!На 1 февруари 2017 година, заврши промотивниот период на слободно користење на содржините на „Мета“. Во периодот што претстои го воведуваме новиот систем за пристап и за претплата. За начинот на пристап и за претплатата ќе информираме дополнително

Иванов: Недозволиво е германска амбасада да темели соопштение на лажни информации


Скопје, 17 мај, 2017 - 23:23 (META) 

„Амбасадорот на германското министерство се служеше со лажни вести, па Меркел мораше да се извинува за неточни информации кои ги добивала од нивната амбасада. Апелирам до Германија дека вакво ниво на дипломати е навреда за нашата земја. Недозволиво е на лажни информации да темелат соопштение од германска амбасада. Како порано да го дадам мандатот? Со кршење на Уставот?“, изјави вечерва претседателот Ѓорге Иванов во интервју за телевизија „Нова“.

Оваа реакција на Иванов следува откако Министерството за надворешни работи на Германија, во соопштение  го поздрави доделувањето на мандатот, но исто така напиша и дека оваа одлука требало одамна да се случи.

Прашан, меѓу другото, за влијанието на меѓународниот фактор изиминатиот период, Иванов изјави дека „треба да нè загрижи квалитетот на дел од дипломатите во Република Македонија“.

„Пријателските земји доаѓаа со желба да се надмине кризата, советуваа и нè упатуваа како да се постапи, но имавме и незгодни средби, телефонски повици со некои лица кои не беа информирани и со погрешни претстави носеа судови без да ги проверат“, додаде Иванов.

Претходно, претседателот Иванов гостуваше и во емисијата „Само вистина“ на телевизија „Канал 5“.


Меркел го дочека Макрон со срдечно ракување


Берлин, 15 мај, 2017 - 20:07 (META) 

Германската канцеларка Ангела Меркел во Берлин го дочека новоизбраниот француски претседател, Емануел Макрон, со најголеми почести.

Тие, по срдечното поздравување, ги почнаа разговорите, само еден ден откако Макрон беше инаугуриран за претседател.

Голема група граѓани ја следеше церемонијата за дочекот на шефот на француската држава.
Макрон последен пат со германската канцеларка се сретна кога беше претседателски кандидат во март во Берлин.

Францускиот претседател со посетата на Берлин како прва дестинација на новата функција, ја продолжи традиција на француските претседатели, па стана четвртиот претседател на земјата кого Меркел го дочекува како канцеларка во изминатите 12 години.


Меркел најави преместување на војниците од Инџирлик доколку Турција не соработува


Берлин, 15 мај, 2017 - 18:39 (META) 

Берлин може да ги премести своите војници од Турција во друга земја, изјави канцеларката на Германија, Ангела Меркел.

Како што наведе, тоа ќе се случи доколку Анкара не издаде дозвола на членовите од одбранбениот комитет на германскиот парламент да ги посетат вработените кои моментално се на НАТО-мисијата во турската воздухопловна база Инџирлик.

Говорејќи денеска на конференција за новинари, Меркел рече дека е неопходно делегацијата да ги посети повеќе од 250 војници што се наоѓаат во воздухопловната база Инџирлик во Турција како дел од НАТО-мисијата против Исламска држава.

– Ќе ги продолжиме разговорите со Турција, но паралелно мораме да истражуваме други опции. Тоа значи и да бараме алтернатива за Инџирлилк, а една од тие се наоѓа во Јордан – рече Меркел.

Турција претходно повторно го одби барањето на пратениците на Бундестагот да ги посетат германските војници во базата Инџирлик.


Макрон во прва посета на Германија


Париз, 15 мај, 2017 - 10:32 (META) 

Новиот француски претседател, Емануел Макрон, кој вчера и официјално ја презеде должноста, денеска ќе биде во прва посета на Германија, каде ќе се сретне со канцеларката Ангела Меркел.

Макрон за време на кампањата рече дека неговата прва посета во странство, доколку победи, ќе биде во Германија. Таа земја била меѓу првите што на новиот претседател му ја честитала победата во првиот и во вториот круг од изборите.

И претходникот на Макрон, Франсоа Оланд, исто така во 2012 година прво ја посети Германија по својата инаугурација.


Партијата на Меркел победи на изборите во Шлесвиг-Холстајн


Берлин, 8 мај, 2017 - 9:41 (META) 

Партијата на канцеларката Ангела Меркел вчера победи на изборите во германската најсеверна покраина.

Според прелиминарните резултати објавени утринава, Христијанско-демократската унија (ЦДУ) освои 32 отсто од гласовите во мнозински протестантската покраина Шлесвиг-Холстајн, јавија германските медиуми.

Социјалдемократите (СПД), кои во моментот се на власт во покраината со партијата на Зелените и со ССВ, освоија само 27,2 отсто од гласовите.

Кандидатот на ЦДУ во покраината, Даниел Гунтер, во обраќањето до јавноста по објавата на првите резултати рече дека гласачите донеле јасна одлука против актуелната власт, која ја нарече „коалиција на стагнација“.


Меркел и Путин се сретнаа во Сочи


Сочи, 2 мај, 2017 - 15:44 (META) 

Германската канцеларка Ангела Меркел допатува во Сочи, на својата прва посета на Русија по две години, за да разговара со рускиот претседател Владимир Путин.

Темите за кои ќе разговараат се претстојниот самит Г20, но и ситуацијата во Украина, Сирија и во Либија, како и билатералните односи.

Портапролот на германската влада, Штефeн Зајберт, претходно изјави дека Меркел и Путин ќе имаат две рунди разговори.

Меркел и Путин последен пат се состанаа во ноември 2016 година во Берлин, кога се разговарало за кризата во Источна Украина.


„Протагон“: Нестабилноста може да доведе до притисоци врз Грција за прием на Македонија во НАТО


Атина, 2 мај, 2017 - 13:04 (META) 

Дополнителна нестабилност и граѓански конфликт во Македонија не ѝ оди во прилог на Грција, пишуваат грчките медиуми, кои деновиве будно ги следат случувањата во државата и на Балканот. Грчкиот информативен портал „Протагон“ коментира дека на Атина ѝ е потребна стабилна Македонија за да може во одреден момент да се најде соодветно решение за името, но и за да се запазат економските интереси и соработка кои Грција ги има со македонските бизнис-партнери.

Според „Протагон“, дестабилизацијата на Македонија може да доведе до нови притисоци врз Грција за прием на Македонија во НАТО.

„Јасно е дека Атина сака БЈРМ да биде стабилна. Тоа е единствениот начин во некој момент да се реши спорот за името, кое претставува најважниот отворен спор за Грција на Балканот. Нестабилноста може да ги донесе во прв план барањата и притисоците за прием на БЈРМ во НАТО, како начин да се осигура мирот, а тоа ќе предизвика главоболка во Атина со нерешен спор за името“, се вели во анализата.

Според „Протагон“, Грција е загрижена за ситуацијата и поради економските интереси и соработка, како и за спроведувањето на мерките за градење доверба. Во анализата се посочува дека грчката влада треба многу добро да ги пресмета последиците од можен граѓански конфликт во Македонија и како тоа би влијаело на засилување на албанскиот фактор во регионот, уште една тема за која постои загриженост од грчка страна во овој период.

Грција уште вечерта по крвавите инциденти во македонското собрание испрати апел за смирување на ситуацијата и се понуди, доколку биде побарано од неа, да помогне за намалување на тензијата.

Грчкиот неделник „Реал“ пишува дека премиерот Алексис Ципрас за случувањата во Македонија и на Балканот викендов разговарал со германската канцеларка Ангела Меркел, за време на Самитот на Европската Унија посветен на излегувањето на Велика Британија од Унијата. Според неделникот, двајцата соговорници, наводно, се согласиле Грција да преземе иницијативи за стабилизација на регионот.

Од кабинетот на премиерот Ципрас соопштија дека тој за време на состаноците на самитот изразил голема загриженост за ситуацијата во Македонија и посочил дека Грција останува главен столб на стабилност во регионот.


„Шпигл“: ЕУ планира санкции за Македонија и блокирање сметки на политичари


Берлин, 24 април, 2017 - 14:49 (META) 

Европската Унија размислува за воведување забрана за патување, замрзнување сметки за одредени македонски политичари, но и за кратење на претпристапната помош, јавува „Дојче веле“, повикувајќи се на германскиот неделник „Шпигл“.

„Земјите членки на ЕУ почнаа со конкретни дискусии околу санкции против Македонија“, објавува „Шпигл“.

Германскиот неделник наведува дека германската канцеларка Ангела Меркел на конгресот на ЕПП на Малта го предупредила лидерот на ВМРО-ДПМНЕ, Никола Груевски, да престане со блокадата.

„Иако во Европската служба за надворешна политика сè уште не се дискутирало јавно за тоа, на крајот веројатно ќе се одлучат за санкции, изјави еден претставник на службата на состанок на европските партнери на почетокот на април“, пренесува неделникот, додавајќи дека голема е загриженоста и фрустрацијата на земјите членки и на институциите поради долготрајниот политички ќор-сокак во земјата.


Курц: Турција сè повеќе се оддалечува од правната држава, демократијата и од ЕУ


Виена, 17 април, 2017 - 14:32 (META) 

Министерот за надворешни работи на Австрија, Себастијан Курц, по повод исходот од референдумот во Турција рече дека таа земја јасно се одлучила против Европската Унија.

„Иако е гласано тесно во корист на измените на Уставот, тоа значи дека Турција сè повеќе се оддалечува од правната држава и од демократија. Исходот од гласањето е јасен сигнал против ЕУ“, порача Курц.

Тој изјави дека очекува јасна реакција од ЕУ, додавајќи дека конечно е потребна искреност во односите помеѓу ЕУ и Турција.

Според германската канцеларка Ангела Меркел, пак, гласањето ја покажало длабоката поделеност на турското општество, но германската влада го почитува правото на турскиот народ да одлучува за сопствениот устав. Истовремено, нагласи таа, Ердоган носи голема одговорност за следните чекори на Турција.

Граѓаните на Турција вчера гласаа за измените на уставот кои ќе му овозможат на турскиот претседател Реџеп Таип Ердоган да именува и да менува министри, да се кандидира уште двапати за претседател и повторно да го преземе водството над својата партија.

Според Ердоган, овие уставни реформи не се обична промена.

„Ова е првпат во историјата на Турција, парламентот и граѓаните да одлучуваат за вака значајна промена“, изјави Ердоган.

Според првичните неофицијални резултати од преброени 99 отсто од гласовите, за поддршка на уставните измени гласале 51,3 отсто од избирачите, а одзивот на референдумот изнесувал 86 отсто.


Меркел, Јункер и Столтенберг ја поддржаа одлуката на Трамп за нападот на Сирија


Берлин, 7 април, 2017 - 15:29 (META) 

Германската канцеларка Ангела Меркел денеска изјави дека нападот на САД на сириската воздухопловна база, од која е употребено хемиско оружје за нападот во Идлиб, е разбирлив имајќи го предвид страдањето на сирискиот народ.

– Нападот на САД е разбирлив, имајќи ги предвид димензиите на военото злосторство и страдањето на невиниот народ, како и блокадата на Советот за безбедност на ОН – рече Меркел.

Таа нападите ги опиша како „лимитирани и таргетирани“.

Претседателот на Европската комисија, Жан-Клод Јункер, порача дека мора да се одговори на употребата на хемиско оружје. Изјавата доаѓа откако американскиот претседател Доналд Трамп нареди напад на воената база на сириската војска, како одговор за нападот со хемиско оружје во провинцијата Идлиб.

– САД ја известија ЕУ дека овие напади се лимитирани и имаат цел да ги запрат понатамошните разорувања со хемиско оружје – рече Јункер.

Според генералниот секретар на НАТО, Јенс Столтенберг, сирискиот претседател Башар ал Асад сноси целосна одговорност за воздушните напади на САД врз сириската воена база.

– Сирискиот режим сноси целосна одговорност за ваквиот развој на настаните. Секоја употреба на хемиско оружје е неприфатлива и не може да мине без одговор, а тие што го направиле тоа, мора да одговараат – наведе Столтенберг.