Тачи: Иванов не може да го запре официјализирањето на албанскиот јазик


Приштина, 23 јануари, 2018 - 22:04 (META) 

Во интервју за „Дојче веле“, косовскиот претседател Хашим Тачи ја критикува одлуката на македонскиот претседател Ѓорге Иванов да не го потпише законот за јазиците.

– Што се однесува до одлуката на претседателот Иванов, тоа е за жалење. Таа одлука е производ на надминат менталитет, но и тоа прашање ќе биде затворено еднаш и засекогаш, без оглед на неговото мислење – вели Тачи во интервјуто.

Косовскиот претседател е убеден дека законот ќе биде донесен и тоа, според него, никој не може да го сопре.


Вучиќ на Косово: Србија сака и ќе направи се да го зачува мирот


Бањска, 20 јануари, 2018 - 12:59 (META) 

Српскиот претседател Александар Вучиќ денеска им порача на Србите на Косово дека мораат да останат и да опстанат на своите живеалишта на Косово, а дека за тоа ќе има понатамошна и поголема помош од државата.

– Србите мора да останат и да опстанат на своите огништа на Косово и Метохија. Не смееме да бидеме помалку на земјата на која од секогаш сме живееле. Затоа како држава ќе се бориме на сите начини, мора да го обезбедиме нивниот економски напредок, да ја обезбедиме нивната сигурност и да се пресметаме со криминалот и корупцијата – порача Вучи.

Осврнувајќи се на атентатот на Оливер Ивановиќ, Вучиќ рече дека Србија, иако била подготвена да учествува во истрагата, што не било прифатено од албанската страна, ќе разменува информации со косовските институции, и дека ќе ги почека конечните резултати.

– Ќе видиме дали истрагата ќе доведе до извршителите на ова гнасно злосторство. Ако тоа не се случи, многу работи ќе бидат јасни, како што реков првиот ден – рече тој.

На Србите на Косово им се заблагодари на цврстината, постојаноста, храброста и желбата да ја чуваат својата земја, а на Албанците им порача дека, без оглед на различните интереси, Србија сака и ќе направи се да го зачува мирот и да ги реши несогласувањата.

– Дојдов да им порачам на Албанците, без оглед што неретко Србите ги доживуваат како, не би рекол непријатели, туку како противници, и неретко имаме различни интереси, дека Србија не само што сака мир, туку ќе даде се од себе тој мир да го зачуваме. Ќе направиме се со цел да ги решиме повеќедецениските и повеќевековните несогласувања, да обезбедиме трајност на тој мир, и безбедност за секое албанско и српско семејство – додаде Вучиќ.


Рама: Без нас албанскиот немаше да биде официјален јазик во Македонија


Тирана, 14 јануари, 2018 - 21:58 (META) 

Премиерот на Албанија, Еди Рама усвојувањето на Законот за употреба на јазиците во Република Македонија го оцени како голем настан, кој што пред неколку години не можел ни да се замисли. За време на конференцијата на Младинскиот форум на неговата Социјалистичка партија, тој изјави дека за изгласувањето на овој закон заслужна е неговата Влада, која имала сериозен пристап кон односите со Македонија, јави ТВ 21.

-Пред неколку дена, во македонското Собрание помина законот кој не можеше ни да се замисли пред некое време. Јас ви велам дека сите вие треба да бидете горди, треба да бидат горди сите тие што гласаа, ја поддржаа и веруваа во оваа партија, бидејќи без неа денеска немаше да постои официјален албански јазик во Македонија – изјави Рама, изразувајќи надеж дека Албанија нема да биде сама во европското семејството, туку заедно со другите земји од Балканот, како што рече, каде што најмногу живеат Албанци.


Ахмети ги повика Албанците во Скопје да гласаат за Шилегов


Скопје, 28 септември, 2017 - 23:30 (META) 

Претседателот на Демократската унија за интеграција (ДУИ), Али Ахмети на митингот во Гази Баба рече дека поддршката со СДСМ ќе биде обострана, каде еден од партнерите нема шанси за победа во некоја од општините.

За градоначалник на Скопје, Ахмети повика да се гласа за кандидатот на СДСМ, Петре Шилегов а исто така рече дека и СДСМ ќе ги поддржи кандидатите на ДУИ во градовите со албанско мнозинство.

– Ова ќе придонесе за зајакнување на власта и ќе биде во полза за сите граѓани – рече Ахмети.

Премиерот и лидер на СДСМ, Зоран Заев исто така најави дека со ДУИ ќе настапат како коалиција во повеќе општини и ќе ги поддржат нивните кандидати кои, како што изјави, се добри и работат во интерес на граѓаните.

– СДСМ ќе има свои кандидати за градоначалници во општините Кондово, Липково, Струга и во други општини каде очекувам и Македонци и Албанци да гласаат за нашите кандидати кои се од албанска етничка припадност – изјави Заев.


Собранието ја продолжува расправата за Законот за употреба на јазиците


Скопје, 20 септември, 2017 - 10:11 (META) 

Собранието денеска ќе ја продолжи 15. седница на која на дневен ред е законот за употреба на јазициите. Предлог-законот е со европско знаменце, односно треба да биде донесен по скратена постапка.

Расправата по оваа точка на претходните продолженија на седницата се одвиваше во тензична атмосфера, бидејќи пратениците на опозициската ВМРО-ДПМНЕ сметаат дека законот е неуставен, дека е резулатат на политички договор на владејачката коалиција и дека нема аргументи за законот да е обележан со европско знаменце.

Ставот на опозицијата вчера го повтори лидерот на ВМРО-ДПМНЕ, Никола Груевски, во емисијата „200“ на „Алсат-М“, кој рече дека откако законот ќе биде донесен, може да падне на Уставениот суд, што, како што додаде, не е чесно кон Албанците, чија поддршка преку законот СДСМ се обидува да ја добие на локалните избори.

– ВМРО-ДПМНЕ нема ништо против употребата на јазиците на сите етнички заедници во Македонија, вклучувајќи ја и албанската, впрочем во 2008 година се донесе Законот за употреба на јазиците и се донесе во време кога ВМРО-ДПМНЕ ја водеше владата. Но, она што ние се залагаме да не се случи е да не се донесе закон што ќе биде противуставен и кој подоцна може да падне на Уставниот суд… Тоа е нечесно и не е фер кон Албанците, тоа е некоректно – вели Груевски.

Тој додаде дека доколку во „втората фаза“ се понуди решение кое е уставно, ВМРО-ДПМНЕ ќе го поддржи таквиот закон за употреба на јазиците.

Од владејачкиот СДСМ, пак, велат дека предложениот закон за употреба на јазиците не е противуставен, туку е во согласност со членот 5 од Уставот на Република Македонија и ја унапредува употребата на сите јазици на немнозинските заедници и отвора шанса за изградба на едно општество за сите.


Косово изгласа нова влада


Приштина, 10 септември, 2017 - 12:34 (META) 

Со 62 гласа „за“, во парламентот на Косово беше изгласана нова влада, предводена од лидерот на Алијансата за иднина на Косово, Рамуш Харадинај. Владата ја поддржаа партијата на Харадинај, Демократската партија на Кадри Весели, Иницијативата за Косово на Фатмир Лимај, Алијансата за Ново Косово на Беџет Пацоли, пратеничката група на Србите и онаа на немнозинските етнички заедници.

Пред гласањето салата ја напуштија пратениците на екстремно националистичкото движење Самоопределување и Демократскиот сојуз.

Во кабинетот на премиерот Рамуш Харадинај, прв потпретседател на владата и шеф на дипломатијата е милијардерот Беџет Пацоли, потпретседатели се Енвер Хоџај, Фатмир Лимај, Далибор Јевтиќ, кој ќе биде и министер за враќање на раселените и за заедниците, и Дардан Гаши, кој ќе биде задолжен за дијаспората и за привлекување инвестиции.


Беса: Владата разочара во првите 100 дена, отсега нема простување


Скопје, 6 септември, 2017 - 18:26 (META) 

Новата Влада во првите 100 дена покажа дека продолжува да работи по стариот терк – на штета на граѓаните, а во интерес на сопствените политички цели. Ова е ставот кој денеска го соопшти партијата Беса по повод стоте дена од формирањето на Владата.

Од партијата велат дека оваа влада, како и претходната, продолжила да ги партизира институциите на државата и наместо форсирање на професионализмот, партијата на власт продолжила да биде биро за вработување во институциите.

Според Беса, со ребалансот на буџетот повторно не дошол до израз интересот на граѓаните, а со него особено биле оштетени регионите со мнозинско албанско население. Законот за употреба на јазиците, кој е во собраниска процедура, според Беса, е „резултат на намерата на вледејачките партии да профитираат политички, но не и навистина да го решат проблемот со албанскиот јазик во Македонија“.

Од партијата реагираат и дека парламентарното мнозиство и Владата го кршат Изборниот законик со негирање на правото на Беса да има свој член во Државната изборна комисија.

„Досега се трудевме да бидеме максимално конструктивни, особено сакавме да ги почитуваме првите 100 дена на Владата, меѓутоа отсега Движењето Беса нема да му прости во ниту еден момент на ова мнозинство за штетата што тоа ќе им ја нанесе на граѓаните, а особено за манипулацијата што ја прави со Албанците“, велат од Беса.


Беса се закани со граѓанска реакција, ако не се обелоденат „монтираните судски случаи“


Скопје, 17 август, 2017 - 16:05 (META) 

Движењето Беса денеска побара од Владата да ги обелодени „монтираните судски случаи ‘Сопот’ и ‘Монструм’“ или во спротивност „ќе се соочи со силна граѓанска реакција“.

„Инсистираме што побргу да се обелоденат познатите случаи како „Сопот“, „Монструм“ како и многу други, и вистинските виновници да се изнесат пред лицето на правдата, без разлика на нивната етничка припадност. Мора еднаш засекогаш да заврши времето кога Албанците се дежурен виновник. Движењето Беса максимално ќе се ангажира за обелоденување на сите монтирани судски процеси, да се обелоденат коруптивните афери каде се шпекулира за високи политички актери кои и сега се дел од владата. Во спротивно, граѓанската реакција ќе биде силна и Беса ќе го предводи организирањето за спречување на селективната правда на штета на Албанците и на сите граѓани во државата“, се наведува во соопштението на Беса.

Од партијата оценуваат дека разрешувањето на Марко Зврлевски од функцијата државен јавен обвинител нема да реши проблемите во Јавното обвинителство, кои како што велат од Беса се постари од периодот во кој Зврлевски ја водел оваа институција.

„Проценките на домашните и меѓународните институции, направените анализи и студии упатуваат на констатацијата дека Јавниот обвинител и Обвинителството се под силно влијание на политиката, како и многу други институции во државата. Освен сомневањата за работата на Јавниот Обвинител, кои се општи, има и сомневања за неговото постапување, особено за случаите кои се поврзани со Албанците. Во јавноста отворено се зборува за монтирани судски процеси, чии жртви претежно се Албанците. Овие монтирани судски случаи не почнале со Марко Зврлевски. Албанците постојано се прогонувани и против нив се монтирани процеси за политички цели“, велат од Беса.


Рама: Албанците во Македонија не треба да бидат алиби за конфликт


Тирана, 30 април, 2017 - 20:10 (META) 

Премиерот на Албанија, Еди Рама, коментирајќи ги последните настани во Македонија, изјави дека во борбата за власт, како алиби биле вклучени Албанците. Рама ги повика Албанците на мир и на трпение во овие тешки услови за да не се дозволи тие да бидат искористени како алиби за конфликт, пренесе телевизија „Алсат-М“.

– Имаме право да ги потсетиме нашите соседи Македонци дека многу би сакале Албанците во Македонија, кои не се малцинство, туку се државотворно население, да ги уживаат почитта, слободите и правата рамноправно со Македонците. Ние сакаме стабилна Македонија, демократски и економски развиена, бидејќи ние сакаме Македонија да биде пример на хармонија меѓу соседите и да биде место каде ниеден Албанец не се чувствува како граѓанин од втор ред. Повторениот повик за мир, трпение и за што повеќе волја и во овие тешки услови за да не се вклучиме во политички конфликт и да не дозволиме Албанците да се наведуваат како алиби за тој конфликт е израз на нашата голема желба Македонија да ја надмине оваа криза која продолжува да ескалира, каде, за жал, во борбата за власт, Албанците се вклучија како алиби – изјави Рама.


Вучиќ ја повика ЕУ да реагира на изјавите на Рама и на Тачи


Белград, 20 април, 2017 - 15:00 (META) 

Премиерот на Србија, Александар Вучиќ, денеска апелираше до политичките претставници на Албанците да не излегуваат во јавност со изјави дека е потребно сите Албанци во регионот да формираат единствена држава доколку биде запрен процесот на европските интеграции.

„Ние ги молиме, повторувам, ги молиме, бидејќи тоа не придонесува за добри односи во регионот, ниту за создавање атмосфера на соработка и за заедничка соработка на важните проекти“, рече Вучиќ пред новинарите во владата на Србија, додавајќи дека „такво нешто, без обзир на нечии желби, нема да биде дозволено“.

Вучиќ ги повика претставниците на Европската Унија да реагираат на ваквите изјави, истакнувајќи дека тој, кога би изјавил дека сите Срби треба да живеат во една држава, најверојатно ќе биде закачен во Брисел на јарбол, на местото на некое од знамињата што висат таму.

Премиерот на Албанија, Еди Рама, завчера изјави дека не исклучува унија на Косово и на Албанија, доколку ЕУ ја „затвори вратата“ за земјите од Западен Балкан, а претседателот на Косово, Хашим Тачи, вчера изјави дека во таков случај, сите Албанци од регионот ќе живеат во една единствена држава за да се продолжи со интеграцијата во европското семејство.