!Во периодот што претстои работиме на воведување систем за пристап и за претплата. За начинот на пристап и за претплатата ќе информираме дополнително. Содржините на „Мета“ до тогаш се слободни за преземање со задолжително цитирање и атрибуирање.

Април 2016 година – нов глобален температурен рекорд


Вашингтон, 16 мај, 2016 - 16:08 (META) 

Температурата во април годинава на глобално ниво била повисока за 0,25 Целзиусови степени од онаа измерена истиот месец во 2010 година, што е нов глобален температурен рекорд, покажуваат податоците на американската агенција за аеронаутика и вселена – НАСА.

Со ова, како што пренесува „Би-би-си“, април е седмиот месец по ред што ги урива досегашните глобални температурни рекорди.

Претходно месеците февруари и март покажаа поголеми отстапувања во температурата од таа што се зема како норма.

„Сите овие уривања на температурни рекорди и придружни последици што ги имавме, како рекордно зголемениот број на пожари, на пример, како и сушите во Индија, се потсетник дека не можеме да си дозволиме ништо друго освен забрзување на агендата на решенија – апсолутно немаме друга опција освен да забрзаме со агендата“, изјавила извршната секретарка на нацрт-конвенцијата за климатски промени на Обединетите нации, Кристијана Фигуерес.

Неколку северни региони, вклучително и американската сојузна држава Аљаска, забележале многу висока температура во април, ситуација која како по шема е забележена и претходните месеци.


Камперите поделени и околу предвремените избори


Скопје, 2 јуни, 2015 - 21:49 (META) 

„Ова е првиот пораз на Груевски. Со зурли и со тапани ќе заминеме кога тој ќе си поднесе оставка“, вака камперите пред Владата ја коментираат денешната одлука за предвремени парламентарни избори, која лидерите на политичките партии ВМРО-ДПМНЕ, СДСМ, ДУИ и ДПА ја договорија заедно со еврокомесарот за проширување, Јоханес Хан.

Без еуфорија, но со внимание и од двата кампа ја очекуваат конечната одлука, која треба да се донесе наредната недела во Брисел и да ги финализира преговорите.

– Добар почето, но за да донесеме некои заклучоци, треба да ја почекаме средбата во Брисел, да видиме таму што ќе се одлучи. Нема шанси да си заминеме оттука пред да ја слушнеме таа одлука. Ако не се договори предна влада која ќе ги организира предвремените избори, нема шанси да си заминеме. Не може еден од најкорумпираните ликови повторно да организира избори. Без преодна влада, не прифаќаме избори. Ова дава малку надеж дека може да се најде излез од кризата. Ако не се договорат за преодна влада и за оставка на Груевски, народот ќе крене револуција. Па, не седиме ние пред Влада за повторно истите личности да ни организираат избори – се коментарите на тие што кампуваат пред Владата.

Додека за едните оваа одлука е добар, за другите таа е лош знак. „Чуварите на демократијата“ пред Собранието велат дека предвремени избори не треба да има, туку да се чекаат регуларните и дека за техничка или преодна влада, никогаш ниту станало збор.

– Не се согласувам со предвремени парламентарни избори, мислам дека треба да има регуларни избори кога ќе им дојде време. Зарем  ќе организираме избори секогаш кога на СДСМ ќе им текне. Не се согласуваме со оваа одлука. Дијалогот е секогаш добар и треба конечно да се реши оваа криза. Добро е да има избори, но да ги организира оваа влада. За техничка влада никогаш не ни станало збор ниту, пак, премиерот би се сложил на преговори ако такво нешто се зборувало. Хан дојде со пакет мерки и мислам дека техничка влада не е дел од нив ниту, пак, од компромисот кој политичките партии треба да го постигнат – сметаат граѓаните од кампот спроти Собранието.