!Во периодот што претстои работиме на воведување систем за пристап и за претплата. За начинот на пристап и за претплатата ќе информираме дополнително. Содржините на „Мета“ до тогаш се слободни за преземање со задолжително цитирање и атрибуирање.

Законот за јазиците в понеделник се враќа пред пратениците


Скопје, 10 ноември, 2017 - 15:29 (META) 

Продолжението на дебатата за законот за употреба на јазиците в понеделник ќе се најде на дневен ред на пленарна седнца во Собранието, информираше денеска на брифинг за новинарите претседателот на законодавниот дом, Талат Џафери.

Според него, дебатата за овој закон би требало да трае до крајот на следната недела, доколку во меѓувреме не стигне предлогот за новите членови на Владата, на кој ќе му се даде предност поради актуелноста.

Џафери очекува до крајот на годината да има седници и за именувањето на нов државен јавен обвинител, за ратификување на Договорот за добрососедство со Бугарија како и седница за пратенички прашања која би требало да се одржи на 24 ноември,

Пред пратениците треба да се најде и буџетот за 2018 година, потоа изборот на потпретседатели на Собранието, како и посебна седница на која треба да се обрати претседатлот на државата, Ѓорге Иванов.

Прашан дали ќе се обраќа во Парламентот на албански јазик откако ќе се изгласа законот за употреба на јазиците, Џафери рече дека суштината на законот не е тоа, туку собраниските материјали да бидат достапни на албански јазик.

– Не сакам да се претворам во преведувач и нормално мене никој не може да ми го исклучи микрофонот, но тоа не е суштината на законот – рече Џафери.

За процесот „Жан Моне“, тој рече дека прво таму ќе се отвораат полесни политички теми за да се направи атмосфера во која што ќе може да се отворат и потешки политички теми, но дека тоа не значи дека таму ќе се решаваат сите прашања во однос на реформите кои треба да се реализираат.

Џафери информираше дека досега до Собранието не пристигнала иницијатива за анкетна комисија за случајот „Диво насеље“ и дека од процедурален аспект нема пречки ваква комисија да се формира затоа што тоа не значи дека Собранието влегува во ингеренциите на судската власт.

Според динамиката, Џафери смета дека Договорот со Бугарија ќе биде ратификуван откако ќе се изгласа буџетот за 2018 година.


Ахмети: Меѓународна истрага и анкетна комисија во Собрание за случајот „Диво Насеље“


Скопје, 6 ноември, 2017 - 19:14 (META) 

Претседателот на Демократската унија за интеграција, Али Ахмети, на средба со францускиот амбасадор во земјава, Кристијан Тимоние, му кажал дека очекува за случајот „Диво Насеље“ да биде вклучена меѓународна истрага, да биде формирана анкетна комисија во Собранието и да има целосно расветлување на вистината.

Како што се наведува во соопштението на ДУИ, соговорниците разговарале за локалните избори, политичката ситуација, реформските процеси во Македонија, како и за евроатлантската интеграција на земјата.

„Во однос на реформите, Ахмети рече дека ДУИ останува посветена да ги води реформите во Собранието и во Владата, како услов за продолжување на реформскиот процес со истиот интензитет по завршувањето на изборите. Ахмети говореше и за интензивирање на напорите за надминување на споровите со соседите и за отворање на нашиот пат кон Брисел. Периодот пред нас припаѓа на спроведувањето на политиките кои се поддржани од граѓаните“, се вели во партиското соопштение.


Џафери: Обврска на партиите е да најдат консензус за нов датум за локалните избори


Скопје, 12 мај, 2017 - 15:34 (META) 

Претседателот на Собранието, Талат Џафери, на брифинг со новинари истакна дека политичките партии мораат да најдат заедничко решение и да се договорат за нов датум за одржување на локалните избори, пред тој да свика седница на која ќе се измени Изборниот законик.

Иако претходно Џафери рече дека на првата наредна седница ќе се формира владата, тој сега додаде дека треба паралелно да се работи на наоѓање решение за локалните избори. Според Џафери, доколку има политички консензус, целата процедура може да се заврши за еден ден.

– Јас, како претседател на Собранието, не можам самоиницијативно да ги распишам локалните избори. Комуницирав со лидерите на партиите, со Зоран Заев, Али Ахмети и со претставник на ВМРО-ДПМНЕ, бидејќи не успеав директно со лидерот Никола Груевски, и ги запознав со процедурите. Сега, обврска на политичките партии е да најдат консензус и откако ќе се договараат, да го известат Собранието за да може да почнат процедурите. Датумот за избори треба да го договорат партиите и да внимаваат на рокот зашто од распишувањето на изборите до нивното одржување треба да поминат 70 дена. Прашањето се решава со сеопфатен договор, но тоа не значи дека ако една партија не се согласи, треба да се блокира целиот процес. Изборниот законик не може да се измени ако не се усогласи датумот. Партиите нека не се впуштат во условување на една власт кон друга затоа што ако тоа се случи, ќе има целосна блокада на локалната самоуправа – рече Џафери.

Според новоизбраниот претседател на Собранието, треба да се формира анкетна комисија за расчистување на настаните на 27 април, но, како што истакна, тоа не е негова надлежност туку на пратеничките групи.

– Јас сметам дека тоа би требало да се направи затоа што покрај материјалната штета што е направена на Собранието, направена е и политичка штета. Неминовно е дека треба да се почне процедура за политичка одговорност на вмешаните пратеници за да се спречи во иднина некој друг да се скрие во костумот на пратеник и да направи слично дело – нагласи Џафери.

За седницата на која треба да се гласа новата влада, Џафери рече дека роковите течат откако ќе се добие мандатот. Претседатело на Собранието појасни и дека 15 дена по добивањето на мандатот, тој треба да свика седница, која, пак, треба да заврши во рок од 48 часа.

– На 19 мај истекува рокот на Иванов и не можам ништо да преземам додека не истече тој рок. Јас не го молам Иванов туку чекам да поминат законските рокови. Но, формално-правно, нема пречка да се избере влада без да се додели мандатот – вели Џафери.

Новоизбраниот претседал на Собранието додаде дека в понеделник ќе свика координација на претставниците на политичките партии во Собранието и дека потоа ќе се одлучи кога ќе се продолжи конститутивната седница и по кој тек таа ќе се одвива.

Ова беше прва официјална средба на претседателот на Собранието со новинарите, а присуствуваа голем број претставници на медиумите. Претходно, во Собранието, Џафери се сретна со амбасадорите на земјите членки на ЕУ во земјава.


До понеделник список на сведоци за Анкетната комисија за личните карти


Скопје, 28 јануари, 2016 - 15:32 (META) 

Членовите на Анкетната комисија за скандалот со фабриката за фалсификување лични карти, пасоши, афери и други документи денеска го изгласаа деловникот и планот за работа на комисијата.

Членовите на комисијата го поддржаа барањето на независната пратеничка Солза Грчева за и независниот пратеник да има право да предложи сведоци. Тие се согласија до понеделник сите да достават листа на сведоци и листи со институции што ќе треба да се посетат и до кои комисијата писмено ќе треба да се обрати за некакви информации.

Наредната седница ќе се одржи следната недела.


Анкетната комисија за фалсификуваните лични документи почна со работа без СДСМ


Скопје, 28 јануари, 2016 - 14:54 (META) 

„Целта на комисијата е да го расчисти скандалот со создавање хаос во државата. А СДСМ со тоа што не учествува, очигледно сака да ја блокира работата и да избега од избори“, изјави Илија Димовски, претседателот на новоформираната собраниска Анкетна комисија за скандалот со фабриката за фалсификување лични карти, пасоши, афери и други документи.

Според Петре Шилегов, пак, која ја води Анкетната комисија за скандалот со прислушувањето, таа не ја исполнила својата задача и нема да го стигне рокот за да поднесе извештај што е обврска од Договорот од Пржино.

– СДСМ нема да учествува во драмолетките на ВМРО-ДПМНЕ – изјави Шилегов.

Комисијата ја води Илија Димовски, координатор на пратеничката група на ВМРО-ДПМНЕ, потпретседател е Љупчо Димовски, а членови се Трајчо Димков, Благоја Деспотовски, Лилјана Кузмановска, Благица Ласовска, Андон Чибишев, Драган Данев, Талат Џафери, Ејуп Рустеми, Газменд Алији и Солза Грчева.

Оваа анкетна комисија се формираше на иницијатива на ВМРО-ДПМНЕ, а опозицијата одби да учествува во нејзината работа со образложение дека една анкетна комисија веќе постои и треба да се создадат услови таа да може да фунционира, а не да се прават паралелни комисии.

Во меѓувреме, останува парализирана работата на Анкетната комисија за скандалот за прислушувањето што на иницијатива на СДСМ беше формирана според Договорот од Пржино, бидејќи сведоците на ВМРО-ДПМНЕ одбиваат да сведочат јавно.


Прва седница на Анкетната комисија за аферата со личните карти


Скопје, 28 јануари, 2016 - 10:15 (META) 

Анкетната комисија за расветлување на скандалот со фалсификувањето на личните документи денеска ќе ја одржи првата седница.

На дневниот ред има две точки – усвојување на деловник и на договор за работа на комисијата.

Комисијата ја води Илија Димовски, координатор на пратеничката група на ВМРО-ДПМНЕ, потпретседател е Љупчо Димовски, а членови се Трајчо Димков, Благоја Деспотовски, Лилјана Кузмановска, Благица Ласовска, Андон Чибишев, Драган Данев, Талат Џафери, Ејуп Рустеми, Газменд Алији и Солза Грчева.

Оваа Анкетна комисија се формираше на иницијатива на ВМРО-ДПМНЕ, а опозицијата одби да учествува во нејзината работа со образложение дека една анкетна комисија веќе постои и треба да се создадат услови таа да може да фунционира, а не да се прават паралелни комисии.

Во меѓувреме, останува парализирана работата на Анкетната комисија за скандалот за прислушувањето што на иницијатива на СДСМ беше формирана според Договорот од Пржино, бидејќи сведоците на ВМРО-ДПМНЕ одбиваат да сведочат јавно.


Анкетната комисија утре ќе пропадне како жртва на затворените седници


Скопје, 21 јануари, 2016 - 12:39 (META) 

Дали Анкетната комисија за скандалот со прислушувањето ќе биде една од жртвите на кризата во спроведувањето на Договорот од Пржино? Утре e последниот ден кога членовите на Анкетната комисија за прислушуваните разговори ќе можат да сослушуваат сведоци или да одат на посета во некоја од државните институции.

Пет дена остануваат до крајниот рок да се одржи седница на која треба да се дадат препораки и уште една недела за комисијата да го поднесе завршниот извештај.

Повеќе од еден месец Анкетната комисија нема одржано ниту една седница, нема извршено ниту една од договорените посети на институции ниту, пак, пред членовите сведочел друг сведок освен поранешниот премиер Никола Груевски, кој не сакаше да зборува јавно, туку на затворена седница.

Претседателот на комисијата, Петре Шилегов, вели дека сè уште е рано за со сигурност да се каже што ќе се случува понатаму.

– Очигледно дека со непојавувањето на Груевски да сведочи на отворена седница, ВМРО-ДПМНЕ сака комисијата да не работи и да не успее да поднесе извештај – рече Шилегов.

Последната седница на Анкетната комисија за скандалот со прислушувањето се одржа на 17 декември минатата година. На таа седница требаше да сведочи министерот за финансии, Зоран Ставрески, но бидејќи тој се повика на член 4, став 4 од деловникот и побара седницата на комисијата да биде затворена, претседателот Шилегов ја прекина седницата и не дозволи таа да се одржи зад затворени врати. Според него, комисијата е направена за граѓаните да можат да ги следат работата и сведочењата и да имаат увид во аферата со прислушуваните разговори.

Како што се договорија пратениците – членови на Анкетната комсија, од 7 декември до 22 јануари требаше да завршат со посета на институциите и со сослушување на сведоци. На 26 јануари требаше да одржат седница  на која ќе дадат препораки и на 29 јануари да го подготват извештајот.

Анкетната комсија беше дел од Договорот од Пржино на барање на СДСМ, за да се обезбеди политичка одговорност за тој што прислушувал и за криминалот за кој се дозна од „бомбите“ што ги објавуваше опозицијата.


Шилегов: Груевски да дојде јавно да сведочи пред Анкетната комисија


Скопје, 13 јануари, 2016 - 16:25 (META) 

Петре Шилегов, пратеник од редовите на СДСМ и претседател на Анкетната комисија за скандалот со незаконското прислушување, упатил писмо до премиерот Никола Груевски во среда, на 20 јануари, да се појави на седницата на комисијата и јавно да сведочи.

Шилегов упатил и писмо до Трајко Вељаноски да не закажува пленарна седница, за да може да биде исполнет условот, седницата на Анкетната комисија, кога ќе сведочи Никола Груевски, да се пренесува директно на собранискиот канал на МРТВ.

– Само на овој начин се создаваат услови Анкетната комисија за скандалот со незаконското прислушување да продолжи со работа, откако беше блокирана од страна на ВМРО-ДПМНЕ. Јавноста знае дека Никола Груевски и ВРМО-ДПМНЕ најголем проблем имаат со вистината и со правдата. Но, успешната работа на Анкетната комисија е обврска од Договорот од Пржино, која мора да биде спроведена во целост. За криминалот и за корупцијата на власта во изминатите 10 години, граѓаните очекуваат одговори и одговорност, а не тајни сослушувања, скриени од очите на јавноста – вели Шилегов.

Шилегов додаде дека наместо да се крие зад затворени врати и да бега од граѓаните, Никола Груевски има обврска да дојде на јавна седница и да одговори на сите прашања.


Димовски избран за претседател на комисијата за аферата со личните карти


Скопје, 11 јануари, 2016 - 11:34 (META) 

Координаторот на пратеничката група ВМРО-ДПМНЕ, Илија Димовски, ќе биде претседател на анкетната комисија што треба да се занимава со расчитување на скандалот со фабриката за фалсификување лични карти, пасоши, афери и други документи, одлучија денеска членовите на Комисијата за изборите и за именувањата.

Претставниците од СДСМ не присуствува на денешната седница на Комисијата за избори и за именувања ниту, пак, предложија свои членови.

Потпретседател ќе биде Љупчо Димовски, исто така од ВМРО-ДПМНЕ, а членови од владејачката партија ќе бидат Трајче Димков, Благоја Деспотовски, Лилјана Кузмановска, Благица Ласовска, Андон Чибишев и Драган Данев.

Претставници на ДУИ во оваа комисија ќе бидат Талат Џафери и Ејуп Рустеми, од ДПА – Газменд Аљији, додека независен член ќе биде Солза Грчева.

Предвидено е во оваа комисија бројот на членови да биде ист како и во Анкетната комисија за прислушувањето, односно вкупно 16 члена, од кои осум од ВМРО-ДПМНЕ, четири од СДСМ, двајца од ДУИ, еден од ДПА и еден независен член.

Претседателот на Комисијата за избори и за именувања, Зоран Илиоски, рече дека кога ќе стигнат предлозите од СДСМ, тој ќе закаже седница на која ќе бидат додадени новите членови. Илиоски, исто така, рече дека ако СДСМ поднесе барање за јавен пристап до информации, за документите, со дипломата и со работниот стаж на Силвана Бонева, во рок од 24 часа тие ќе им бидат дадени на увид. Тој, исто така, рече дека претставници од СДСМ можат да дојдат кај него во канцеларија, каде што тој ќе им ги покаже документите.


Ќе се избира претседател на комисијата за аферата со личните карти, СДСМ нема да учествува


Скопје, 11 јануари, 2016 - 10:20 (META) 

Собраниската комисија за прашања на изборите и на именувањата денеска во 11 часот треба да одржи седница.

Според дневниот ред, предвидено е да се избере претседател и потпретседател на анкетната комисија што треба да се занимава со расчитување на скандалот со фабриката за фалсификување лични карти, пасоши, афери и други документи.

Координаторот на пратеничката група на СДСМ, Горан Сугаревски, утринава ни потврди дека СДСМ останува на ставот да не учествува во работата на оваа комисија и да не предложи свои членови.

– Во Собранието веќе има една анкетна комисија, која, меѓу другото, треба да се занимава и со расчистувањето на овој скандал, затоа што дел од овие работи за гласачи од Пустец и за незаконски издавани лични карти ги имаше и во „бомбите“. Ние нема да учествуваме во работата на оваа комисија ниту, пак, ќе предложиме членови од нашата пратеничка група – телефонски ни изјави Сугаревски.

Комисијата за прашања на изборите и на именувањата седница одржа и во петокот, но претседавачот на комисијата, Трајче Димков, го одложи изборот на членови за да им остави простор на партиите да преложат свои членови.