Еурактив: Брисел очекува конкретни резултати од Македонија и од Грција за името


Брисел, 5 јануари, 2018 - 13:45 (META) 

Европската комисија (ЕК) ги поздравува активностите на македонската Влада за решавање на 25-годишниот спор за името го Грција и очекува „конкретни резултати“ во врска со ова прашање, изјавил неименуван функционер на ЕК за „Еурактив“, независната паневропска мрежа на медиуми специјализирана за политиките на ЕУ.

Според претставникот на ЕК, одржувањето на добрите односи меѓу соседите, вклучувајќи го и договореното и заемно прифатливо решение за името, под покровителство на Обединетите нации, останува од суштинско значење.

– Во таа насока, ги поздравуваме чекорите на владата за вклучувањето во разговорите со нивните колеги во Грција за зајакнување на добрососедските односи и се надеваме дека ова ќе води кон понатамошни конкретни резултати – вели претставникот на ЕК.

Во анализата на „Еурактив“ се посочува „оптимизмот што владее во левичарските влади во Скопје и Атина за решавање на прашањето кое е пречка за влезот на Македонија во Европската Унија и во НАТО“.


Заев учествуваше на дипломатскиот прием организиран од Трамп


Њујорк, 21 септември, 2017 - 11:11 (META) 

Премиерот Зоран Заев учествуваше на дипломатскиот прием организиран од претседателот на Соединетите Американски Држави, Доналд Трамп, во рамките на 72. Генерално собрание на Обединетите нации во Њујорк.

„Дипломатскиот прием организиран од претседателот на САД на ГС на ОН е можност за зацврстување на пријателствата и за идни соработки во интерес на нашите држави“, напиша Заев на „Твитер“.

Премиерот Заев, во рамките на активностите на Генералното собрание на ОН денеска ќе има билатерална средба со премиерот на Беглија, Чарлс Мишел, соопштија од владината прес-служба.

Заев ќе присуствува и на приемот по повод кандидатурата на Германија во Советот за безбедност на ОН, за периодот 2019-2020 година, што, во име на канцеларката Ангела Меркел, го организира министерот за надворешни работи на Германија Зигмар Габриел.

„Во текот на денот предвидени се и други средби и разговори со влијателни гости на Генералното собрание на ОН, како и со американски политичари и тинк-тенк експерти од сферата на надворешните политики и меѓународните односи на САД“, стои во соопштението на Владата.


Владата ќе одржи седница на која ќе расправа за штетите во поплавените подрачја во Порој


Скопје, 7 јуни, 2017 - 17:56 (META) 

Владата денеска ќе ја одржи третата седница со почеток во 18.30 часот.

На седницата ќе се расправа за преземање соодветни мерки и активности за заштита на граѓаните од настанатите штети во поплавените подрачја во Порој, Тетовско.


„Гардијан“: Русија една деценија работела на оддалечување на Македонија од НАТО


Лондон, 4 јуни, 2017 - 22:52 (META) 

Руски шпиони и дипломати речиси една деценија работеле на ширење пропаганда и на провоцирање раздор во Македонија, како дел од пошироките напори на Кремљ да го зголеми своето влијание во земјите од поранешна Југославија и да го спречи нивното членство во НАТО, како и да ги држи подалеку од западното влијание, пишува британскиот весник „Гардијан“.

Овие активности почнале во 2008 година, пишува весникот, повикувајќи се на класифицирани документи од македонските тајни служби, до кои дошла Мрежата за известување за организиран криминал и корупција („Нова ТВ“, Српската мрежа за истражување кримнал и корупција „Крик“, во партнерство со британскиот весник „Гардијан“).

Сознанијата од документите ги покажуваат и напорите на српското разузнавање за поддршка на „антизападните и на проруските националисти во Македонија“.

„Со употреба на сите техники и методологии на таканаречената мека моќ, како дел од стратегијата на Руската Федерација на Балканот, целта е изолација на земјата (Македонија) од влијанијата на Западот“, било наведено во еден од документите.

Според еден од извештаите, подготвен на почетокот на годинава за шефот на Управата за безбедност и контраразузнавање, Владимир Атанасовски, било наведено дека во последните девет години Македонија е „под силна субверзивна пропаганда и разузнавачки активности спроведувани преку Амбасадата на Руската Федерација“, пишува „Гардијан“. Почетокот на руските активности во Македонија коинцидира со уназадувањето на македонските напори за приклучување кон НАТО во 2008 година, кога Грција стави вето поради долгогодишниот спор за името, забележува британскиот весник.

Разузнавачките активности на Москва биле спроведувани од амбасадата во Скопје, преку тројца агенти на руското надворешно разузнавање (СВР), а водени од канцеларијата на СВР во Белград, како и преку четворица воени разузнавачи координирани преку Софија, Бугарија, се наведува во материјалите.

Во еден од документите било наведено дека руските агенти работеле и на регрутирање на сегашни и на поранешни припадници на македонската армија и на еден министер за внатрешни работи за да креираат „критична маса од воено обучени лица кои во одреден важен политички момент или ситуациија би биле корисни за постигнување на руските интереси“.

Агентите преку парични фондови се обиделе да влијаат и врз македонски, но и врз медиуми на албански јазик во Македонија за „да шират информации и дезинформации за поддршка на руските политики“.


Голем одрон го затрупа патот кон тетовско Бањиче


Тетово, 28 април, 2017 - 13:26 (META) 

Вчера попладне на патот кој води кон рекреативното место Бањиче во Тетовско, наспроти објектот на хидроцентралата на реката Пена, паднал голем одрон од земја и од камења.

Според Секторот за сообраќај и патишта при Општина Тетово, одронот за неколку часа е отстранет, но оттаму апелираат овој патен правец да не се користи, освен во случај на голема потреба, затоа што сè уште постои ризик да се појават свлечишта.

Екипи постојано го контролираат овој патен правец сè додека состојбата не се стабилизира. Во меѓувреме, надлежните вршат проценки и утврдуваат на кој начин и со какви градежни активности би било најдобро и најбрзо да се сопрат ерозивните процеси на земјата над овој патен правец.

Патниот правец кон рекреативното место Бањиче почна да се реконструира како дел од проектот за реконструцкија на горниот тек на реката Пена.


Лажна дојава за бомба во Основен суд Тетово ги вознемири тетовци


Тетово, 12 април, 2017 - 16:21 (META) 

Лажна дојава за бомба денеска ги вознемири вработените во Основен суд Тетово. Дојавата била пренесена преку писмо со назнака „ОВК“, оставена на подот од една адвокатска канцеларија, лоцирана на само неколку метри од зградата на судот.

„На 13 април ќе се бомбардира судот во Тетово, големa количинa експлозија има внатре, доста игравте со народот, соопштение ОВК“, гласела пораката напишана на кирилично писмо.

За случајот веднаш бил известен јавен обвинител, кој дал насоки за мерките и за активностите што треба да се преземат.

По целосното пребарување на внатрешноста на објектот и просторот наоколу, припадници на Единицата за антитероризам на МВР не пронашле никакви експлозивни или други средства.

Надлежните работат на расветлување на случајот. Основниот суд Тетово денеска работеше нормално.


Жените во Македонија дневно поминуваат по два часа во чистење и по два часа во забава


Скопје, 7 март, 2017 - 12:18 (META) 

Жените во Македонија сочинуваат 49,9 проценти од населението и во просек живеат 77,4 години, односно 3,9 години подолго од мажите, објави Државниот завод за статистика по повод 8 Март – Меѓународниот ден на жената.

Од вкупниот број вработени жени, кој во 2015 година изнесувал 282.078 лица, 76,3 проценти се вработени во деловни субјекти во приватна сопственост.

Во 2015 година, бројот на дипломирани жени изнесувал 4.831, односно 57,1 процент од вкупниот број на дипломирани студенти. Бројот на жени магистри на науки изнесува 1.290 или 58,6 проценти од вкупниот број на магистри, а жени доктори на науки има 143.

Во домаќинствата кои имаат деца, жените просечно дневно поминуваат по 1 час и 57 минути во нивно згрижување. Во гледање телевизија, жените просечно поминуваат по 1 час и 50 минути.

Жените во урбаните средини на забава и за култура поминуваат просечно дневно по 2 часа и 16 минути, што е двојно повеќе од жените во руралните средини, односно 1 час и 13 минути.

Во текот на денот, вработените жени поминуваат 15 проценти во слободни активности, а невработените – 21 процент.

Од сите домашни активности на жените, 16 проценти отпаѓаат на чистење на станот. Жените кои имаат домашни миленици, просечно дневно поминуваат со нив по 1 час и 41 минута.

Најчесто женско име е Марија.


ЦРМ бара „За заедничка Македонија“ да се погрижи за безбедноста на протестите


Скопје, 1 март, 2017 - 15:57 (META) 

Центарот за развој на медиуми (ЦРМ) најостро го осудува вчерашниот напад на новинарите на информативниот портал „А1он“ од страна на учесници на протестот „За заедничка Македонија“ и бара брзо откривање и санкционирање на сторителите на нападот.

– Колегите Александар Тодевски и Владимир Желчески совесно ја вршеле својата должност, да ја известуваат јавноста за настани од јавен интерес, и со ништо не заслужиле таков вандалски и кукавички чин. Нападот врз нив го сметаме за напад на целата новинарска професија – велат од ЦРМ.

Оттаму потсетуваат дека не треба да се заборави на одговорноста за настанот на организаторите на протестите, неформалната граѓанска иницијатива „За заедничка Македонија“, од која бараат сериозно да се погрижи за безбедноста за време на своите активности за да спречи повторување на вакви и слични инциденти, а на новинарите да им овозможи безбедно и непречено да работат.

– Пресудна е и улогата на политичарите, кои ги повикуваме да се воздржат од користење запалив говор и говор на омраза и да се однесуваат одговорно. Од медиумите бараме да се однесуваат професионално и да се воздржуваат од провокации, користење говор на омраза и поттикнување на етнички поделби и за настаните да известуваат објективно и непристрасно – додаваат од ЦРМ.

Центарот за развој на медиумите ја поддржува одлуката на повеќе медиуми да ги бојкотираат вечерашните протести и да не информираат за активностите на граѓанската иницијатива „За заедничка Македонија“, сè додека тие претставуваат безбедносен ризик и небезбедно окружување за новинарските екипи.


Повеќе од 4 милиони евра за мерки против загадувањето на воздухот во 2017 година


Скопје, 20 декември, 2016 - 13:15 (META) 

За 2017 година, предвидени се повеќе од 4 милиони евра за конкретни мерки и активности што ќе придонесат за намалување на загаденоста на амбиенталниот воздух во Скопје, се вели во соопштението на Град Скопје.

Оттаму информираат дека за подигнување на нови зелени површини и за посадување нови дрвја предвидени се 80 милиони денари, за изработка и за реализација на програми, планови и стратегии – 10 милиони денари, а за субвенции на граѓани за набавка на печки на пелети – 10 милиони денари.

Еден милион денари се предвидени и за извршување на разни мерења и за изработка за интегрирани Б-дозволи.

Како дополнителна мерка, од Град Скооје ја наведуваат и поддршката за одредени категории граѓани за почесто користење на сите форми на јавен и организиран превоз.

– За 2017 година, предвидени се околу 152 милиони денари или 2,5 милиони евра за субвенции и за финансиска поддршка за организиран превоз и за користење на јавниот превоз на ученици, студенти, повозрасни лица и лица со посебни потреби. Како една од мерките кои ќе се спроведат во иднина е и набавката на 50 електрични автобуси. Цената на еден ваков автобус се движи од 300.000 до 500.000 евра и нивната набавка ќе чини од 15 до 25 милиони евра. Средствата за овие автобуси би биле делумно покриени од буџетот на Град Скопје, а делумно од буџетот на Македонија – информираат од Град Скопје.


Утрово најзагадени се скопските населби Центар и Карпош


Скопје, 22 ноември, 2016 - 10:52 (META) 

Мерните станици на Министерството за животна средина и просторно планирање утрово измерија највисоки концентрации на честичките ПМ10 во Центар, односно 159,09 микрограми на еден кубен метар, во Карпош – 149,73 микрограми, Лисиче – 131,09 микрограми и во Гази Баба – 125,87 микрограми на еден кубен метар.

Неодамна, на регионалниот форум на програмата за поддршка на граѓанското општество „Цивика мобилитас“  беше истакнато дека политичките партии треба да понудат програми за заштита на животната средина, а потоа како активност да се спроведат за следните локални избори.

Учесниците на форумот предложија да се направи кратка предлог-политика за заштита на животната средина, која ќе се однесува на загадувањето на воздухот, управувањето со отпадот, урбанистичкото планирање и на спроведувањето акции.