Иванов демантира дека блокира назначување амбасадори


Скопје, 26 јуни, 2018 - 13:30 (META) 

Кабинетот на претседателот Ѓорге Иванов ги демантира тврдењата на Дипломатскиот клуб Скопје за блокада на назначување шефови на дипломатско-конзуларните претставништва на Македонија.

„За сите предлог-кандидати за амбасадори, за кои претходно е постигната согласност со Министерството за надворешни работи, постапките за нивно именување се во тек. Согласно законските процедури, за дел од прифатените и усогласени предлози, постапките за нивно именување се завршени и дипломатите се веќе упатени на извршување на амбасадорската должност“, соопшти Кабинетот на Претседателот.

Доколку, Дипломатскиот клуб, додаваат од кабинетот, има забелешки околу постапката и процедурите за именување амбасадори, го упатуваме на одговори во Кабинетот на министерот за надворешни работи.

„Претседателот на Република Македонија, како и досега, останува доследен на своите заложби за поставување на професионални и стручни кадри, кои ќе придонесат во јакнење на дипломатската мрежа и ќе ги застапуваат интересите на Република Македонија“, стои во соопштението.

Претходно, Дипломатскиот клуб – Скопје соопшти дека се празни 20 позиции на амбасадори на Македонија во странство заради, како што наведоа, неноминирање на амбасадори од страна на претседателот Иванов и покрај серијата предлози што до него ги има доставено Владата.


Дипломатски клуб: Иванов ја уништува дипломатијата


Скопје, 26 јуни, 2018 - 10:06 (META) 

Дипломатски клуб – Скопје се огласи со реакција, за како што се вели, блокада во професионалниот развој на дипломатската структура во Министерството за надворешни работи и во несоодветното претставување на земјата во странство. Вината ја ставаат врз претседателот Ѓорге Иванов.

„Евидентно е дека заради блокадата за неименување на шефови на Диломатско-конзулрните претставништва на Република Македонија во странство од страна на претседателот Ѓорге Иванов, несоодветно се претствуваат, афирмираат и бранат интересите на Република Македонија. Со таквиот однос на Иванов доаѓа до уназадување на нивото на односите на Република Македонија со државите со кои сме потпишале и договори за отворање на амбасади со именување на амбасадори“, се вели во соопштението.


Македонија заслужува датум за преговори со ЕУ и покана за НАТО, сметаат Османи и Димитров


Скопје, 21 мај, 2018 - 17:13 (META) 

Вицепремиерот задолжен за европски прашања, Бујар Османи и министерот за надворешни работи, Никола Димитров, учествуваа на работна средба со амбасадорите на земјите – членки на Европската Унија во Македонија, организирана од страна на амбасадорот на Република Бугарија во земјава, Иван Великов Петков. Тема на состанокот беа политичките состојби околу евроинтегративните процеси во Република Македонија, а во контекст на пораките и заклучоците од софискиот Самит посветен на Западниот Балкан.

Османи рече дека Република Македонија, изминатава година, во целост била посветена на евроатланската агенда, успешно имплементирајќи го притоа планот „3-6-9“, со што, како што рече, повторно се вратила довербата како на граѓаните, така и на меѓународните партнери во европската перспектива на земјата.

-Нашиот фокус останува реформската агенда, и наскоро излегуваме со нов План 18, со кој ќе ги адресираме сите потребни реформи кои произлегуваат од Извештајот на Комисијата, водечките иницијативи на Стратегијата, заклучоците од софискиот самит, но и сите останати релевантни извештаи кои се во насока на евроатланските процеси – изјави Османи, додавајќи дека Македонија на дело ја демонстрирала својата сериозност и зрелост која очекува да резултира со одлука на Европскиот Совет во јуни за почеток на пристапните преговори, како и покана за НАТО, подоцна на Самитот во јули.

Димитров потенцираше дека дојдено е времето Република Македонија заслужно да го започне европското патување.

– Следните недели се од особена важност за Евро-интегративните перспективи на Македонија. Се наоѓаме пред одлучувачки момент кој траба да ја признае способноста на земјата да се справи со најголемата политичко-чувствителна ситуација во последните 15 години. Дополнително, постои јасна потреба да се демонстрира сојузништво и заеднички да се построиме во вистинскиот правец – изјави Димитров.

Тој повика силните пораки за поддршка да се стават во пракса.

– Република Македонија демонстрираше искрен пристап и сериозност за која е потребна соодветна валоризација на јунскиот состанок на Европскиот совет преку одлука за почеток на преговори, како и покана за членство во НАТО на самитот во јули – додаде Димитров.


Османи: Очекувам најдобар извештај и чиста и безусловна препорака од ЕК за Македонија


Скопје, 7 март, 2018 - 13:52 (META) 

Вицепремиерот за европски прашања Бујар Османи очекува најдобар извештај на Европската Комисија за Македонија досега, кој ќе биде проследен со чиста и безусловна препорака за почеток на преговорите на Македонија за зачленување во ЕУ.

Тоа, рече тој на конференцијата во Владата, ќе биде најголема потврда дека Македонија повторно е вратена на европскиот колосек.

– Секако, тоа не значи дека реформите по Извештајот ќе запрат, туку напротив, реформскиот процес продолжува, а конечно, очекуваме сиот овој напор да резултира и со одука на Советот на ЕУ за почеток на преговорите во јуни, и, согласно Стратегијата за проширување, да се приклучиме кон динамиката 2025 за полноправно членство во Европската Унија – изјави Османи  пред да се одржи презентацијата за реализираното од планот „3-6-9“ пред амбасадорите од земјите-членки на ЕУ во Македонија.

Во свечената сала на Владата Османи, министерка за одбрана Радмила Шекеринска, министерот за внатрешни работи Оливер Спасовски, министерот за правда Билен Саљији и министерот за информатичко општество и администрација, Дамјан Манчевски, одржаа презентација на статусот на имплементацијата на планот „3-6-9“ пред амбасадорите.


Османи очекува Македонија да се приклучи на колосекот за влез во ЕУ до 2025 година


Скопје, 5 февруари, 2018 - 11:00 (META) 

Стратегијата за проширување на Европската Унија е една од најважните иницијативи на Европската комисија за овој регион, истакна вицепремиерот за европски прашања, Бујар Османи на денешниот координативен работен појадок со амбасадорите и нивните претставници од земјите од Западен Балкан.

Средбата се одржува во пресрет на објавувањето на Стратегијата на Европската комисија, за проширување со земјите од Западниот Балкан до 2025 година.

„Стратегијата за проширување на ЕУ претставува една од најважните инцијативи на Европската комисија за овој регион, затоа што директно покажува дека Европската Унија го враќа фокусот на регионот, а процесот на проширување со земјите од Западниот Балкан е повторно високо на агендата на Унијата“, истакна Османи, додавајќи дека со овој документ, Комисијата го става процесот на проширување на цврсти шини, со прецизни рокови.

Османи рече оти очекува дека покрај Црна Гора и Србија, за кои е најавено да бидат наведени во Стратегијата како земји кои во моментов го предводат евроинтегративниот процес во регионот, во документот соодветно да бидат наведени и европските перспективи за Македонија и Албанија, кои би биле „охрабрени набргу да ги почнат преговорите за членство“, и со тоа, да се приклучат на истиот колосек за влез во Унијата до 2025 година.


Димитров до амбасадорите од ЕУ: Можеме да бидеме фактор на успех


Скопје, 22 јануари, 2018 - 13:00 (META) 

Министерот за надворешни работи Никола Димитров на денешната средба со амбасадорите на земјите – членки на Европската Унија, повторно ја нагласил заложбата на Македонија за отпочнување на пристапните преговори со ЕУ и потребата да се посвети внимание на процесот на интеграција во ЕУ.

Димитров исто така информирал за конкретните реформски активности во  правосудството, добро владеење, јавната администрација и следење на комуникациите, извести Министерството за надворешни работи.

– Треба да ја искористиме секоја шанса за напредок. Ние ќе направиме се да ве убедиме дека можеме да бидеме фактор на успех, за нас, за регионот и за Унијата – истакнал Димитров.

Според министерството, амбасадорите ја нагласиле важноста за постојано одвивање на реформите и неопходноста Република Македонија да се фокусира на спроведување на итните реформски цели.


Османи на амбасадорите им ги презентираше деловите „6“ и „9“ од планот „3-6-9“


Скопје, 28 ноември, 2017 - 13:38 (META) 

Вицепремиерот задолжен за европски прашања, Бујар Османи, денес ги презентирал деловите „6“ и „9“ од планот „3-6-9“, пред амбасадорите на земјите членки на Европската Унија во Македонија.

Османи посочил дека намерата на Владата е планот „3-6-9“ да ја заокружи реформската потреба на Република Македонија, за откочување на евроинтегративните процеси. Тој на амбасадорите им ги повторил очекувањата на Владата за конкретни чекори од стана на Европската Унија во насока на визибилноста на европските перспективи во Македонија.

„Пред нас имаме процес на имплементација на сериозни реформи, политички чекори насочени како придобивка за следните генерации, а не за следните избори. Владата храбро влезе во реализација на овие реформи и согласно нивната испорака, граѓаните ќе очекуваат испорака и од страна на Европската Унија“, истакна Османи.

Османи нагласил Владата во наредниот период, ќе се посвети на изградбата на широк општествен и политички консензус за планот „3-6-9“, за да се издвојат интеграциите во ЕУ и во НАТО од дневната политичка дебата.


Груевски им се пожали на амбасадорите дека власта ги злоупотребувала институциите


Скопје, 12 октомври, 2017 - 19:53 (META) 

Лидерот на ВМРО-ДПМНЕ, Никола Груевски, денеска имал средба со амбасадорите на САД, на државите членки на Европската Унија и на НАТО во земјава, на која од страна на партијата било посочено дека во текот на кампањата се забележени низа прекршувања на изборниот процес, физички инциденти, демолирања на штабови, како и злоупотреба на државните ресурси во партиски цели.

Од ВМРО-ДПМНЕ, како што се наведува во соопштението, било истакнато дека е неминовно „власта да престане со злоупотребите на државните институции за да се запази демократијата“.

„Од страна на ВМРО-ДПМНЕ исто така беше истакната потребата од спроведување на фер и демократски избори, за што е потребен зголемен ангажман на државните институции. ВМРО-ДПМНЕ ќе остане посветена во заложбата за спроведување на фер и демократски избори и создавање на демократски амбиент за сите учесници во изборниот процес. ВМРО-ДПМНЕ е убедена дека претстојните локални избори мора да бидат по највисоките стандарди, за Република Македонија да продолжи да чекори по патот кон ЕУ и НАТО“, стои во соопштението од ВМРО-ДПМНЕ за средбата.

Ова е втора средба на Груевски со амбасадорите во пресрет на локалните избори. На 19 септември, тој со членови на извршниот комитет на партијата имаше средба со амбасадорите на земјите членки на ЕУ во Македонија и со претставници на ОБСЕ/ОДИХР, на која, меѓу другото, побара „Владата активно да се ангажира за создавање демократски амбиент за одржување на локалните избори“.


Иванов и Димитров кохабитирале за пополнување на дел од испразнетите амбасади


Скопје, 2 октомври, 2017 - 15:59 (META) 

Наскоро ќе бидат назначени првата група амбасадори кои ќе бидат испратени во испразнетите дипломатски претставништва на Македонија во светот, соопшти денеска шефот на македонската дипломатија, Никола Димитров, одговарајќи на прашање до каде се преговорите со претседателот Ѓорге Иванов за новите македонски амбасадори.

– Неколкупати имавме средби со претседателот Иванов и со неговиот тим. Би рекол дека сме во финална фаза за испраќање на правата група амбасадори – рече Димитров, без притоа да прецизира дали меѓу договорените кандидати се и амбасадорите што ќе бидат испратени во Брисел, Париз и во Велика Британија.

Димитров истакна дека наследил тешка ситуација во однос на бројноста и во однос на балансот во односот меѓу кариерни дипломати и политички именувани дипломати.

– Соодносот е 60 наспрема 40 во полза на политичките дипломати – рече Димитров.

Тој истакна дека се гради добра волја и консензус да се подобри балансот, бидејќи е потребна професионализација на кадровската политика на МНР.


Груевски од амбасадорите и од ОДИХР побарал услови за фер избори


Скопје, 19 септември, 2017 - 21:09 (META) 

На средба со амбасадорите на земји членки на ЕУ во Македонија и со претставници на ОБСЕ/ОДИХР, претседателот на ВМРО-ДПМНЕ, Никола Груевски, и членови на извршниот комитет на партијата, побарале „Владата активно да се ангажира за создавање демократски амбиент за одржување на локалните избори“, соопшти партијата.

„Беше изразена силна загриженост од првичните обиди да се заплашуваат гласачи и да се поткупува гласот од страна на СДСМ. Се побара да се создадат сите услови за фер и демократски избори“, се вели во соопштението.

Притоа лидерот на партијата изразил загриженост за евроинтеграциите и за економската ситуација во земјава.

„Груевски истакна дека стратешки приоритет на Република Македонија преставува членството во Европската Унија и за тоа е многу важна поддршката од европските пријатели за придвижување на процесите. Во изминатиот период освен декларативна заложба на Владата, немаше никаков суштински продонес за напредок на полето на интеграциите. Беше изразена загриженост поради негативните трендови во економијата, која придонесува за слабеење на стандардот на граѓаните“, стои во партиското соопштение.