Кејт Брнс номинирана за нова амбасадорка на САД во Македонија


Вашингтон, 8 ноември, 2018 - 17:04 (META) 

Претседателот на САД, Доналд Трамп ја предложи Кејт Мери Брнс (Kate Marie Byrnes) за нов амбасадор на САД во Македонија која треба да дојде на местото на сегашниот амбасадор Џес Бејли.

Според соопштението од Белата куќа, Кејт Мери Брнс е амбасадорка од кариера и доаѓа од Атина каде што ја вршела функцијата заменик амбасадор на САД во Грција од септември 2017 година.

Претходно таа била заменик-шеф на мисија и заменик- постојан претставник на Мисијата на САД во Организацијата за безбедност и соработка во Европа (ОБСЕ) во Виена, Австрија.

За време на нејзината кариера, таа била советник за односи со јавност во Амбасадата на САД во Мадрид, била виш цивилен претставник на Одделот за државни функции во оперативната група Бастон/Бронко во Авганистан.

Работела како советник за јавни работи во Мисијата на САД во НАТО во Брисел, Белгија, од 2007-2010 година. Таа исто така ги претставувала интересите на САД во Шпанија, Боливија, Унгарија и Турција.

Во мај минатата година, како претставник на Мисијата на САД во ОБСЕ, Брнс рече дека САД го повикуваат надлежните во Македонија да преземат чекори за да ја осигурат безбедноста на сите членови на парламентот, да ги истражат нападите во Собранието од 27 април темелно и да ги повикаат на одговорност тие што ги извршиле, ги организирале и ги нарачале насилствата.

– САД силно ги осудуваат насилните напади на членови на македонскиот парламент, кои следеа по изборот на Талат Џафери за спикер на Собранието. САД ќе соработуваат со новиот спикер и со парламентот за поддршка на демократијата и за да ѝ помогнат на Македонија да се движи по европскиот пат. За насилството нема место во демократските процеси. Ги изразуваме нашите најдлабоки симпатии кон членовите на парламентот и кон другите повредени во нападите и на нивните семејства. Како стратешки партнер и пријател на Македонија, со целосна почит на нејзиниот суверенитет и унитарноста, САД ги повикуваат сите партии да го концентрираат интересот на Македонија и на нејзините граѓани, пред сè друго, да работат заедно конструктивно и целосно да ги имплементираат сите нивни заложби што произлегуваат од Договорот од Пржино. Ги повикуваме сите партии да ги решат разликите мирно и да ги почитуваат законите во Македонија и демократските процеси – рече Брнс во нејзиното обраќање.

Претходно, во март истата година, Брнс изјави дека САД се разочарани од одлуката на Иванов да го додели мандатот за формирање влада на парламентарното мнозинство.

– САД се разочарани што претседателот Иванов одби да им понуди можност да се формира новата влада на претставниците кои имаат јасно парламентарно мнозинство. Ние сметаме дека оваа одлука не е во согласност со заложбите на ОБСЕ, основните демократски принципи и владеењето на правото, што се основни вредности на оваа организација – рече Брнс.

Амбасадорите ги номинира претседателот, а ги потврдува Сенатот на САД.


Герберих: Владата и опозицијата да ја спроведат волјата на населението за излез од чекалната на ЕУ и НАТО


Скопје, 9 октомври, 2018 - 14:39 (META) 

Со преку 91 отсто од гласовите „за“, гласачите во Македонија јасно гласаа за европскиот пат и за понатамошната ЕУ и НАТО перспектива на својата земја. Иако, за жал, само 37 проценти од официјалната бројка на гласачи учествуваа на референдумот и со тоа не се постигна официјалниот кворум, рече германскиот амбасадор Томас Герберих по повод Денот на националното единство.

– Но, сеедно која математика ќе се примени за пресметка на бројот на гласачите, сигурен сум дека мнозинството од македонското население со тоа ја искажа својата волја конечно да излезе од чекалната на ЕУ и НАТО. Сега на ред се владата и опозицијата, заедно да ја спроведат оваа волја и со промена на уставот да го одобрат патот на својата земја во правец на НАТО и ЕУ и да ја покажат својата политичка одговорност, за да не се случи овој пат повторно да биде блокиран на долг рок за Македонија и земјата да биде во Европа во изолација – вели Герберих.

Тој во својот говор истакна дека Германија е и останува да биде најзначајниот трговски партнер на македонското стопанство со билатерална трговска размена што се очекува на крајот на годината да достигне 4 милијарди евра.


ТХП против новиот косовски амбасадор, контроверзниот Ѓерѓ Дедај


Скопје, 7 август, 2018 - 14:09 (META) 

Партијата за движење на Турците во Македонија (ТХП) испрати писмо до претседателот Ѓорге Иванов и до министерот за надворешни работи Никола Димитров и побара во рамките на своите можности да го спречат назначувањето на досегашниот заменик-министер за надворешни работи на Косово, Ѓерѓ Дедај, на функцијата амбасадор во Македонија.

„Партијата за движење на Турците во Македонија, како и целата турска јавност во Македонија, но и пошироко, со голема доза на разочараност и огорченост ја примивме веста дека новиот амбасадор на Косово во Македонија ќе биде токму лицето Ѓерѓ Дедај, кој претходно додека ја вршеше функцијата заменик министер на Косово во повеќе наврати даде скандалозни, навредливи, крајно фашистички изјави кон турскиот народ. Категорични сме дека човек кој има ваков фашизоиден и примитивен ментален склоп во ниту еден случај не смее да биде амбасадор во нашата земја која во сите сегменти максимално се труди да ја негува и промовира мултиетничноста како една голема придобивка за целото општество“, се вели во писмото.

Од партијата, чиј претседател е Енес Ибрахим, се вели дека прифаќањето на Дедај како амбасадор „ќе резултира негативно врз мултиетничките релации во нашава земја и регионот, но и ќе влијае негативно и кон пријателството со Турција“.

Ѓерѓ Дедај предизвика бурни реакции во косовската јавност на крајот на минатиот месец со краток пост на неговиот Фејсбук профил, насловен „Вештерките на Балканот“, во кој рече дека Турција и Србија преку свои емисари се обидуваат да „се вратат“ на Косово и побара „остатоците на овие освојувачи да бидат истребени од Косово и од земјите на Ѓерѓ Кастриот“.
Пратениците од Групата 6+, народни избраници од помалите етнички заедници во косовскиот парламент, минатата недела побараа од премиерот Рамуш Харадинај разрешување на Дедај од функцијата заменик министер, поради неговите навредливи изјави во однос на Република Турција.

„Дедај, со неговите понижувачки изјави, со кои предизвикува раздор, ја навреди турската заедница во Косово“, се вели во писмото на пратениците од помалите етнички заедници кои се дел од владејачката коалиција.

Пет ден подоцна Дедај повторно се огласи на Фејсбук, напаѓајќи ги новинарите што го критикуваа неговиот настап, велејќи дека лажат.

„Турција и Србија цели шест века беа најголемите владетели и варварски освојувачи на албанскиот народ. Вршеа злосторства и геноцид во овие подрачја. Турците и Србите не треба да се чувствуваат горди на тие времиња, туку треба да се дистанцираат од нив и од варварските злосторства. Истовремено, не треба да се чувствуваат навредени кога го нарекуваме шествековниот период така како што го нарекуваме“, напиша Дедај.


Ѓерѓ Дедај именуван за нов амбасадор на Косово во Македонија


Приштина, 7 август, 2018 - 11:16 (META) 

Косовскиот претседател Хашим Тачи го именувал актуелниот заменик министер за надворешни работи Ѓерѓ Дедај за нов амбасадор на Косово во Македонија, јави дописникот на МИА од Приштина.

Веста на својата фејсбук-страница синоќа ја објави самиот Дедај.

Пратениците од Групта 6+ во косовското Собрание минатата недела побараа од премиерот Рамуш Харадинај разрешување на Дедај од функцијата заменик министер, поради неговите навредливи изјави во однос на Република Турција.

„Дедај, со неговите понижувачки изјави, со кои предизвикува раздор, ја навреди турската заедница во Косово“, се вели во писмото на пратениците од помалите етнички заедници кои се дел од владејачката коалиција.


Унгарскиот и словачкиот амбасадор: Очекуваме Македонија да ги почне преговорите со ЕУ


Скопје, 20 јуни, 2018 - 13:01 (META) 

Очекуваме добри вести идната недела, Македонија да ги почне преговорите со ЕУ. Ќе помогнеме колку што можеме зашто земјата треба да стане полноправен член што поскоро, а договорот со Грција е само дополнителен, силен поттик во оваа насока, рекоа денеска амбасадорите на Унгарија и на Словачка во Македонија, Ласло Дукс и Хенрик Маркуш, на прес-конференцијата по повод примопредавањето на претседателството со Вишеградската група.

И Дукс и Маркуш напоменаа дека Вишеградската четворка е силен поддржувач на проширувањето на ЕУ. За членството на Македонија, времето е повеќе од вистинско, а изборот е јасен.

– Отворањето на преговорите треба да почне во секој случај иако Договорот со Грција дава дополнителен, огромен придонес во оваа насока. Жалиме што процесот на преговори не почна уште пред многу години – истакна амбасадорот Маркуш, одговорајќи на новинарско прашање.

Унгарското претседателство официјално завршува на 30 јуни по што го презема Словачка на 1 јули.


Герберих: Клучни се реформите и дијалогот власт – опозиција


Скопје, 26 април, 2018 - 13:17 (META) 

Потребни се реформски зафати што ќе ги опфатат сите во општеството и вистински дијалог меѓу власта и опозицијата, рече германскиот амбасадор Томас Герберих говорејќи за евроатлантските интеграции на Македонија на конференцијата „Македонија: Евроатлантска интеграција, нови предизвици и можности“ што се одржа во Министерството за надворешни работи.

Според германскиот амбасадор,  Владата во изминатата година постигнала голем напредок, поради што стаса и препораката од Европската Комисија за почеток на преговорите, но реформите мора да продолжат со вклученост на сите фактори.

– Реформите мора да се спроведат со вклученост на сите во општеството и да се врати доверба во институциите, кои треба да работат во рамки на нивниот мандат почитувајќи го правото и применувајќи ги највисоките професионални стандарди, оти само тогаш ќе можеме со сигурност да кажеме дека реформскиот процес пристигнал во оваа земја. Опозицијата мора да биде вклучена како клучен дел во функционирањето на демократијата. Конструктивниот политички дијалог меѓу Владата и опозицијата надминувајќи ги сите политички разлики е клучно за соодветно функционирање на една парламентарна демократија – рече Герберих.


Столтенберг: Русија не одлучува за членството на Македонија во НАТО


Брисел, 26 април, 2018 - 13:16 (META) 

Генералниот секретар на НАТО Јенс Столтенберг, денеска порача дека само Македонија и 29-те земји членки на Алијансата можат да одлучуваат за членството на земјата во Алијансата, пренесува МИА.

На прес-конференција ден пред состанокот на министрите за надворешни работи на НАТО членките во Брисел, генералниот секретар Столтенберг, прашан да ги коментира изјавите на рускиот амбасадор во Македонија дека земјата ќе стане „легитимна цел“ во случај на конфликт доколку стане членка на НАТО, рече дека станува збор за покажување сила.

– Целата идеја дека Русија нема да прифати одредени земји да станат членки на НАТО е идеја на сфери на влијаниа каде големите сили ги контролираат помалите држави и тоа е во контрадикција со се за што НАТО се залага. Прво мислам дека е важно правото на секоја нација да одлучи за сопствениот пат и безбедносни договори, ова е фунадаментален принцип за НАТО. На Скопје е да одлучи за сопствениот пат и дали сака да се приклучи кон НАТО. Македонија и 29-те сојузници на НАТО одлучуваат за тоа и никој друг нема збор во овој процес – одговори Столтенберг.

Како што јави дописничката на МИА во Брисел, Столтенберг рече дека го поздравува напредокот во преговорите за спорот за името и оти е информиран за тоа.


Тимови на Холандија, САД и Британија утре ќе го чистат кејот на Вардар


Скопје, 25 април, 2018 - 10:34 (META) 

Амбасадата на Кралството Холандија заедно со „Пивара Скопје“ и „Пакомак“ во утре на пладне ќе организира твит-ап за чистење на кејот на реката Вардар. Во акцијата за чистење на кејот од ѓубре и смет досега се пријавиле тимови од амбасадите на САД и на Велика Британија, соопштија од холандската амбасада.

Од амбасадата велат дека по трет пат организираат акција за чистење, и дека годинава акцијата се совпаѓа со одбележување на Денот на кралот Вилем Александер.

Американскиот амбасадор Џес Бејли на „Твитер“ објави дека тимот од неговата амбасадата е среќен што може да се вклучи во активностите за чистење, организирани од неговиот колега Ваутер Пломп од амбасадата на Холандија.

Во претходните две акции организирани од холандската амбасада, се чистеше ѓубре и смет од кејот на Вардар и кај Езерото Матка. Во овие акции покрај вработените од амбасадата редовно учествува и амбасадорот на Холандија Ваутер Пломп, а во минатогодишната акција за чистење на Матка се вклучи и британскиот амбасадор Чарлс Гарет.

Пред неколку години холандската амбасада организираше и чистење на Маврово.


Протераниот руски дипломат испратен од Македонија со патриотскиот марш „Прошчаније Славјанки“


Скопје, 2 април, 2018 - 16:21 (META) 

Рускиот дипломат на кој македонските власти му наложија да ја напушти земјава поради одлуката на Владата да се солидаризира со Велика Британија во врска со случајот „Скрипаљ“, но и под обвинување за активности надвор од неговиот мандат, утрово ја напушти земјава преку скопскиот аеродром, јави „ТАСС“.

Од амбасадата на Руската Федерација протераниот дипломат и семејството биле испратени со звуците на патриотскиот марш „Прошчаније Славјанки“.

На меѓународниот аеродром „Скопје“ биле испратени од група негови колеги, на чело со амбасадорот Олег Шчербак.

Токму  Шчербак минатата седмица на прес-конференција рече дека потегот за протерување на рускиот дипломат од Македонија, како прв ваков чекор во билатералните односи, е непромислен чекор, кој Македонија очигледно го донела под притисок од надвор, но и дека тоа нема да остане без соодветен одговор од Русија.


Шчербак: Русија е разочарана од реакцијата на ВМРО-ДПМНЕ за протерувањето, ќе почека со контра мерки


Скопје, 29 март, 2018 - 13:29 (META) 

Изјавата на потпретседателот на ВМРО-ДПМНЕ, Николоски е израз на недоследната политика на дел од раководството на таа политичка партија, и како резултат на таквата политика, ВМРО-ДПМНЕ ги загуби изборите. Но истовремено, јас знам дека не мал број членови на една од најголемите партии се искрено определени за развој на конструктивна соработка и взаемни односи со Руската Федерација. Ова го изјави амбасадорот Олег Шчербак одговарајќи на прашањето од „Мета“ дали вчерашната изјава на Александар Николоски во емисијата „200“ на „Алсат-М“ дека потегот на владата да протера еден руски дипломат е в ред, е разочарување за Русија, со оглед на интензивната соработка на двете земји во текот на владеењето на ВМРО-ДПМНЕ.

Рускиот амбасадор на денешната прес-конференција рече дека потегот за протерување на рускиот дипломат од Македонија, како прв ваков чекор во билатералните односи, е непромислен чекор, кој Македонија очигледно го донела под притисок од надвор, но и дека тоа нема да остане без соодветен одговор од Русија.

– Македонската страна не ни достави докази или не сака да достави докази или на некој начин да ни потврди дека протераниот дипломат се занимавал со одредени дејности што излегуваат од дипломатскиот статус. Одлуката на власта во Македонија предизвикува кај нас длабоко жалење. Оваа одлука е неоснована и е без преседан во севкупните односи на Република Македонија и Руската Федерација. Претставниците на власта во Скопје решија да преземат непријателски чекор под влијание од надвор, но тоа не ја ослободува македонската страна од одговорност – рече Шчербак.

Но, според рускиот амбасадор, реакцијата од руската страна ќе дојде по обемно промислување и нема да биде донесена избрзано и веднаш, туку ќе треба да се почека.

– Истакнуваме дека оваа избрзана и кусогледа антируска акција е во спротивност со повеќепати декларираните ставови на врвот на власта во Република Македонија за развој на обостраните односи. Руската Федерација е постојана членка на Советот за безбедност на ОН и одговорен член на меѓународната заедница и така се однесува во билатералните односи. Руската дипломатија има долга и длабока традиција, и ние немаме практика да брзаме со важните чекори. Протерувањето на диипломат претставува сериозен чекор на непријателство. Во свое време ќе дадеме наш одговор и тој ќе биде адекватен и добро промислен – рече Шчербак.

Допрашан дали ќе стане збор за одредени економски мерки, Шчербак рече дека за руската реакција сепак ќе треба да се почека.

Тој рече дека за разлика од другите негови колеги во Македонија никогаш не се мешал во внатрешните работи на земјата и рече дека ниту бил пред ниту во Собранието на 27 април 2017 година, „за разлика од некои други“. Категорично тврди дека ниту еден друг вработен во руската амбасада не бил пред или во Собранието при насилствата.

Во сличен манир одговори и на новинарското прашање за став за донесувањето на Законот за јазиците.

-Руската федерација има долга традиција на соживот на многу народи, а нашата допломатска практика не се врзува со мешање во внатрешните работи и јас не би се мешал. Се разбира дека меѓуетничките односи се чувствителна тема и најдобро е во такви услови да се воздржам од коментар – рече рускиот амбасадор Олег Шчербак.