Коалициските сили денеска извеле 23 напади врз позиции на ИД во Ирак и во Сирија


Вашингтон, 18 октомври, 2015 - 16:18 (META) 

Коалициските сили предводени од Соединетите Американски Држави (САД) денеска извршиле 18 воздушни напади на позиции на Исламска држава (ИД) во Ирак и на пет во Сирија, соопшти командата на здружените сили, јавуваат светските агенции.

Според информациите, во Ирак биле гаѓани девет градови, вклучувајќи ги Синџар, Мосул, Кисик и Рамади. Во нападите било уништено тешко оружје, борбени позиции и возила на милитантите на ИД.

Во Сирија, цел на воздушните напади биле позиции на ИД во Абу Камал, Алепо и во упориштето на екстремистите, Рака.

Во меѓувреме, Пентагон потврди дека во нападите на коалициските сили, во северозападниот дел на Сирија пред два дена бил убиен еден од високите команданти на сирискиот разгранок на Ал каеда, фронтот Ал нусра.

Станува збор за саудскиот државјнин Санафи ал-Наср, кој, според Пентагон, е долгогодишен џихадист, искусен во собирањето пари и во регрутирањето борци за терористичката организација.


Ал каеда нуди три милиони евра за главата на Асад


Дамаск, 13 октомври, 2015 - 16:46 (META) 

Сирискиот разгранок на терористичката организација Ал каеда нуди три милиони евра за главата на претседателот на Сирија, Башар ал Асад, како и два милиони за главата на лидерот на либанското движење Хезболах.

Во објавената аудиоснимка за распишаната награда, лидерот на разгранокот, Абу Мохамед ал Голани, вели дека е време  Асад да се избрише од историјата.


Лидерот на Ал каеда повикува на нови напади на Западот


Багдад, 14 септември, 2015 - 10:28 (META) 

Лидерот на Ал каеда, Ајман ал Завахири, на снимката, која е најверојатно стара два месеци, ги повикува младите муслимани да го напаѓаат Западот, особено САД. Тој посакува да се изведе терористичка акција по примерот на таа што ја извршија браќата Царнаев на бостонскиот маратон. Исто така, повикува на поголема слога и на соработка меѓу милитантите.

Снимката на интернет се појави вчера, а во прилог на тврдењата дека е стара два месеца оди и фактот што Завахири во обраќањето го споменува талибанскиот лидер мула Мохамед Омар на начин како да станува збор за живо лице, додека авганистанската влада кон крајот на јули објави вест за неговата смрт.

Завахири на крајот повика на заедништво на сите фракции на исламските милитанти во Сирија и во Ирак и на основање независен шеријатски суд кој би ги решавал конфликтите меѓу спротиставените страни.


Одбележување на 14-годишнината од терористичките напади на Њујорк и на Вашингтон


Вашингтон, 11 септември, 2015 - 9:30 (META) 

САД денеска ја одбележуваат 14-годишнината од терористичките напади на Њујорк и на Вашингтон, извршени на 11 септември 2001 година. Во нападите со киднапираните авиони загинаа 3.000 лица.

Во Пенсилванија денеска, по тој повод, е отворен меморијален центар посветен на жртвите од патничкиот авион „Јунајтед ерлајнс“, на летот 93, еден од четирите киднапирани авиони.

Авионот не стигна до целта. Истрагата потврди дека мета бил Капитол хил во Вашингтон. Два авиона се урнати во кулите на Светскиот трговски центар во Њујорк, а еден падна на зградата на Пентагон, во главниот град на САД.

Претседателот на САД, Барак Обама, ќе ја посети воената база Форт Меди и ќе разговара со војниците стационирани таму, соопшти Белата куќа.


Ал каеда: Исламска држава е нелегитимна


Дамаск, 10 септември, 2015 - 13:49 (META) 

Лидерот на Ал каеда, Ајман ал Завахири, соопшти дека Исламска држава и нејзиниот лидер Абу Бакр ал-Багдади се незаконити, но рече дека неговите приврзаници ќе ја поддржат нивната борба против западните коалиции во Ирак и во Сирија, доколку тоа е можно.

– Не го признаваме овој калифат – вели Завахири во аудиоснимка што се појави на интернет.

Не е сигурно кога говорот е снимен, но се претпоставува дека е стар најмалку осум месеци.

Милитантната Исламска држава, која контролира големи делови од Ирак и од Сирија, вети дека ќе го реформира калифатот на Блискиот Исток.

Без разлика на ривалството меѓу Ал каеда и Исламска држава, Завахири рече дека сè уште има простор за соработка кога станува збор за борбата против Западот.

– Без разлика на големите грешки на Исламска држава, да бев во Ирак или Сирија, ќе соработував со нив во убивањето христијани, секуларисти и шиити, иако не ја признавам легитимноста на нивната држава – рече Завахри.

 


Исламистички бунтовници ја зазеле воздухопловната база во Идлиб во Сирија


Дамаск, 9 септември, 2015 - 18:59 (META) 

Сириски бунтовници поврзани со Ал Каеда, по двегодишна опсада ја презеле контролата на една од клучните воздухопловни бази во провинцијата Идлиб, во северозападниот дел на земјата, соопштила сириската државна телевизија, пренесува „Би-Би-Си“.

Воздухопловната база Абу ал-Духур, беше последното упориште на режимот во Дамаск во провинцијата, која е под речиси целосна контрола на бунтовниците.

Милитантите кои стојат зад нападот се верува дека се дел од коалицијата на ислимистички групи, вклучувајќи ги сирискиот разгранок на Ал каеда и фронтот Ал нусра.


Исламска држава преку социјалните мрежи влијае на Американците


Денвер, 23 јули, 2015 - 10:58 (META) 

Внатрешното превирање на припадници на Исламска држава претставува поголема закана за САД отколку надворешните напади на Ал каеда, изјави директорот на ФБИ, Џејмс Коми.

Тој објасни дека радикалната група ИД поттикнува Американци со проблеми да се свртат кон насилство. Тој вели дека ИД влијаела на значителен број Американци преку кампања на социјалните мрежи, повикувајќи ги муслиманите што не можат да патуваат до Блискиот Исток, да убиваат каде и да се. Коми појаснува дека членови на „Твитер“ поврзани со групата ИД, имаат повеќе од 21.000 следбеници.

Директорот на ФБИ соопшти дека во изминатите осум недели, агенцијата уапсила голем број радикализирани граѓани. Според него, некои од уапсените планирале напади поврзани со националниот празник Денот на независноста.


Уапсени 18 терористи во Италија


Рим, 24 април, 2015 - 11:58 (META) 

Италијанската полиција уапси 18 лица поврзани со терористичка организација блиска до Ал каеда, која поддржува напади врз пакистанската Влада и врз американските сили во Авганистан.

Како што јавуваат италијанските медиуми, уапсените се осомничени дека учествувале во нападот врз пазарот во пакистанскиот град Пешавар од 2009 година, во кој загинаа повеќе од 100 луѓе.


Во антитерористичка акција, САД убиле и двајца заложници


Вашингтон, 23 април, 2015 - 20:11 (META) 

Еден државјанин на САД и еден Италијанец, кои биле држени од Ал каеда како заложници во погранична област меѓу Пакистан и Авганистан, загинале во антитерористичка операција на силите на САД, изведена со дронови, во јануари оваа година, соопшти денеска Белата куќа, пренесуваат светските медиуми.

Во операцијата биле убиени американскиот лекар Ворен Вајнштајн и Италијанецот Џовани Ло Порто.

Од Белата куќа соопштиле дека во нападите се убиени и двајца други американски државјани, за кои постојат сомневања дека биле припадници и дел од високите структури на Ал каеда.

Американскиот претседател, Барак Обама, денеска изјавил дека презема „целосна одговорност“ за антитерористичката операција во јануари и изразил длабоко жалење поради смртта на недолжните цивили.


Директорот на Европол предупредува: Ал каеда сè уште може да изврши големи напади во Европа


Хаг, 15 април, 2015 - 15:36 (META) 

Опасноста од терористички напади во Европска унија и понатаму е висока, изјави денеска Роб Вејнврајт, директорот на Европол, предупредувајќи на опасноста што ја претставуваат Исламска држава и Ал каеда.

– Двете организации имаат способност и средства за да спроведат напади во ЕУ. Сметаме дека заканата за безбедноста во ЕУ ќе остане на високо ниво – изјави Венјврајт.

Според Венврајт, организациите кои се поврзани со Ал каеда „на високо ниво ја задржуваат способноста“ за извршување „големи спектакуларни напади“ во Европа. Како особена опасност ги наведе „патувачките џихадисти“, Европејци кои одат на боиштата во Ирак и во Сирија. Тие, според директорот на Европол, одамна претставуваат проблем, за што сведочи и нивната вмешаност во нападите во Франција и во Белгија.