Пратениците ја укинаа забраната за продажба на алкохол по 19 односно по 21 часот


Скопје, 27 јуни, 2018 - 11:39 (META) 

Укината е забраната за продажба на алкохол во трговијата по 19, односно 21 часот, воведена во 2008 година, откако Собранието ги усвои измените на Законот за трговија, кои ќе стапат на сила осум дена по објавување во „Службен весник“.

Со најновите законски измени, што пратениците ги усвоија на вчерашната собраниска седница, се дозволува и продажба на алкохолни пијалаци во киосците, но останува забраната за продажба во продавниците во состав на бензинските станици.

Останува и забраната за продажба на алкохол на лица помлади од 18 години. За да можат да продаваат алкохолни пијалаци, трговските објекти и понатаму треба да поседуваат соодветни лиценци. Овие измени во Законот за трговија ги бараше Стопанската комора на Македонија.


Владата ја почна процедурата за неограничена продажба на алкохолни пијалоци


Скопје, 9 мај, 2018 - 10:12 (META) 

Три месеци по рокот што му го даде на Министерството за економија да достави предлог за изменување на Законот за трговија за укинување на времето за продажба на алкохол и за укинување на ограничувањето, односно забраната на продажба на алкохол во киосци, Владата на својата вчерашна седница ја почна процедурата за укинување на временското ограничување и другите рестрикции за продажба на алкохол.

Како што соопштија од Владата, на вчерашната седница министрите го прифатиле предлогот за измени и дополнувања на Законот за трговија на предлог на Министерството за економија за укинување на ограничувањата на времето на продажба на алкохолни пијалаци во трговијата на мало и на малопродажните објекти во кои тоа беше забрането со законот од 2008 година.

„Основните решенија на Предлог законот кој ќе биде доставен на усвојување во Собранието предвидуваат продажбата на алкохолни пијалаци во трговијата на мало и понатаму да се врши во лиценцирани продажни објекти, но при тоа нема да се бараат посебни услови во продажниот објект за продажба на алкохолни пијалаци, ниту ќе се ограничуваат малопродажните објекти во кои истата ќе се врши, односно ќе се дозволи продажбата на истите и во киосците. Исто така  со Предлогот на закон не се ограничува времето за продажба на алкохолни пијалаци во малопродажните објекти во трговијата“.

Инаку, Владата уште на 41-та седница на 5 декември минатата година му даде рок од два месеци да достави предлог, кој истече во февруари.

Покрај тоа, владиниот кабинет на вчерашната седница донел и одлука за исплата на паричен надоместок и обезбедување на здравствено осигурување за последните месеци на вработените во компанијата Еурокомпозит од Прилеп.

Покрај другите одлуки, било усвоено и времено укинување на увозната давачка за замрзнато свинско месо и други производи од свинско во период од шест месеци, но не повеќе од 50 отсто од утврдените потреби за суровини на домашната индустрија кои ги дефинирала Стопанската комора на Република Македонија.

На вчерашната 67-ма седница, била усвоена и  Информацијата околу новите моменти за премин во втора фаза од Спогодбата за стабилизација и асоцијација (ССА) меѓу Македонија и Европската Унија, и го задолжила вицепремиерот Бујар Османи за координација на релевантните институции.

„Оваа одлука на Владата доаѓа врз основа на вербалната нота доставена од страна на Канцеларијата за врски на Република Грција до Министерството за надворешни работи, на 23.02.2018 г. во која се информира дека Грција нема резерви во однос на преминот на Македонија  во втора фаза на ССА“, соопштија од Владата.


Тешко повредени тројца велешани откако на нив налетал автомобил


Велес, 1 јануари, 2018 - 13:32 (META) 

Во тешка сообраќајна несреќа што се случила ноќеска во 3.30 часот близу Градската библиотека во Велес, тешки телесни повреди задобиле тројца тинејџери, од кои двајца потоа се пренесени во Ургентниот центар во Скопје во животозагрозувачка состојба.

Како што извести СВР Велес, околу 03.30 часот на улицата „Алексо Демниевски“, Т.Т (33) од Велес изгубил контрола над автомобилот „фиат пунто“ со велешки таблички и удрил во К.К (19), Б.Д (18), Ф.К(18), кои во тој момент ја преминувале улицата, а потоа и во ѕид од камења.

Со возило на Итна медицинска помош во Општа болница Велес пренесени се К.К и Ф.К. Откако таму се констатирани тешки телесни повреди, тие се препратени во Клиничкиот Центар – Скопје и се наоѓаат во животна опасност.

Екипа на СВР Велес извршиле увид според инструкции од јавен обвинител, кој исто така издал наредби за прибирање на траги од местото на настанот и за вршење на анализа на крв и урина од возачот.


Ќе се укинува временското ограничување на продажбата на алкохол


Скопје, 5 декември, 2017 - 20:46 (META) 

Министерството за економија на денешната владината седница ја презентираше информацијата за изменување на Законот за трговија во согласност со иницијативата на посетените компании во рамки на проектот „Учиме од бизнис-заедницата“.

„Со информацијата, Министерството за економија во рок од два месеци треба да достави предлог за изменување на Законот за трговија за укинување на времето за продажба на алкохол и за укинување на ограничувањето, односно забраната на продажба на алкохол во киосци, за кои ќе се издава лиценца“, стои во соопштението од владината седница.


Секој втор во Македонија пуши, најмладите најмногу се опиваат


Скопје, 21 ноември, 2017 - 14:47 (META) 

Речиси секој втор граѓанин на Македонија пуши, а во текот на изминатава година најголемо секојдневно опивање е забележано меѓу младите на возраст од 15 до 24 години, покажува новата студија за употребата на психоактивни супстанци во Република Македонија, која ја изработи Институтот за јавно здравје (ИЈЗ) на Република Македонија.

Презентирајќи ја студијата, директорот на ИЈЗ, Шабан Мемети, нагласи дека загрижува и фактот што дури половината од учениците на возраст од 15 и 16 години барем еднаш или двапати пробале марихуана.

Студијата го опфатила населението на возраст меѓу 15 и 64 години и е утвдено дека 46 отсто од нив се активни пушачи, а потесно, во групата од 15 до 34 години, 40 отсто пушат.

Во поглед на алкохолот, дури 76,9 отсто од луѓето на возраст од 25 до 34 години некогаш консумирале алкохол, а во изминатата година и во изминатиот месец највисок е процентот на консумирање алкохол кај младите на возраст од 15 до 24 години, односно 68,5 отсто. Четири или повеќепати седмично алкохол консумира највозрасната група од испитувањето, односно луѓето на возраст од 55 до 64 години, при што бројката на мажи во оваа категорија е четирипати поголема од таа на жените.

Од сите старосни групи, бројката на секојдневно тешко пиење (шест или повеќе чаши алкохолни пијалоци во иста пригода) е најзастапено кај младите на возраст од 15 до 24 години, односно 1,7 отсто од нив се со таква зависност.

Дури 32,5 отсто од испитаниците пријавиле дека во изминатата година земале апчиња за смирување, а тука се „најактивни“ најстарите меѓу испитаниците.

Во поглед на негалните дроги, 8,9 отсто од сите испитаници рекле дека некогаш во животот земале илегални дроги, а тука предничат младите на возраст меѓу 15 и 24 години, со 18,9 отсто.


ВМРО-ДПМНЕ: „Македонски железници“ нема пари за плата, а купува алкохол за 24.000 евра


Скопје, 25 септември, 2017 - 14:31 (META) 

ЈП „Македонски железници“ нема пари да исплати плата, но сепак извршило набавка на алкохолни пијалоци во вредност поголема од 24.000 евра, рече пратеникот на ВМРО-ДПМНЕ, Крсте Јовановски.

– Внимавајте, 24.000 евра за алкохолни пијалоци платени со државни пари, во исто време кога вработените мака мачат да добијат плата. Нема пари за пензии, за плати во „Колска“ и за други загубари, за субвенции, но има пари за алкохолни пијалоци. Јавноста заслужува одговори од Сугарески и од Владата предводена од Заев, зошто има пари за алкохолни пијалоци, а нема за субвенции, пензии, за нови патишта, нови проекти – рече Јовановски.

Тој порача дека ВМРО-ДПМНЕ бара веднаш да се поништи оваа набавка и парите да се пренасочат кон реализација на проекти за граѓаните.


Алкохолот поевтинил, храната поскапела во март


Скопје, 5 април, 2017 - 12:47 (META) 

Индексот на цените на угостителските услуги во март годинава во споредба со февруари е зголемен за 0,1 отсто, а притоа алкохолот поевтинил, додека храната поскапела, покажуваат податоците што денеска ги објави Државниот завод за статистика.

Храната поскапела за 0,2 отсто, безалкохолните пијалаци за 0,1 отсто, а алкохолните пијалоци поевтиниле за 0,4 отсто.

Индексот на цените на угостителските објекти во март годинава во однос на истиот месец лани е зголемен за 0,3 проценти.

Индексот за првите три месеци од годинава, пак, во однос на истиот период лани е зголемен за 0,3 проценти, но во однос на декември лани се намалил за 0,1 отсто.


Сè помалку се издаваат фискални сметки при купување алкохол и цигари


Скопје, 6 март, 2017 - 10:28 (META) 

Лани најретко се издавале фискални сметки за услуги за одржување на домот (17 проценти), услуги за поправки на домот (21 процент), изнајмување имот (30 процент) и за занаетчиски услуги (36 проценти).

Ова го покажуваат податоците од анкетата за даночната евазија во Република Македонија во 2016 година, направена од Центарот за истражување и креирање на политики (ЦИКП).

Во 2016 година, повеќе од половина од испитаниците (54 проценти) изјавиле дека не им била издадена фискална сметка за разни искористени услуги во последните три месеци, броени од моментот на анкетирање.

– Од друга страна, најчесто и најредовно (85 проценти) се издаваат фискални сметки за професионалните услуги (сметководство, психолог/психијатар, архитектура/дизајн) и за транспортни услуги (75 проценти) – покажуваат податоците на анкетата.

Во неа се додава дека ситуацијата во однос на 2104 година е непроменета во однос на издавање фискални сметки за козметички производи (17 проценти) и 11 проценти за храна и за прехранбени продукти.

– Но, даночната дисциплина бележи двојно влошување во категоријата алкохол и тутун, каде што дури на 20 проценти од испитаниците во 2016 година не им била издадена фискална сметка во последниот месец, споредено со 12 проценти од испитаниците во 2014 година. Алкохолот и тутунот се акцизни стоки за кои следуваат високи даноци, а тоа значи дека потенцијалното зголемување на даночната евазија во оваа сфера носи со себе ризик од помали даночни приходи во државната каса – се вели во анкетата.

Како препорака, во истражувањето се вели дека владата најпрво треба да размисли за менување на балансот помеѓу постојните казнени мерки (со прогресивни стапки на казнување) и второ, на балансот помеѓу казнените мерки и стимулациите.


Пакистан: Најмалку 26 лица починале од отровен алкохол


Исламабад, 27 декември, 2016 - 13:05 (META) 

Најмалку 26 лица од областа Пенџаб, во источниот дел на Пакистан, починале, а дванаесетмина се тешко болни откако пиеле отровен алкохол во неделата за Божиќ, соопштиле локалните власти, пренесува „Би-би-си“.

Починатите, од кои 24 биле христијани, а двајца муслимани, консумирале домашна ракија, која ја набавиле од засега непознато место. Полицијата почнала истрага за да открие каде бил направен и продаден алкохолот.

Во Пакистан постојат строги закони за продажба на алкохол. На муслиманите им е строго забрането консумирањето алкохол, додека на припадниците на христијанската и на другите малцински заедници им се потребни посебни дозволи за негова набавка. Поради строгата регулатива, голем број луѓе илегално произведуваат алкохол, кој честопати содржи метанол, кој е отровен.

Во истата област и претходно имало смртни случаи од труење со алкохол, а во 2014 година за само неколку дена од отровна ракија починаа 40 лица.


Од денеска продажба на алкохол до 19 часот


Скопје, 1 октомври, 2016 - 14:07 (META) 

Од денеска почнува зимската рестриктивна продажба на алкохол.

Тоа значи дека во трговските објекти алкохолните пијалоци ќе се продаваат до 19 часот.

За трговските субјекти што нема да го почитуваат законското решение, предвидени се санкции, односно забрана за вршење дејност во траење од седум или 15 дена, како и парична казна до 5.000 евра.