Уапсени двајца албански државјани со 38 килограми марихуана кај Меџитлија


Скопје, 4 декември, 2017 - 12:44 (META) 

Екипа на граничната полиција викендов, во близина на преминот Меџитлија, привела двајца албански државјани кои се обиделе да прошверцуваат 38 килограми марихуана, преку Македонија во Грција, соопшти денеска МВР.

Според полиција, станува збор за Р.А. (45) и Б.Г. (33), и двајцата од Република Албанија, против кои е поднесена кривична пријава за неовластено производство и пуштање во промет на наркотични дроги, психотропни супстанци и прекурсори. Судија на претходна постапка од битолскиот суд, на барање на Основното јавно обвинителство, на осомничените им одредил притвор од 30 дена. Третото лице кое било дел од групата, според МВР, успеало да ѝ побегне на полицијата.

Според истрагата на МВР, осомничените ја набавиле марихуаната во Албанија и откако ја препакувале, тргнале преку Македонија да ја транспортираат во Грција.

Ноќта меѓу саботата и неделата, екипа од полициската станица за граничен надзор Меџитлија, ги забележала тројцата албански државјани во близина на напуштената караула Лажец, но по дадената наредба од полицијата да застанат, тие почнале да бегаат.

По кратко време Р.А. и Б.Г. биле фатени во близина на граничната линија, со две торби со марихуана, додека третото лице успеало да избега.

„Од извршената анализа утврдено е дека во торбите има 38 најлонски пакувања со марихуана со вкупна нето-маса од 38,1 килограми. Во торбите имало и 201 грам хашиш и околу 350 милилитри хашишова смола“, стои во соопштението на МВР.


Царината заплени 29 килограми марихуана на граничниот премин Блаце


Скопје, 1 ноември, 2016 - 14:49 (META) 

Царинските екипи на граничниот премин Блаце вчера во возило во кое се превезувале четворица албански државјани, пронашле и заплениле 29 килограми марихуана, соопшти денеска Царинската управа.

Како што информираат оттаму, возачот на автомобилот 26-годишниот Б.Г., и тројцата негови сопатници, синоќа, околу 22.30 часот, се пријавиле за влез во земјава. Цариниците го селектирале возилото за детален перглед и под подот откриле специјално направен бункер, наполнет со 29 пакетчиња со марихуана.

„Дрогата требало да биде однесена до Германија, а нејзината цена на западно-европскиот пазар би достигнала вредност од околу 120.000 евра“, велат од царината.

Случајот бил предаден на инспекторите од одделението за истраги на Царинската управа, кои по собирањето на сите докази, до надлежното обвинителство против возачот ќе поднесат кривична паријава за неовластено производство и пуштање во промет на наркотични дроги, психотропни супстанции и прекурсори.

Од Цариската управа информираат дека во текот на минатиот месец нивните службеници во четири одвоени случаи заплениле вкупно 65 килограми марихуана.