Алијансата за Албанците во Гостивар повика да се гласа за НАТО и ЕУ


Гостивар, 13 септември, 2018 - 9:30 (META) 

Претседателот на политичката партија Алијанса за Албанците, Зијадин Села, вчера во Гостивар повика на масовност и поддршка на претстојниот референдум. Тој на собирот во амфитеатарот во градскиот парк пред сопартијците и симпатизерите рече дека има природна потреба Албанците од Македонија да бидат во НАТО и ЕУ.

– Да излезме на 30 септември масовно и да ги мобилизираме останатите. Така ќе им ја врачиме благодарницата на НАТО кои беа со нас кога опстанокот на Албанците на овие простори беше загрозен. Да гласаме „за“ и да ги направиме нашите домови и иднината посигурни – рече Села.


Алијанса за Албанците во недела ќе одлучува за референдумското прашање


Скопје, 24 август, 2018 - 16:41 (META) 

Алијанса за Албанците во недела во 12 часот ќе има состанок на Централното собрание кое ќе расправа за референдумското прашање.

По состанокот на Централното Собрание ќе има прес-конференција, каде претседателот на Алијансата за Албанците, Зијадин Села, ќе ги информира новинарите за одлуката на Централното Собрание.

Претседателот на Собранието Талат Џафери вчера достави известување до пратеничките групи во кое бара до понеделник да одговорат дали ќе учествуваат во јавната пропаганда за референдумот која треба да ја спроведе Собранието, како и за тоа каква кампања ќе водат, дали ќе бидат „за“ или „против“ референдумското прашање.

Известувањето е упатено до координаторите на пратеничките групи на СДСМ, ДУИ, ВМРО-ДПМНЕ, Беса, како и до пратениците на ДПА и Алијансата за Албанците.

Рокот од три дена што Џафери им го дааде на координаторите на пратеничките групи за да го известат е заради планирана и соодветна распределба на овие средства за реализација на јавната пропаганда.


„Република Северна Македонија“ за Алијанса за Албанците е прифатливо име


Скопје, 25 јуни, 2018 - 11:14 (META) 

Новиот предлог за името на државата „Република Северна Македонија“  преставува позитивен момент во изнаоѓање на трајно решение за името во спорот меѓу двете соседни земји и го отвара патот за ЕУ и НАТО интеграциите, смета Алијанса за Албанците.

„Веруваме дека овој предлог е прифатлив за сите, и не го уценува мултиетничкиот карактер на државата, за разлика од претходниот предлог соопштен од Владата и промовиран од ДУИ кој што содржеше историски и религиозни елементи“, порачуваат од Алијанса за Албанците, посочувајќи дека партијата ќе ја поддржи ратификацијата на договорот во Собранието и поддржува одржување референдум.

Сепак, како што се вели во соопштението, станува збор за првичен став, а откако ќе го добијат предлог-договорот, ќе се изјаснат и за другите детали од договорот „предлог кој што треба да го реши и прашањето на националниот идентитет“.


Алијанса за Албанците: „Илинденска“ е удар врз секуларизмот и славизирање на државата


Скопје, 23 мај, 2018 - 10:30 (META) 

Алијансата за Албанците на вчерашната седница на Централното претседателство, последниот предлог „Република Илинденска Македонија” за решение на спорот за името со Грција, го нарече тенденција да се славизира името на државата и тежок удар врз секуларизмот.

„Интегрирањето на Македонија во ЕУ и НАТО е бескомпромисна стратегиска и политичка определба на Алијансата за Албанците. Таа го повторува својот став дека е против која било тенденција да се славизира во која било форма името на државата. Во врска со информацијата лиферувана во јавноста околу новото име на државата, Алијансата за Албанците констатира дека ова именување е тежок удар врз секуларниот карактер на државата како една од основите на либералната демократија”, наведува во своето соопштение Алијансата за Албанците.


Села нема да биде дел од Владата на Заев без избори


Кичево, 10 април, 2018 - 9:54 (META) 

Алијансата за Албанците на ниту еден начин нема да биде дел од некоја нова владина гарнитура, на која нема да претходи парламентарен изборен процес, едногласно одлучила партијата на првото Централно собрание во Кичево по партискиот конгрес кој се одржа на 10 март.

Од партијата велат дека нивната одлука се заснова на индикациите дека владејачката гарнитура не е доволно убедлива во својата заложба за радикални реформи во земјата, а особено нејзината индиферентност околу спроведувањето и примената на принципите и функционирањето на владеењето на правото.

На седницата беше избрано дел од раководството на партијата, генералниот секретар, централното претседателство, претседателот на Академија и комисијата за статутарно-правни работи.

Воедно на централното собрание е донесен заклучок во кој се вели дека партијата ги поддржува напорите и преговорите за решавање на проблемот со името, но се против решение на име напишано само на кирилично писмо.

Од Алијанса за Албанците велат дека предлогот за името треба да биде меѓународно преведен и не треба да биде на јазикот само на одредена етничка заедница во земјава.


Села: Алијансата за Албанците и понатаму е отворена за преговори за влез во Владата


Дебар, 22 јануари, 2018 - 11:46 (META) 

Лидерот на Алијансата за Албанците, Зијадин Села, синоќа во Дебар изјави дека АА и понатаму е отворена за преговори за нејзино враќање во Владата на премиерот Зоран Заев, но само ако се исполнат веќе познатите барања. Тој бара одговорност за корупцијата на сите партиски функционери без разлика од нивната етничка припадност.

– Имаме чести средби со меѓународните фактори во кои, исто така, често е барано да бидеме дел од Владата бидејќи без пратениците на Алијансата, Заев не можеше да изгласа Влада – рече Села.

Тој притоа нагласи дека е за продолжување на реформите бидејќи цврсто е уверен дека влезот во ЕУ и НАТО е клучна задача на земјата. Тој упати остри критики на адреса на ДУИ бидејќи, како што рече, нема сторено ништо за правата на Албанците.

Според него, на претстојните избори ДУИ ќе има катастрофален неуспех, додавајќи дека Алијансата е партија во која нема корумпирани функционери и очекува продолжување на зголемување на рејтингот.

– Сите анкети покажуваат дека кај Алијансата има рапиден раст на рејтингот и покрај тоа што сега е во опозиција – вели Села.


Замениците-министри од Алијансата за Албанците ги депонираа оставките во Владата


Скопје, 28 декември, 2017 - 17:51 (META) 

Функционерите на Алијансата за Албанците денеска и официјално ги депонираа оставките во Владата.

– Тројца заменици-министри и државниот секретар во Министерството за правда денеска поднесоа оставките во владината архива, а се очекува од своите функции да се повлечат и уште осум директори, што значи вкупно 12 или 13 функционери кои ќе поднесат оставка од водечки позиции – рече Елми Азири од Алијансата за Албанците за телевизијата „Алсат-М“.

Оставки поднесоа замениците-министри за надворешни работи, за транспорт и врски и за труд и социјална политика, Арта Точи, Ремзи Мемеди и Елми Азири, како и државниот секретар во Министерството за правда Зулфи Адили, три дена откако претседателот на партијата Зијадин Села ги повика на ваков чекор.


Анѓушев: Мора да се промени начинот на греење – гасификацијата е најдобро решение


Скопје, 28 декември, 2017 - 16:10 (META) 

Вицепремиерот за економски прашања Кочо Анѓушев одговарајќи на пратенички прашања денеска во Собранието рече дека според истражувањата најголем загадувач е затоплувањето на домаќинствата, а потоа следуваат автомобилите па индустријата.

– Проблемот со загадувањето треба да се реши со дејствување врз изворите, а не врз последиците. Мораме да го измениме начинот на греење. Не може на дрва, сецкан ќумур или гуми да се греат домаќинствата. Единствен начин како да се реши тоа е да се заменат горивата. А како? Така што таму каде што има горива кои прават полуција на ПМ10-честички, да се заменат со горива кои не го прават тоа. Затоа гасификацијата е важна – рече Анѓушев.

На прашање на пратеникот од Алијансата за Албанците Сурија Рашиди дали некои лица се заштитени пред законот, премиерот Зоран Заев рече дека нема да има ни „п“ од правна држава ако некој е заштитен пред законот.

– Оваа влада се што затекна како криминал го процесираше до Јавното обвинителство. Станува збор за десетици предмети, а на ОЈО е да каже дали има можност да се отворат постапки и да се процесираат предметите без разлика од која партија се луѓето инволвирани. Ниту сум помислил ниту сум добил информација дека некој влијаел врз ОЈО или СЈО за некој предмет – рече Заев.

Рашиди му реплциираше дека Алијансата за Албанците ќе продолжи да ги поддржува реформите во правосудниот систем и дека ќе се бори да нема заштитени пред законот.

На прашањето што се случува со проектот Скопје 2014 година, министерот за култура Роберт Алаѓозовски рече дека проектот е вирус кој е ставен во карантин и е секоја постапка околу негова понатамошна реализација е запрена.

– Работната група прави темелна анализа бидејќи има голем број на проекти, измешани се надлежностите на институциите врз нив па затоа на секој проект ќе му се пристапи поединечно. Работната група изработи елаборати за споменикот на Ќосето, за Воинот на коњ и за Порта Македонија. Тие се испратени во општините кои треба да ги истражат во детали. Процедурата за отстранување на спомениците мора да биде прецезино разгледана за да не се соочиме со тужби со кои дополнителни би бил оптоварен буџетот. Треба да внимаваме на забелешките на СЈО дека отстранувањето треба да се врши без оштетување и уништување затоа што спомениците претставуваат докази во нивни постапки – рече Алаѓозовски и додаде дека кога ќе има доволно докази ќе бидат поднесени и тужби до одредени функционери.


Несериозно е да се помисли на нови избори во 2018 година, смета Џафери


Скопје, 28 декември, 2017 - 11:35 (META) 

Несериозно е да се помисли да има нови избори во 2018 година, затоа што Македонија ја чекаат процеси за евроатлантската интеграција и реформи кои треба да се спроведат, изјави денеска претседателот на Собранието, Талат Џафери.

Тој изрази надеж дека на седницата на 9 јануари, која ќе биде прва во следната година, ќе присуствуваат и пратениците на ВМРО-ДПМНЕ и потенцираше дека политичката криза завршила пред шест месеци. Според Џафери излегувањето на Алијансата за Албанците од Владата не го разнишува парламентарното мнозинство и од тоа не зависи кворумот во Собранието.

-Убеден сум дека ќе има мнозинство и во 2018 година, дека во Собранието ќе учествуваат сите политички партии, што ќе води кон позитивен извештај од Европската комисија во април и датум за почнување на претпристапните преговори – рече Џафери.

Според собранискиот спикер, постигнувањето кворумот во Собранието е должност на координаторите на пратеничките групи, но и дека тоа зависи од индивидуалното однесување на пратениците. Тој потенцираше дека пратениците треба да бидат повнимателни и да ги разберат сериозните моменти.

Џафери информираше дека ратификацијата на Договорот со Бугарија во Собранието не треба да се очекува пред 15 јануари следната година, а предлог-законот за употребата на јазиците ќе се најде на собраниска седница на 9 јануари. Прашан што ќе се случи доколку претседателот Ѓорге Иванов не го потпише законот за јазиците, Џафери рече дека тогаш предлог-законот повторно ќе се врати на пленарна седница во Собранието според законите и Уставот, а потоа законот може да се донесе и без да го потпис од претседателот Иванов.

На истата седница со законот за јазиците ќе се најде и точката за избор на двајцата уставни судии, кои се на предлог на претседателот Иванов, по што ќе почне постапката за предложување и именување.

Џафери информираше дека процесот „Жан Моне“ ќе започне на 25 и 26 јануари, следната година, а во однос на спорот за името повтори дека тој формално-правно може да се реши и без референдум.

– Спорот за името може да се реши во Собранието, затоа што таму има претставници на сите политички партии за кои гласале граѓаните. Сепак, тоа е политичка одлука за која е потребен политички консензус – додаде Џафери.


Заев му посака среќа на Мицкоски и му порача заедно да мислат за Македонија


Скопје, 25 декември, 2017 - 11:34 (META) 

Можам само да му посакам среќа на новиот претседател на ВМРО-ДПМНЕ и заедно сите да му ја мислиме за Република Македонија, изјави премиерот Зоран Заев прашан како го оценува изборот на Христијан Мицкоски за претседател на најголемата опозициска партија.

Тој истакна дека стабилни политички партии како ВМРО-ДПМНЕ и СДСМ значат стабилност за Македонија.

– Завршувањето на конгресот на нашиот политички опонент и изборот на нов лидер треба да претставува перспектива и за државата. Очекувам конструктивен процес во Парламентот и критичен осврт од опозицијата – изјави Заев, одговарајќи на новинарски прашања по денешното рочиште за случајот „Поткуп“.

Прашан дали има најава за средба со Мицкоски, премиерот рече дека досега немаат ништо разговарано, но, оти ќе ја искористи првата прилика кога ќе има потреба за средба и ќе го покани новиот лидер на ВНРО-ДПМНЕ.

Околу прашањето дали очекува пратениците на ВМРО-ДПМНЕ да се вратат во Собранието, Заев изјави оти очекјува тие да ја коригираат својата одлука и да се вратат во законодавниот дом, бидејќи на дневен ред доаќаат важни прашања кои бараат двотретинско мнозинство.

– Учеството на опозицијата е неопходно за да имаме нормални и демократски процеси. Убеден сум дека опозицијата треба да биде составен дел од сето она што значи реформски процес, но и сето она што значи добри перспективи на Република Македонија. Таму каде што ќе успееме да се усогласиме, го очекувам и нивниот глас, таму каде што нема да се согласуваат со власта да бидат критични и против – рече Заев.

На прашањето дали ќе има нова средба со лидерот на Алијанса за Албанците, Зијадин Села, Заев рече дека за ова прашање разговараат повеќе од еден месец, додавајќи дека ако одлуката на Алијансата донесена на вчерашното Централно собрание на партијата е да останата во Владата, се надева оти тоа значи и прифаќање на местото вицепремиер за реформи.

– Очекувам дека господинот Села, кој е лидер на млада партија, која најверојатно сака да се докажува, ќе го прифати понуденото потпретседателско место во владата за реформи. Очекувам таков чекор од партијата која води 20 сериозни сектори во државните органи. Не е возможно да сменам кој било од министрите кои се зафатија со својата работа од 1 ноември, веднаш по локалните избори – рече Заев.

Алијансата за Албанците на вчерашното Централно собрание одлучи да не ја напушта владината коалиција и да ги задржи своите претходни позиции.

Заев и Села имаат средба во четвртокот, минатата недела, по која лидерот на Алијанса за Албанците за медиумите изјави дека му дал предлог на премиерот „да стокми уште една друга позиција, што би била заменик премиер за носење бурек“, која потоа би им ја дал на ДУИ.