!Во периодот што претстои работиме на воведување систем за пристап и за претплата. За начинот на пристап и за претплатата ќе информираме дополнително. Содржините на „Мета“ до тогаш се слободни за преземање со задолжително цитирање и атрибуирање.

Србија ќе има приходи од 1,5 милијарди евра од концесијата на аеродромот „Никола Тесла“


Белград, 6 јануари, 2018 - 17:08 (META) 

Премиерката на Србија, Ана Брнабиќ изјави дека планираните приходи од концесијата на белградскиот аеродром „Никола Тесла“, ќе бидат 1,5 милијарди евра. Концесијата ја доби француската компанија „Ванци ерпорт“, која со аеродромот ќе стопанисува во наредните 25 години, а потоа аеродромот ќе се врати во сопствеништво на државата.

Таа сопшти дека француската корпорација дала најдоба понуда за концесија и станува збор за компанија која има осум аеродроми во светот.

Српскиот претседател. Александар Вучиќ изјави дека проектот е започнат во време на неговата влада, но најголем дел од работата ја завршила сегашната влада.


И ние и Србија повлековме по еден дипломат и ја решивме кризата во односите, рече Заев


Белград, 21 ноември, 2017 - 15:16 (META) 

Дипломатската криза меѓу Македонија и Србија ја решивме на пријателски начин: Србија го врати својот човек, ние го вративме нашиот човек, изјави премиерот Зоран Заев по средбата со премиерката на Србија, Ана Брнабиќ.

Одговарајќи на новинарско прашање, тој рече дека не само што Србија го повлекла разузнавачот Горан Живаљевиќ од амбасадата, туку и Македонија повлекла свој човек од амбасадата во Белград.

– На многу пријателски, дипломатски начин најдовме решение за тоа што се случи во Македонија, поврзано со човекот вработен во српската амбасада во Македонија. Направивме билатерален договор: Србија го врати својот човек, ние го вративме нашиот човек. Така прават пријателите. Претседателот Вучиќ и јас имавме разговор тогаш, директно го дефиниравме тоа што се случуваше со амбасадата и најдовме решение какво што им доликува на пријатели – рече Заев.

Тој додаде дека меѓу двете влади, а и на повисоко претседателско ниво било договорено за секое прашање, болно или позитивно, двете страни телефонски да разговараат и да се договорат.

Скандалот изби откако беше објавено дека српскиот разузнавач, Горан Живаљевиќ, бил затекнат во Собранието за време на крвавиот упад на 27 април.

Потоа српската амбасада ги повлече амбасадорката и персоналот од Скопје на консултации во Белград, но по четири дена тие се вратија.


Заев: Србија е земјата со која односите најмногу ни напреднаа во последните пет години


Белград, 21 ноември, 2017 - 13:32 (META) 

Перцепцијата на граѓаните во Република Македонија е дека Србија е на прво место од соседите со кои најмногу се подобрени односите во последните пет години, сосед со кој граѓаните имаат најдобри лични искуства, сосед чија историја и култура најдобро ги познаваат, сосед за кој се има најдобро мислење, како и сосед со кој би сакале најблиски односи, рекол македонскиот премиер Зоран Заев на заедничката прес-конференција со премиерката на Србија, Ана Брнабиќ, во Белград.

Зборувајќи за регионалната соработка, Заев нагласил дека таа ќе се базира на принципот за еднакви услови за сите, пренесува владината служба за информирање.

– Планот за регионална економска област на Западен Балкан, кој се базира на принципите на еднакви услови за сите во регионот, предвидува наши заеднички интереси: промовирање на понатамошна трговска интеграција, воведување динамичен регионален инвестициски простор, олеснување на регионалната мобилност и креирање агенда за дигитална интеграција – нагласи Заев.

Македонскиот премиер посочил дека со премиерката Брнабиќ се согласиле дека од особен интерес на двете земји е соработката во областа на дигитализацијата, партнертво на отворени влади, ИТ-секторот, како и креирање на култура на иновативни бизниси и претприемачки дух кај младите.

Заев ја оценил економската соработка меѓу Македонија и Србија како константно добра, укажувајќи на фактот што Србија е трет по обем на размена трговски партнер на Македонија, веднаш зад Германија и Велика Британија.

Српската премиерка Брнабиќ истакнала дека унапредувањето на односите меѓу двете земји е од особен интерес на Република Србија, со оглед на фактот дека двете земји делат многу заеднички интереси како што се евроинтеграциите, инфраструктурните проекти во рамките на Коридорот 10 и многу други.

Зборувајќи за малцинските прашања, Заев рекол дека српскиот народ е еден од конститутивните народи наведени во Уставот на Република Македонија и српскиот е службен јазик во општините Старо Нагоричане и Чучер-Сандево, како и еден од службените во Општина Куманово. Зборувајќи за Македонците во Србија, тој истакнал дека е добро што е во службена употреба во повеќе места, се изучува во неколку училишта во Србија, а во Статутот на Војводина, Македонците се наведени како конститутивен народ.


Заев и Брнабиќ договориле заедничка владина седница во февруари или март


Белград, 21 ноември, 2017 - 11:53 (META) 

Премиерот Зоран Заев и премиерката на Србија, Ана Брнабиќ, на денешната средба во Белград се договориле владите на Македонија и на Србија на крајот на февруари или на почетокот на март да одржат заеднички седницa.

На пленарната средба, делегациите на двете земји разговарале за интензивирање на некои од заедничките проекти и за соработката на проектите за завршување на Коридорот 10, изградба на пруга Будимпешта – Белград – Скопје, како и за гасна конекција Врање – Куманово.

Заев, како што информира владината прес-служба, истакнал дека може да се продлабочи економската соработка во делот на инвестициите, како и да се засили поддршката на бизнис-иницијативите во информатичките технологии, иноватовните компании, технолошките паркови и во иновативните технологии.

Според него, соработката во дигитализацијата има потенцијал да ги олесни царинските формалности, роаминг-комуникацијата и во голема мера да ги олесни врските меѓу двете економии, бизниси и други проекти.

Двајцата лидери разговарале за соработката помеѓу двете министерства за внатрешни работи, за заедничка контрола на границите и справување со мигрантските процеси, како и за унапредувањето на заедниците на Србите и на Македонците во Република Македонија и во Република Србија.

Српската премиерка по средбата истакна дека посетата на Заев е важна за целиот регион.

– Регионалната соработка и регионалното поврзување е многу важно, затоа што без регионален мир и стабилност нема европска интеграција на Западен Балкан – изјави Брнабиќ која додаде дека на заедничката владина седница ќе бидат потпишани неколку важни договори.

Според Брнабиќ, посетата на македонскиот премиер е добар сигнал, кој говори за тоа дека сите меѓусебно отворени прашања треба да се решаваат со дијалог.


Ердоган вели дека соработката меѓу Анкара и Белград е клучна за Балканот


Белград, 10 октомври, 2017 - 11:11 (META) 

Турција и Србија се двете клучи земји за Балканот и нивната соработка е од суштинско значење за одржување на мирот, стабилноста и на просперитетот на полуостровот и во Европа, наведува турскиот претседател Реџеп Таип Ердоган, во авторскиот текст за весникот „Политика“ објавен по повод неговата денешна посета на Белград.

„Врските меѓу Турција и Србија се силни и со длабоки корени. Во долгата историја на тие територии, Турците и Србите живееја заедно. И денес можат да се забележат траги од нашата заедничка историја во јазикот, архитектурата, кујната, културата и во многу други области“,  пишува Ердоган.

Според турскиот претседател, иако немаат заедничка граница, Турција и Србија „се сметаат за соседи, а тајната е скриена токму во тие блиски врски“.

– Несомнено, соработката е неизбежна и поради геополитичката позиција на две земји. Заедничката историја носи и одредена чувствутелност и некои различни разбирања кои се однесуваат и за Турција и за Србија – пишува турскиот претседател.

Тој пристигна вчеравечер во Белград, а беше пречекан од српскиот колега Александар Вучиќ, премиерката Ана Брнабиќ и дел од српската влада.

Во делегацијата на Ердоган има 185 бизнисмени и осум турски министри. Официјалните разговори на турскиот претседател почнуваат денеска, на тет-а-тет средба со Вучиќ, по што ќе одржат заедничка прес-конференција.


Заев се сретна со делегација на Партијата на Македонците во Србија


Скопје, 14 септември, 2017 - 19:43 (META) 

Премиерот Зоран Заев прими делегација на Партијата на Македонците во Србија, предводена од претседателот на партијата, Горан Илиевски, во придружба на основачот на оваа партија, Драган Доневски.

Од Владата информираат дека претседателот и основачот на Партијата на Македонците во Србија изразиле надеж дека ќе имаат можност да организираат настан кој би можел да биде вклучен во агендата на премиерот Заев за време на неговата посета на Србија во ноември, која доаѓа како иницијатива од претседателот Александар Вучиќ, а на покана на премиерката Ана Брнабиќ.

Тоа ќе биде шанса да се поттикне поголема активност на македонската заедница во Србија, како што кажаа претставниците на Партијата на Македонците во Србија, и ќе се отвори можност за нивна поголема застапеност во политичките институции и во политичкиот живот во Србија.


Брнабиќ го покани Заев да ја посети Србија во ноември


Драч, 26 август, 2017 - 13:47 (META) 

Македонскиот премиер Зоран Заев во ноември ќе го посети Белград, соопшти денеска во Драч српската премиерка Ана Брнабиќ.

– Денеска разговарав со Заев за настаните од изминатите денови. Имавме доста добро разбирање за следните наши чекори. Го повикав и се договоривме да ја посети Србија во ноември – изјави Брнабиќ по средбата одржана на маргините на неформалниот состанок на премиерите од Западен Балкан.

Таа истакна дека се договориле при посетата на Белград да разговараат и за одржување заедничка седница на двете влади.

На средбата, како што рече Брнабиќ се разговарало и за приемот на Косово во УНЕСКО при што, премиерот Заев истакнал дека Македонија останува воздржана по ова прашање.


Брнабиќ ќе го покани Заев на заедничка владина седница, најави Вучиќ


Белград, 24 август, 2017 - 15:18 (META) 

Српската премиерка, Ана Брнабиќ ќе испрати покана до премиерот Зоран Заев за одржување на заедничка седница на владите на двете земји до крајот на годината во Белград. Ова, меѓу другото, го истакнал претседателот на Србија, Александар Вучиќ, на денешната средба со амбасадорката на Македонија во Белград, Вера Јовановска – Типко.

На средбата, како што се наведува во соопштението на официјалната интернет-страница на претседателот на Србија, Вучиќ и Јовановска – Типко, разговарале за „континуираното унапредување на добрососедските односи и негување на традиционалните пријателски врски меѓу двете земји“.

– Сите сметаме дека е потребно да работиме вредно и одговорно на унапредување на нашите односи – нагласил Вучиќ на средбата.

На неа било договорено, по поставувањето на советникот за национална безбедност на Србија, да биде одржан заеднички состанок со неговиот македонски колега.

Тема на средбата, како што се додава во соопштението било унапредувањето на соработката во сите сфери, особено во областа на економијата, туризмот и зедничкиот настап на трети пазари, науката и културата.

Инаку, зачестената комуникација меѓу македонските и српските власти деновиве, доаѓа откако пред пет дена Белград го повлече комлетниот персонал од својата амбасада во Македонија на итни консултации, поради „многу офанзивни разузнавачки активности“ против Србија во Македонија, што предзвика дипломатски тензии.

Премиерот Зоран Заев и претседателот на Србија, Александар Вучиќ вчера во „долг и отворен“ разговор ги разгледаа сите „новононастанати околности“ и ги договорија принципите на кои ќе ги темелат односите меѓу двете земји, а пред дека сите евентуални несогласувања ќе ги решаваат преку дијалог.

За утре во Ниш е најавена средба меѓу шефот на макеоднската дипломатија, Никола Димитров и неговиот српски колега, Ивица Дачиќ.

Денеска се очекува персоналот на амбасадата на Србија да се врати назад во Скопје, а наскоро, според најавите од Белград треба да се врати и српската амбасадрока во земјава, Душанка Дивјак – Томиќ.


Вучиќ: Има докази за офанзивни разузнавачки активности во Македонија против Србија


Белград, 21 август, 2017 - 13:41 (META) 

Српскиот претседател Александар Вучиќ денеска изјави дека персоналот во амбасадата на Србија во Македонија е повлечен на консултации во Белград, откако од страна на српските разузнавачки органи „биле добиени доволно докази за многу офанзивни разузнавачки активности против органите и институциите на Србија“.

– Наша работа е нашите луѓе да бидат подготвени и да се заштити пријателството меѓу Србите и Македонците и да дознаеме како да делуваме во поинакво и ново опкружување кое нам не ни било познато до пред неколку месеци. Многу има шпекулации и мислам дека во наредните 10 дена се ќе биде многу појасно – изјави денеска Вучиќ.

На новинарско прашање, дали кризата во односите со Македонија има врска со членството на Косово во УНЕСКО, Вучиќ рекол дека „Србија ќе ги заштити своите интереси и ќе гради добри односи со Скопје.

– Но, како да ви кажам… тие односи ќе мора да бидат засновани на взаемно почитување. Дали Албанците ќе го стават Косово на дневен ред на Собранието на УНЕСКО… наша работа е да ги заштитиме интересите на Србија, притоа да не го нарушиме интересите на другите земји – рече Вучиќ, додавајќи дека сепак во целата работа има мешање на некои други сили.

Прашан дали мисли на официјална Москва, тој одговорил дека не помислил на Русија.

Сите вработени во амбасадата на Србија во Скопје синоќа беа повлечени на итни консултации во Белград.

Македонското министерство за надворешни работи соопшти дека добило нота од амбасадата на Србија за повлекувањето на персоналот, а Министерството за внатрешни работи потврди дека презело зголемени мерки за обезбедување на амбасадата.

Српската премиерка, Ана Брнабиќ, претходно денеска изјави дека имала консултации со Вучиќ и со шефот на српската дипломатија, Ивица Дачиќ и кратко рече дека „не станува збор за мала работа“.

 


Брнабиќ за повлекувањето на дипломатите од Македонија: Не станува збор за мала работа


Белград, 21 август, 2017 - 12:04 (META) 

Српската премиерка Ана Брнабиќ денеска изјави дека за одлуката за повлекување на персоналот на амбасадата на Србија во Македонија разговарала со министерот за надворешни работи Ивица Дачиќ и со претседателот на Србија, Александар Вучиќ.

– Утринава имав состанок со Дачиќ и консултации со претседателот на Србија, затоа што не станува збор за мала работа – соопшти Брнабиќ.

Сепак, таа не сакаше да открие за што станува збор и замолила новинарите да го почекаат соопштението од српското МНР кое треба да биде објавено околу 12 часот, а на кое заеднички работат.