!Во периодот што претстои работиме на воведување систем за пристап и за претплата. За начинот на пристап и за претплатата ќе информираме дополнително. Содржините на „Мета“ до тогаш се слободни за преземање со задолжително цитирање и атрибуирање.

ЦИКП: Корупцијата и даноците – дел од факторите за постоење на сива економија


Скопје, 28 јули, 2017 - 11:38 (META) 

Корупцијата, високиот даночен товар, стремежот на бизнисмените за брзо богатење се фактори што влијаат на постоењето на сива економија.

Ова го покажува бизнис-анкетата на Центарот за истражување и креирање политики (ЦИКП), спроведена за да се утврдат различните форми на скриени економски активности во бизнис-секторот лани и да се споредат резултатите од истата анкета направена во 2014 година.

– Покрај општото задоволство со даночниот систем во земјата, се смета дека даноците играат значајна улога во појавувањето на скриени економски активности. Поточно, „високиот даночен товар“ се смета за втор најважен фактор за појава на сивата економија (42,9 проценти) и „импулс на бизнисмените за брзо богатење“ избран од 40 проценти од бизнисите – се вели во анкетата.

Најголемите детектирани проблеми лани биле нелојалната конкуренција, која е проценета како среден и голем проблем од страна на 64,3 проценти од бизнисите, политичката ситуација (50 проценти) и криминалот, кражбите и немирите (50 проценти).

– Пријавувањето понизок обрт од реалниот е уште една практика во сивата економија која се користи за избегнување на даночниот опфат. Манипулирањето со плаќање и со пријавување данок на додадена вредност (ДДВ) и користење на сметководствени трикови за плаќање пониски даноци е исто така честа практика во Македонија – се вели во анкетата.


Трамп е најлошо рангиран претседател на САД во последните 70 години


Вашингтон, 16 јули, 2017 - 19:26 (META) 

Граѓаните на САД за американскиот претседател Доналд Трамп сметаат дека во последните 70 години е најлошиот претседател на државата во првите половина година од мандатот, јави „Еј-би-си њуз“, повикувајќи се на анкетата што ја спроведе заедно со весникот „Вашингтон пост“.

Во анкетата се најдоа прашања за компетентноста на Трамп на светската сцена, неговата ефективност, републиканскиот план за здравствена заштита и за улогата на Русија во американските претседателски избори во 2016 година.

Триесет и шест отсто од анкетираните се изјасниле дека ја поддржуваат работата на Трамп, што е за десет отсто помалку од процентите што ги доби во првите 100 дена во Белата куќа.

Најблизок на Трамп по слабиот рејтинг по половина година на власт беше претседателот Џералд Форд со 39 отсто поддршка во февруари 1975 година.


„Брима“: Мнозинството граѓани сметаат дека била потребна промена на власта


Скопје, 28 јуни, 2017 - 14:37 (META) 

Доверба во новата влада имаат 57 проценти од граѓаните, а 37 отсто гледаат со недоверба на идното работење на владата. Најголема доверба на владата ѝ даваат етничките Албанци, односно 71 отсто, а најмалку доверба имаат етничките Македонци, односно 51 процент, покажува новата анкета на „Брима Галуп“, спроведена од 2 до 12 јуни.

Истражувањето покажува дека на Македонија ѝ била потребна промена на власта. Така сметаат 69 отсто од анкетираните граѓани, а само 24 отсто сметаат дека било добро и со минатата власт.

Најголема недоверба во Владата има кај поддржувачите на ВМРО-ДПМНЕ и кај тие што изјавиле дека нема да гласаат на следните избори, додека најголема доверба има кај поддржувачите на СДСМ, потоа се поддржувачите на ДУИ и на Движење за реформи на ДПА.

Шеесет и два отсто од анкетираните граѓани сметаат дека изборот на Зоран Заев за премиер е добро решение, додека 29 проценти сметаат дека тоа е лошо решение. И тука најголема е поддршката кај етничките Албанци, потоа кај припадниците од другите етнички заедници и кај етничките Македонци.

Високи 66 отсто сметаат дека влегувањето на граѓаните во Собранието на Република Македонија на 27 април било со однапред испланирано сценарио, а 21 отсто сметаат дека тоа било спонтано.

Поддршката за изборот на Талат Џафери за претседател на Собранието во вкупната јавност е 43 проценти, а 47 отсто се изјасниле дека дека не го поддржуваат.

Со истражувањето биле опфатени 1.193 граѓани во осум региони, а интервјуата биле направени лице в лице во домот на испитаникот.


„Брима Галуп“: СДСМ и Заев со поголем рејтинг од ВМРО-ДПМНЕ и од Груевски


Скопје, 23 јуни, 2017 - 11:39 (META) 

Рејтингот на СДСМ е за 2,6 отсто повисок од тој на ВМРО-ДПМНЕ, покажува најновата анкета на „Брима Галуп“ спроведена непосредно по изборот на новата Влада од 2 до 12 јуни 2017 година.

Рејтингот на СДСМ е 22,4 отсто, на ВМРО-ДПМНЕ – 19,8 отсто, ДУИ има 7,3 отсто, Беса и Движењето за реформи на ДПА имаат по 4,3 проценти, а ДПА е со најнизок рејтинг од 1,8 отсто.

ВМРО-ДПМНЕ, во сегментот на етничките Македонци, има предност од 0,9 отсто, но СДСМ го поддржуваат 6,3 отсто од етничките Албанци, а исто така партијата е во предност пред ВМРО-ДПМНЕ и кај гласачите од другите етнички заедници.

Резултатите покажуваат дека дошло и до промени во рејтингот на политичарите, па сега највисок рејтинг има Зоран Заев за кого се одлучиле 17,7 отсто од испитаниците и е пред Никола Груевски, чиј рејтинг е помал од тој на Заев за 4,7 проценти и изнесува вкупно 13 отсто.

Али Ахмети кај албанскиот електорат има предност пред Зијадин Села и пред Билал Касами. За Ахмети како политичар, во кого имаат најмногу доверба, се определиле 23,8 отсто етнички Албанци, за Села се определиле 15,9 отсто, а за Касами – 13,9 отсто.

Најголем дел, односно 29,8 проценти од вкупниот број испитаници се изјасниле дека немаат доверба во ниту еден политичар.


Анкета: ВМРО-ДПМНЕ води пред СДСМ за 0,8 отсто, а Груевски пред Заев за 1 процент


Скопје, 19 мај, 2017 - 21:23 (META) 

Доколку утре би се одржале избори, за ВМРО-ДПМНЕ би гласале 24,5 отсто од граѓаните, а за СДСМ 23,7 отсто, покажуваат резултатите од последната анкета на телевизија „Телма“ и на Македонскиот центар за меѓународна соработка (МЦМС).

Според резултатите од анкетата, за ДУИ би гласале 8,5 отсто, за Беса – 3,7 отсто, за Алијансата за Албанците – 1,8 отсто, а за ДПА – 0,9 отсто од граѓаните.

Вкупно 35 отсто од анкетираните граѓани не дале одговор, односно 13,1 отсто не сакале да кажат за кого би гласале, 10,8 рекле дека не знаат, а 10,3 отсто рекле дека нема да гласаат за ниту една партија.

Што се однесува до рејтингот на партиските лидери, на прашањето кој политичар заслужува најголема доверба, за лидерот на ВМРО-ДПМНЕ, Никола Груевски се определиле 25,8 отсто од анкетираните, а за лидерот на СДСМ, Зоран Заев, 24,8 отсто.

Претседателот на државата, Ѓорге Иванов, според анкетата има поддршка од 9 отсто од граѓаните, а по него е лидерот на ДУИ, Али Ахмети, со 6,1 отсто. Лидерот на Алијанса за Албанците, Зијадин Села, ја има поддршката на 3,6 отсто од граѓаните, Билал Касами од Беса има поддршка од 3 отсто, додека 14,8 отсто рекле дека немаат доверба во ниту еден политичар.

Анкетата е спроведена телефонски, по насилствата во Собранието на Република Македонија, во периодот од 10 до 15 мај, на репрезентативен примерок од 1.000 испитаници. Анкетата ја спровела агенцијата „М-Проспект“ на барање на „Телма“ и на МЦМС.


Анкета на „Телма“: Граѓаните веруваат дека зад упадот во Собранието стои ВМРО-ДПМНЕ


Скопје, 17 мај, 2017 - 21:52 (META) 

Во најновата анкета на телевизија „Телма“ и на МЦМС, направена од 10 до 15 мај, на прашањето кој стои зад нападот во Собранието, 40,5 проценти изјавиле дека тоа е ВМРО-ДПМНЕ, 20 проценти изјавиле дека толпата влегла спонтано, 8,7 проценти сметаат дека упадот бил спроведен од странски служби, 4,6 проценти – СДСМ, а 25,4 проценти одговориле дека не знаат.

Високи 81,3 проценти од испитаниците не го оправдуваат насилството врз пратениците што се случи во Собранието, а 6,1 отсто одговориле дека насилството врз пратениците е оправдано.

На прашањето дали полицијата овозможила ескалација или смирување на ситуацијата, 57 проценти од испитаниците одговориле дека полицијата овозможила ситуацијата да ескалира, 27,6 проценти одговориле дека таа овозможила намалување на насилствата, а 16,3 проценти одбиле да одговорат.

62,2 проценти од испитаниците одговориле дека очекуваат правна разврска и фер судење за настаните во Собранието, а 28,9 проценти не очекуваат.

На прашањето дали постапките на претседателот Ѓорге Иванов придонесуваат за смирување или влошување на политичката криза, 48,6 проценти одговориле дека тој ја влошува политичката криза, 38 отсто сметаат дека неговото однесување придонесува кон смирување на кризата, а 13,3 проценти одбиле да одговорат.

Изборот на Талат Џафери за претседател на Собранието, 50,3 проценти од испитаниците не го одобруваат, а 49,1 отсто го сметаат за нелегитимен неговиот избор.


ВМРО-ДПМНЕ: Анкетата на ИРИ покажа дека народот му го врти грбот на Заев


Скопје, 16 мај, 2017 - 10:01 (META) 

„Народот се чувствува постизборно измамен со тиранската платформа и затоа на анкетата на ИРИ мнозинството смета дека треба да има нови избори. Анкетата на ИРИ покажа дека народот му го врти грбот на Заев и не сака криминалец да ја води државата. Речиси двојно поголема е поддршката што ВМРО-ДПМНЕ ја има во однос на поддршката на СДС“, порача ВМРО-ДПМНЕ денеска во своето редовно утринско соопштение.

Партијата на својот политички противник му порачува дека доколку во СДСМ постои „барем малку храброст, чесност и одговорност кон сопствениот народ“, ќе се согласи во октомври заедно со локалните да се одржат и предвремени парламентарни избори на ист трошок.

ВМРО-ДПМНЕ, исто така, го предупреди СДСМ „да не помисли да бега од локалните избори како што претходно двапати бегаше од одржувањето на минатогодишните парламентарни избори“.


Анкета на ИРИ: Мнозинството граѓани на Македонија не се задоволни од локалните власти


Скопје, 15 мај, 2017 - 13:34 (META) 

Мнозинството граѓани на Македонија се незадоволни од нивните локални власти, покажува најновата анкета на Центарот за анкетни истражувања на Меѓународниот републикански институт (ИРИ).

Според податоците од анкетата, 51 отсто од испитаниците изјавиле дека се донекаде или многу незадоволни од работата на нивните градоначалници, додека 47 отсто искажале идентични ставови и за општинските совети.

Четириесет и шест отсто од анкетираните се изјасниле дека, исто така, се незадоволни од локалната администрација.

На прашањето колку сте расположени да гласате на претстојните локални избори 61 отсто од испитаниците рекле дека се многу расположени, 21 отсто се расположени, а пет отсто нерасположени за гласање.

Од испитаниците, 28 отсто би гласале за ВМРО-ДПМНЕ на локалните избори, 16 отсто за СДСМ, ДУИ би го поддржале 8 отсто, БЕСА 7, Алијансата за Албанците и ДПА по 2 отсто, ГРОМ и ЛДП по 1 отсто.

Четириесет и четири отсто од испитаниците сметаат дека треба да има предвремени парламентарни избори, 41 отсто дена не треба, а 15 отсто не знаат.

Доколку се одржат предвремени парламентарни избори, 59 отсто од испитаниците би биле многу расположени да гласат, 18 отсто би гласале, а 7 отсто не се расположени да гласаат.

На прашањето за влез на Македонија во Европската Унија, значително мнозинство, односно 72 отсто од испитаниците, искажале поддршка за влез на земјава во ЕУ, а 71 отсто се за членство во НАТО.

Регионалниот директор на ИРИ за Европа, Јан Суротчак, ги повикува политичките партии да најдат начин за решавање на проблемите кои се најважни за гласачите на локално ниво.

Анкетата е спроведена за Центарот за анкетни истражувања преку фирмата за истражувања на пазарот „Брима“, во соработка со „Чериот ЛЛЦ“. Податоците се собрани преку интервјуа лице в лице од 4 до 12 март 2017 година. Вкупно биле спроведени 1.108 интервјуа, а истражувањето има маргина на грешка од плус или минус три проценти на среден опсег, на ниво на доверба од 95 отсто. Стапката на одѕив била 71 процент.

Истражување е овозможено со поддршка на Агенцијата на за меѓународен развој САД (УСАИД).


Охриѓани против новите градежни зафати, бараат заштита на Студенчишко Блато


Охрид, 25 април, 2017 - 14:31 (META) 

Околу 99 отсто од сите 300 анкетирани жители од Охридско сметаат дека промената на деталниот урбанистички план за зголемување на катноста на објектите од хотел „Тино“ до „Милениум палас“ е штетна урбанистичка одлука, која треба да се повлече. Огромен дел од испитаните граѓани, исто така, ги оценуваат предвидените капитални инфраструктурни проекти како исклучиво штетни и непотребни за регионот, покажуваат бројките од анкетата од проектот „Заштита на природата во НП Галичица: Бајка или реалност“.

Проектот финансиски поддржан преку механизмот за граѓански организации ИПА2 и од Глобалниот фонд за зелени грантови (Global Green Grants Fund) беше презентиран вчера во Охрид, во присуство на граѓани и на претставници на локални, национални и на меѓународни организации.

Резултатите ги презентираше Драгана Велковска од Здружението за заштита на животните и животната средина „Еден“, а Ајман ал Мала, раководител на секторот за животна средина во Општина Ресен, зборуваше на тема „Со добро владеење до одржлив развој“.

Покрај несогласувањето за градбата долж брегот на езерото, буквално сите анкетирани граѓани бараат заштита на Студенчишко Блато бидејќи го сметаат за филтер на езерото и за негов незаменлив дел, наспроти 1,2 отсто од граѓаните кои се изјасниле дека во регионот треба да се развива масовен туризам.

Во рамки на проектот се одржани вкупно четири консултативни состаноци – три со одделни категории на чинители и еден со сите чинители заедно, изработена е анализа на националната и на меѓународната легислатива која го третира Националниот парк Галичица и е спроведено истражување на мислењето на близу 300 испитаници од регионот – граѓани, граѓански организации и институции.

Покрај граѓаните, кои бараат регионот да го задржи УНЕСКО-статусот и да почне да се развива активниот туризам кој не ја уништува животната средина, сите испитаници од државните институции сметаат дека економската придобивка не смее да оди на штета на природата, велат од „Еден“.

Анкетата покажува и дека 45,5 отсто од институциите сметаат дека законските прописи се почитуваат селективно, а речиси 47отсто од претставниците од граѓанскиот сектор рекле дека биле изложени на некаква форма на притисок или закани поради нивниот ангажман.

На вчерашната презентација Ал Мала ја претстави успешната приказна за ревитализацијата и за заштитата на Преспанското Езеро и нагласи дека професионалниот интегритет на јавните и на државните службеници мора да биде неприкосновен доколку сакаме вистински, долгорочен и сеопфатен развој.


Политичката криза влијае врз стопанството, компаниите бараат брзо решение


Скопје, 11 април, 2017 - 15:52 (META) 

Компаниите членки на Македонско-германското стопанско здружение се жалат на дефицитот на правната сигурност, политичката и социјалната стабилност, борбата против корупцијата и криминалот, дисциплината при наплата на побарувањата, по пред се непредвидливата политичка криза која има силно влијание на стопанскиот развој.

Ова го покажува анкетата на здружението во која учествувале 71 компании и дури 51 процент од нив, актуелната состојбата ја оцениле како лоша, а само 10 проценти како добра.

„Годинава, како и во изминатите години, повторно истите фактори се оценети со оценка недоволен правната сигурност, дисциплината при наплата на побарувања, политичка и социјална стабилност, транспарентноста при јавни набавки и борбата со корупција. Сево ова го спречува  долгорочното планирање и доведува до неизвесност кај деловните луѓе, воедно како за домашните така и за странските инвестиции. И покрај наведените проблеми, сепак е охрабрувачки фактот дека 82 проценти од компаниите кои работат во Македонија повторно би инвестирале во Македонија, што е 10 проценти повеќе од минатата година што  е важна порака до потенцијалните инвеститори, изјави директорот на Делегацијата на германското стопанство во Македонија Патрик Мартенс.

Според него, брзо е потребно решение за актуелната политичка криза, која силно се пресликува на стопанството.

Во однос на очекуваната перспектива за тековната година, 63 проценти од испитаниците сметаат дека состојбата нема да се промени, 26 проценти очекуваат да има влошување, само 11 проценти се оптимисти и очекуваат подобрување.

Во земјата работат повеќе од 200 компании со германски капитал кои вработуваат 15.000 лица, што игра важна улога на  пазарот на трудот.