Амбасадата на САД му понудила експертска помош на Судскиот совет за реформите


Скопје, 18 јануари, 2018 - 13:18 (META) 

Претседателот на Судскиот совет, Зоран Караџовски вчера имал средба со претставниците на Амбасадата на САД во земјава, Дејвид Стивенсон – шеф на политичкиот и економскиот сектор и со Џон Т. Мекнил – правен советник.

На состанокот, како што информираат денеска од Советот, било разговарано за начинот на избор на судиите, како и за одговорноста на сите субјекти во судството, вклучувајќи ги судиите и членовите на Судскиот совет.

„Делегацијата од Амбасадата на САД изрази желба за соработка и нивна поддршка за подобрување на законските решенија за избор на судии и водење на дисциплинските постапки, како и за транспарентноста на Судскиот совет на Република Македонија, а воедно понудија и можност за активна помош на експерти од САД“, стои во соопштението.


Бејли: Нема твитер-војна, но уште еден руски цевковод нема да донесе чист воздух


Скопје, 15 декември, 2017 - 20:48 (META) 

Откако претседателот на Обединета македонска дијаспора, Мето Колоски денеска на својот Твитер профил ги предизвика Амбасадата на САД во Македонија и Амбасадорот Џес Бејли, наведувајќи дека се случува „Твитер војна меѓу амбасадите на САД и Русија поради загадувањето на воздухот во Македонија, набргу доби одговор од Бејли.

Амбасадорот на САД одговори опширно. „Не е Твитер војна. Ние им поставивме на македонските граѓани прашање за краткорочни мерки за чист воздух. Уште еден руски цевковод тоа нема да го направи. САД ја поддржуваат желбата на Македонија да донесе гас во македонските градови и разноликоста во снабдувањето со гас за Македонија и Европа“, напиша амбасадорот на САД во одговор на Колоски.   

Препирката почна завчера, кога амбасадата на САД во Македонија во објава на социјалните мрежи „Фејсбук“ и „Твитер“ праша „кои се вашите идеи за почист воздух во Македонија“.

„Загадувањето на воздухот во Скопје денеска беше толку големо што едвај можеше да се види амбасадата! Кои се вашите идеи за почист воздух во Македонија?“ напишаа од Амбасадата на САД на „Фејсбук“ и на „Твитер“.

Набргу стаса одговор од амбасадата на Руската федерација во Македонија: „Бидејќи нашите пријатели од амбасадата на САД бараат идеи за аерозагадувањето во Македонија, ние сакаме да помогнеме со решение. #Турски тек“, порачаа од руската амбасада на „Твитер“.


Амбасадата на САД загрижено праша: Има ли идеи за намалување на загадувањето?


Скопје, 14 декември, 2017 - 20:19 (META) 

Амбасадата на САД во Македонија денеска изрази загриженост поради големата загаденост на воздухот во Скопје и во земјава.

Во својата објава на социјалните мрежи „Фејсбук“ и „Твитер“ од aмбасадата прашаа „кои се вашите идеи за почист воздух во Македонија“.

„Загадувањето на воздухот во Скопје денеска беше толку големо што едвај можеше да се види амбасадата! Кои се вашите идеи за почист воздух во Македонија?“ напишаа од Амбасадата на САД на „Фејсбук“ и на „Твитер“.

Загриженост за енормната загаденост на воздухот изрази и амбасадорот на Холандија во земјава, Ваутер Пломп.

„Постои дилема: дали да се користи автомобил и да се придонесе на загадувањето или да се земе велосипед и тоа да се вдишува. Денеска за прв пат се обидов со маска“, напиша Пломп на „Твитер“.


Амбасадорот Бејли ги следел изборите како акредитиран набљудувач


Скопје, 30 октомври, 2017 - 14:36 (META) 

Амбасадорот Џес Бејли беше акредитиран да ги следи изборите, во рамки на меѓународната набљудувачка мисија на изборниот процес, соопштија за „Мета“ од Амбасадата на САД во Скопје, по обвинувањата дека американскиот амбасадор посетувал избирачки места и се фотографирал со активисти и со членови на СДСМ.

„Како и во минатото, Амбасадата на САД и другите дипломатски мисии, вчера на терен имаа тимови што ги набљудуваа изборите. Амбасадорот Бејли беше еден од акредитираните набљудувачи. Тоа беше дел од нормалните напори за меѓународно набљудување на изборите“, соопштија од Амбасадата на САД.

Вториот круг од локалните избори во Македонија вчера го набљудуваа и набљудувачкиот тим на ОБСЕ/ОДИХР составен од 126 набљудувачи од 26 земји, како и амбасадорите на Холандија, Велика Британија и на Франција, Ваутер Пломп, Чарлс Гарет и Кристијан Тимоние.

Набљудувачката мисија на ОБСЕ/ОДИХР денеска попладне ќе ги соопшти првичните оценки од вториот круг од локалните избори.


Американската амбасада ги охрабри граѓаните в недела да излезат и да гласаат


Скопје, 12 октомври, 2017 - 14:12 (META) 

Претстојните локални избори на 15 октомври се важни за иднината на Македонија како просперитетна, стабилна демократија, целосно интегрирана во евроатлантските институции, соопшти денеска Амбасадата на САД во Македонија и ги повикаа граѓаните да излезат и да гласаат.

– Ги охрабруваме сите граѓани да го искористат своето право на глас, да ги изразат своите погледи за прашањата од нивната општина и да ја реафирмираат својата посветеност кон демократските вредности и владеењето на правото. Ги охрабруваме сите граѓани, граѓанските организации и медиумите да ги пријавуваат своите забелешки за изборните неправилности на надлежните власти. На крајот, партиите, владините институции, новинарите и граѓаните ќе ја одредат веродостојноста на процесот преку своите чекори – стои во изјавата.

Од Амбасадата истакнуваат дека изборите се круцијален дел од секоја демократија и дека ги поддржуваат напорите за охрабрување на граѓаните да гласаат.

„Американската амбасада активно учествува во надзорот, заедно со меѓународните и со локалните набљудувачи“, велат од амбасадата.


Сирени и затворање раскрсници кај амбасадата на САД утре поради вежба


Скопје, 29 септември, 2017 - 17:53 (META) 

Сирени за тревога ќе се огласат утре претпладне во Скопје, а раскрсниците кај амбасадата на САД ќе бидат затворени, поради заедничката вежба што ќе ја вршат припадници на Министерството за внатрешни работи (МВР) и персоналот од амбасадата на САД во рамките на амбасадата.

Како што соопшти МВР, сирените ќе може да ги чујат граѓаните на Скопје, а со затворањето на раскрсниците ќе се направи само кус застој во сообраќајот.

„Целта на заедничката вежба е поефикасна координација меѓу МВР и Американската  амбасада при преземање активности за справување со кризни ситуации“, нагласува МВР.


Граничната полиција доби квадроцикли за тешко пристапни терени од САД


Скопје, 21 септември, 2017 - 19:00 (META) 

Амбасадата на САД во земјава денеска на Министерството за внатрешни работи му ја предаде донацијата наменета за потребите на одделот за гранични работи.

Покрај техничката опрема наменета за контрола на товари и возила, владата на САД донираше и пет теренски квадроцикли, кои за прв пат ќе бидат во составот на граничната полиција за контрола и надзор на тешко пристапни терени на државната граница.

Примопредавањето на опремата беше извршено на граничниот премин „Блаце“, а на церемонијата присуствуваа министерот за внатрешни работи, Оливер Спасовски и амбасадорот на САД во земјава, Џес Бејли.

– Успешното менаџирање на безбедноста на границите во современиот начин на живеење подразбира отворени, но и добро контролирани граници, каде што е возможен брз проток на материјални добра и патници, и ефикасна контрола и спречување на сите облици на илегална миграција и прекуграничен криминал – рече Спасовски, кој заблагодарувајќи се за донацијата, истакна дека таа е резултат на долгогодишното партнерство и блиската соработка со американската амбасада во Македонија.

Амбасадорот на САД, Бејли истакна дека во изминативе 16 години владата на САД издвоила повеќе од 20 милиони американски долари во опрема и обуки за подобрување на квалитетот на граничната контрола и безбедност во земјава. Тој ги оцени како извонредни досегашните заеднички напори за подобрување на македонската гранична безбедност и порача дека соработката ќе продолжи и во наредниот период, како во делот на граничната безбедност, така и во делот на обуката за криминалистички истраги.


Ахмети разговарал со Швајцер Блум и со Жбогар за формирањето на новата влада


Скопје, 19 мај, 2017 - 18:59 (META) 

Лидерот на ДУИ, Али Ахмети денеска во амбасадата на Соединетите Американски Држави во Скопје, имал работна средба со заменик-амбасадорката на САД во земјава, Микаела Швајцер Блум и со амбасадорот на Европската Унија, Самуел Жбогар.

Како што соопштија од партијата, на средбата било разговарано за натамошните активности во однос на формирањето на новата влада. Ахмети пред Швајцер Блум и Жбогар го повторил ставот дека ДУИ целосно е посветена на спроведувањето на бараните реформи од страна на меѓународната заедница, интеграцијата во НАТО и во Европската Унија, добрите меѓуетнички односи, но и економскиот развој и отворањето на нови работни места.

„Првите чекори што ќе ги преземе новото парламентарно мнозинство се решавањето на застојот во локалната власт, како и укинувањето на екстерното тестирање, како две непосредни прашања“, истакнал Ахмети на средбата.

Тој нагласил дека во изминатите 16 години, колку што е активен во рамките на ДУИ, „никогаш немало разочарување во пријателските и добронамерните ставови на меѓународната заедница“ и во тој контекст побарал од САД и од ЕУ да помогнат за побрзо интегрирање на Македонија во НАТО и во Европската Унија.

Инаку, денеска во седиштето на СДСМ, се одржа првата средба меѓу лидерот на партијата и мандатар Зоран Заев со претседателот на ДУИ, Али Ахмети, во рамките на преговорите за состав на новата влада.


Амбасада на САД: Насилството не е начин за решавање на разликите


Скопје, 27 април, 2017 - 23:09 (META) 

Амбaсадата на Соединетите Американски Држави вечерва го осуди насилството во Собранието, во кое беа повредени неколку пратеници, меѓу кои и лидерот на СДСМ, Зоран Заев.

Од амбасадата порачаа дека насилството не е во согласност со демократијата и е неприфатлив начин за решавање на разликите.

„Најостро го осудуваме насилството во Собранието. Тоа не е во согласност со демократијата и е неприфатлив начин за решавање на разликите. Клучно е сите страни да ги почитуваат демократските процеси и законот и да се воздржат од насилни акции кои можат да ја влошат ситуацијата. Мнозинството пратеници го избраа Талат Џафери за претседател на Собранието, во рамките на регуларна и континуирана сесија на парламентот на која сведоци беа јавноста и медиумите. Ние ќе работиме со него за поддршка на демократијата и за унапредување на интересите на Македонија“, стои во реакцијата на амбасадата.

Насилствата во Собранието ги осуди и германското министерство за надворешни работи.

„Најостро го осудуваме нападите во Собранието во Скопје“, напишаа од германското МНР на „Твитер“.


Македонија го одбележува Светскиот ден на водите


Охрид, 22 март, 2017 - 11:40 (META) 

Денеска, според календарот на Обединетите нации, се одбележува Светскиот ден на водите. Обединетите нации го признаа правото на вода како елементарно човеково право.

Со повеќе манифестации, Светскиот ден на водите ќе биде одбележан и кај нас.

Министерството за животна средина и просторно планирање организира конференција на тема „Водата и отпадните води“, на која ќе се обратат министерот за животна средина и просторно планирање, Башким Амети, раководителот на Одделот за оперативни работи во Делегацијата на ЕУ, Мауро ди Вероли, и претседателот на Регулаторната комисија за енергетика, Димитар Петров.

Управата за хидрометеоролошки работи (УХМР) предвидува атрактивно нуркање во водите на езерото Матка од страна на членови на Нуркачкото друштво „Врело“ и хидрометриски мерења на реката Треска, додека Институтот за јавно здравје, најави „Саем на вода“, пред Домот на АРМ во Скопје.

Амбасадата на САД во Македонија организира тркалезна маса на која ќе се говори за Дримскиот процес/проект и за заштитата на Охридско Езеро.

Водата е основата за постоењето на живот на планетата Земја, а чистата вода за пиење и за одржување на хигиената е неопходна за одржување на животот и на здравјето на целиот жив свет. Сепак, правото на вода не е еднакво достапно за секого. Приближно 900 милиони луѓе во светот немаат пристап до чиста и здрава вода за пиење, додека 2,5 милијарди луѓе немаат нормални услови за одржување на својата хигиена.

Експертите алармираат дека до средината на овој век дури седум милијарди луѓе ќе бидат соочени со недостиг од вода бидејќи бројот на жители на Земјата се зголемува, а водените ресурси се намалуваат.

Помалку од 1 отсто од водата на Земјата е употреблива за пиење. Како што се зголемува бројот на населението во светот, се зголемуваат и потребите од вода за пиење.

До 2025 година две третини од човештвото ќе почувствува сериозен недостиг од вода, предупредуваат експертите од Обединетите нации.