Анкета: Заев води со 24,1 отсто, Мицкоски со само 2,9 отсто, Груевски со огромен пад


Скопје, 31 мај, 2018 - 9:54 (META) 

Ако утре се одржат избори СДСМ би добил најмногу гласови односно за таа партија би гласале 25,5 проценти од граѓаните, а за ВМРО-ДПМНЕ би гласале 20,6 проценти, покажува анкетата на телевизија „Телма“ и невладината МЦМС.

Во албанскиот политички блок води ДУИ со 7,4 процент, за Алијанса на Албанците се определиле 2,9 проценти, а за БЕСА – без разграничување кое од двете крила – се определиле 2 проценти. Високи 26,2 проценти не сакале да дадат одговор на ова прашање, а 11,8 отсто рекле дека нема да гласаат.

Убедливо најголем рејтинг има премиерот и лидер на СДСМ, Зоран Заев, со 24,1 процент. Претседателот Ѓорге Иванов е втор на рејтинг листата, со 9,9 проценти и има повисок рејтинг од екс-премиерот и лидер на ВМРО-ДПМНЕ, Никола Груевски кој доби поддршка од 6,1 процент.

Лани во мај највисок рејтинг имаше тогашниот лидер на ВМРО-ДПМНЕ, Никола Груевски со 28,5 проценти. Груевски за една година има пад на рејтингот од 22,4 проценти. Неговиот наследник во партијата Христијан Мицкоски ужива поддршка на само 2,9 проценти, што е идентичен процент со поддршката која ја ужива и лидерот на Алијанса за Албанците, Зијадин Села. Лидерот на ДУИ, Али Ахмети, ужива поддршка од 4,1 процент.

Истражувањето покажа дека доверба на ниту еден од политичките лидери во анкетата не би им дале дури 31,3 отсто од граѓаните, а 11,5 проценти не знаат за кого би гласале.

Средната оценка за работата на премиерот Зоран Заев од граѓаните е 2,78 отсто. За најниска оценка – единица, се одлучиле 26 отсто од испитаниците, 22,2 проценти го оцениле Заев со тројка, додека 15,5 отсто со четворка. Петка добил од 15,2 проценти од анкетираните, додека 14,4 отсто го оцениле со двојка.


На референдум, 61,5 отсто од граѓаните би гласале против Илинденска Македонија


Скопје, 30 мај, 2018 - 14:34 (META) 

Мнозинството граѓани – 61,5 отсто – би гласале против на референдум за името Република Илинденска Македонија, покажа анкетата спроведена од „М-проспект“ во соработка со МЦМС.

Со „не” би гласале мнозинството од етничките Македонци односно 70,5 отсто. Големо мнозинство од симпатизерите на ВМРО-ДПМНЕ исто така не би го подржале овој предлог односно со „не“ би гласале 92,7 проценти. Етничките Албанци во 52,8 отсто од случаите одговориле дека Република Илинденска Македонија за нив е прифатливо решение. За симпатизерите на СДСМ овој предлог е прифатлив во 56,4 проценти од случаите додека за симпатизерите на ДУИ во 62,5 отсто од случаите.

Споредено со резултатите на теренската анкета спроведена во април 2018, за граѓаните додавката Илинденска е помалку прифатлива од додавката Горна – 41,5 отсто би прифатиле промена во Горна, споредено со 27,2 отсто кои би прифатиле Илинденска.

Нешто повеќе од една третина од испитаниците, односно 38,9 отсто, би гласале на референдум за Република Илинденска Македонија кога земјата ќе стане членка на ЕУ,

Од етничките Македонци, 63,8 отсто би гласале со „не”, а етничките Албанци во речиси три четвртини (72,1%) од случаите одговориле дека за нив е прифатливо решение Република Илинденска Македонија кога земјата ќе стане членка на ЕУ.

Споредбено по политичка припадност, овој предлог е најнеприфатлив за ВМРО-ДПМНЕ кои 89,5 отсто би се изјасниле со „не“, за симпатизерите на СДСМ овој предлог е прифатлив во 71,8 проценти од случаите, додека за симпатизерите на ДУИ во 88,8 отсто од случаите.

Испитувањето на јавното мислење било спроведено со телефонска анкета во периодот 23 мај до 26 мај 2018 година на национален репрезентативен примерок од 1.047 испитаници.


Од работата на Владата задоволни се помалку од 50 отсто од граѓаните


Скопје, 28 мај, 2018 - 17:03 (META) 

Граѓаните се поделени за работата на владата во првата година од владеењето, 49 отсто се задоволни, додека 47,4 проценти не се задоволни од работата на владата, покажа анкетата на телевизија „Телма“ и МЦМС, за една година влада.

Според партиска припадност, 11,9 отсто од поддржувачите на СДСМ, и 38,4 отсто од поддржувачите на ДУИ не се задоволни од работата на владата во изминатата година.

Анкетата е направена на 1.052 испитаници, телефонски, во периодот од 15 до 23 мај.

Анкетираните одговарале и на прашањата дали владата на Заев ја движи земјата во позитивна или во негативна насока, кои се приоритетите на владата, а што граѓаните сакаат да работи, кои се најдобрите и најлошите министерства.

Резултатите од анкетата ќе бидат презентирани вечерва во емисијата „Топ Тема“.


Анкета: Мнозинството граѓани се против каква и да е промена на името


Скопје, 3 мај, 2018 - 9:39 (META) 

Никаква промена на името е ставот на речиси половина од граѓаните или 47,1 проценти, покажува најновата анкета на МЦМС и Институтот за демократија, која ја објави „Телма“. Само 14,4 отсто од граѓаните би прифатиле „двојна формула“, речиси исто толку 14,1 би прифатиле име за севкупна употреба или ерга омнес. Договорено име за во меѓународните организации е прифатливо за 13,6 проценти од испитаниците, додека 10,1 отсто би поддржале договорено име за севкупна меѓунарона употреба. Овие резултати споредени со последната анкета на МЦМС од 2013-та година покажува пад од 15 процентни поени во противењето на каква било промена на името, но негативниот став за промена на името и натаму доминира.

Анкетата на МЦМС и Институтот за демократија, спроведена теренски од 5 до 20 април на репрезентативен примерок од 1004 испитаници, го опфати и прашањето за промена на Уставот на Македонија, на што инсистира Грција, покажувајќи дека тоа е неприфатливо за 48,3 проценти од граѓаните, наспроти само 16,4 % за кои е прифатлива промена на уставното име. Со став Без промена на уставното име, а со утврдување на меѓународно име за земјава, се 18,3 проценти. Анализирано по однос на етничката припадност 60,7 проценти од Македонците не прифаќаат никаква промена на Уставот, додека за 41,8 процент од Албанците е прифатлива промената на Уставот со уставното име.

Испитувањето на јавното мислење покажа и која придавка или додавка на името би била најприфатлива за граѓаните за постигнување решение. За „Горна“ се изјасниле 17,1 процент, за „Скопје“, 11,9 проценти, „Нова“ – 9,5, за „Северна“ 8,1 процент и за Вардарска 5,9 проценти. Мнозинство од испитаниците 44, проценти не се за ниту една додавка.

За тоа каде да стои евентуалната придавка, во ново договорено име меѓу двете страни, 42,9 проценти одговориле – никаде. Додавка да стои по името Република Македонија би профатиле 24,4 проценти, придавка пред Република Македонија – е прифатливо за 13 проценти, додека за придавка по Република, а пред Македонија позитивно одговориле 17,2 проценти.

За прашањето на државјанството или националноста според дефиниците во Обединетите нации, од понудени четири опции најголем број 47,9 отсто се изјасниле дека државјанството треба да биде запишано како македонско/Macedonian. Евентуалната опција – граѓанин на Република Горна Македонија преведено и на англиски е прифатливо за 14,4 отсто. Најприфатлива дефиниција на јазикот во Обединетите нации за 45,7 проценти е „македонски“ – со превод на англиски, додека за 16,5 прифатливо е и „македонски“ напишано на латиница.


Квиз: Проверете ги вашите знаења за половата застапеност на пазарот на труд


Скопје, 25 април, 2018 - 12:30 (META) 

Анализата на податоците од Анкетата за работната сила на Државниот завод за статистика покажува дека во Македонија постои нерамномерна полова распределба на работните места и на платите. Проверете ги вашите знаења во однос на половата застапеност на пазарот на трудот во Македонија преку овој интерактивен квиз.

Објавените визуелизации се дел од проектот D.A.T.A. – Data Analytics for Transparency and Accountability имплементиран од Фондацијата за интернет и општество „Метаморфозис“.

Овој проект е делумно поддржан од Амбасадата на САД. Мислењата, откритијата и заклучоците или препораките изнесени овде се на имплементаторите/авторите, и не ги одразуваат оние на Владaта на САД.


Нова демократија води со 9 отсто предност пред СИРИЗА на Ципрас


Атина, 16 март, 2018 - 12:01 (META) 

Опозициската Нова демократија води пред СИРИЗА со 9 отсто, покажува најновата анкета во Грција што за телевизијата „Скај“ ја спровела агенцијата „Пулс“.

Финансиската криза и ригорозните мерки за штедење генерално на секои парламентарни избори во изминатите 10 години ги тераа гласачите да се ориентираат кон опозицијата, а според анкетата изгледа дека повторно ќе се случи истото сценарио. Дополнително довербата на гласачите во владејачката СИРИЗА е разнишана и поради справувањето со случајот на двајцата грчки војници што се притворени во Турција, но и од проблемот со Македонија, односно спорот за името.

На прашањето за која партија би гласале доколку в недела би се одржале избори, Нова демократија води со 9 отсто пред СИРИЗА, односно 28,5 отсто од испитаниците се определиле за НД, наспроти 19,5 за владејачката партија.  Третата партија според рејтингот е движењето „Промени“ со 8 отсто поддршка, што е само половина процент повеќе од поддршката за ултранационалистичката „Златна зора“. На петтото место, со 5,5 проценти поддршка е Комунистичката партија. Ниту една друга партија го нема цензусот за влез во парламентот. Тоа се „Независни Грци“ и „Центристичка Унија“, со по 1,5 отсто поддршка.

Во однос на тоа во која партија имаат поголема доверба за справување со барањата на кредиторите, Нова демократија води со 31,5 отсто, наспроти 21,5 отсто за СИРИЗА.

Анкетата на Пулс покажува дека во Грција преовладува песимизмот, бидејќи 63 отсто од испитаниците „сигурно“ или „прилично сигурно“ веруваат дека земјата се движи во погрешна насока.


Граѓаните оптимисти за придобивките доколку влеземе во ЕУ


Скопје, 5 февруари, 2018 - 14:10 (META) 

Доколку Македонија влезе во ЕУ, драматично ќе се подобри демократијата во земјава, јавната администрација, судството, слободата на медиумите, борбата против корупцијата и човековите и малцинските права, сметаат големо мнозинство од вклучените во дебатната анкета на Институтот за европска политика – Скопје.

Дебатната анкета (Deliberative Polling) е форма на политички консултации со спојување на испитување на јавното мислење и јавната расправа и има цел да го претстави јавното мислење на одредена тема, пред и откако група граѓани ќе се запознаат со темата преку настани со меѓусебна дискусија и разговори со експерти.

Институтот за европска политика (ИЕП) првично спровел анкета со 1.200 испитаници во ноември минатата година, од кои Македонци биле 67,4 отсто а Албанци 24 отсто. Речиси две седмици се одржал дебатниот настан со 150 граѓани кои дискутирале на истите теми и поставувале прашања на експерти, а потоа биле замолени да го кажат својот став на прашањата поставени во анкетата.

Така, ако пред дебатата 52,2 отсто од граѓаните целосно го поддржувале членството во ЕУ, по нејзиното одржување поддршката била 63,7 отсто. На прашањето дали Македонија ги исполнува демократските критериуми за влез во ЕУ на големата анкета со тоа се согласиле 11,5 отсто од испитаниците, додека само 5,3 отсто од луѓето што учествувале на дебатниот настан, се согласиле со тоа.

Што се однесува до името на земјава, отприлика 1,5 проценти повеќе луѓе се противеле на промена на името за да може Македонија да влезе во ЕУ, односно претходно на анкетата 31,4 отсто испитанции имале таков став, а потоа, по дебатата, така размислувале 32,9 отсто.

Во однос на прашањето дали по влегување на Македонија во ЕУ многу би се подобриле демократијата во земјава, јавната администрација, судството, слободата на медиумите, борбата против корупцијата и човековите и малцинските права, разликите во ставовите искажани на анкетата и по дебатата се многу големи, односно најмалку 10 отсто поголем оптимизам имале луѓето што биле на дебатата и разговарале со експертите.

Во однос на демократијата, наспроти 43 отсто на анкетата, дури 60 отсто од луѓето на дебатата покажале оптимизам. Во однос на јавната администрација, бројките се 45 отсто и 63 отсто потоа, а слични се смената на ставовите и во дргите категории, при што значителна разлика во ставовите е забележана за унапредување на човековите и малцинските права, односно наспроти 48 отсто на анкетата со 1.200 испитаници, по дебатата увереноста дека ќе има подобрување пораснала на 70 отсто.


Само 22,5 отсто од Грците подготвени да прифатат сложенo име за Македонија


Атина, 4 февруари, 2018 - 13:12 (META) 

Само 22,5 отсто од Грците биле подготвени да прифатат сложено име за Македонија, а 71,5 отсто се против употреба на терминот Македонија, покажало истражувањето на солунскиот универзитет „Македонија“, пишува грчкиот весник „Катимерини“, a пренесува Македонската информативна агенција (МИА).

Според овој медиум, резултати покажуваат промена на јавното мислење во Грција, бидејќи на истата анкета во 2016 година, 57 отсто од граѓаните не го прифаќале терминот Македонија, а 38 отсто биле за сложено име.

Прашањето за името е важно за 65 отсто од Грците, а мнозинството од граѓаните сметаат дека грчките политичари водат погрешна политика во однос на него. 56 отсто од Грците сметаат дека активностите на грчкиот премиер Алексис Ципрас се движат во погрешна, а 26,5 отсто во правилна насока.


Дури 61 отсто од граѓаните се за решавање на спорот за името


Скопје, 2 февруари, 2018 - 15:47 (META) 

Мнозинството граѓани на Македонија, односно 61 отсто од нив поддржуваат решавање на проблемот околу името, со цел побрз влез на земјава во Европската Унија и во НАТО, додека 33 отсто се категорично против, покажува новата анкета на Институт за демократија „Социетас цивилис“.

Анкетата е спроведена од агенцијата „М-проспект“ од 19 до 26 јануари, телефонски со 1.000 испитаници. Можноста за статистичка грешка е околу три проценти. Резултатите се поделени на општи, резултати според националноста, односно Македонци и Албанци, и поделба според политичката ориентација, односно гласачи на ВМРО-ДПМНЕ и гласачи на СДСМ.

Што се однесува до етничките Македонци, дури 50 отсто од нив целосно или донекаде се за доаѓање до решение за името, а категорично  против се 42 отсто. Кај етничките Албанци, поддршка за решение за името даваат 82 отсто од испитаниците, а против се само еден отсто.

Од оние што се изјасниле дека гласале за ВМРО-ДПМНЕ, поддршка за решение дале 33 отсто, а 60 отсто се категорично против, додека од оние што гласале за СДСМ, „за“ во некоја форма се 76 отсто, а 18 отсто се против.

Од вкупниот број испитаници, 34 отсто сметаат дека ако се смени името, целосно ќе се смени и идентитетот, додека 19 отсто сметаат дека донекаде ќе се промени. Од другата страна, 33 отсто сметаат дека воопшто нема да се промени значењето што е Македонија и македонски народ, а 4 отсто сметаат дека донекаде нема да се промени.

Став дека со решение за името ќе се смени и идентитетот имаат 60 отсто Македонци, додека 35 отсто не се убедени во тоа. Во последното се убедени и 48 отсто од етничките Албанци.


Анкета: За 51 отсто од граѓаните Законот за јазиците нема да го подобри соживотот


Скопје, 31 јануари, 2018 - 20:24 (META) 

Законот за употреба на јазиците нема да го подобри соживотот во Македонија сметаат 51 отсто од граѓаните, додека 44 отсто одговориле позитивно, покажуваат резултатите од анкетата на Институтот за демократија „Социетас цивилис“.

Според анкетата постои голема разлика во одговорите на ова прашање во зависност од тоа за која партија гласале анкетираните граѓани. Така 77 од анкетираните кои гласале за ВМРО-ДПМНЕ одговориле дека со Законот за употреба на јазиците нема да се подобри соживотот, наспроти 39 отсто од анкетираните гласачи за СДСМ, 25 отсто од гласачите на Беса и 11 отсто од гласачите на ДУИ.

Најголеми оптимисти дека законот ќе го подобри соживотот се гласачите на ДУИ со 85 отсто, Беса со 75 отсто, додека 55 отсто од гласачите на СДСМ и само 18 отсто од гласачите на ВМРО-ДПМНЕ веруваат дека со законот ќе се подобри соживотот во Македонија.

Од испитаниците 34 отсто сметаа дека со воведувањето на овој закон секоја етничка заедница ќе го користи само својот јазик, додека за 57 проценти од анкетираните со воведувањето на овој закон македонскиот јазик ќе се користи како заеднички јазик.

И за ова прашање граѓаните имаат различна перцепција во зависност од тоа за која партија гласале на последните избори. Така 44 отсто од оние што гласале за ВМРО-ДПМНЕ и 20 отсто од гласачите на СДСМ веруваат дека секоја етничка заедница ќе го користи само својот јазик, додека 47 отсто од анкетираните кои гласале за ДУИ и 57 отсто проценти од оние кои гласале за Беса сметаат дека македонскиот јазик сè уште ќе се користи како заеднички јазик.

Телефонската анкета е спроведена од „М Проспект“ за потребите на Институтот за демократија „Социетас цивилис“ на национален примерок од 1.000 испитаници во периодот од 19 до 26 јануари, оваа година, со маргина на статистичка грешка од три проценти.