Грчкиот парламент во жешка атмосфера попладнево гласа за договорот за името


Атина, 25 јануари, 2019 - 11:13 (META) 

Иако во грчкиот парламент требаше да се гласа ноќеска за ратификација на Преспанскиот договор, постапката се развлече поради огромниот број пријавени пратеници за збор, поради што најверојатно за ратификацијата ќе се гласа денеска околу 14.30 часот по локално време.

Сè уште е неизвесно каков ќе биде исходот, оти последните анкети во Грција покажуваат сериозна предност на опозициската Нова Демократија, која остро се противи на Договорот од Преспа,  пред владејачката СИРИЗА.

Од вкупно 300 пратеници, за дискусијата збор побарале 230. Додека вчера траеше дебатата, околу 5 илјади членови на националистички организации беа собрани на протести пред парламентот во Атина но и во Солун извикувајќи „Македонија е само грчка“. Дел од нив фрлаа со пиротенички материјали и камења врз полицијата. Припадниците на полициските сили употребија заслепувачки гранати, спреј и палки за растерување на насилните демонстранти.

Лидерот на опозициската Нова Демократија, Киријакос Мицотакис, го обвини грчкиот премиер дека ги „игнорира патриотските чувства“ на милиони Грци. Тој се закани дека ќе го блокира членството на Македонија во ЕУ доколку неговата партија биде победник на изборите.

– Приклучувањето на Скопје во ЕУ не е поврзано со Преспанскиот договор. Грција во секој момент ќе може да стави вето на приклучувањето на Скопје во ЕУ. А, јас лично, ве уверувам дека нема да се откажам од ова национално право – рече лидерот на опозицијата.

Одговарајќи им на сите кои се противат зборот Македонија да биде во името на северниот сосед, грчкиот премиер Алексис Ципрас синоќа во парламентот ги потсети грчките комунисти на „славомакедонскиот буквар и Славомакедонката Мирка Гинова“. Тој во говорот одговори и на сите критики од неговиот политичкиот опонент – лидерот на Нова Демократија, Кирјакос Мицотакис, а потсети на отстапки што ги направиле неговите претходници и политичари од претходни гарнитури, но и некои политичари што го критикуваат за „национално предавство“.

Според Ципрас „токму инерцијата и одложувањето кои станале доктрина за надворешната политика на Грција, завршувале со постојани дипломатски порази за грчката страна и резултирале со тоа повеќе од 130 земји, вклучувајќи ги САД, Русија и Кина, соседната земја да ја нарекуваат Македонија“.

– Каде бевте во 2008-2009 година, кога беше договорено визна либерализација за пасоши на македонски граѓани во Шенген-зоната? – ги праша Ципрас своите политички опоненти.

Грчкиот премиер им се обрати и на пратениците од Комунистичката партија, спомнувајќи ја антифашистичката хероина Мирка Гинова, (родена во село Русилово, Воденско, и осудена на смрт со стрелање на 26 јули 1946 година во Ениџе-Вардар). Тој ја именуваше со македонското име, и со името (Ирини Гини) со кое ѝ се обраќале членовите на грчката Комунистичка партија.

-Не сакам да ја критикувам историјата на Комунистичката партија на Грција, онаа која се однесува на славомакедонскиот буквар кој ваши членови им го делеа во Ташкент на децата на славомакедонските борци на ДАГ. Ниту 70.000 цивилни бегалци кои грчката држава ги лиши од правото да се вратат во својата татковина во 1983 година. Ниту Славомакедонката Ирини Гини, Мирка Гинова, првата жена стрелана во граѓанска војна. Вие и вашите луѓе соочете се со тоа – рече Ципрас.

Тој ги осуди и нападите против одредени грчки пратеници кои се залагаат за Договорот за Преспа.

Како и да е, сè уште е неизвесно како ќе гласаат независните пратеници, ако се земат предвид најновите анкети што ја затресоа Грција, покажувајќи дека остриот противник на Преспанскиот договор, опозициската Нова Демократија, значително води пред СИРИЗА во однос на расположението на гласачите за изјаснување на парламентарни избори.

Инаку, според најновата анкета направена од „Пулс“ за телевизијата Скај, Нова Демократија води пред СИРИЗА со 10,5 отсто, додека во анкетата направена за in.gr, предноста на опозицијата пред владејчката партија е 9,8 отсто.

Според „Пулс“, Нова Демократија има 33 отсто доверба, што е пад за половина процент во однос на претходната ваква анкета. СИРИЗА има доверба од 22,5 отсто, што исто така е половина процент помалку отколку на претходната анкета на „Пулс“, а треба е ултрнационалистичката „Златна Зора“ со 8 отсто. Таа доживеала пораст на довербата од 1 отсто во однос на претходната анкета, a по неа е КИНАЛ, коалицијата на ПАСОК, со 6,5 отсто доверба, а Комунистичката партија има 5,5 отсто, а  на претходната анкета на „Пулс“ забележала 6 отсто доверба.

Во проценките кој би победил на парламентарни избори ако се одржат сега, води Нова Демократијат на Киријакос Мицотакис со 59 отсто (на претходната анкета 57 отсто), а шанса за победа на СИРИЗА дале само 22 отсто од испитаниците (на претходната анкета 25 отсто).

Претседателот на Независни Грци, Панос Каменос, на „Твитер“ напиша дека бара оставки од 101 пратеник за да се спречи ратификација на Договорот од Преспа кој треба да се гласа денеска во грчкиот Парламент.

Каменос најпрво самиот понудил оставка, а потоа побарал уште 100 пратеници да го сторат истото.

„Најпрво ќе ја поднесам мојата оставка. До 14 часот ќе можеме да ја спречиме ратификацијата на Договорот од Преспа со 101 оставка во парламентот и да со тоа да ставиме крај на овој договор“, напиша Каменос.


Анкета на „Факултети“: 83,7 отсто кога би можеле би се отселиле од Македонија


Скопје, 4 јануари, 2019 - 12:29 (META) 

Анкетата на порталот „Факултети.мк“ со прашањето „Кога би можеле, дали би заминале од Македонија?“ покажала поразителни резултати. Дури 83,7 отсто од испитаниците би си заминале од Македонија кога би имале шанса. Анкетата била отворена пред две недели, а на прашалникот анонимно одговориле вкупно 1.474 читатели.

Порталот добил различни одговори од читателите за земјата каде што би се преселиле, а најчести биле Германија, Австралија, Канада, Франција, Холандија, Данска, Австрија, Скандинавија, Швајцарија, Словенија, Нов Зеланд, Шведска, САД, Англија … но добиле и одговори „Каде било, само не Македонија“, „Подалеку оттука“, „Во земја каде што владеат закони и каде што има нормален здравствен систем и образование“.

На прашањето: „Зошто би заминале?“ одговориле 1.054 читатели. Најчестиот кус одговор бил „за подобар живот“.

– Катастрофално лошо функционирање на сите институции. Корупција, мито, непотизам. Голема злоупотреба на должностите и функциите што им ги доверила државата. Лоша инфраструктура, лоша организација во функционирањето на сите институции. Тие што се одредени да ја организираат работата и функционирањето на институциите се неспособни, корумпирани, алчни да заработат многу за кратко време. Не постојат долгорочни планови за развој и напредок. Корумпирана полиција, судство… Здравствениот систем многу лошо организиран, нефункционален. Образовниот систем корумпиран. Факултетите се натпреваруваат кој ќе им додели (продаде) повеќе дипломи на неспособни кадри! Способните, вредните, тивките, трудољубивите… се оставени на маргините, да се снаоѓаат како знаат и умеат – одговорил еден од читателите.


Анкета: Заев со највисок рејтинг, СДСМ има најмногу доверба кај Албанците


Скопје, 22 ноември, 2018 - 10:00 (META) 

Мнозинство од граѓаните, односно 66,9 отсто се против амнестија, а 58,9 отсто се против предвремени избори покажува најновата анкета на телевизија „Телма“ и невладината МЦМС.

Што се однесува до амнестија за обвинетите и учесниците во настаните од 27 Април во Собранието, 57,8 отсто не се согласуваат со амнестија, 37 проценти се согласуваат.

Анкетата покажува дека премиерот Зоран Заев е во убедливо водство со 21,4 отсто рејтинг. Лидерот на ВМРО-ДПМНЕ, Христијан Мицковски е зад него со 14 процентни поени, со раст во личниот рејтинг и прв пат над претседателот Ѓорге Иванов чиј рејтинг е во пад и застанува на само 6 отсто. Следува Ахмети со 5,7, Села 3,8 отсто, и избеганиот Никола Груевски кој е во слободен пад со 2,7 отсто, рејтинг во рамките на статистичките грешки.

Големата поддршка на Заев доаѓа и од популарноста кај Албанците – со 17,6 отсто поддршка тој е втор лидер по популарност кај етничките Албанци. Прв е лидерот на ДУИ, Али Ахмети со 23 отсто , а трет Зијадин Села со 16 проценти. Највисока е бројката кај оние кои немаат доверба во ниту еден политичар – 39,9 проценти.

Според истражувањето, рејтингот на СДСМ расте, додека на опозициската ВМРО-ДПМНЕ паѓа. Владејачката партија има 26,8 отсто, 21,5 проценти се изјасниле за ВМРО-ДПМНЕ, за ДУИ 6,7 отсто, потоа е Алијансата со 3 проценти, БЕСА со 2,4 додека нема да гласаат 21,3 отсто.

Според етничка припадност. ВМРО-ДПМНЕ има водечки рејтинг кај Македонците – 30,4 отсто со пет процентни поени пред СДСМ која 25,5 проценти. СДСМ е прва партија кај Албанците со 27,5 отсто, додека ДУИ е втора со половина процент помалку.


Нова демократија води со 10 отсто пред СИРИЗА на најновата анкета


Атина, 4 октомври, 2018 - 10:27 (META) 

Опаѓа рејтингот на СИРИЗА на Алексис Ципрас на најновите анкети. Според сондажата на компанијата „Интервју“ опозициската Нова Демократија е грчка политичка партија со 30,9 отсто, додека партијата на Ципрас доби 21,3 отсто.

Анкетата е правена со прашањето „За која партија би гласале ако следната недела се одржат општи парламентарни избори?“.

Зад двете први партии се Златна зора со 7,2 отсто, Комунистичката партија на Грција со 6,6 отсто и Движењето за промени (во кое е и ПАСОК) со скромни 6,4 отсто.

Бројките не се добри ниту за владиниот партнер на Ципрас, Панос Каменос, бидејќи според анкетата, Независни Грци, со само 1,7 отсто, во случај овој рејтинг да се потврди на избори, би останале надвор до Пралементот.

Опозицискиот весник „Елефтерос типос“ смета дека резултатите од анкетата се „шлаканица в лице за Ципрас“.


Димески: Законите најчесто се носат без проценка на финансиските импликации


Скопје, 2 октомври, 2018 - 14:22 (META) 

Граѓаните и деловниот сектор во Македонија постојано укажуваат на честите промени на законската регулатива и усвојување нови закони кои наметнуваат скриени трошоци. Искуствата покажуваат дека надлежните институции кои се јавуваат како предлагачи на законите не подготвуваат проценка за влијанието на регулативата и не земаат предвид какви ефекти ќе предизвикаат новите одредби во општеството. Како да се подобри оваа состојба и да се зголеми искористувањето на постоечките алатки за комуникација меѓу предлагачите и засегнатите страни се прашања на кои побаравме одговор од Јане Димески од Институтот за демократија „Социетас Цивилис“ каде подолг период се занинаваат со оваа проблематика.

Институт за демократија „Социетас Цивилис“ преку теренска анкета неодамна истражуваше каква е перцепцијата на јавноста за процесот на проценка на влијанието на регулативата (ПВР). Какви беа главните наоди?

anketa infografik

– Направивме анкета на национално ниво во рамки на проектот „Проценка на влијание на регулативата во сенка“ кој го спроведуваме заедно со Центарот за економски анализи, и наодите укажуваат дека тој процес е генерално непознат за широката јавност, иако е воведен уште во 2009 година. Под непознат не мислиме дека луѓето не се запознаени со етапите и деталите од процесот, туку дека во 2017 година дури 77 проценти од анкетираните воопшто немаа слушнато дека постои нешто што се нарекува ПВР. Тоа е голем проблем со оглед на тоа што последните години има засилени барања и очекувања во јавноста за отворање на процесите на создавање на законите и политиките за пошироко учество, а од друга страна алатките кои стојат на располагање за токму такво учество остануваат непознати. Притоа, поголем дел од граѓаните кои ги анкетиравме сметаат дека при изработката на законите и прописите не се користат истражувања односно тие не се засноваат на факти. Исто така, секој втор од анкетираните граѓани (53 проценти) смета дека Владата и Собранието не прават ниту проценка на трошоците од воведување на некое ново законско решение. Сепак, иако не знаат дека формално постои ваква процедура поголем дел од граѓаните рационално заклучуваат дека кога се менуваат или се носат нови закони треба да се испитаат и економските и социјалните влијанија од нив. Тоа оди во иста насока со она што треба да го прави ПВР процедурата доколку суштински се почитува.

Неизбежен е заклучокот дека мнозинство од граѓаните, но и од вработените во надлежните институции кои најчесто се јавуваат како предлагачи на законската регулатива воопшто не знаат дека постојат алатки за проценка на влијанието на регулативата. Како го објаснувате овој феномен?

– Точно. Настрана од очекуваното сознание дека обичните граѓани кои не се секојдневно поврзани со административни процеси не се запознаени со постоењето на ПВР интересно е што кога ги вкрстивме податоците според работниот однос на испитаниците произлезе дека дури 72 проценти од оние кои изјавија дека се вработени на некое ниво во државниот сектор исто така воопшто не слушнале за ПВР. Тоа е позагрижувачко со оглед на тоа што ПВР првенствено се смета за алатка на администрацијата за проценка на влијанието од легислативата која се носи со цел поефикасно користење на јавните ресурси и од тоа да има попозитивни ефекти врз општеството и да има можност да процени доколку некој закон би имал некакви негативни влијанија. Значи во ПВР првенствено е вклучена администрацијата на различни нивоа и поради тоа очекувавме повеќе од луѓето од државниот сектор да имаат барем основно познавање за процесот, меѓутоа тоа не е така.

anketa infografik 2

Според вашите сознанија, колку често во Македонија се предлагаат и усвојуваат закони без да има проценка за финансиските импликации по буџетот и ефектите што ќе ги имаат прописите врз граѓаните?

– Порано почесто поминуваа такви закони. Сега барем формалната процедура за повеќето од законите се запазува да вклучува ПВР, но различно прашање е колку е тоа суштински успешно. Најчести се оние кои велат дека законот нема да има финансиски импликации иако само ако го прочитате воведот на законот ќе ви стане јасно дека такви импликации ќе има. Во секоја ПВР анализа треба да бидат понудени три опции како ќе се решава еден проблем и секоја да биде аналитички поддржана со податоци и истражувања. Едната треба да покажува што ќе се случува ако не се преземе ништо, а другите две опции треба да покажат какви ќе видат влијанијата и колку ќе чини ако еден проблем се решава на два различни начини.

Притоа тие што го пишуваат документот треба врз основа на фактите да заклучат која од тие две опции е преферирана и да објаснат зошто. Такви документи во системот на ЕНЕР кој е јавно достапен на адресата ener.gov.mk се исклучително ретки. Неодамна организиравме работилница на која комбинирани групи составени од претставници на граѓански организации и министерства анализиравме повеќе такви документи за различни закони и заклучивме неколку работи. Прво, дека за многу нешта нема доволно добри информации и статистики со оглед на тоа што немаме нов попис на населението. Второ, дека и во тие области во кои има многу податоци тие не биле искористени во анализите иако се јавни и лесно достапни. Трето, дека често воопшто не е објаснета целта за која се носи законот што може да е резултат и на тоа што претходно не е јасно идентификуван проблемот што тој закон треба да го решава, што е основа за создавање на неприменливи закони. Законите за кои не се предвидени трошоците од буџетот, трошоците на економијата и граѓаните едноставно ги има многу повеќе отколку оние за кои овие трошоци се барем приближно проценети.  Тоа сè уште е доминантна практика.

Каде треба да се бара решението за поголемо вклучување на граѓаните и бизнис секторот во подготовка на законската регулатива? 

– За почеток прво неминовно ќе биде да се промовира процесот и електронскиот систем ЕНЕР на кој граѓаните може да ги читаат и коментираат сите закони уште во фазата на нивните нацрт верзии. Мора да се засилат ПВР тимовите во министерствата, како и способноста на граѓанските организации да следат спроведување на вакви анализи при нивното креирање. Владата конечно мора да почне да прави реални планови за својата годишна работа и строго да се држи до нив. Со тоа министерствата, Собранието и јавноста ќе знаат точно во кој месец кој закон ќе се носи и ќе може да се подготвуваат и да истражуваат за нив. Досегашното искуство покажува дека она што Владата го дава како план во својата годишна програма за работа најчесто е далеку од она што реално се носи како легислатива. Мора да се престане со носење закони или измени преку ноќ неколку пати годишно и да се прејде на темелен и посуштински законодавен процес во кој сите ќе имаат шанса да учествуваат со аргументи. Таквите закони ќе бидат подобри, потрајни и поевтини и секако поприфатени од граѓаните. Сега имаме закони кои се менуваат по неколку пати годишно и дури ниту самите правници кои работат на нив не успеваат да држат ритам.

disklejmer1-01


ИФИМЕС: На референдумот нема да излезат 17,4 отсто од граѓаните


Љубљана, 14 септември, 2018 - 9:28 (META) 

Вкупно 63,6 отсто од граѓаните на Македонија ќе учествуваат на претстојниот референдум, а 67,3 проценти се за членство во ЕУ и НАТО со прифаќање на Договорот од Преспа. На референдумот нема да излезат 17,4 отсто од граѓаните, додека 16,4 отсто не се за членство во ЕУ и НАТО со прифаќање на Договорот со Грција, покажува испитувањето на јавното мислење што го спроведе Меѓународниот институт за блискоисточни и балкански студии (ИФИМЕС) од Љубљана.

Во обемната студија во рамките на која е објавена и анкетата се вели оти се очекува силен хакерски напад врз Македонија со цел промена на волјата на граѓаните и спречување на успехот на референдумот.

Анкетата е направена од 1 до 10 септември годинава врз 1.218 испитаници во сите шест изборни единици.

Од испитаниците, 86,7 отсто сметаат дека македонските граѓани независно од етничките и политичките разлики, треба да покажат единство кога е во прашање полноправното членство во ЕУ и НАТО, додека 79,8 проценти мислат дека евроатлантската интеграција е правилна стратешка ориентација на државата.

Најголем процент од анкетираните, 74,2, го оцениле негативно работењето на претседателот на државата Ѓорге Иванов, позитивно се изјасниле 9,4 проценти, а став по ова прашање немаат 16,4 отсто.

Високи 79,2 отсто од испитаниците сметаат дека СЈО под водство на Катица Јанева добро си ја врши работата, 14,4 проценти имаат спротивно мислење, додека 6,4 немаат став.

Освен дел од внатрешните фактори, клучните предизвици на Македонија пред претстојниот референдум на 30 септември 2018 година доаѓаат од надвор, се вели во студијата. Јавно противење на членството на Македонија во НАТО изразија Србија и Русија. Затоа го зајакнаа безбедносно-разузнавачкото присуство во таа земја со цел нејзина дестабилизација пред претстојниот референдум.

Се предупредува и на голем хакерски напад врз Македонија.

„Сè е насочено кон Македонија, да се обиде да се спречи успешен референдум во таа мултиетничка земја, со што ќе се спречи нејзино членство во НАТО. Се очекува силен хакерски напад врз Македонија со цел промена на волјата на граѓаните и спречување на успехот на референдумот. Сепак, зад овие причини, се крие веројатно главната причина, а тоа е фактот дека по успешниот референдум следи долгоочекуваниот признавање на канонската автокефалноста на Македонската православна црква (МПЦ), која заеднички сакаат да ја спречат Србија и Русија“, се вели во студијата, која како главни противници ги посочува и на договорот ги посочува овие две земји.


Анкета на ИРИ: Голема поддршка за ЕУ и НАТО пред референдумот


Скопје, 29 август, 2018 - 11:33 (META) 

Новата анкета спроведена од Центарот за анкетни истражувања на Меѓународниот републикански институт (ИРИ) открива дека во Македобија постои високo ниво на  оптимизам и поддршка за членство во Европска Унија (ЕУ) и Северно-атлантската алијанса (НАТО) пред референдумот на 30 септември.

Според анкетата, поголемиот дел од македонските граѓани се за решавање на спорот за името со Грција. Вкупно 57 проценти „целосно или донекаде го поддржуваат“ предлогот Македонија да се зачлени во ЕУ и НАТО под новото име „Република Северна Македонија“.

Истиот процент (57 %) веруваат дека придобивките од членството го оправдуваат прифаќањето на новото име.

Половина од анкетираните (49 %) имаат намера да гласаат за решавање на спорот за името, споредено со 22 проценти, кои ќе гласаат против предложената промена.

„Како што Македонија се приближува кон овој важен референдум, поддршката за  компромисно решение на спорот за името кое би ги отворило вратите кон членство во ЕУ и НАТО укажува на силна наклонетост кон трансатлантските институции“, вели Пол Мекарти, в.д. регионален директор на ИРИ за Европа.

Поддршката за членство во ЕУ и НАТО продолжува да расте. Бројот на анкетираните кои го поддржуваат зачленувањето на Македонија во ЕУ порасна на 83 проценти – зголемување од шест проценти од август 2017 и зголемување од 11 проценти од март 2017. Поддршката за НАТО исто така останува силна со 77 проценти.

Анкетата исто така одразува постојан тренд на зголемен оптимизам и перцепција за националната стабилност. Триесет и седум проценти од анкетираните сметаат дека земјата се движи во вистинската насока — зголемување од 10 проценти од август 2017 и зголемување од 23 проценти од март 2017. Перцепцијата за стабилноста е исто така висока: Бројот на анкетирани кои сметаат дека Македонија е постабилна денес отколку пред една година (37 проценти) го надминува бројот на оние кои веруваат во спротивното (25 проценти) за прв пат во скоро девет години.

Анкетата е спроведена за Центарот за анкетни истражувања преку ГфК Скопје, преку директни контакти од  28 јуни до 15 јули 2018. Изработена е на примерок од 1.100 анкетирани возрасни граѓани на Македонија.


Анкета на МЦМС: Само 0,4 отсто предност на владејачката СДСМ пред ВМРО-ДПМНЕ


Скопје, 8 август, 2018 - 16:38 (META) 

Опозициската ВМРО-ДПМНЕ и се доближила на владејачката СДСМ во рејтингот, па доколку утре има парламентарни избори за СДСМ би гласале 24,4 отсто од граѓаните, а за ВМРО-ДПМНЕ само 0,4 отсто помалку односно 24 отсто, покажува анкетата на МЦМС.

За ДУИ би се одлучиле 6,9 проценти од анкетираните, за Алијанса за Албанците 2,7 отсто, за Беса 1,7 отсто, а „не знам“ односно „нема да гласам“ избрале 37,8 отсто од испитаниците.

Кај етничките Македонци, ВМРО-ДПМНЕ има мала предност 31,2 отсто наспроти СДСМ кои имаат 28,3 отсто. Владејачката СДСМ сè уште има поддршка кај 8 проценти од етничките Албанци, додека кај ВМРО-ДПМНЕ таа е помала од 1 отсто.

Анкетата ја спроведе агенцијата „М-проспект“ во периодот од 24 јули до 01 август 2018 година и е спроведена на примерок од 1.026 испитаници постари од 18 години, а сите резултати се подложни на статистичка грешка од 3,1 отсто со прифатливо ниво на доверба од 95 проценти.


Анкета на МЦМС: Повеќето граѓани би гласале за Договорот со Грција


Скопје, 8 август, 2018 - 10:32 (META) 

На референдумското прашање „Дали сте за членство во ЕУ и НАТО, со прифаќање на Договорот помеѓу Република Македонија и Република Грција“, „За“ би гласале 41,5%, а „Против“ – 35,1%, односно разликата е 6,4 процентни поени. Ова го покажа испитувањето на јавното мислење кое за МЦМС го спроведе агенцијата М-проспект во периодот од 24 јули до 1 август.

Сепак, помалку Македонци би гласале „За“ (27,4%) отколку „Против“ (45,2%), додека кај етничките Албанци поддршката „За“ е убедлива (88% наспроти само 2,2% „Против“).

Повеќето млади би гласале „За“ (49,2%), а со возраста опаѓа поддршката (34,9%).

Слична е тенденцијата и во однос на образованието – поголема поддршка на Договорот со Грција даваат тие со повисоко образование.

Во однос на партиската припадност, очекувано големи мнозинства на симпатизерите на најголемите две партии се во линија со партискиот став (75% од тие на СДСМ се „За“, а 68% од приврзаниците на ВМРО-ДПМНЕ се „Против“), но поголемо отклонување има кај СДСМ (14,6% нивни симпатизери ќе гласаат „Против“, наспроти 4,7% од тие на ВМРО-ДПМНЕ кои ќе гласаат „За“).

Дополнително, 20,6% од тие на ВМРО-ДПМНЕ изјавиле дека нема да излезат на гласање.

Анкетата е направена телефонски, на  повеќеслоен стратификуван примерок од 1.026 испитаници постари од 18 години, репрезентативен според пол, возраст, етничка припадност и место на живеење.


63,8 отсто од Грците негативно го оценуваат Договорот од Преспа


Атина, 5 јули, 2018 - 15:07 (META) 

Речиси 7 од 10 Грци негативно го оценуваат Договорот од Преспа меѓу Македонија и Грција, покажува истражувањето на агенцијата МРБ спроведено меѓу 22 и 29 јуни годинава, преку директни интервјуа со вклучени 2.000 граѓани со право на глас.

На прашањето „Врз основа на она што го знаете, она што го имате слушнато, што го имате прочитано, како во целост го оценувате договорот што го потпиша грчката влада со ПЈРМ?“, позитивен одговор одбрале само 12,8 отсто, 3,5 отсто рекле сигурно позитивно, 9,3 отсто веројатно позитивно, додека пак 68,3 отсто од испитаниците одговориле негативно. Од нив 48,4 отсто го оценуваат сигурно негативно договорот, а 19,9 отсто веројатно негативно.

Делот каде стои дека новото име на соседната земја ќе биде Република Северна Македонија и ќе се користи ерга омнес, 62 отсто од анкетираните го оценуваат негативно. Точката која што вели дека државјанството на жителите на соседната земја ќе биде македонско/граѓанин на Република Северна Македонија негативно ја оценуваат 64,4 отсто од испитаниците.

Над 7 од 10 анкетирани сметаат дека Грција можеше да постигне подобар договор (75,1 отсто), дека Договорот повеќе им служи на македонските интереси (73,3 отсто) дека е штетен за националните интереси на Грција (70,5 отсто) и дека во иднина ќе создаде сериозни проблеми (68,5 отсто).

На прашањето која земја ја сметате се реална закана за Грција и со можност да одберат најмалку две од понудените одговори: Турција, Албанија, Македонија и Бугарија, 15,4 отсто од испитаниците ја одбираат Македонија, со што нашата земја е на третото место. 87,9 отсто од испитаниците одговориле Турција, 33,5 отсто Албанија, а само 6 отсто Бугарија.