното обвинителство и полицијата спроведоа две акции, „Ќелија“ и „Ќелија 2“, во кои беа уапсени поголем број лица за регрутирање борци за боиштата на Блискиот Исток. Тие беа обвинети за учество во странски воени и паравоени формации, а поголем дел од нив добија затворски казни, откако ја признаа вината и се спогодија со обвинителството.