!Во периодот што претстои работиме на воведување систем за пристап и за претплата. За начинот на пристап и за претплатата ќе информираме дополнително. Содржините на „Мета“ до тогаш се слободни за преземање со задолжително цитирање и атрибуирање.

Таравари ќе се кандидира за градоначалник на Гостивар


Гостивар, 3 септември, 2017 - 18:41 (META) 

Министерот за здравство, Арбен Таравари, ќе биде кандидат за градоначалник на Алијансата на Албанците за Гостивар, објави порталот „Сакам да кажам“.

Според извори од партијата на Зијадин Села, по неуспешните преговори со Беса за заеднички да настапат на претстојните локални избори, тие одлучиле во Гостивар да настапат самостојно, а нивен кандидат да биде Таравари.

– Најверојатно, ќе се кандидирам за градоначалник на Гостивар, како кандидат на Алијансата. До почнување на предизборната кампања, останувам во Министерството за здравство. За време на кампањата ќе земам две недели одмор, меѓутоа ќе одам во Министерството за да завршам неопходни работи – изјави Таравари.


ВМРО-ДПМНЕ не кажува дали утре ќе присуствува на собраниската седница


Скопје, 29 мај, 2017 - 11:36 (META) 

ВМРО-ДПМНЕ сè уште не објавува дали нејзините пратеници ќе учествуваат на утрешната собраниска седница, на која треба да се расправа по предлогот на Зоран Заев за нова влада.

Утрешната седница е прва по изборот на Талат Џафери за претседател на Собранието.

Неговиот избор ВМРО-ДПМНЕ го нарече „нелегитимен, неуставен и неделовнички“.

Од партијата велат дека ставот околу утрешната седница ќе го соопштат наскоро, но се изненадени од краткиот рок што им е даден на пратениците да се запознаат со програмата и со составот на владата.

Од 27 април, Талат Џафери имаше средби главно со амбасадори.

Инаку Џафери, вчера, од мандатарот  Заев, го добил предлогот за состав на владата и програмата за нејзиниот мандат. До претседателот на Собранието тие биле доставени околу 15 минути пред полноќ. Џафери веднаш двата документа ги доставил до пратениците, а седницата за избор на владата ја закажа за утре, во 11 часот.

Лидерот на СДСМ и мандатар за состав на новата влада, Зоран Заев, вчера соопшти дека новиот владин кабинет ќе има 15 министри со ресори и неколку министри без ресори: Радмила Шекеринска ќе биде министер за одбрана, Оливер Спасовски – министер за внатрешни работи, Драган Тевдовски – министер за финансии, Никола Димитров – министер за надворешни работи, Рената Десковска – министер за образование и наука, Љупчо Николовски – министер за земјоделство, Мила Царовска – министер за труд и социјална политика, Роберт Алаѓозовски – министер за култура, Дамјан Манчевски – министер за информатичко општество и администрација и Горан Сугаревски – министер за транспорт и врски.

Во новата влада за министри без ресор ќе бидат предложени  Роберт Поповски, Кочо Анѓушев, Едмонд Адеми, Аднан Ќахил, Самка Ибраимовски, Зорица Апостоловска и Зоран Шапуриќ.

Алијансата за Албанците ќе биде дел од новата влада со две министерски места – за здравство и за локална самоуправа.

Иако Беса не е дел од новата влада, договориле соработка за реформите и за важните проекти.


Села: Ќе учествуваме во новата влада со министри за здравство и локална самоуправа


Тетово, 28 мај, 2017 - 22:51 (META) 

Алијансата за Албанците ќе биде дел од новата влада со две министерски места – за здравство и за локална самоуправа, соопшти доцна вечерва лидерот на Алијансата, Зијадин Села.

-Движењето за реформи на ДПА имаше централно претседателство на кое одлучивме да бидеме дел од владата, а не само да и дадеме поддршка. Како АА имаме две ресорни министерства. Нам како ДР-ДПА ни следува едно министерство и тоа ќе биде за здравство, со кое ќе раководи Арбен Таравари. Второто, за локална самоуправа ќе го добијат НДП, кои ќе треба да информираат за името – рече Села.

Села додаде дека ДР-ДПА не размислува за учество во владата само преку министрите, туку дека ќе бидат за длабоки и вистински реформи за да се врати надежта во општеството за сите граѓани.

На новинарско прашање што мисли за стабилноста на владата со само 62 пратеници без учеството на Беса, Села рече дека на 15 октомври ќе има локални избори, но не и парламентарни.


Алијанса за Албанците вечерва одлучува дали ќе учествува во новата влада


Тетово, 28 мај, 2017 - 21:56 (META) 

Во Тетово започна Централно претседателство на Алијансата за Албанците на која ќе се расправа по две точки, учеството во новата влада и изборот на министрите од редовите на Алијансата.

Од коалицијата велат дека, доколку одлучат да бидат дел од новата влада ќе предложат двајца министри.

Министерското место за здравство ќе му припадне на Арбен Таравари, а за министер за локална самоуправа има повеќе кандидати.

Неофицијално, високи партиски извори од АА велат дека можно е да се расправа и да се гласа Алијансата да не биде дел од новата влада, но дека тие ќе ја поддржат владата во носење на закони и реформи.


ВМРО-ДПМНЕ: Граѓаните не сакаат политичари кои лажат


Скопје, 25 мај, 2017 - 10:08 (META) 

ВМРО-ДПМНЕ прашува каква е состојбата со двојазичноста, поради контрадикторноста на тоа што го кажува Зоран Заев и портпаролот на Алијанса за Албанците.

„Кој лаже, Зоран Заев или Арбен Таравари? Кој ги манипулира гласачите и народот, Алијанса за Албанците или СДС?     Дали лаже Таравари кога вели дека побарале двојазичноста да се реализира експресно и Заев се согласил со тоа или лажеше Заев кога ја потпиша гаранцијата со која ја отфрли Тиранската Платформа?“, стои во утринското соопштение од партијата.
ВМРО-ДПМНЕ порачува дека „граѓаните не сакаат политичари кои лажат кај ќе стигнат“.

„Граѓаните оправдано се плашат дека криминалецот Заев е подготвен да ја реализира Тиранската Платформа, во надеж дека од позиција на власт ќе се спаси од кривичен прогон за кривични дела кои ги извршил“, вели ВМРО-ДПМНЕ.


Заев со Ахмети ги почнува преговорите за новата влада


Скопје, 19 мај, 2017 - 10:11 (META) 

Претседателот на СДСМ, Зоран Заев, денеска официјално ќе ги почне преговорите за составување на новата влада. Тој завчера го доби мандатот од претседателот Ѓорге Иванов.

Првата средба би требало да биде со претседателот на ДУИ, Али Ахмети, но терминот уште не е договорен, појасни за „Мета“ портпаролот на СДСМ, Петре Шилегов.

Потоа ќе следуваат и преговори со другите претставници на партиите од новоформираното парламентарно мнозинство, Алијанса за Албанците и Беса, кои би требало да учествуваат во составот на новата влада заедно со партнерите на СДСМ од коалицијата.

Извесно е дека преговорите ќе течат и во текот на викендот.


Халити: Состојбата на Села е добра и за неколку дена треба да биде пуштен дома


Тетово, 2 мај, 2017 - 15:38 (META) 

Лидерот на Алијанса за Албанците, Зијадин Села, е во добра здравствена состојба и за неколку дена треба да биде пуштен на домашно лекување, изјави денеска Дестан Халити, лекар од ургентниот центар при Клиничката болница во Тетово.

– Вчера се правени нови анализи, при што е утврдено дека неговата состојба е стабилна, на секој дел од телото каде што е повреден има подобрување. Уште неколку дена ќе биде згрижен во болницата и потоа ќе го пуштиме на домашно лекување – изјави Халити.

Тој додаде дека поради големиот интерес за здравствената состојба и барања за посети, од болницата донеле забрана за прием на посетители кај Села.

– Имаме донесено забрана за посети, бидејќи тоа не е добро за неговата здравствена состојба, но и за нас како лекари. Сè уште го третираме со лекови и очекуваме, како што веќе кажав, за неколку дена да биде работоспособен. Тој имаше повреда на мозокот, една од потешките, меѓутоа немаше индикации за да извршиме хируршки зафат и затоа го лекуваме на ваков начин – додаде Халити.

Лидерот на Алијанса за Албанците беше најтешко повреден во насилствата во Собранието, минатиот четврток, кога демонстранти упаднаа во Законодавниот дом и ги нападнаа пратениците од парламентарното мнозинство.


Алијансата за Албанците им се заблагодари на Хојт Ји и на САД за поддршката на Македонија


Скопје, 30 април, 2017 - 19:24 (META) 

Генералниот секретар на Движењето за реформи на ДПА, Арбен Таравари, и пратеникот на Алијансата за Албанци и претседателот на НДП, Весел Мехмеди, денеска се сретнаа со заменик-помошникот државен секретар за Европа и за Евроазија во Стејт департментот, Хојт Брајан Ји.

„Нашите претставници го информираа Хојт Ји и за настаните што се случија во Собранието на Македонија, како и за здравствената состојба на лидерот на Движење за реформи на ДПА, Зијадин Села, кој поради здравствени причини не беше во можност да биде дел од средбата. Тој беше информиран и за придонесот на Алијансата за Албанците и на нејзините пратеници, за надминување на политичката ситуација, како и за политичката поддршка на Алијансата за Албанците за деблокирање на институции кои се резултат на изборот на претседателот на Собранието на Република Македонија и подготвеноста на Алијансата за Албанците да се формира што е можно поскоро, новата реформска влада од парламентарно мнозинство“, велат од Алијансата за Албанците.

Претставници од Алијансата за Албанците им се заблагодариле на дипломатската улога, како и за политички континуираниот придонес на САД за надминување на политичката ситуација и за признавањето на изборот на новиот претседател на Собранието, Талат Џафери.


ВМРО-ДПМНЕ: Алијансата за Албанците како мираз му ја носи тиранската платформа на Заев


Скопје, 21 април, 2017 - 9:58 (META) 

Коалициските партнери на Заев од Алијанса за Албанците, кои како мираз му ја носат тиранската платформа, вчера уште еднаш потврдија дека не им е битен државниот интерес, туку националното прашање на Албанците, стои во утринското соопштение од ВМРО-ДПМНЕ.

„Поголема потврда од тоа дека од Алијанса за Албанците ќе коалицираат заради исполнување на барањата од тиранската платформа со СДС, а не за некаков „граѓански концепт“ кој Заев ни го продава, нема. Зоран Заев е очаен и има патолошка потреба за власт. Заев во власта гледа единствена надеж за спас и за амнестија од сите криминали кои ги има сторено тој и неговата криминогена врхушка во врвот на СДС“, велат од ВМРО-ДПМНЕ.

Од партијата истакнуваат дека Заев не ги осудил, како што велат, антидржавните изјави на Зијадин Села, Еди Рама и на Дитмир Бушати, затоа што тој, како што се наведува, „е заробеник на желбата за власт и е спремен да ја проголта секоја антидржавна изјава, само за да направи влада“.


Алијанса за Албанците: Важно е да се спроведе волјата на мнозинството на електоратот


Скопје, 11 март, 2017 - 13:56 (META) 

Важно е да се спроведе волјата на мнозинството на електоратот, кое јасно посочи дека постои интерес за суштински реформи и за нов пристап кон целосна рамноправност, социјален напредок и кон постигнување на стратешките цели, како што се интеграцијата во ЕУ и во НАТО, соопшти денеска Алијанса за Албанците.

Од партијата не ја коментираа програмата што вчера ја презентираше СДСМ, но рекоа дека таа ќе биде проширена за да ги рефлектира интересите на сите.

„Во однос на 15-те приоритетни принципи утврдени од страна на СДСМ, Алијансата за Албанците смета дека албанските политички партии во владината проширена програма ќе бидат внимателни за да се опфатат сите точки кои се со посебен национален и граѓански интерес“, стои во соопштението на Алијанса за Албанците.