„Социетас цивилис“: Потребна е јавна дебата за Законот за јазиците


Скопје, 19 јануари, 2018 - 13:38 (META) 

Институтот за демократија „Социетас цивилис“ ја повика Владата Законот за употреба на јазиците да се даде на мислење на Венецијанската комисија и нејзините забелешки да се вградат во текстот на законот како што е предвидено во планот „3-6-9“.

„Потсетуваме дека од 2001 година, Уставот на Република Македонија предвидува употреба на албанскиот јазик на централно ниво, во јасно одредени сфери на употреба. Сметаме дека е особено важно државата да посвети внимание на имплементацијата на јазичните права и сметаме дека овој закон треба да ја има таа функција. Воедно, укажуваме и дека при носење на законот е потребна поголема транспарентност и јавна дебата, принципи за кои јасно се залага оваа Влада и Собранието“, велат од „Социетас цивилис“.

Оттаму апелираат до пратениците во Собранието да ја искористат можноста за повторно разгледување на законот и да ги отстранат евентуалните недостатоци со вклучување на стручната јавност во дискусијата, со што „воедно ќе се намали и можноста за манипулација со јавноста“.


Димовски ќе бара од Уставниот суд да го поништи Законот за јазиците


Скопје, 16 јануари, 2018 - 12:35 (META) 

Пратеникот Илија Димовски денеска најави дека ќе поднесе иницијатива до Уставниот суд за поништување на Законот за употреба на јазиците.

Тој преку својот фејсбук-профил апелераше до претседателот на државата, Ѓорге Иванов да не го потпишува указот за прогласување на законот, а до неговите колеги во Собранието да не гласаат за овој закон кога тој повторно ќе се врати на седница во законодавниот дом.

„Доколку и покрај укажувањата на целокупната јавност пратениците на СДСМ повторно одлучат да гласаат за овој закон, најавувам дека ќе поведам иницијатива пред Уставниот суд на Република Македонија за поништување на овој закон“, напиша Димовски на „Фејсбук“.

Според него Законот за употреба на јазиците или како што го нарекува „Законот за двојазичност“ е штетен, дезинтегрирачки, дискриминирачки и целосно неуставен документ.

„Овој закон е донесен како плод на партиски пазарења помеѓу партиите, а не како плод на суштинска, длабока и сеопфатна анализа на реалните потреби на нашите сограѓани од помалубројните етнички заедници (Албанците, но и сите други помали заедници). Процедурата за донесување на овој закон во Собранието на Република Македонија беше целосно неделовничка и спротивна на основните демократски стандарди. Овој закон е донесен на сила. Овој закон ја загрозува позицијата на македонскиот јазик во Република Македонија, но и ја загрозува унитарноста и иднината на нашата држава“, пишува Димовски.


Да не се уништува опремата во парк-шумата „Водно“, апелира ЈП „Паркови и зеленило“


Скопје, 2 јануари, 2018 - 12:23 (META) 

Јавното претпријатие „Паркови и зеленило“ реагираа на уништувањето на опремата во парк-шумата „Водно“ и апелираа до посетителите да се однесуваат посовесно и поодговорно.

Изминатиов период чуварските служби на ЈП „Паркови и зеленило“ на реонот во парк – шумата „Водно“ регистрирале уништување на повеќе парковски елементи. Се почесто се среќаваат уништени и оштетени информативни табли, корпи за отпадоци, оштетувања на видиковци, парковски клупи и маси за посетителите, што говори за вандалско и несовесно однесување кон истите.

„Потребата и значењето на парковскиот инвентар и нивната намена за одмор и рекреација е се поголема, особено во градските средини, како составен дел од програмската содржина при посета на парк – шумите, парковите и урбаното зеленилото. Оттука апелираме до посетителите да совесно и одговорно се однесуваат кон урбаната парковска опрема, како и кон природата“, стои во соопштението на ЈП „Паркови и зеленило“.


Запленети повеќе од 7.000 парчиња петарди во струшкото село Мороишта


Струга, 30 декември, 2017 - 11:19 (META) 

Инспектори од надворешната канцеларија за недозволена трговија со дрога и оружје Струга вчера извршиле контрола во продавница во селото Мороишта, Струшко каде пронашле 7.377 парчиња петарди, информира МВР.

Петардите се запленети, а сопственикот на продавницата „Лазароски компани“, В.Л. (55) бил приведен во полициската станица во Струга за натамошна постапка.

Од Министерството за внатрешни работи апелираат до граѓаните за време на празниците да не употребуваат петарди и други пиротехнички средства. Оттаму велат дека нема да се толерира и најстрого ќе се казнува препродавањето и употребата на пиротехничките средства.

Според Законот за прекршоци, против јавниот ред и мир на лице кои неовластено пука од огнено оружје, употребува пиротехнички средства или сличен експлозивен или лесно запалив материјал, или на сличен начин го нарушува мирот и безбедноста на граѓаните ќе му биде изречена глоба во износ од 200 до 500 евра во денарска противвредност.


Дијабетичарите од Велес до Заев: Еден месец 50.000 дијабетичари се без инсулин


Велес, 27 декември, 2017 - 12:33 (META) 

Речиси еден месец нема инсулин и некои си поигруваат со судбините на над 50.000 граѓани кои мора да примаат инсулин, од кои над 500 се деца, алармираше Здружението на лица со дијабетес „Шеќерче-Лолипоп“ Велес, кое упати писмо до премиерот Зоран Заев за лично да преземе итни мерки за средување на состојбата.

„Се изнаслушавме разноразни изговори и изјави, кои ама баш ништо не му значат на шеќерот(гликемијата во крвта) во нашите тела, на она што нас, граѓани на оваа држава – татковина, не уништува не по наш избор или определба, туку тоа ни го одредила судбината. Време е Вие лично да се ангажирате и дејствувате! Уште еднаш од Вас бараме да ставите моментален крај на инсулинската криза во државата! Инсулин да стасува до секој што му е потребно, а истовремено да донесете системско решение со кое нема да се овозможи следна криза, која и сега мислиме дека е наметната“, се вели во здружението на дијабетичари од Велес.


Чичаковски: Партиите веднаш да престанат со инцидентите


Скопје, 3 октомври, 2017 - 13:23 (META) 

Претседателот на Државната изборна комисија (ДИК), Александар Чичаковски, денеска упати апел до политичките партии итно да престанат со инциденти и порача дека насилството во предизборниот период може да донесе само штета на кандидатите, на партиите, на изборниот процес и на државата.

Чичаковски во името на ДИК остро ги осуди сите досегашни инциденти во пресрет на локалните избори, закажани за 15 октомври. Инцидентите, нагласи претседателот на ДИК, го нарушуваат демократскиот амбиент и изборниот процес и треба веднаш да престанат.

– Насилството никогаш не е решение. Тоа не му помага никому и може само да донесе штета на кандидатите, на партијата, на изборниот процес, на државата. Уште еднаш апелираме итно да престанат сите негативни појави, апелираме на почитување на противкандидатите и за фер и демократски избори. Изборите се добиваат на 15 октомври со јасно изразена волја на граѓаните, со голема излезност и со индивидуално право на секој граѓанин да гласа за оние кандидати кои смета дека се најдобри, а не со насилство – изјави претседателот на ДИК.

Чичаковски потсети дека кандидатите за градоначалници и за советници, како и политичките партии, потпишаа кодекс за фер и демократски избори, со што се обврзаа дека ќе ги почитуваат принципите на демократијата и на доброто владеење и дека ќе придонесуваат за демократски развој на општеството.

– Секое насилство, инцидент, непочитување на политичките опоненти во изборниот процес, е спротивно на кодексот, на законите, правилата и на прописите на Република Македонија кои се релевантни за изборите – рече Чичаковски.

Тој, во име на ДИК, ги повика надележните институции да ги расветлат инцидентите и да ги казнат сторителите, а политичките партии да придонесат кон смирување на страстите.


НФАПВ предупредува да не се плаќа за вработување во странство


Скопје, 16 јули, 2017 - 14:09 (META) 

Националната федерација на агенции за вработување (НФАПВ) денеска упати предупредување да бидат внимателни сите што сакаат да дојдат до работно место во странство преку некоја агенција. Заинтересираните за работа не треба да плаќаат на агенциите, бидејќи агенцијата за постапката треба да им наплати на работодавците. Затоа кандидатите не треба да прифаќаат плаќање на какви било провизии и трошоци, пред или по заминување на работа во странство, предупредува НФАПВ.

„Во врска со последните случувања со одредени агенции за посредување при вработување, за кои постојат информации за измама на кандидати за вработување во странство, сакаме на целата јавност да ѝ упатиме јасен апел да бидат претпазливи кога носат одлука за заминување на работа во странство. Имено, според член 22, став 1, точка 4 од Законот за работни односи, и според Меѓународната конвенција 181 за приватните агенции за вработување, што Република Македонија ја има ратификувано, агенциите не смеат да наплаќаат никакви трошоци од кандидатите за вработување. Сите трошоци за вработување на лицата треба да се наплатат од компанијата, односно клиентот кадешто ќе се вработат лицата“, се вели во соопштението од Националната федерација на агенции за вработување.

НФАПВ посочува дека како тело кое има цел да ги претставува агенциите, да лобира за подобрување на законската основа, да соработува со домашните и со меѓународните институции, како и да ги зајакне капацитетите на своите членови за развивање на пазарот на вработување, се залага за заштита на правата на работниците и ќе продолжи во таа насока да соработува и со надлежните инситуции за да се подобри законската регулатива и таа да се почитува од сите лиценцирани агенции.


ВМРО-ДПМНЕ апелира судот да не подлегнува на притисоци и на закани


Скопје, 1 јули, 2017 - 10:47 (META) 

Опозициската ВМРО-ДПМНЕ денеска упати апел до судот да не подлегнува, како што стои во соопштението, на притисоците и на заканите кои се вршат, а во врска со обвиненијата што ги поднесе Специјалното јавно обвинителство против високи функционери на партијата и поранешни министри, помеѓу кои е и лидерот на ВМРО-ДПМНЕ и поранешен премиер, Никола Груевски.

Од партијата повторно нагласуваат дека со работата на СЈО се прави „единствен атак врз ВМРО-ДПМНЕ, со цел нејзина политичка елиминација за конечно слабеење на Македонија и исполнување на плановите на оној кој го смислил цело ова сценарио“.

„Целта е стигматизирање и оцрнување на стотина луѓе од ВМРО-ДПМНЕ против кои се води политички процес чија крајна цел е политичка, а никако правна. Она што се случува со СЈО нема апсолутно никаква врска со правото и исклучиво е поврзано со политичките интереси на одредени структури. Апелираме судот да не подлегнува на притисоците и на заканите кои се вршат. Да се држи до словото на Уставот и законите. Воедно за сите што ќе се огрешат кон законите, кои што вршат притисоци и без докази спроведуваат политички атак, укажуваме дека ќе има правда и таа ќе дојде бргу“, стои во соопштението на ВМРО-ДПМНЕ.

Инаку, како што најавија од Кривичниот суд, денеска треба да бидат соопштени одлуките на кривичните совети во врска со барањата на СЈО за одредување притвор на високи функционери на ВМРО-ДПМНЕ и поранешни министри, меѓу кои и за лидерот на партијата и поранешен премиер, Никола Груевски.


СЕММ: МВР и обвинителството да ги расчистат инцидентите во Собранието и нападите на новинари


Скопје, 28 април, 2017 - 10:14 (META) 

Советот за етика во медиумите (СЕММ) бара итна реакција на полицијата и на Јавното обвинителство и преземање на неопходните мерки за расветлување и за расчистување на вчерашните инциденти во Собранието на Република Македонија, во кои беа нападнати и новинарски екипи од неколку медиуми.

„Ваквите случувања се суров доказ за алармантните услови со кои се соочуваат медиумите, а насилството врз нив е атак врз демократијата и, со тоа, и криминал врз општеството. Доколку властите не преземат сериозни чекори во заштитата на слободата на изразување, ќе продолжат да ги охрабруваат тие чија цел е по пат на сила да ги замолчат новинарите и другите критички гласови во општество. Барањето одговорност од политичарите е една од клучните одговорности во новинарството и медиумите не смеат да бидат блокирани во обидите да ги истражат сите важни прашања од јавен интерес“, стои во соопштението од СЕММ.

Оттаму потсетуваат дека државата, во согласност со член 10 од Европската конвенција за човекови права, е одговорна за преземање на сите активни мрки за да се создаде и да се одржува поволна средина за слобода на изразување и ги повикуваат медиумите професионално и непристрасно да ја вршат својата работа за урамнотежено претставување на настаните од сите засегнати страни.


Ситуацијата со отпадот во Македонија е очајна, предупредува „Ајде Македонија“


Скопје, 22 април, 2017 - 12:10 (META) 

Македонија се наоѓа во очајна состојба во справувањето со отпадот и со можностите кои постојат доколку поинаку се постапува со него, предупредуваат од Асоцијацијата за чиста животна средина „Ајде Македонија“, а по повод 22 Април – Денот на планетата Земја.

„Ситуацијата со управувањето со отпадот во Република Македонија се карактеризира пред сè како супстандардна и неефикасна, а системот е попречен од сериозни организациски и технички недостатоци. Тоа резултира со различни дисфункционални системи на национално и на општинско ниво и со негативни ефекти врз животната средина и здравјето на луѓето“, стои во соопштението на „Ајде Македонија“.

Оттаму велат дека околу 99 отсто од комуналниот отпад во Македонија се депонира, со што се пропушта можноста за зачувување на животната средина, отворање на нови работни места, поефтини суровини за индустријата и приходи за државата во облик на даноци.

„Затоа, ние бараме имплементирање на правилата кои веќе ги имаме утврдено во нашето законодавство, а тоа се стандардите наведени во Директивата за отпад. Тие се засновани на хиерархијата во управувањето со отпадот, односно да се работи на спречување на создавањето на отпадот, а доколку ова е невозможно, отпадот да се селектира, реупотреби, рециклира, компостира или да се добие биоенергија“, велат од Асоцијацијата.

Според „Ајде Македонија“, во земјава има 54 комунални депонии и стотици нелегални или „диви“ депонии, од кои 16 се со висок ризик по животната средина, потоа 16 со среден и 19 со низок ризик. Дополнително, во Македонија има 16 стари еколошки загадени индустриски локалитети кои претставуваат сериозен ризик за луѓето што живеат во нивна близина.

Од Асоцијацијата апелираат што побргу да се најде политичка волја за решавање на овој проблем.