!На 1 февруари 2017 година, заврши промотивниот период на слободно користење на содржините на „Мета“. Во периодот што претстои го воведуваме новиот систем за пристап и за претплата. За начинот на пристап и за претплатата ќе информираме дополнително

Зголемувањето на моќта на жените треба да биде приоритет, смета Гутереш


Најроби, 8 март, 2017 - 17:58 (META) 

Генералниот секретар на Обединетите нации, Антонио Гутереш, денеска изјави дека зголемувањето на моќта на жените е ефикасен начин за заштита на нивните права.

По повод 8 Март – Меѓународниот ден на жената, тој истакна дека приоритет треба да се даде на големо присуство на жените во владините институции, политичките системи и во економијата, како и на другите аспекти на општествениот живот.

Првиот човек на ОН изјави дека поголемото присуство на жените во сите сфери од општеството би придонело за поголем развој, полесно зачувување на мирот и за подобра заштита на човековите права.

Тој додаде дека како висок комесар за бегалци на ОН, го видел најголемото страдање на жените во најтрагични околности кои човек може да ги замисли.

Гутереш е во официјална посета на Кенија.


Генералниот секретар на ОН во итна посета на Сомалија поради гладот во земјата


Могадишу, 7 март, 2017 - 10:15 (META) 

Генералниот секретар на Обединтетите нации, Антонио Гутереш, ја почна итната посета на Сомалија, која изминатите неколку недели е зафатена од глад поради суша, јавуваат светските медиуми.

„Луѓето умираат. Светот мора да дејствува за да се спречи тоа. За ова мораме да зборуваме најгласно што можеме. Конфликтите, сушата, болестите, климатските промени… Оваа комбинација е кошмар“, изјавил Гутереш во пресрет на посетата на Могадишу, главниот град на Сомалија, и побарал меѓународна поддршка на Обединетите нации за пружање хуманитарна помош во земјата.

Гутереш денеска ќе се сретне со новоизбраниот претседател на Сомалија, Мохамед Абдулахи Мохамед.

Сомалија, со Нигерија, Јужен Судан и со Јемен, е една од четирите земји во кои е прогласена состојба на глад и за кои генералниот секретар на ОН минатиот месец побара помош од 4,4 милијарди долари.

Минатиот викенд во Сомалија за само 48 часа од глад починаа 110 лица.

Обединетите нации проценуваат дека на околу 5 милиони луѓе во Сомалија им е потребна помош, за да се избегне глад од катастрофални размери.


Гутереш го назначи Лакроа за шеф на мировните операции на ОН


Њујорк, 15 февруари, 2017 - 9:42 (META) 

Генералниот секретар на ОН, Антонио Гутереш денеска го именуваше за нов шеф на мировните операции на ОН францускиот дипломат Жан-Пјер Лакроа на мандат од година дена.

Лакроа на 1 април ќе ги преземе мировните операции на ОН во момент кога ги тресе скандал за случаите на сексуално злоставување извршени од мировници. Тој доаѓа на местото на Французинот Ерве Ладсу, кој го одби предлогот на Гутереш да остане на функцијата.

Гутереш, исто така, соопшти дека американскиот дипломат Џефри Фелдман, кој е одговорен за политички прашања во ОН, ќе остане на истата функција.


Преговорите за Кипар завршија без договор


Женева, 13 јануари, 2017 - 9:42 (META) 

Лидерите на кипарските Грци и Турци, Никос Анастасијадес и Мустафа Акинџи, синоќа во Женева не постигнаа договор за обединување на Кипар, но ќе продолжат да прават напори за наоѓање решение. Новата рунда преговори би требало да продолжи на 18 јануари, но на ниво на експерти.

По завршувањето на преговирите, генералниот секретар на ОН, Антонио Гутереш, изјави дека двете преговарачки страни се подготвени да ги направат „последните напори“ за наоѓање решение.

Шефот на турската дипломатија, Мевљут Чавушоглу, по завршувањето на преговорите изјави дека експертските преговори на 18 јануари ќе се одржат во истиот формат како и вчерашните, односно со учество на претставници на двете кипарски заедници, Велика Британија, Грција и на Турција. Тој истакна дека не е утврден краен рок до кога би требало да завршат преговорите на експертите.

– Се надевам дека повторно ќе се собереме кон крајот на јануари – изјави Чавушоглу.


Потребен е целосно нов пристап за спречување војни, смета Гутереш


Њујорк, 11 јануари, 2017 - 10:10 (META) 

Генералниот секретар на Обединетите нации, Антонио Гутереш, повика на „целосно нов пристап“ како да се спречат војните.

Во првото обраќање пред Советот за безбедност на ОН откако стапи на функција, Гутереш рече дека е потрошено премногу време и средства за одговарање на кризите, наместо за нивно спречување.

– Луѓето плаќаат превисока цена. Потребен ни е целосно нов пристап – рече тој.

Тој оцени дека премногу шанси за превенција на кризи се пропуштени затоа што државите членки на ОН немале меѓусебна доверба.

– Денеска е потребно да покажеме поголемо лидерство и зајакнување на капацитетите и на авторитетот на ОН, ставајќи го мирот на прво место – истакна Гутереш.


Коѕиас на средба со Гутереш в петок


Атина, 3 јануари, 2017 - 11:36 (META) 

Шефот на грчката дипломатија, Никос Коѕиас, в петок во Њујрок ќе се сретне со новиот генерален секретар на Обединетите нации, Антонио Гутереш. Разговорите се очекува да се насочат главно на кипарското прашање, тема на која Грција, Кипар и Турција, како и меѓународната јавност, интензивно се фокусирани со можност наскоро да се најде решение.

Проценките се дека покрај кипарското прашање, на средбата со Гутереш извесно е да се разговара и за спорот за името, чии преговори поради македонската политичка криза и проблемите во Грција веќе две години се во застој.

Односите со Македонија, но и со Балканот, според грчкиот весник „Катимерини“, можно е следниот период да се најдат во фокусот на грчката влада. Весникот пренесува дека премиерот Алексис Ципрас планира да го посети Белград на 30 и 31 јануари, посета која симболично ќе означи ново поглавје за една поактивна грчка политика на Балканот.

Весникот, повикувајќи се на грчки дипломатски извори, пренесува дека со задоцнување од две години, во време кога границите за бегалците се затворени, а Грција има отворени проблеми со Македонија и со Албанија, Ципрас од Белград ќе се обиде да испрати јасна порака дека не прифаќа политики на иредентизам и на национализам, како и да ја засили својата политика на Балканот.

Проценките се дека Грција ќе планира да ги засили врските со Србија и со Бугарија, а ќе преземе и активности за зајакнување на стабилноста на Балканот.


Португалецот Антонио Гутереш од денеска ја презема функцијата генерален секретар на ОН


Њујорк, 1 јануари, 2017 - 11:52 (META) 

Поранешниот премиер на Португалија, Антонио Гутереш, од денеска ја презема функцијата генерален секретар на Обединетите нации.

Гутереш доаѓа на местото на Бан Ки-мун, кој два мандати беше генерален секретар на светската организација.

Положувајќи заклетва на 12 декември, тој оцени дека ОН мораат да се подготват за промени.

– Од акутните кризи во Сирија, Јемен, Јужен Судан и во други места, до долгогодишните спорови, вклучувајќи го израелско-палестинскиот конфликт, потребно ни е посредување, арбитража и креативна дипломатија – изјави тогаш Гутереш.

Еден од неговите приоритети ќе биде подобрувањето на положбата на жените, така што веќе именуваше три жени на клучни позиции во својот тим.

Гутереш е деветтиот генерален секретар на ОН во 71-годишната историја на ОН.


Генералното собрание на ОН ќе гласа за Гутереш


Њујорк, 13 октомври, 2016 - 11:06 (META) 

Генералното собрание на ОН, во кое има претставници од 193 држави, денеска ќе гласа за именување на поранешниот португалски премиер, Антонио Гутереш, на позицијата генерален секретар на светската организација.

Претседателот на Генералното собрание на ОН, Питер Томпсон, соопшти дека се надева дека именувањето на Гутереш ќе биде потврдено едногласно.

Советот за безбедност на ОН минатата недела едногласно го номинираше 67-годишниот Гутереш на местото на Бан Ки-мун, чиј петгодишен мандат истекува на 31 декември.

Португалецот би требало да стане деветти генерален секретар на ОН во 71-годишната историја на организацијата.

Освен што бил премиер на Португалија, од 1995 до 2002 година, Гутереш десет години бил на позицијата висок комесар за бегалци на ОН, од 2005 до 2015 година.

Номинацијата на Гутереш ги разочара тие што се залагаа на позицијата генерален секретар првпат да биде избрана жена, како и тие што се надеваа дека првпат на чело на светската организација, според непишаното ротирачко правило, ќе биде избрана личност од источноевропска земја.

Дипломатите соопштија дека гласале за најдобриот кандидат, без разлика на другите критериуми.
Генералниот секретар ја регулира работата на 44.000 службеници на ОН и на повеќе од 100.000 припадници на мировните сили.


СБ на ОН едногласно го поддржа Гутерeш за генерален секретар


Њујорк, 6 октомври, 2016 - 18:19 (META) 

Советот за безбедност на Обединетите нации денеска едногласно го номинираше поранешниот португалски премиер Антонио Гутереш за генерален секретар на светската организација и му порача на Генералното собрание на ОН да го именува со мандат од пет години, од 1 јануари.

Генералното собрание веројатно ќе се состане следната недела за да го одобри именувањето на 67-годишниот Гутереш, кој ќе го замени Бан Ки-мун од Јужна Кореја.

Вториот мандат на Бан Ки-мун истекува кон крајот на 2016 година.

Гутереш беше премиер на Португалија од 1995 до 2002 година, а беше и висок комесар за бегалци на ОН од 2005 до 2015 година.


Гутереш на чекор да биде избран за нов генерален секретар на ОН


Њујорк, 5 октомври, 2016 - 20:48 (META) 

Поранешниот премиер на Португалија, Антонио Гутереш, речиси со сигурност ќе биде новиот генерален секретар на Обединетите нации (ОН) откако на денешното гласање ниту една од петте постојани членки на Советот за безбедност на ОН не стави вето на неговиот избор, јавуваат светските агенции.

Денешното, шесто неформално гласање за нов генерален секретар на светската орагнизација беше клучно, бидејќи постојаните членки на Советот за безбеност првпат гласаа на ливчиња во боја, со што веднаш се знаеше кој од кандидатите може да очекува вето.

Дека Гутереш е „јасен фаворит“, денеска соопштил и рускиот амбасадор во ОН, Витали Чуркин, пренесува „Би-би-си“.

Формалното гласање за избор на нов генерален секретар на ОН ќе се случи утре.

Гутереш речиси со сугурност ќе биде новиот генерален секретар на светската организација, иако по правилото на географска ротација ова место требаше да му припадне на кандидат од Источна Европа, а се очекуваше и дека првпат жена ќе застане на чело на светската организација.

Инаку, на актуелниот генерален секретар на ОН, Бан Ки-мун, мандатот му истекува во декември.