!На 1 февруари 2017 година, заврши промотивниот период на слободно користење на содржините на „Мета“. Во периодот што претстои го воведуваме новиот систем за пристап и за претплата. За начинот на пристап и за претплатата ќе информираме дополнително

Вечерва во Струга, концерт на вокалниот ансамбл „Симбиоза“


Струга, 13 април, 2017 - 11:34 (META) 

Вечерва, од 20 часот, во холот при Центарот за култура „Браќа Миладиновци“ во Струга, ќе се одржи хорски концерт на вокалниот ансамбл „Симбиоза“.

„Симбиоза“ е мултиетнички, мултикултурен и образовен проект кој произлегува од секојдневната соработка на двајца млади просветни работници, Дамјан Темков (композитор) и Бехар Весели (диригент).

Проектот „Симбиоза“ досега има реализирано шест концерти на реномирани фестивали.

Овој проект, иако најавен само како образовен, има многу поширока мултиетничка, спојувачка димензија, за што сведочи и самата програма.

Публиката, меѓу другото, ќе може да ги доживее македонските изворни песни „Параходот“, „Не си го продавај Кољо“ на албански јазик.

Влезот за концертот е бесплатен.


Програмата на СДСМ е рамка за доградување, оцени Беса


Скопје, 11 март, 2017 - 12:27 (META) 

Програмата што вчера ја претстави СДСМ е рамка што треба да се догради за да биде сеопфатна и за прашањата кои се однесуваат на Албанците како втор поголем народ во Македонија, соопшти денеска Движењето Беса.

Oд Беса, сепак, не сакаат да ја коментираат програмата на СДСМ, бидејќи мандатот за формирање влада сè уште не е даден.

„Сè уште е не е деблокирано доделувањето мандат на претседателот нa СДСМ, процес кој создава можност за почнување на преговорите за создавање влада. Затоа дотогаш нема да коментираме, а откако ќе му биде доделен мандатот, ќе се изјасниме со забелешки и со сугестии, сè со цел да се постигне една сеопфатна владина програма, секако, со надеж дека тоа ќе се случи“, велат од Беса и додаваат дека понатаму имаат разлики со СДСМ во однос на толкување на уставните одредби кои се однесуваат на употребата на албанскиот јазик.


ВМРО-ДПМНЕ: Шекеринска подготвена да ги продаде и нацијата и државниот интерес


Скопје, 8 март, 2017 - 19:05 (META) 

Жедна и гладна да се фати за фотелја, Радмила Шекеринска е подготвена е да ги продаде и нацијата и државниот интерес, реагираше ВМРО-ДПМНЕ на денешната прес-конференција на заменик-претседателката на СДСМ.

Партијата вели дека прифаќањето на албанската платформа од страна на СДСМ и сокривањето од јавноста на договореното со трите албански партии е поради тоа што договорот е против интересите на Македонците и на државата.

„Народот е мудар и сфаќа дека Шекеринска и СДСМ го кријат договорот затоа што тој содржи елементи кои се спротивни на националните и државни интереси. Ниедна празна изјава на Радмила Шекеринска нема да ја намали загриженоста на граѓаните за иднината на Република Македонија. Радмила Шекеринска го прави и денеска тоа што најдобро знае и го практикува две и пол децении, да ја манипулира јавноста за политичка корист“, реагира ВМРО-ДПМНЕ.


ВМРО-ДПМНЕ: СДСМ сака да ги осуди партизаните и борците од АСНОМ за нивната борба


Скопје, 7 март, 2017 - 9:45 (META) 

„Усвојување резолуција во Собранието на Република Македонија со која се осудува геноцидот врз албанскиот народ во Македонија во периодот 1912-1956 година. Ова е точка од платформата преку која СДСМ сака да ги осуди борците од АСНОМ и партизаните за нивната борба за слободна држава“, се вели во редовното утринско соопштение на ВМРО-ДПМНЕ.

Во него се додава дека „граѓаните не се должни да ги трпат штетите што ги нанесуваат Зоран Заев и СДСМ“.

– Граѓаните на изборите ниту гласаа за платформа од друга држава, ниту гласаа за формирање тиранска влада во Македонија. Граѓаните гласаа за проекти и за економски просперитет. Зоран Заев и СДСМ се уценети заради нивните криминали да прифатат сè што ќе им биде сервирано за да си ја спасат кожата, притоа заобиколувајќи ја волјата на граѓаните – се додава во соопштението на ВМРО-ДПМНЕ.

Од партијата велат дека „новата тиранска влада на чело со уценетите Заев и СДСМ ќе има единствено улога против волјата на граѓаните да го прогласат албанскиот јазик и неговото писмо за официјален државен јазик, заедно со македонскиот и со неговото кирилско писмо“.

– Тие немаат проблем ниту да ги променат името на државата, химната, знамето, банкнотите, униформите, написите. Доколку Зоран Заев и СДСМ сметаат дека платформата од Тирана е добра за Македонија, ВМРО-ДПМНЕ ги охрабрува да се согласат да распишат парламентарни избори и да им ја понудат на граѓаните на Македонија да ја изгласаат – додаваат од партијата.


Рама: Без Албанците нема Македонија, драг претседателе


Тирана, 1 март, 2017 - 23:07 (META) 

„Господине Иванов, албанскиот јазик не ви е непријател, тоа e јазик на државотворен народ во Македонија. Без Албанците, нема Македонија, драг претседателе“, се вели во реакцијата на албанскиот премиер Еди Рама, по повод одлуката на претседателот Ѓорге Иванов да не му го додели мандатот на лидерот на СДСМ, Зоран Заев, за да формира влада.

Рама ја објави реакцијата на својот профил на „Фејсбук“.

Иванов, во образложението за недоделување на мандатот, меѓу другото, рече дека „со преговарање за постизборна платформа на туѓа држава, се загрозуваат унитарноста и суверенитетот на државата“.


Битолски Широк сокак излепен со лажни банкноти на албански јазик


Битола, 28 февруари, 2017 - 10:48 (META) 

Битолски Широк сокак утрово беше преплавен со лажни банкноти од 1.000 денари отпечатени на албански јазик, како и со летоци на кои пишува „Казна од 5.000 евра за секој што не знае албански јазик“.

Акцијата најверојатно се случила доцна во ноќта, летоците и лажните банкноти се расфрлани насекаде, па вработените од Јавното претрпијатие „Комуналец“ со млазови вода се обидуваа да ги одлепат од гранитните плочки.

– Како ги залепиле се чудам, ниту метла ниту вода не ги вади – се пожали една од вработените во ЈП „Комуналец“ која утрово имаше задача да го исчисти Широк сокак.

Акцијата се совпаѓа со најавите на социјалните мрежи за нов марш по Широк сокак против воведувањето двојазичност на целата територија во државата.

– Црвената линија ја поминавте, црвено-жолтата, не! Под овој слоган утре во 17 часот од Плоштад Магнолија до Музеј во Битола ќе се одржи мирен марш – стои во пораката што се шири на социјалните мрежи.

Битолчани герила-акциите со лажни банкноти ги практикуваат од минатата година, како еден од начините за протест и за отпор поради актуелните случувања во државата и во градот.

Лани битолчани отпечатија пари со ликот на градоначалникот Владимир Талески, во вредност од 360.000 евра и ги фрлија банкнотите врз него за време на јавен настан.


ДУИ даде зелено светло за предлогот на СДСМ за употребата на албанскиот јазик


Тетово, 23 февруари, 2017 - 10:27 (META) 

Централното претседателство на ДУИ даде зелено светло за предлог-одлуката на СДСМ околу употребата на албанскиот јазик, останува уште работните групи да испеглаат мали разлики кои не се толку важни околу овој предлог-закон, информира портпаролот на ДУИ, Бујар Османи, по завршувањето на средбата на претседателството на партијата, кое синоќа се состана во седиштето на партијата во Мала Речица.

Утре се очекува лидерот Али Ахмети да го свика централното претседателство на партијата и да се разговара за другите точки кои се услов за ДУИ да му ги даде потписите на СДСМ за состав на нова влада.

Другите точки се однесуваат на работата на Специјалното јавно обвинителство, евроатлантските интеграции, распределба на буџетот, за кои лидерите на двете партии претходно истакнаа дека нема разлики и дека се согласуваат околу нив.


Османи: Официјалната употреба на албанскиот јазик е услов без кој не може да се преговара


Тетово, 20 февруари, 2017 - 18:44 (META) 

Во седиштето на ДУИ во Мала Речица, доцна попладнево почна средба меѓу лидерот на ДУИ, Али Ахмети, и потпретседателите на партијата. На средбата на која учествува и дел од тесното претседателство, според портпаролот Бујар Османи, се разговара за тековни прашања за добивање на мандатот за составот на нова влада, одлуката што треба да ја донесе централното претседателство на партијата.

Ова највисоко партиско тело, како што рече Османи, ќе биде свикано кога работните групи на партијата ќе имаат усогласени материјали, по однос на прашањата и на предлозите што ДУИ ги постави како услови без кои не може да се преговара.

– Еден од тие услови е официјална употреба на албанскиот јазик, предлог кој е доставен од ДУИ, и тој не е почетна позиција за преговори, туку е услов без кој не се може. Тој текст не може да биде предмет на преговори или да се стесни во ниту една буква, тоа е оптимумот што го предвидуваат Рамковниот договор и Уставот, и во ниту еден дел не излегува од Уставот, но го решава ова прашање кое не е решено со Рамковниот договор. Значи, текстот не е предмет на преговори, туку се работи за прифаќање или неприфаќање – рече Османи.

Тој рече дека за точките од албанската платформа кои предвидуваат промена на Уставот, потребно е почнување на, како што го нарече, македонско-албански дијалог.

– Платформата која беше донесена, беше постигнување на внатреалбански консензус, за да се почне македонско-албански дијалог. Промената на Уставот бара да се вклучат сите парламентарни партии, затоа што за да се промени Уставот, потребно е двотретинско мнозинство – вели Османи.

Тој додаде дека вечерва нема да се донесе никаква одлука и не прецизираше кога партијата ќе го свика централното претседателство.


Албанските партии ќе формираат тело за Законот за употреба на јазиците


Скопје, 18 февруари, 2017 - 16:08 (META) 

Албанските парламентарни политички партии во рок од три дена ќе формираат тело кое ќе направи правилник за функционирањето на албанските политички партии и ќе состави предлог Закон за употреба на јазиците кој ќе ги задоволува потребите на Албациите.

Ова се двата заклучоци кои ги донеле албанските политички партии денеска на средбата во хотел „Арка“, соопшти лидерот на Движењето за реформи на ДПА, Зијадин Села.

-На средбата се дебатираше и дискутираше во врска со заедничката декларација потпишана од страна на албанските парламентарни политички партии. Требаше да бидат присутни сите партии и ги повикувам тие да ја свикаат наредната средба. Од средбата донесени се два заклучоци. Првиот е во рок од три дена албанските парламентарни политички партии да предложат по двајца претставници за да направиме правилник за функционирањето на албанските политички партии како тело. Под два, ќе правиме хармонизација на нашите ставови околу предлог Законот за употреба на јазиците кое ќе го предложи ова тело и кој ќе ги задоволува потребите на Албациите – рече Села.

Тој повтори дека потписите на пратениците на Алијансата за Албанците за добивање на мандат ќе ги дадат на СДСМ, но тоа дека не значи дека тие ќе бидат потписи за формирање на влада.

Зборувајќи за мирот, тој рече дека македонските партии и Македонците се тие кои што јавно се заканувале и штетеле на мирот и на стабилноста во државата.

На средбата, освен Села, присуствува и Гзим Острени, претседател на Унитети, Весел Мемеди од Националната демократска преродба, претседателот на ДУИ Али Ахмети и шефот на неговиот кабинет Артан Груби.

Али Ахмети ја напушти средбата без да даде изјава за новинарите.

Лидерот на Беса, Билал Касами не присуствуваше на средбата, а партијата преку соопштение истакна дека „не гледа никаква обврска да учествува на состаноци кои не се во духот на Заедничката Декларација на албанските парти во Македонија“.


Села: Досегашните предлози за употреба на албанскиот јазик за нас се неприфатливи


Тетово, 17 февруари, 2017 - 18:52 (META) 

Предлозите на СДСМ за употреба на албанскиот јазик, за кои се зборува во јавноста, се неприфатливи за Зијадин Села. Претседателот на Движењето за реформи на ДПА не сакаше да открие за какви предлози станува збор, додавајќи дека неговата партија останува на ставот за целосно официјализирање на албанскиот јазик.

– Стоиме на ставот дека нема да очекуваме некој да си игра со нашиот јазик, да се зема постоечкиот закон и да се менуваат членовите. Треба закон кој ќе биде во склад со Уставот. Бидејќи Уставот дозволува употреба на албанскиот јазик во сите институции на државата, ние ќе предложиме закон што ќе го официјализира албанскиот јазик во сите институции на државата. Јас не знам кој предлагал и што предлагал, но тие предлози кои се слушаат во јавноста, за нас се неприфатливи – изјави Села доцна попладнево, пред да започне Централното претседателство на Движењето за реформи на ДПА.

На состанокот на претседателството вечерва, како што рече Села, ќе се информираат членовите за преговорите за состав на новата влада, и за средбата која Алијансата за Албанците ја имаше  со потпретседателите на ДУИ. Ќе се разговара и за организирање на партијата во пресрет на локалните избори.

Утре, како што рече Села, на иницијатива на Алијансата за Албанците, ќе се одржи заедничка средба на политичките партии на Албанците, на која ќе се разгледаат сите опции околу можноста за формирање на новата влада.

Средбата ќе се одржи утре од 13 часот во хотел Арка во Скопје.