!Во периодот што претстои работиме на воведување систем за пристап и за претплата. За начинот на пристап и за претплатата ќе информираме дополнително. Содржините на „Мета“ до тогаш се слободни за преземање со задолжително цитирање и атрибуирање.

Милан Зарубица, притворениот од „фабриката“ во Тетово, бил доктор за рак и за дрога


Белград, 5 декември, 2017 - 13:45 (META) 

Милан Зарубица, некогаш угледен фармацевт кој докторирал на анализа за лекување карцином, а подоцна станува озлогласен српски нарко-хемичар, е еден од главните организатори на нелегалното производство на амфетамини во „лабораторијата“ во Тетово.

Бил уапсен во Мала Речица, во фабриката за екстази и за каптагон во петокот, но тоа не е неговото прво апсење.

Како што пишува српскиот весник „Блиц“, Милан Зарубица од Земун, по ненадејната смрт на неговиот брат, фармацевт и стоматолог, Горан Зарубица, во деведесетите години на минатиот век, го презел неговиот бизнис со увоз на лекови и на фармацевтска опрема, го развил, но набргу зачекорил на другата страна на законот.

Милан докторирал на почетокот од деведесеттите години на минатиот век, со дисертација за лекување рак на тироидната жлезда на медицинскиот факултет во Белград, а откако го презел фармацевтскиот бизнис од брат му, односно во моментот на првото апсење во февруари 2003 година, бил сопственик и косопственик на фирмата „Ленал НБЦ“ и уште пет фирми за увоз на лекови и на фармацевтска опрема – „Микропоинт“, „Давидшпед“, „Варан фармасеутикалс“, „Варан кемикалс“ и „Кимел“. Повремено хонорарно ангажирал професори од Фармацевтскиот факултет во Белград, а таму доведувал и светски имиња.

Истовремено го ширел и бизнисот со производство на синтетички дроги, сокривајќи го зад фиктивните фирми кои му биле параван за продажбата, сè до моментот кога го „извезува“ бизнисот во Македонија. За тоа, како што пишува „Блиц“, информацијата дошла од американската агенција за борба против дрогата ДЕА.

Милан Зарубица првпат е уапсен на 4 февруари 2003 година, заедно со неговиот татко Филип, пред дрогата од тогаш најголемата балканска „фабрика“ да ја продаде на купувачи од Македонија и од Бугарија. Иако нивниот идентитет не се дознал, Зарубица добил 11 години затвор. Но, затворската управа на докторот на науки од Земун му дала повластен статус и слободни викенди, а тој тоа го користел за развивање на „бизнисот“, во кој го вклучил и внукот од брат, Бојан Зарубица, кој исто така бил уапсен во Белград, во рамките на големата акција на полициите на Македонија, Србија и на ДЕА.

Второто апсење на Милан поради производство и продавање синтетички дроги се случило на 12 мај 2011 година, откако на границата со Македонија била фатена негова пратка за двајца Турци и за еден Македонец. И откако во последниот ден до 2014 година излегол од затвор отслужувајќи ја првата затворска казна, следната година направил спогодба со српското обвинителство за организиран криминал за случајот од 2011 година, признавајќи дека поседува опрема и материјал за производство на синтетичка дрога, но специјалниот суд му ја потврдил казната и му изрекол единствена казна за случаите од 2003 и од 2011 година, односно 11 ипол години без решетки. Сепак, бидејќи веќе ја одлежал, не се вратил во затвор.

Потоа, пишува српскиот весник, со клиентите од Македонија кои првин му купувале дрога, а потоа посакале и повеќе и го довеле во Македонија за да произведува, бил следен од ДЕА, која заедно со српската и со македонската полиција обезбедила докази за да го врати зад решетки.

Милан Зарубица сега е во 30-дневен притвор изречен од судија на претходна постапка по барање од Основното јавно обвинителство за гонење организиран криминал и корупција на Македонија.


Притвор од 30 дена за лицата од тетовската лабораторија за амфетамин


Скопје, 5 декември, 2017 - 10:20 (META) 

Основното јавно обвинителство за гонење организиран криминал и корупција соопшти дека почнало истрага против двајца државјани на Република Србија и петмина македонски државјани. Тие се осомничени за неовластено производство и пуштање во промет на наркотични дроги, психотропни супстанции и прекурсори, а беа уапсени на крајот на минатиот месец при акцијата на полициите на Македонија и на Србија, кога беше откриена и лабораторијата за синтетички дроги во Тетово.

Сите седуммина од судија на претходна постапка добиле 30-дневен притвор. Меѓу нив е и Милан Зарубица, познат во Србија како некогашен стручњак што станал „балкански крал на синтетичките дроги“.

На 30 ноември и на 1 декември, македонското МВР со соработка со МВР на Србија изврши претрес на повеќе објекти и локации на подрачјето на Тетово и на Скопје. Притоа во Тетово беше откриена лабораторија за синтетички дроги, а во скопско Батинци се откриени опрема и големи количества материи за кои се смета дека се поврзани со пронајдените во Тетово.

Според Обвинителството, групата произвела вкупно 204.696 таблети амфетамин со вкупна маса од 35 килограми.


Пронајдена дрога кај скопјанец што управувал возило на агенцијата СГС


Скопје, 26 февруари, 2016 - 12:32 (META) 

Екипа на полициската единица „Алфа“, пред десетина дена, при претрес на 22-годишен скопјанец, кој управувал возило, сопственост на агенцијата за обезбедување „Секјурити груп сервис“ (СГС), пронашла и запленила околу 3 грама амфетамин и помало количество марихуана, информираат од МВР.

Секторот за внатрешни работи Скопје деновиве поднел кривична пријава против 22-годишниот Е.Ш., според која тој се товари за неовластено производство и пуштање во промет на наркотични дроги, психотропни супстанци и прекурсори.

На 17 февруари 2016 година, од полициски службеници од Единицата за прв одговор и интервенција – Алфа, околу 9.30 часот во село Визбегово било сопрено патничко моторно возило „форд фиеста“, со скопски регистарски ознаки, сопственост на агенцијата СГС, а управувано од пријавениот. Од извршениот преглед над истиот, пронајдени биле две кесички со непозната растителна материја и една зипер-кесичка со непозната прашкаста материја. По извршеното вештачење било утврдено дека прашкастата материја е психотропна супстанција амфетамин, со нето-маса од 2,55 грама, додека растителната материја е наркотична дрога марихауана со нето-маса од 0,27 грама и мешавина од тутун и од марихуана со нето-маса 0,42 грама“, стои во информацијата за случајот во дневниот билтен на настани на МВР.

Оттаму додаваат дека против осомничениот Е.Ш. во 2009 година била поднесена една кривична пријава за тешка кражба.


Скопјанец и прилепчанец осомничени за продажба на дрога во Охрид


Охрид, 4 август, 2015 - 14:45 (META) 

Охридската полиција поднела кривична пријава против две лица, од Скопје и од Прилеп, осомничени дека препродавале дрога на локални наркозависници и на туристи, информираат од полицијата.

Според пријавата, осомничените Г.С. (30) од Прилеп и Ф.Ј. (21) од Скопје, се товарат за неовластено производство и пуштање во промет на наркотични дроги, психотропни супстанци и прекурсори. Судија на претходна постапка на осомничените им одредил мерка притвор од 30 дена.

Според полицијата, првоосомничениот Г.С. пред околу една недела набавил поголемо количество таблети екстази, амфетамин и хашиш, кои потоа ги препакувал во мали количества „за продажба на наркоуживатели од подрачјето на Охрид, но и на други лица – туристи, особено посетители на техно-забави кои се одржуваат во Охрид“.

Во неделата, при претрес на соба во студентскиот дом „Никола Карев“ во Охрид, што ја користел Ф.Ј., била најдена кеса со околу 50 таблети екстази, со лого „мерцедес“, едно најлонско пакување со бела прашкаста материја ставена во целофан и други предмети.


Штипјанец се обидел во гаќи да прошверцува дрога


Струмица, 13 јануари, 2015 - 13:41 (META) 

Двајца штипјани се осомничени за трговија со дрога откако биле фатени со амфетамин што го набавиле во Бугарија, соопшти МВР.

Станува збор за Ж.М. (26) и З.Ч. (29), против кои СВР Струмица поднела кривична пријава за неовластено производство и пуштање во промет на опојни дроги, психотропни супстанци и прекурсори.

Како што соопштуваат од МВР, осомничните на 8 јануари заминале во Софија, каде од непознато лице купиле амфетамин со вкупна тежина од 54,45 грама, за сума од 360 лева или 180 евра.

Првоосомничениот Ж.М. ја сокрил дрогата во гаќи и така се обидел да ја прошверцува преку граница, но бил откриен од полициските службеници на граничниот премин Ново село.

Во разговор ос полицијата, Ж.М. дал изјава за потеклото на дрогата и дека имале намера со второосомничениот да ја продадат на дилер во Штип.

Од МВР додаваат дека и двајцата се регистрани во крим-евиденцијата на СВР Штип.