!Во периодот што претстои работиме на воведување систем за пристап и за претплата. За начинот на пристап и за претплатата ќе информираме дополнително. Содржините на „Мета“ до тогаш се слободни за преземање со задолжително цитирање и атрибуирање.

1,2 милиони патници од Македонија летале со „Виз-ер“


Скопје, 11 јануари, 2018 - 12:08 (META) 

„Виз ер“, лани  превезе 1,2 милиони патници на ниско-буџетните македонски авиолинии, што претставува пораст од 20 проценти на годишно ниво и поддржува 900 локални работни места во придружните индустрии.

Лани, компанијата ја прошири својата скопска флота на четири авиони и воведе четири нови авиолинии од Скопје до Будимпешта, Малта, Рим и Ваксјо.

– Како авиокомпанија со најголем удел во патничкиот авиосообраќај, очекуваме „Виз ер“ да продолжи со развојот на нивниот бизнис на македонскиот пазар, притоа инвестирајќи во нови дестинации и зголемување на фреквенциите на постојните авиолинии – изјави генералниот директор на „ТАВ Македонија“, Алпер Ерсој.

„ТАВ Македонија“ лани ја заврши со 2 милиона патници (2.027.344) на скопскиот и охридскиот аеродром, што претставува пораст за 13 проценти споредено со 2016 година. Во исто време со порастот на патничкиот авиосообраќај, вкупниот број на летови на двата аеродрома во Скопје и во Охрид е зголемен за 7 отсто, достигнувајќи 18.130 летови во 2017 година.


„ТУИ Холандија“ ќе воведе сезонски летови од Ајндховен до Охрид


Скопје, 26 декември, 2017 - 13:22 (META) 

Тур-операторот „ТУИ Холандија“ ќе воведе нови сезонски летови од Ајндховен до Охрид во летната сезона во 2018 гoдина, информираат од „ТАВ Македонија“.

Сезонските летови од Ајндховен треба да донесат од 3.000 до 3.500 патници на охридскиот аеродром. Вклучително и со летовите од Амстердам, „ТУИ Холандија“ се очекува да донесе 15.000 туристи на Охридското Езеро следната година.

– Веќе сообраќаме на линијата Амстердам – Охрид, а сега ќе почнеме и со летови од Ајндховен до Охрид, двапати неделно, односно секој понеделник и петок, почнувајќи од 11 мај до 21 септември. Главната причина за воведување на оваа сезонска линија е поради тоа што сакаме да привлечеме туристи и од Белгија. Сигурни сме дека можеме да го прошириме пазарот – изјави Жак Кријнон, продукт-менаџер во „ТУИ Бенелукс“.

Генералниот директор на „ТАВ Македонија“, Алпер Ерсој се надева дека турите на „ТУИ Холандија“ ќе привлечат не само туристи од Холандија, туку и туристи од други европски земји.

„ТАВ Македонија“ ги заврши првите 11 месеци од 2017 година со 13 проценти пораст на бројот на патници, достигнувајќи 1.876.304 на двата македонски аеродрома во Скопје и во Охрид. Во исто време, бројот на летови е зголемен за седум проценти, достигнувајќи вкупно 16.756 летови.


Компанијата „Нордика“ ќе воведе летови од Талин до Охрид


Охрид, 26 септември, 2017 - 14:13 (META) 

Естонскиот авиопревозник „Нордика“ ќе почне да лета на авиолинијата Талин – Охрид – Талин, почнувајќи од 1 јуни 2018 година, најави „ТАВ Македонија“.

– Очекуваме дека со овие летови во текот на следното лето повеќе од 2.500 патници од Естонија ќе слетаат на охридскиот аеродром „Св. Апостол Павле“. Со отворањето на директната авиолинија до Талин, всушност, отвораме еден сосема нов пазар за патници на охридскиот аеродром – изјави генералниот директор  на „ТАВ Македонија“, Алпер Ерсој.

Билетите се пуштени во продажба од денеска, со цени кои почнуваат од 99 евра.

Извршниот директор за развој на бизнисот во „Нордика“, Свен Кукемелк, вели дека целта е да пронајдат различни и возбудливи дестинации за одмор на Естонците.

– Многу луѓе ги посетиле Париз и Рим, но Македонија со нејзината фантастична природа и култура дефинитивно вреди да се посети. Кога избираме некоја нова дестинација, многу внимаваме и на тоа патниците преку неа да може да посетат уште неколку други земји во исто време – изјави Кукемелк.

„Нордика“ е националниот авиопревозник на Естонија и нуди голем број летови од Талин до различни европски дестинации. Во соработка со партнерските авиопревозници нуди поврзани летови до повеќе од 140 дестинации во светот.

Талин ќе биде петтата нова дестинација до која ТАВ воведе чартер-лет од охридскиот аеродром во изминатите две години.


„Еуровингс“ воведе авиолинија на релација Скопје – Минхен


Скопје, 17 август, 2017 - 12:38 (META) 

Нискобуџетната авиокомпанија „Еуровингс“ (Eurowings), членка на групацијата „Луфтханза“, ќе воведе нова линија Скопје – Минхен, поврзувајќи го скопскиот аеродром „Александар Велики“ со меѓународниот аеродром во Минхен, „Франц Јозеф Штраус“, информираат од „ТАВ Македонија“.

Линијата Скопје – Минхен ќе биде воспоставена од октомври, два пати неделно, односно, секој вторник и петок.

Официјалните претставници на авиокомпанијата најавија, најниските цени за авионските билети ќе почнуваат од 39,99 евра и веќе се во продажба преку веб-страницата на авиокомпанијата eurowings.com.

– Скопскиот аеродром „Александар Велики“ ќе биде поврзан со главниот аеродром во Минхен, што ќе претставува одличен избор и можност за продлабочување на комуникацијата меѓу двата града. Нашите патници, не само од Македонија, туку и од регионот, ќе имаат дополнителни конекции и во Европа и интерконтинентално – изјави генералниот директор на „ТАВ Македонија“, Алпер Ерсој.

„Еуровингс“ неодамна најави 10 нови прекуокеански летови од аеродромот во Минхен. Сообраќа на повеќе од 150 дестинации во повеќе од 40 земји низ Европа и е добро позната по одличната мрежа на авиолинии до атрактивни туристички локации. Лета во многу држави во регионот, како што се Албанија, Бугарија, Хрватска, Србија, Косово, Црна Гора и Турција.


Полски новинари ја промовираат Македонија како туристичка дестинација


Скопје, 31 јули, 2017 - 11:37 (META) 

Петмина новинари од Полска ја посетија Македонија за да ги откријат убавините на земјата и да ја промовираат како туристичка дестинација помеѓу полските туристи.

Новинарите, кои во Македонија престојуваа од 17 до 22 јули на покана и во органазија на „ТАВ Македонија“, ги посетиле Скопскиот и Битолскиот Регион, како и Охрид.

– Имплементирајќи ја неодамнешната успешна маркетинг-активност со турските блогери за промоција на Македонија помеѓу турските граѓани, презедовме многу слична маркетинг-иницијатива, за да ја промовираме Македонија како интересна туристичка дестинација меѓу туристичките агенции и тур-оператори од Полска, како и самите патници од оваа земја – изјави генералениот директор на „ТАВ Македонија“, Алпер Ерсој.


Македонија на листата на земји за кои важи олеснителен визен режим за влез во Катар


Скопје, 18 јули, 2017 - 12:50 (META) 

Новата авиолинија помеѓу Доха и Скопје на авиокомпанијата „Катар ервејс“ е уште еден значаен момент за развој на воздушниот сообраќај во Македонија, изјави министерот за транспорт и врски, Горан Сугарески, на денешната прес-конференција по повод воспоставувањето на првата авиолинија со Катар.

Сугарески рече дека на овој начин се отвораат бројни можности за значајно унапредување на соработката во економијата, туризмот, културата, инвестициите, како и во други области кои се од заеднички интерес на двете држави.

– Она што сакам да го нагласам е дека оваа линија е од огромно значење и за македонските граѓани кои живеат во Катар. Моментално повеќе од 1.000 државјани на Република Македонија кои живеат и работат во Катар се етаблирани во тамошното општество и претставуваат исклучителен потенцијал за градење на меѓусебните врски. Исто така, во авиокомпанијата „Катар ервејс“ работат повеќе од 100 млади лица кои се дел од професионалниот кадар на оваа компанија – изјави Сугарески.

Тој додаде дека Македонија е ставена на листата земји за кои важи олеснителен визен режим за влез во Катар.

– Имено граѓаните на Македонија, виза ќе можат да добијат при пристигнување на аеродромот во Доха со што сметаме дека е огромна придобивка за сите што ќе патуваат во оваа земја – додаде Сугарески.

Генералниот директор на „ТАВ Македонија“, Алпер Ерсој, изјави дека за Македонија е од големо значење што престижна авиокомпанија како „Катар ервјес“ влегува на пазарот. Тоа, според него, е голем поттик и за другите компании, а е добро и за развојот на туризмот и на бизнисот помеѓу двете држави.

„Катар ервејс“ ќе лета четирипати во неделата, а преку Доха ќе се овозможи и поврзување со бројни дестинации низ целиот свет.


Во Охрид пристигнаа полски туристи со првиот чартер-лет од Катовице


Охрид, 22 јуни, 2017 - 15:26 (META) 

„ТАВ Македонија“ утрово го пречека првиот чартер-лет од Полска на аеродромот „Св. Апостол Павле“ во Охрид, одбележувајќи го почетокот на соработката меѓу „ТАВ Аеродроми“ и еден од најголемите полски тур-оператори „Рего-бис“.

Првиот чартер-лет, управуван од полската авиокомпанија „Смол планет ерлајнс“ (Small Planet Airlines), пристигна од Катовице и донесе 220 полски туристи во Охрид.

– Ќе имаме еден чартер-лет неделно, односно секој четврток, од Катовице, опериран од „Смол планет ерлајнс“ (Small Planet Airlines) за време на летната сезона во 2017 година. Од денеска, па сè до крајот на септември, на охридскиот аеродром ќе пристигнат вкупно 14 сезонски летови од Катовице – изјави генералниот директор на „ТАВ Македонија“, Алпер Ерсој.

Како што изјавија од „ТАВ Македонија“ и во согласност со најавите од полскиот тур-оператор, авиолинијата Катовице – Охрид е само првата рута на која ќе сообраќаат чартер-летови од Полска. Варшава е следна дестинација, од каде што се очекуваат полски туристи да пристигнуваат на Охридско Езеро.

„Повеќе од 3.000 туристи ќе пристигнат со 14 летови со „ербас 321“, а со секој лет 220 патници ќе слетуваат во Охрид. Другите туристи ќе пристигнуваат со комфорни автобуси на секои десет дена. Ова не е само можност да им се излезе во пресрет на полските туристи за да можат да патуваат, туку ова е исто така можност да им помогнеме да ја истражат македонската култура и историја“, изјави Габриела Манка-Сокулу, сопственичка на „Рего-бис“.


Холандските туристи ја отворија летната сезона во Охрид


Охрид, 2 мај, 2017 - 13:32 (META) 

Првиот сезонски чартер-лет со 180 патници од Амстердам, кои допатуваа со авиокомпанијата „Корендон“ на аеродромот „Св. Апостол Павле“, ја отвори летната сезона во Охрид.

– Покрај редовните линии кои ги имаме преку целата година на охридскиот аеродром – за Базел, Цирих и за Лондон, како и традиционалните чартер-летови од Холандија, ова лето ќе продолжат сезонските летови кои ги отворивме во 2016 година од Белград, Брисел и од Тел Авив, додека нови чартер-летови од Полска ќе почнат од 22 јуни. Еднаш неделно 200 полски туристи ќе доаѓаат на Охридското Езеро, благодарение на договорот што го потпишавме со еден од најголемите полски тур-оператори – изјави генералниот директор на „ТАВ Македонија“, Алпер Ерсој.

Ова лето на охридскиот аеродром се очекува да слетаат 183 авиони од Амстердам, со авиокомпаниите „Корендон“ и ТУИ, кои ќе донесат повеќе од 28.000 холандски туристи, информираат од компанијата.

Во исто време, од мај до октомври 2017 година, со сезонските летови, на охридскиот аеродром се очекуваат околу 2.000 патници од Брисел со „Томас Кук“, потоа 2.300 патници од Белград со „Ер Србија“ и околу 2.600 патници од Тел Авив со „Аркиа“.


„Виз ер“ од денеска со летови од Скопје до Будимпешта


Скопје, 5 април, 2017 - 13:53 (META) 

Компанијата „ТАВ Македонија“ денеска го пречека авионот на „Виз ер“ кој на скопскиот аеродром „Александар Велики“ слета од Будимпешта, одбележувајќи го отворањето на новата рута Будимпешта – Скопје – Будимпешта.

Авиокомпанијата ќе сообраќа двапати неделно, односно секоја среда и недела, со пристигнување на скопскиот аеродром од Будимпешта во 12.25 часот и заминување од Скопје за Будимпешта во 13 часот.

– Воведувањето на оваа линија меѓу Скопје и Будимпешта од страна на „Виз ер“ денеска е важен чекор напред за македонското воздухопловство, бидејќи со ова се исполнува побарувачката на пазарот што остана отворена во изминативе пет години, односно од февруари 2012 година. Очекуваме оваа линија да придонесе за пораст на туризмот, како и за бизнис-размената меѓу двете земји, Македонија и Унгарија – изјави генералниот директор на „ТАВ Македонија“, Алпер Ерсој.

Лани, „Виз ер“ превезе преку еден милион патници на нискотарифните линии од Македонија, што претставува пораст од 27 проценти на годишно ниво.


Карго-аеродромот во Штип би можел да почне да се гради во 2020 година


Струга, 14 ноември, 2016 - 12:05 (META) 

Kарго-аеродромот во Штип би можел да почне да се гради во 2020 година доколку постојат услови за негова изградба, информираше заменик-директорот на „ТАВ Македонија“, Алпер Ерсој, на работилницата за авијација што се одржа во Струга.

– Од 2010 до 2020 година ги испитуваме условите за изградба на овој аеродром во Штип. Доколку се покаже дека има услови, со изградбата би почнале во 2020 година – информираше Ерсој.

Првиот човек на „ТАВ холдинг“, Сани Шенер, во една пригода истакна дека ако резултатите покажат дека изградбата не е можна, парите ќе ги вложат во нешто друго, како, на пример, во проширување на терминалот на скопскиот аеродром, бидејќи се сигурни дека овој аеродром ќе ги проширува своите капацитети.

Изградбата на карго-аеродром во Штип од страна на „ТАВ Македонија“ е обврска од договорот за концесија меѓу македонската Влада и турската компанија, која ќе оперира со македонските аеродроми во наредните 20 години.