!Во периодот што претстои работиме на воведување систем за пристап и за претплата. За начинот на пристап и за претплатата ќе информираме дополнително. Содржините на „Мета“ до тогаш се слободни за преземање со задолжително цитирање и атрибуирање.

СЈО: Судијката Бахчованска антидатирала одлука за отфрлање на „бомбите“ како доказ


Скопје, 1 ноември, 2017 - 14:14 (META) 

Специјалното јавно обвинителство поднело претставка до Советот за утврдување на факти и поведување постапка за утврдување одговорност за судија, против судијката Моника Бахчованска од скопскиот Кривичен суд. СЈО бара од Советот да ја испита работата на судијката Бахчованска поради наводи што укажуваат на нестручно и несовесно вршење на судиската функација.

Во претставката на СЈО се наведени околности кои укажуваат на тоа дека судијката Бахчованска го антидатирала решението со кое прислушуваните разговори се отфрлаат како доказ во постапката за случајот „Тифани“, во кој новинарката и уредничка на телевизиијата „Сител“ е обвинета за даночно затајување.

Според СЈО, Бахчованска решението за издвојување на „бомбите“ од доказниот материјал го донела на 11 септември оваа година, а во образложението на својата одлука се повикала на одлука на Апелацискиот суд Скопје околу користењето на прислушуваните разговори во случајот „Триста“, која второстепениот суд ја донел на 18 септември, односно седум дена подоцна.

Решението на Бахчованска за „Тифани“, СЈО го добило на 5 октомври.

„Оттука, произлегува дека судијата Бахчовановска посочила решение што во моментот на донесување на одлуката сè уште не е дел од правниот поредок на Република Македонија, односно не е воопшто донесено според временскиот момент. Се поставува прашањето како судијата Бахчовановска можела да ја знае содржината на одлуката на Апелацискиот суд Скопје седум дена пред истиот да одлучи. Тоа упатува дека решението на судијата Моника Бахчовановска од 11 септември 2017 година, всушност, е антидатирано решение, односно не е донесено на наведениот датум, туку на некој подоцнежен датум, што, пак, понатаму упатува на заклучок дека судијата Бахчовановска при носењето на наведената одлука постапувала несовесно“, стои во претставката на СЈО до Советот за утврдување на факти.

Од СЈО наведуваат дека „временскиот момент на носење на судските одлуки е исклучително значаен, бидејќи тоа е моментот од кој одредена судска одлука почнува да опстојува како таква во правниот поредок и стекнува одредена правна сила, односно произведува одредено правно дејство“, поради што е недозволива каква било манипулација.


Груевски останува без пасош, одлучил Апелацискиот суд


Скопје, 31 октомври, 2017 - 12:51 (META) 

Апелацискиот суд Скопје ја отфрлил жалбата на лидерот на ВМРО-ДПМНЕ, Никола Груевски, со која тој бараше да му биде вратен пасошот, потврдила за „Телевизија 24“ судијката Лилјана Ивановска-Шопова, која претседаваше со тричлениот совет на судии што одлучуваше по жалбата на јавна седница.

Инаку, Груевски, кој е првообвинет во случајот „Титаник“ на СЈО, четврти месец е без пасош, кој му беше одземен од Кривичниот суд, како една од мерките на претпазливост што му беа оредени заради обезбедување присуство.

На вчерашната јавна седница адвокатите на Груевски рекоа дека на лидерот на најголемата опозициска партија во државата му е потребен пасошот заради извршување на политичките активности, од кои дел се во странски држави.

Како потврда на своите тврдења, тие до судот и до обвинителите на СЈО доставија покана од премиерот на Унгарија, Виктор Орбан, испратена до Груевски.

Обвинителката на СЈО, Лиле Стефанова, рече дека одењето во странство за присуство на политички семинари или состаноци е причина на Груевски да не му биде вратен пасошот, бидејќи, како што рече, во текот на истрагата за случајот тој неколкупати го оправдувал своето недоаѓање на распит во СЈО со политички активности во земјава и во странство.

Таа нагласи дека СЈО останува на ставот дека двете мерки – одзмање на пасошот и обврската Груевски да се јавува еднаш неделно во суд – се неопходни заради непречено и ефикасно водење на кривичната постапка.


Судот го одобри обвинението, случајот „Триста“ на СЈО оди на судење


Скопје, 3 октомври, 2017 - 14:41 (META) 

Советот за оценка на обвинителен акт го одобрил обвинението за случајот „Триста“ на Специјалното јавно обвинителство, кое сега треба да биде распределено кај судија кој треба да закаже тремин за почеток на судскиот процес.

Како што соопштија денеска од Основниот суд Скопје 1, Советот, составен од судиите Верка Петковска, Горан Бошевски и Татјана Михајлова, донел решение со кое приговорот на одбраната на обвинението го одбил како неоснован и го одобрил обвинителниот акт во целост.

„Оценетиот обвинителен акт, согласно автоматизираниот компјутерски систем за управување со судските предмети (АКМИС), електронски ќе биде распореден на судија за понатамошно постапување, кој треба да закаже термин за одржување главна расправа по предметот, за што јавноста ќе биде навремено информирана“, стои во соопштението од Кривичниот суд.

Инаку, Апелацискиот суд кон средината на септември соопшти дека донел одлука прислушуваните разговори да се користат како доказ во судската постапка за случајот „Триста“. Одлуката на Апелација беше донесена откако СЈО претходно поднесе жалба на решението на Основниот суд Скопје 1, кој ги отфрли „бомбите“ како доказ во постапката.

Во случајот „Триста“, обвинет е помошник-министерот во МВР, Ѓоко Поповски, кој се товари дека со набавка на 300 возила за МВР го оштетил буџетот за 453.570 евра, бидејќи тендерот за купување, сервисирање и за одржување на возилата им го доделил на компании кои не дале најевтина понуда.


Комисија ќе испитува дали судиите им помогнале на Грујовски и на Бошковски да избегаат


Скопје, 25 август, 2017 - 13:37 (META) 

Советот за утврдување на факти и покренување на постапка за утврдување одговорност за судија, денеска одржал седница на која донел одлука да формира комисија која ќе испита дали судиите од Кривичниот, Апелацискиот и Врховниот суд, кои одлучувале по барањата за притвори против обвинетите во случаите на СЈО „Таргет“ и „Тврдина“, ја прекршиле постапката и им овозможиле на Горан Грујовски и на Никола Бошковски да побегнат од државата.

На седницата, како што соопштуваат од Советот, бил разгледан извештајот на известителот на Советот во врска со предметот, формиран по допрен глас и по иницијативата поднесена од Здружението за истражувања, анализи и развој „Зелена Лупа“.

„На јавноста и е познато дека во одлучувањето учествувале судии во Основинот суд Скопје 1, Апелациониот суд Скопје и Врховниот суд. Врз основа на поднесениот извештај од страна на известителот, поткрепен со одредени факти обезбедени од негова страна, Советот донесе одлука извештајот да се прифати и од своите редови формира Комисија за утврдување на фактите во врска со изнесените наводи во јавните гласила и иницијативата поднесена од страна на Здружението за истражувања, анализи и развој „Зелена Лупа“ Скопје“, стои во соопштението.

Комисијата треба да утврди дали судиите сториле неправилности при донесувањето на нивните одлуки и за тоа ќе изготви извештај врз основа на која Советот ќе одлучи дали ќе се поведе постапка за утврдување одговорност на судиите пред Судскиот Совет или ќе ја одбие иницијативата.

Поранешниот началник на петтата управа, Горан Грујовски и Никола Бошковски, вработен во УБК, веќе еден месец се во бгество, откако Врховниот суд ги потврди решенијата на Апелацискиот суд на двајцата да им биде одредена мерка притвор.

Останува спорна одлуката на судовите на обвинетите да им биде овозможено да се бранат од слобода додека траеше жалбената постапка во Врховниот суд, како и доцнењето на налогот за нивно приведеување, кој од Врховниот суд до МВР стигнал неколку часа по одлуката за притвор.


Апелација ги разгледува жалбите на СЈО и на Канческа-Милевска


Скопје, 24 јули, 2017 - 11:10 (META) 

Во Апелациски суд – Скопје денеска се одржува јавна седница на која се разгледуваат жалбите за случајот „Тендери“, во кој првообвинета е поранешната министерка за култура, Елизабета Канческа-Милевска. Жалби до Апелацискиот суд имаат поднесено и Специјалното јавно обвинителство, кое бара да се поништи одлуката на првостепениот суд и на Канчевска-Милевска да ѝ се одреди притвор, но и обвинетата, која исто така бара поништување на одлуката на Кривичниот суд така што ќе ѝ биде вратен пасошот.

Случајот „Тендери“ што го отвори СЈО се однесува на набавките за дополнителни работи на Музејот на ВМРО. Специјалното јавно обвинителство бараше притвор за Канческа-Милевска, но ѝ беа одредени поблаги мерки, односно на поранешната министерка ѝ беше одземен пасошот. Таа и уште две лица се товарат за злоупотреба на службената положба и овластување со што е нанесена штета на државниот буџет од 54 милиони денари.

Вчера Апелација ги одби жалбите на СЈО за определување притвор на поранешниот премиер Никола Груевски и на неговите најблиски соработници, но судот донесе одлука да останат без пасоши.


Димовски и Трајковски остануваат без пасоши, Апелација им ги одби жалбите


Скопје, 21 јули, 2017 - 12:07 (META) 

Тони Трајковски, актуелениот градоначалник на Гази Баба, и пратеникот во Собранието од ВМРО-ДПМНЕ, Илија Димовски, остануваат без пасоши и со обврска еднаш неделно да се јавуваат пред служебно лице во суд, откако Апелацискиот суд Скопје ги одби нивните жалби на одлуките на Кривичниот суд да им бидат одредени мерки на претпазливост.

Апелацискиот суд, истовремено, ја одбил како неоснована и жалбата со која Специјалното јавно обвинителство бараше на градоначалникот на Гази Баба, Трајковски, обвинет во случајот „ТНТ“, да му биде одредена мерка притвор, наместо мерки на претпазливост.

СЈО бараше притвор за Трајковски, бидејќи, како што навел обвинителот Гаврил Бубевски пред судот, иако уредно ги примал поканите за распит, градоначалникот на Гази Баба не доаѓал и не покажувал почит кон обвинителството.

Во врска со жалбата на Димовски, кој e обвинет во случајот „Титаник“, Апелацискиот суд, како што стои во решението, оценил дека таа е неоснована и дека Кривичниот суд правилно постапил кога го уважил предлогот на СЈО за определување мерки на претпазливост.

Димовски во жалбата навел дека се јавувал на сите покани во СЈО и дека доколку имал намера да бега, имал доволно време да го стори тоа досега.


Апелација: Притвор за Грујовски, Јакимовски и за Бошковски – Мијалков останува без пасош


Скопје, 18 јули, 2017 - 17:10 (META) 

Апелацискиот суд Скопје ја уважи жалбата на Специјалното јавно обвинителство за дел од обвинетите во случаите „Таргет“ и „Тврдина“ и им одреди притвор на поранешниот началник на петтата управа, Горан Грујовски, на поранешниот шеф на кабинетот на Сашо Мијалков во Управата за безбедност и контраразузнавање, Тони Јакимовски, и на Никола Бошковски, вработен во УБК.

Поранешниот директор на УБК, Сашо Мијалков, останува без пасош и со обврска еднаш неделно да се јавува во судот, откако за него и за останатите обвинети Апелацискиот суд ги одбил жалбите на СЈО и ги потврдил решенијата на првостепениот суд.

„Апелацискиот суд Скопје по одржаните седници на 17 јули 2017 година, донесе одлуки во предметите познати во јавноста како „Таргет“ и „Тврдина“, со кои за тројца обвинети ја уважи жалбата на Јавно обвинителство за гонење кривични дела поврзани и кои произлегуваат од содржината на незаконското следење на комуникациите, така што ги преиначи првостепените решенија за обвинетите Г.Г., Н.Б и Т.Ј. и заради обезбедување присуство на обвинетите во кривичната постапка, определи мерка притвор, додека за останатите обвинети се потврдија првостепените решенија, со тоа што жалбите на обвинетите, како и на Обвинителството, се одбиени како неосновани“, стои во соопштението на Апелацискиот суд.


Мијалков даде збор дека редовно ќе се јавува во суд


Скопје, 17 јули, 2017 - 15:50 (META) 

Поранешниот директор на Управата за безбедност и контраразузнавање (УБК), Сашо Мијалков, денеска пред тричлениот совет на Апелацискиот суд Скопје изјави дека нема зошто да бега од државата, бидејќи е убеден во својата невиност и оти верува дека во понатамошната постапка и судот ќе го увиди тоа, пренесува „Нова ТВ“.

Апелацискиот суд денеска ги разгледува жалбите на Специјалното јавно обвинителство и на обвинетите во случаите „Таргет“ и „Тврдина“. Првообвинет во случаите, кои се споени во едно обвинение, е Мијалков, за кого СЈО бара да му биде одреден притвор. Ваквото барање претходно беше одбиено од Кривичниот совет на Основниот суд Скопј 1, поради што СЈО поднесе жалба до второстепениот суд.

– Досега само двапати не сум се јавил на покана и тоа затоа што бев во странство и немаше билети за да се вратам порано. Одговорно се јавувам на секој нивни повик. Така било досега, а од денеска можам да кажам дека мој збор е дека секогаш и на секој повик од судот ќе се јавувам уредно и ќе бидам присутен – рекол Мијалков.

Обвинителката на СЈО, Ленче Ростовска, образложила дека како основа на барањето за притвор против Мијалков се зема само опасност од бегство бидејќи против него се води скратена постапка. Таа во прилог ги доставила анкетните листови на Мијалков од Дражвната комисија за спречување на корупција и документи од Трговскиот регистар во Чешка, во кои стои дека тој е сопственик на имот и на фирми во Чешка, алудирајќи на можноста за бегство.

Љупчо Шврговски, кој му е адвокат на Мијалков, побарал да не се земе предвид жалбата на СЈО за определување мерка притвор затоа што Мијалков, ако сакал, досега можел да избега и да не се врати во државата. Тој додал дека Мијалков уредно се јавувал на поканите на СЈО.

Мијалков, пред завшувањето на седницата, изјавил оти верува во „објективноста и професоналноста на судот и дека ќе донесе вистинска одлука“.

Денеска тричлениот совет на Апелацискиот суд ги разгледуваше жалбите на СЈО и на одбраната на другите обвинети во „Таргет“ и во „Тврдина“, меѓу кои е и поранешниот директор на петтата управа Горан Грујовски, кој денеска не се појави во судот.


Пешевски и Латас остануваат без пасоши, Апелација досега ги одби сите жалби на СЈО


Скопје, 17 јули, 2017 - 12:00 (META) 

Поранешниот вицепремиер за економски прашања, Владимир Пешевски, кој е обвинет во случајот „Траекторија“ на Специјалното јавно обвинителство, останува без пасош и со обврска еднаш неделно да се јавува во суд. Вака одлучил Апелацскиот суд Скопје по разгледувањето на жалбите на СЈО и на одбраната на Пешевски минатата недела.

СЈО до Апелацискиот суд се жалеше на одлуката на Кривичниот совет на Основниот суд Скопје 1, кој одби на Пешевски да му биде одреден притвор и наместо тоа, одлучи да му одреди мерки на претпазливост. Од СЈО бараа второстепениот суд да му одреди притвор на Пешевски, а одбраната на поранешниот вицепремиер поднесе жалба со која бараше укинување на мерките за претпазливост.

Според решението, Кривичниот совет на Апелацискиот суд, составен од судиите Љиљана Ивановска-Шопова (претседател на Советот), Африм Фидани и Јани Нича, ги одбил како неосновани жалбите на СЈО и на одбраната и ја потврдил одлуката на Кривичниот суд.

Обвинителите на СЈО, во жалбата, меѓу другото, навеле дека обвинетиот Пешевски „поседува 24 активни банкарски сметки, на кои има постојан прилив и одлив на поголем износ на парични средства, па токму паричните средства што ги поседува и неговиот развиен бизнис надвор од границите на Македонија упатуваат дека може да се даде во бегство и да ја напушти државата“.

Од СЈО навеле и дека со обвинението се предложени и други сведоци кои сè уште не се испитани, што „упатува на оправдан страв дека обвинетиот, доколку се брани од слобода, ќе ја попречува кривичната постапка со влијание на сведоците, кои се предложени на листата на докази“.

Кривичниот совет на Апелацискиот суд ги одбил ваквите наводи како неосновани и оценил дека Основниот суд Скопје 1 донел правилна одлука дека „во оваа фаза на постапката, примената на мерката притвор не е оправдана и дека со примена на поблаги мерки, како што се определените мерки на претпазливост – обврска за јавување во судот и привремено одземање на патната исправа, успешно ќе се елиминира опасноста од бегство“.

Второстепениот суд ја одбил жалбата на одбраната на поранешниот директор на Агенцијата за државни патишта, Љупчо Георгиевски, кому му остануваат мерките за претпазливост, односно да му биде одземен пасошот и да се јавува во судот еднаш неделно.

На сила остануваат истите мерки и за новинарот Драган Павловиќ-Латас, обвинет во случајот „Тотал“, откако Апелацискиот суд го одбил барањето на СЈО да му биде одреден притвор, како и жалбата на обвинетиот против одлуката на Кривичниот суд да му биде одземен пасошот и еднаш неделно да се јавува во суд.

Апелацискиот суд досега ги одби сите жалби што ги поднесоа Специјалното јавно обвинителство и обвинетите против одлуките на првостепениот суд.

Инаку, денеска во Апелацискиот суд треба да се одржат нови пет јавни седници, на кои ќе бидат разгледувани жалбите на СЈО и на обвинети во случаите што ги отвори ова обвиниелство и за кои кон крајот на минатиот месец поднесе обвиненија.

СЈО бараше притвори за вкупно 18 обвинети, меѓу кои и за лидерот на ВМРО-ДПМНЕ и поранешен премиер, Никола Груевски, но кривичните совети на Основниот суд Скопје 1 ги одбија сите предлози и наместо притвор им одредија мерки на претпазливост.


ВМРО-ДПМНЕ бара од судот да не подлегнува на притисоци и да ги врати одземените пасоши


Скопје, 12 јули, 2017 - 16:11 (META) 

Судот не смее да подлегне на политичките притисоци и на пропагандата што во континуитет ја врши Специјалното јавно обвинителство против ВМРО-ДПМНЕ и нејзиното раководство. Ова од пред Апелацискиот суд Скопје денеска го порача членот на извршниот комитет на партијата, Зоран Илиоски.

Апелацискиот суд попладнево на јавна седница ги разгледува жалбите на одбраната на поранешниот вицепремиер, Владимир Пешевски, и поранешниот директор на Агенцијата за државни пасишта, Љупчо Георгиевски, обвинети во случајот „Траекторија“ на Специјалното јавно обвинителство, на одлуките на Основниот суд Скопје 1 да им бидат одземени пасошите.

Тој, во името на ВМРО-ДПМНЕ, побара судот да ги отфрли „политичките барања на СЈО и да донесе одлука со која ќе се вратат патните исправи на лицата опфатени во предметите на Катица Јанева“.