!Во периодот што претстои работиме на воведување систем за пристап и за претплата. За начинот на пристап и за претплатата ќе информираме дополнително. Содржините на „Мета“ до тогаш се слободни за преземање со задолжително цитирање и атрибуирање.

Апсења во Холандија поради скандалот со затруените јајца


Хаг, 10 август, 2017 - 16:32 (META) 

Две лица се уапсени во Холандија во рамки на истрагата за затруените јајца под сомневање дека нелегално користеле инсектицид фипронил на живинарските фарми.

Холандското обвинителство соопшти дека двајцата осомничени се директори на компанијата која, наводно, го користела фипронилот на фармите.

Иако нема извештаи дека некој се разболел, обвинителите рекле дека имаат докази дека јавното здравје е загрозено со „примената на биоцидот фипронил кај кокошките кои несат јајца“.

Осомничените се приведени во текот на серијата претреси кои Холандија ги спроведе во рамки на заедничката акција со белгиските власти.

Поради аферата, милиони јајца се повлечени од продавниците во повеќе европски земји, вклучувајќи ги Германија, Белгија и Холандија.

Десетина произведувачи на јајца во Белгија и во Холандија се под истрага, откако во нивните производи е откриено присуството на инсектицидот фипронил, кој може да го загрози човечкото здравје.

Европската комисија неделава предупреди дека е можно јајца затруени со инсектицидот да се продавани во седум земји, со што скандалот доби поголеми размери.


Се зголемува бројот за жртвите во Дијарбакир


Дијарбакир, 4 ноември, 2016 - 12:00 (META) 

Осум загинати и повеќе од 100 повредени е последниот биланс од силната експлозија што се случи во јужниот турски град Дијарбакир, претежно населен од Курди, јавува весникот „Хуриет“, цитирајќи го премиерот Бинали Јилридим.

Меѓу загинатите, како што соопшти премиерот, има двајца полицајци, пет цивили и едно лице за кое постои сомневање дека е припадник на Курдската работничка партија (ПКК).

Експлозијата се случила во близина на полициска станица, на некои 200 метри од затворот во Дијарбакир. Весникот „Хуриет“ јавува дека властите им забраниле на медиумите да известуваат за експлозијата.

Според турската телевизија НТВ, експлозијата била предизвикана од автомобил бомба.

Инцидентот се случи еден час откако двајца ко-лидери на Народната демократска партија и уште 12 пратеници беа уапсени по полициските рации во Анкара и во источните области на Турција, во кои повеќето жители се Курди.

Пратениците се притворени откако „не се појавиле да сведочат во рамки на контратерористичка истрага“. Турските медиуми јавуваат дека нивното сведочење е поврзано со „терористичката пропаганда“ која ја спроведува ПКК и прокурдските протести кои станаа насилни во октомври 2014 година, за кои беше обвинет лидерот на ХДП дека ги иницирал.

Во меѓувреме, турските власти утринава го блокираа пристапот на социјалната мрежа „Твитер“, како и можноста да се користи мобилната апликција за инстант пораки „Ватсап“.


Турската полиција уапси Јапонец кој сакал да се приклучи на ИД


Анкара, 24 март, 2016 - 13:01 (META) 

Турската полиција уапсила јапонски државјанин кој се обидел да ја премине границата со Сирија за да се приклучи на Исламска држава, соопшти денеска претставник на турското министерство за внатрешни работи.

Лицето е пресретнато на пат кон сирискиот град Јарбулс, кој е под контрола на ИД, и во моментов е во притвор. Полицијата соопшти дека кај себе имало јапонски пасош и дека на сослушувањето рекло дека сака да ѝ се приклучи на ИД.

Јапонските власти потврдија дека нивен државјанин се наоѓа во притвор во Турција и оти чекаат информации за случајот.

Уапсениот Јапонец М.М. (24) контактирал со терористите на ИД преку социјалните мрежи.

Турската полиција уапсила во близина на границата со Сирија уште пет странски државјани кои планирале да им се приклучат на екстремистите.