Заев: По Самитот на НАТО ќе падне договор за прашањето и датумот за референдумот


Лондон, 11 јули, 2018 - 10:56 (META) 

По НАТО самитот, сите партии во Собранието ќе ги договорат датумот за референдумот, како и референдумското прашање и карактерот на референдумот, вели македонскиот премиер Зоран Заев за грчката новинска агенција АНА-МПА, наведувајќи ги како можни датуми за одржување на народното изјаснување 23 и 30 септември или 7 октомври. Тој вели и дека уставните измени би се направиле за 90 до 110 дена од сега.

– По самитот на НАТО, ќе имаме средба во Собранието, сите политички партии за да ги дефинираме датумот на референдумот, деталите на референдумското прашање и карактерот на референдумот – вели Заев, појаснувајќи дека и да се одржи референдумот на 7 октомври, ќе има доволно време до крајот на годината да се финализира процесот што Макадонија мора да го заврши според Договорот со Грција.

– Потоа, по референдумот, се надеваме дека сите ќе бидат доволно мотивирани да придонесат за референдумскиот процес – вели Заев.

Македонскиот премиер во изјавата за АНА-МПА нагласува дека ако целиот процес во Македонија е успешен, ќе остане обврската на Грција, односно на грчкиот парламент, најдоцна до 15 јануари 2019 година „да го ратификува Договорот, но исто така да го ратификува Протоколот за нашето членство во НАТО“.

Инаку, вчера на самитот ЕУ/Западен Балкан во Лондон, кој е продолжение на Берлинскиот процес, Заев повтори дека решението што го постигнале владите на двете држави е достоинстевено и прифатливо за двете страни.

– Со премиерот Ципрас избравме да оставиме решенија како траги зад нас. Решенија за нашите граѓани и  за нашите општества, а не за нас, и за нашите политички партии. Такви се лидерите на Европа. Што ќе беше Европа денеска ако не беа лидерите кои на политичката сцена излегуваа траги за паметење, траги заради кои ние денеска ги уживаме плодовите на нивното визионерство? Што ќе беше Европа денес ако на политичката сцена излегуваа самобендисани и самодоволни, кусогледи политичари, без визија?“, нагласи премиерот Заев, и изрази благодарност за континуираната поддршка што на овој процес му ја даваа лидерите на земјите членки на ЕУ, поддршката на лидерите на ЕУ, и за поддршката на лидерите на нашите соседи и пријатели од Западен Балкан – вели Заев во изјавата од Лондон.


Бутарис: Прашањето за името е „надувано“ поради глупавоста на политичарите


Солун, 3 јануари, 2018 - 14:10 (META) 

Мора да имате добри односи со соседите. Прашањето за името е надувано пред се поради глупавоста на политичарите. Луѓето сакаат да си најдат идентитет. Со отстапки од двете страни, но и од опозицијата, подготвени се за компромис. Господинот Заев рече дека ќе го смени името на аеродромот, ќе ги смени таблите на улиците, вели солунскиот градоначалник Јанис Бутарис во интервју за радиото „Практорио ФМ“ на грчката новинска агенција АНА-МПА, одговарајќи на прашање за саботната неформална средба во Солун со македонскиот премиер Зоран Заев.

Истовремено, Бутарис во интервјуто вели дека е најголем Македонец, најверојатно посочувајќи со тоа на неговото раѓање во грчката област Македонија.

– Поголем Македонец од мене не постои, поради потеклото. Моето потекло и моето воспитување кажуваат сѐ, вели градоначалникот на Солун и објаснува дека „во Скопје првпат отишол во 1991 година, со Комората за трговија и индустрија“.

За саботната средба која се одржа по негова покана до Заев, Бутарис вели дека се разговарало за соработка.

– Имавме планирано приватна вечера. Го поканив да ја пречека Новата година во Солун. Неговиот брат и неговите пријатели секоја седмица се во Солун. Она што го финализиравме е да организираме спуштање со кајаци по Вардар, некаде во април. Можеби ќе имаме и мешан екипаж. Второ, се договоривме да правиме културни размени што ќе вклучуваат танц, музика и предавања. Еднаш во Скопје, еднаш во Солун. Разговаравме и за една стипендија што ќе ја даде општина Солун – објаснува солунскиот градоначалник во интервјуто за радиото на новинската агенција АНА-МПА.