!На 1 февруари 2017 година, заврши промотивниот период на слободно користење на содржините на „Мета“. Во периодот што претстои го воведуваме новиот систем за пристап и за претплата. За начинот на пристап и за претплатата ќе информираме дополнително

Напаѓачот од Берлин користел 14 различни идентитети


Берлин, 5 јануари, 2017 - 15:37 (META) 

Германските власти утврдиле дека напаѓачот кој на божиќниот панаѓур во Берлин со камион уби 12 лица, Тунижанецот Анис Амри, користел 14 различни идентитети, соопшти германската полиција.

Како што се наведува во соопштението, Амри дошол во Германија на средината на 2015 година и набргу успеал да се најде на листата на потенцијално опасни исламистички екстремисти, а против него паралелно е водена истрага поради остварување права под два различни идентитета.

Според наводите на началникот на полицијата на Северна Рајна – Вестфалија, Дитер Шуерман, властите не нашле цврсти докази дека планира напад.
Амри (24) на 19 декември со камион влета меѓу посетителите на традиционалниот божиќен панаѓур во Берлин и уби 12 лица, а на 23 декември беше убиен во пресметка со италијанската полиција во Милано.


Напаѓачот од Берлин убиен во Милано


Милано, 23 декември, 2016 - 12:02 (META) 

Тунижанецот Анис Амри, осомничен дека го возел „камионот на смртта“ во Берлин, наводно е убиен во Милано во вооружена пресметка, јавуваат светските медиуми.

Агенцијата АНСА пренесе дека Амри е убиен три часа по полноќ, за време на рутинска полициска контрола.

Наводно полицијата од Амри побарала документи, а тој од ранецот извадил пиштол и пукал и ранил еден од полицајците. Единицата возвратила и го усмртила Амри.

Германските медиуми јавуваат дека човекот за кој се смета дека управувал со камионот кој усмрти 12 лица во Берлин е убиен за време на рутинска контрола во миланското предградие Сесто Сан Џовани.

Медиумите претходно јавија дека 24-годишниот Амри во 2011 година, некое време престојува на италијанскиот остров Лампедуза.

Агенцијата АНСА објави една фотографија од април 2011 година, на која се гледа Амри со уште две момчиња, негови сонародници, откако полицијата ги уапсила откако запалиле школо во Лампедуза. Амри за ова дело доби четири години затвор. Во затворот не покажувал знаци на радикализација, а по излегувањето од таму Амри требало да биде депортиран во Тунис, но оттаму не сакале да го примат назад, затоа што и во своето родно место правел проблеми.


Уапсени две лица од Косово поради планирање напад во Германија


Дуизбург, 23 декември, 2016 - 11:26 (META) 

Германската полиција рано утрово уапсила две лица поради сомневање дека планирале напад на трговски центар во Оберхаузен, во близина на границата со Холандија, јавуваат светските медиуми, повикувајќи се на соопштение од полицијата.

Полицијата соопштила дека станува збор за двајца браќа родени во Косово, на возраст од 28 и 31 година, кои бил уапсени во Дуизбург, врз основа на информации од безбедносните служби.

Од министерството за надворешни работи на Косово за балканскиот сервис на „Радио Слободна Европа“, изјавиле дека работат на прибирање информации за уапсените.

Засега нема информации за тоа дали денешните апсења се поврзани со нападот на божиќниот панаѓур во Берлин, во кој загинаа 12 лица.

Германската полиција сè уште трага по 24-годишниот Тунижанец Анис Амри, чии отпечатоци од прсти се најдени во кабината на каминот со кој беше извршен нападот во Берлин.


Напаѓачот од Берлин четири години лежел в затвор во Италија


Берлин, 22 декември, 2016 - 10:26 (META) 

Тунижанецот кој е осомничен за терористичкиот напад во Берлин, поминал четири години во затвор во Италија, а потоа бил пуштен на слобода затоа што не можеле да го депортираат.

Дваесет и четиригодишниот Анис Амри е осомничен за нападот со камион извршен во понеделникот во Брелин, кога беа убиени 12, а повредени 48 лица.

Амри побегнал во Италија по „Арапската пролет“ во 2011 година во Тунис, кога од власт беше соборен Зине ел Абидине бен Али.

Како што пренесуваат светските медиуми, италијанските власти сакале да го депортираат Амри откако ја отслужил затворската казна која му била изречена за повеќе дела, но тоа било невозможно бидејќи не поседувал документи од која земја потекнува.

Казната ја отслужил во затвор во Палермо, а италијанските медиуми јавуваат дека и во затворот бил насилен, но оти не покажувал знаци на радикализација.

По отслужувањето на казната во 2015 година, бил префрлен во центарот за идентификација, во исчекување на документи од Тунис кои никогаш не стигнале. По истекот на законскиот рок, морал да ја напушти Италија.

Во Германија пристигнал како бегалец во 2015 година, а годинава му било одбиено барањето за азил.

Германските медиуми јавуваат дека бил на листата на потенцијални извршители на терористички напади и оти бил во контакт со Исламска држава.

Германија вчера понуди 100.000 евра за информација што би довела до апсење на Амри. Објавени се и негови фотографии, со напомена дека може да биде насилен и вооружен.


Германското обвинителство распиша потерница по Анис Амри


Берлин, 21 декември, 2016 - 18:44 (META) 

Сојузната криминалистичка служба на Германија по налог на обвинителството и со поддршка на покраинската полиција, спроведува интензивна потрага по Анис Амри, кој е осомничен дека го изврши нападот на божиќниот базар во Берлин, во кој загинаа 12 лица.

Обвинителството нуди и награда до 100.000 евра за информација што би помогнала да биде уапсен осомничениот.

По налог на обвинителството, исто така, е распишана и јавна потерница во која првпат се споменува и презимето на бараниот, а наведено е дека е на возраст од 24 години и роден е во Тунис.