Алијанса за Албанците и БЕСА на Касами ќе поднесат амандмани за Албанците


Скопје, 22 октомври, 2018 - 17:11 (META) 

Алијанса за Албанците (АА) и крилото на БЕСА предводено од Биљал Касами ќе поднесат амандмани за албанскиот јазик и за преамбулата, во текот на расправата за уставните измени кои се прават поради исполнување на обврските од Преспанскиот договор, јави „Порталб“.

ДУИ, крилото на БЕСА предводено од Африм Гаши, НДП и ДПА сметаат дека сега не е време за поднесување амандмани, туку е многу побитно да се отвори евроатлантскиот пат за Македонија. Артан Груби од ДУИ дури најавите за „албански амандмани“ ги нарече „неписмен, незналечки фолклоризам на ситните партии, отсуство на политичко-партиски идентитет, недостиг на знаење, некреативност и за неуспешен обид да се наметнат како фактор на мала врата, но го немаат клучот да го отклучат“.

БЕСА на Касами ќе поднесе амандмани за целосна еднаквост на Албанците во Македонија и целосна официjализација на албанскиот јазик, а не како што се наведува сега, за „јазикот што го зборуваат 20 отсто од граѓаните“.

-Како политичка партија најавивме дека ќе бидеме дел од процесот на усвојување на уставните измени, при што ќе интервенираме со уставни амандмани за подобрување на правата на Албанците. Не можеме да прифатиме по 27 години да ги оставаме овие права за „подобри времиња“. Цениме дека сега е времето да се отворат овие прашања. Го поддржуваме Договорот од Преспа, но напоредно ќе интервенираме со амандмани откако Владата ќе го достави предлогот. Не кажуваме ништо ново, нема нови работи. Ќе бараме целосна еднаквост на Албанците во Македонија, Албанците не може да се третираат како малцинство и ќе бараме албанскиот јазик да биде официјален – вели Фадил Зендели, заменик на Касами, за „Порталб“.

Тој не кажува дали својата поддршка за другите амандмани ќе ја условат со поддршката на нивните.

И Алијанса за Албанците, како што претходно најавуваше, ќе поднесе амандмани за албанскиот јазик и за преамбулата на Уставот.

– Ние предупредивме дека ќе поднесеме амандмани, но првин ќе го видиме владиниот предлог, за да видиме што содржи, и потоа ќе решиме. Ќе поднесеме амандмани за преамбулата и за албанскиот јазик – изјави пратеникот Сурија Рашиди за „Порталб“.

Албанските партии од владината коалиција, пак, порачуваат дека сега е најважно да се донесат уставните измени за да стапи на сила Договорот од Преспа и да се отвори евроатлантската патека на Македонија. Артан Груби од ДУИ порачува дека амандмани за албанското јазично прашање и за менување на преамбулата ќе бидат само дневно-политичка пропаганда и се „продавање магла“.

-Амандмани треба да се поднесуваат само за предложените членови на Уставот, а не и за други нешта. Овој неписмен, незналечки фолклоризам на ситните партии зборува за отсуство на политичко-партиски идентитет и зборува за недостиг на знаење, некреативност и за неуспешен обид да се наметнат како фактор на мала врата, но го немаат клучот да ја отклучат. Оние што ги затвораа очите и молчеа кога се остваруваа националните права, денес, заостанати и со незнаење, откако преспаа 15 години, се обидуваат да продаваат магла. Патот на земјата кон НАТО и ЕУ не смее на никој начин да биде попречен, а најмалку за сувопарна пропаганда – вели Груби во изјава за „Порталб“.

И од БЕСА на Африм Гаши велат дека е битно да се усвои Преспанскиот договор и, според нив, сега нема поголем интерес за Албанците од влезот на Македонија во НАТО.

Весел Мемеди од НДП, вели дека не треба процесот на спроведување на Договорот од Преспа да се условува со други амандмани, оти тоа би им служело на деструктивните сили во земјава и во регионот.

И од ДПА велат дека не е променет нивниот став дека ќе го поддржат Договорот од Преспа, пишува „Порталб“.


Бушати ги повика Албанците кои живеат во Македонија да го поддржат референдумот


Скопје, 13 септември, 2018 - 15:06 (META) 

Апелирам на сите граѓани на вашата земја, особено на Албанците кои живеат тука да дадат поддршка на историскиот Преспански договор, затоа што тој има исклучително значење за демократската стабилност на регионот, изјави денеска шефот на албанската дипломатија Дитмир Бушати на прес-конференцијата со неговиот македонски колега Никола Димитров.

– Сите се согласуваме дека Албанците кои живеат во Македонија ќе бидат огромни поддржувачи на процесите кои течат и уште еднаш сакам да апелирам да излезат масовно да учествуваат во изградбата на иднината и на подобар живот тука. Во оваа насока ќе продолжиме блиско да соработуваме со цел да создадеме што подобра и поинклузивна средина – рече Бушати.

Во однос на македонското малцинство во Албанија, Бушати рече дека се направени чекори напред со новиот Закон за малцинствата, со што, истакна тој, македонското малцинство е признаено како едно од малцинствата што составуваат поширок мозаик на малцинства во Албанија.

Во однос на положбата на Албанците во Македонија, Бушати рече оти тука има подобрена реалност, подобрена клима на соработка и на разбирање и подобра претставеност на Албанците, пред се, како што рече, преку позицијата претседател на Собранието и вицепремиер за европски прашања. Додаде оти очекува Законот за јазици што побрзо да стапи во сила.

Ја повтори поддршката што Албанија како членка на НАТО и ја дава на Македонија, и оти 2019 е многу значајна година за Македонија и ЕУ.


Ахмети: Надвор од НАТО, Македонија тешко ќе опстои


Тирана, 12 септември, 2018 - 10:18 (META) 

Референдумот на 30 септември е печат кој му дава вредност на мирот, стабилноста и ќе се затвори едно поглавје која трае веќе 25 години. Ова е референдум за НАТО, изјави претседателот на ДУИ, Али Ахмети во емисијата „Опинион“ на тиранската телевизија „Клан“.

Тој вели дека Албанците се во својата земја, во нивната држава и затоа ќе гласаат „за“ Договорот со Грција.

Лидерот на ДУИ исто така вели дека треба да се има разбирање за другиот во заедничката земја.

– Додека живееме во една држава, ние треба да внимаваме за историјата и идентитетот на другиот. Јас не сум за реваншизам. Ние треба да упатиме порака дека не сакаме да владееме, или да бидеме арбитри на други проблеми. Сега е време за зачленување во НАТО и почеток на преговорите во ЕУ – истакна Ахмети.

Идентитетот на нашите сограѓани Македонци и самата Македонија, додава Ахмети, тешко дека ќе опстојат надвор од НАТО и ЕУ.

– И Македонците се уморни од блокирањето на интеграцијата на земјата, така што атмосферата генерално е позитивна – истакна Ахмети.


Мета ги повика Албанците во Македонија да го поддржат референдумот


Тирана, 29 август, 2018 - 16:32 (META) 

Претседателот на Албанија, Илир Мета во интервју за „Албаниaн Дејли Њуз“, зборувајќи за Македонија истакна дека постигнатиот договор помеѓу Скопје и Атина за името, отвора нова перспектива кон членството на Македонија во НАТО и интеграцијата во ЕУ, како и директно придонесува за мирот, безбедноста и стабилноста во регионот.

– Верувам и истовремено ги повикувам сите Албанци од Македонија да учествуваат на референдумот на 30 септември и да гласат „за“ договорот, за отворање на ново поглавје, не само во интерес на интеграцијата на Македонија, туку и во корист на иднината на земјата – порача албанскиот претседател.


Села ќе бара во Уставот и во пасошите да стои „Албанци/граѓани на Северна Македонија“


Скопје, 24 јули, 2018 - 13:59 (META) 

Претседателот на Алијансата за Албанците, Зијадин Села, на прес-конференција во Собранието порача дека го поддржува договорот со Грција, но дека има забелешки. Тој рече дека при менувањето на Уставот, неговата партија ќе бара во пасошите и во Уставот за македонските Албанци да стои „Албанци/граѓани на Северна Македонија“.

Села рече дека е незадоволен од постигнатото на лидерските средби и дека албанскиот опозициски блок не бил соодветно застапен.

– Во делот на патните исправи каде стои „Македонци/ граѓани на Северна Македонија„, ќе бараме за Македонците да биде така, а за Албанците да стои „Албанци/ граѓани на Северна Македонија“ и така за сите народи кои се набројани во преамбулата. Преку процесот на уставни измени ќе бараме во преамбулата сите народи да се чувствуваат еднакви. Треба да покажеме европски ставови. Носител на суверенитетот се сите народи и граѓани и тоа треба да се отсликува – рече Села.

Дополнително, Алијансата за Албанците ќе бара во преамбулата на Уставот за службените јазици и да се внесе албанскиот јазик.


Денеска нова лидерска средба во Клубот на пратеници во 12 часот, но во потесен состав


Скопје, 19 јули, 2018 - 9:29 (META) 

Премиерот Зоран Заева синоќа најави нова лидерска средба денеска напладне во Клубот на пратеници, но овој пат на четирите најголеми политички партии, така како што бараше лидерот на ВМРО-ДПМНЕ, Христијан Мицкоски, кој синоќа ја напушти лидерска средба еден час по почнувањето.

– Сите што останавме на лидерската средба сме за успешен референдум, а однесувањето на Мицкоски демонстрирано во име на ВМРО-ДПМНЕ е несериозно, неодгороно и навредливо кон сите политички субјејктки и граѓаните на Македонија – изјави Заев по лидерската средба во клубот на пратениците.

Тој додаде дека Мицкоски денеска ќе може да се изјасни дали е за НАТО и ЕУ, како и дали е за тоа граѓаните да одлучуваат за иднината на Македонија.

– Ако Мицкоски е за НАТО и ЕУ требаше да седи со сите лидери тука и да носи одлуки за иднината на државата, но одлучи да избега од ова историски најважно прашање за македонската иднина – потенцираше Заев.

Мицкоски бара на денешната средба да бидат СДСМ, ДУИ, ВМРО-ДПМНЕ и најголемата опозициска партија на Албанците, за кои не се знае кој ќе ги претставува.

На синоќешната лидерска присуствуваа премиерот и лидер на СДСМ Зоран Заев со Радмила Шекеринска, Али Ахмети и Бујар Османи од ДУИ, Зијадин Села и Арбен Таравари од Алијанса за Албанците, Мендух Тачи и Имер Алиу од ДПА, Африм Гаши од едното и Билал Касами и Фадил Зендели од другото крило на Беса, Горан Милевски и Дуфе Кукоски од  ЛДП, Лилјана Поповска и Маја Морачанин од ДОМ, Љупчо Димовски и Владанка Авировиќ од Социјалистичка партија, како и Тито Петковски и Горан Мисовски од НСДП.


Ахмети: Албанците се на нивното место и во нивната држава


Скопје, 29 јуни, 2018 - 9:34 (META) 

Во Република Македонија, живеат Македонци, Албанци, Турци, Срби, Власи… Ние сме дел од Уставот на РМ и нема никаква дилема дека Албанците се во нивното место и во нивната држава, рече вчера претседателот на ДУИ, Али Ахмети, во емисијата „Патот кон“ на Алсат-М, одговарајќи на новинарско прашање, дали името Република Северна Македонија го одразува и идентитетот на сите Албанци.

Тој појасни дека имал серија средби со грчките власти, вклучувајќи ги и министрите за внатрешни работи на Грција во изминатите 10 години и дека инсистирал на барањето да не прекинат односите меѓу Македонија и Грција и да не се продлабочи јазот, туку да се изнајдат заеднички позиции и дека ги убедил оти нема никаков проект за промена на границите во регионот.


Ахмети: Концептот на поделби е штетен за Албанците


Приштина, 14 јуни, 2018 - 9:37 (META) 

Лидерот на Демократската унија за интеграција (ДУИ), Али Ахмети порача дека нема да има национално обединување на Албанците во една држава, туку дека тие треба да ги јакнат државите во кои живеат и заедно да се интегрираат во Европската унија, јавува дописникот на МИА од Приштина.

Ахмети синоќа во емисијата „Пресинг“ на приштинската телевизија „Т7“ рече дека „нема Албанец кој не ја сака Албанија и кој не сака национално обединување“, но дека работите се многу сменети од 90-тите години на минатиот век.

– Албанците сега треба да тежнеат да се обединат во Европа, со интегрирањето на Албанија, Косово, Македонија и Црна Гора во Европската унија. Друга алтернатива нема. Ниту за Албанците, ниту за нашите соседи – рече Ахмети.

Говорејќи за идеите за територијални поделби, лидерот на ДУИ рече дека „концептот на поделби е штетен за Албанците“.

– Во прв ред, немаш како да делиш. Не можеш да ги делиш границите ниту со конец, ниту се лењир – рече Ахмети.

За таканаречената „Голема Албанија“, лидерот на ДУИ вели дека тој концепт на Албанците им го импутираат другите, пренесува МИА.


Жбогар: Очекуваме Законот за јазиците да стапи на сила и реформите да продолжат


Гостивар, 19 март, 2018 - 13:38 (META) 

Донесувањето на Законот за употреба на јазиците ќе ги подобри односите помеѓу зедниците и ќе ја врати земјата на реформската агенда, одговори евроамбасадорот Самуел Жбогар на новинарско прашање за овој закон.

На новинарско прашање како го коментира тоа што Иванов не го потпишал Указот за Законот, Жбогар вели „ние очекувме Законот да стапи на сила и земјата да се фокусира на рефорската агенда“.

Тој додаде дека меѓуетничките односи во мултиетничките општества треба константно да бидат негувани и да растат, со што се подобрува климата на соживотот во едно општество. Објасни дека во ЕУ се оптимисти во спроведувањето на законот.

– Јас разбирам дека законот за јазиците е важен за Албанците и тие го гледаат како последниот чекор, кој произлегува од Охридскиот рамковен договор. Донесувањето на овој закон за Албанците е важен, бидејќи така се чувствуваат повеќе ценети и прифатени во општеството и самата земја –  рече Жбогар.

Според него, во случај кога правата на немнозинската заедница се подобруваат, тоа не би требало да им пречи или да се меша со правата на мнозинската заедница.

– Мислам дека мнозинската заедница не би требало да се почувствува дека на кој било начин нејзините права се загрозени. Чувствувам дека кај мнозинската заедница постои таков страв. Ние како ЕУ одблиску го следевме донесувањето на законот за јазиците и очекуваме тој да биде испратен до Венецијанската комисија, како впрочем и беше наведено во планот 3-6-9. Се надеваме дека овој закон ќе започне со имплементација и целосно почитување на европските стандарди и европските позитивни практики. Секако, очекуваме и дека имплементацијата ќе биде почитувана од сите чинители во општеството и во близок дијалог – додаде Жбогар.

Тој денеска во Гостивар присуствуваше на потпшувањето на меморандумот за соработка – прв во серијата – меѓу Проектот за унапредување на иновативниот туризам (СТЕП) и општината Гостивар.

Проектот партнерски го спроведуваат Фондацијата за интернет и општество „Метаморфозис“ со Заедницата за развој на полошкиот регион и Советот за Елбасан, a e финансиран од Програмата за меѓугранична соработка на Европската Унија (ИПА 2).


Заев: Одлуката на Иванов е флагрантно кршење на Уставот


Скопје, 16 март, 2018 - 12:21 (META) 

Законот за употреба на јазиците нема ништо да се промени во Македонија ниту ќе ја наруши нејзината заедничка иднина. Апелирам да се пушти законот да живее, да се почитуваат институциите, а Уставниот суд и Венецијанската комисија да се изјаснат по него, изјави премиерот Зоран Заев.

– Да го оставиме законот за употребата на јазиците да го види денот. Мене ми е жал што претседателот на државата одлучи буквално да не го почитува Уставот и објави по втор пат дека нема да го потпише законот. Тоа не е добро, тоа е флагрантно кршење на Уставот на Македонија и секако институциите немаат право да дозволат тоа да се случи. Но, истовремено тоа за мене значи кукавичлук, да не се дозволи законот да живее заради тоа што ако се пушти законот да заживее конечно ќе ја реализираме последната правна обврска од Охридскиот договор. И сите ќе видат дека нема да има ниту Тиранска агенда во Македонија, дека Македонија нема да биде држава на Албанците или не знам кои од малцинските заедници во државата – рече Заев одговарајќи на новинарски прашања на маргините на Форумот за владеење на правото во ЈИЕ.

Тој истакна дека овој закон не е изгласан скришно и заткулисно како што порано се правело, туку девет месеци била отворена дебатата.

– Ајде сите да се фокусираме и да му дадеме шанса на ова наше мултиетничко општество каде што сите граѓани ќе бидат еднакви согласно Уставот и ќе ги користат своите права. Со овој закон дадено е едно ускратено прво на граѓаните од помалкубројните заедници – вели премиерот.

Според него, законот треба да се потпише, да се достави до Уставниот суд и Венецијанската комисија, но и јасно да се каже дека во Штип, во Гевгелија, во Струмица не мора никој да зборува албански јазик.

– Убаво е граѓаните Албанци да си го користат својот мајчин јазик во општините каде што се повеќе од 20 отсто, Ромите во единствената ромска општина во Европа да го користат својот јазик, Турците во Гостивар, Србите во Куманово итн. Апсолутно незаборавајќи дека официјален службен јазик во Република Македонија е македонскиот јазик и притоа овој закон дополнително го прецизира и начинот и употребата на македонскиот јазик за кое што беше отворена дилема и прашање во државата – додаде Заев.