Прилепскиот театар одбележа јубилеј во исчекување на нов објект


Прилеп, 19 февруари, 2019 - 16:32 (META) 

Народниот театар „Војдан Чернодрински“ – Прилеп синоќа со изведба на претставата „Пиреј“ по текст од Петре М. Андреевски, а во режија на Љупчо Ѓорѓиевски, ја одбележа 69-годишнината од постоењето на прилепскиот храм на Талија.

На истата сцена на која што досега се одиграни 370 премиери и преку 7.000 претстави, за приближно два милиона публика, по речиси седум децении креативниот и посветен ансамбл го одбележа скромно, но максимално професионално, како што доликува на врвни уметници и актери, својот јубилеј.

На истите штици бројни генерации актери, од кои дел не си меѓу живите,ја одиграа: „Солунски патрдии“, „Полковникот птица“, „Туѓо сакаме, свое не даваме“, „Колобан“, „Спиро Црне“, „Арсениј“ и други.

Прилепскиот театар низ децениите постоење бележи квалитативен развој. Тоа го докажа со кадровското освежување, со ангажманот на новата млада генерација актери, со која ансамблот веќе неколку години освојува бројни награди не само на домашните фестивали „Војдан Чернодрински“ и „Ристо Шишков“,туку и на меѓународните „Експонто“ во Љубљана, „МЕСС“ во Сараево, на „Фестивалот на актерот“ во Ниш со проектите: „Тапани во ноќта“, „Кавкаски круг со креда“,„Клетници“…

Главната заложба на новото раководство е нов храм на Талија, со изградба на нов објект или со преадаптација на просторот во постоечкиот Центар на култура „Марко Цепенков“.

– Сакаме да твориме во професионални услови, со гримиорни, со сите услови, техничка поддршка потребна на еден современ театар. Очекуваме Министерството за култура да има слух и за актерите и театарот во Прилеп – велат дел прилепски актери.

Директорката на центарот, Менче Караџоска вели дека работи на  конечно решавање на проблемот.

– Факт е дека Прилеп и театарската публика, и фестивалот „Војдан Чернодрински“, а особено актерите во театарот, имаат потреба од оптимални услови за работа и творештво. Затоа и моите заложби се во тој правец  – вели директорката Караџоска.

Инаку, за прв пат завесата во прилепскиот театар се кренала на 18 февруари 1950 година, со изведбата на претставата „Кир Јања“ од Јован Стерија Поповиќ, а во режија на Аце Михајлоски.


Културни работници бараат професионален театар во Кочани


Кочани, 28 јануари, 2019 - 12:26 (META) 

Со список со потписи, дваесетина културни работници и уметници од Кочани и формално ја поддржаа иницијативата за основање на професионален театар во Кочани. Градот има државен аматерески фестивал, аматерска театарска сцена од која произлегле повеќе значајни имиња. На листата со потписи се актерот и пантомимичар Трајче Георгиев и ѕвездата на македонскиот филм „Исцелител“, Благој Веселинов.

На неформалната средба што се одржа изминатиот викенд, уметниците се согласија дека неопходно е да се возобнови некогашниот Народен театар во Кочани.

Дарко Јан Спасов, еден од поддржувачите на оваа идеја и актуелен претседател на Управниот одбор на Драмскиот аматерски фестивал, смета дека сега Кочани има историска шанса за културен исчекор.

– Убеден сум дека ќе успееме да го оствариме сонот на многу актери, режисери, мултимедијални работници кои работеле на сцената во Кочани. Ние и не размислуваме поинаку, затоа што како група ентузијасти веќе работиме на подготовка на премиерна претстава што ќе ја означи работата на новиот театар – вели Спасов.

Народниот театар, како професионален театар во Кочани работеше само од 1951 до 1959 година, раководен од еден од најпознатите културни дејци на Кочани, Борис Стојчев.

Општината Кочани, по прифаќањето на иницијативата со одлуката од страна на Советот на Општина Кочани, документацијата веќе ја испрати до Министерството за култура.

Иницијативат доаѓа во време кога Министерството за култура прави нова институционални реорганизација, со цел намалување на трошоците.


За градоначалникот на Тирана, Националниот театар е „фашистичка зграда и кoњска штала“


Тирана, 4 септември, 2018 - 11:46 (META) 

Законот со кој би се урнал Националниот тетар за да се изгради нов, во Албанија не престанува да биде главна тема во јавноста. Законот беше изграсан од мнозинството на 5 јули 2018 година и покрај постојаните протести од здруженијата на актерите и активистите.

veliaj fake news

Според законот, новиот тетар би бил изграден на местото на постојниот Национален театар преку јавно-приватно партнерство. Со тоа, наводно, компанијата понудила да го изгради „бесплатно“ театарот во замена за парцела на државно земјиште која би ја добила во близина на тетарот.

Противниците на законот велат дека целата зделка е неуставна и го повредува Договорот за асоцијација и стабилизација со ЕУ кој Албанија го склучи во 2003 година.

Многу историчари, професори и архитекти укажуваат на вредноста на постојниот објект и даваат аргументи за културната, историската и архитектонската вредност на зградата.

Но и покрај тоа градонашалниот на Тирана, Ерион Велиај, во твит пред неколку дека продолжува театарот да го нарекува „фашистичка зграда, логор, коњска штала“, а тие кои протестираат дека се „лажговци“.

На овој проект му се спротивставува Europa Nostrа, организацијата која се занимава со културносто наследство на Европа и вели дека овој објект, изграден во 1938 година, е еден од најистакнатитие културни центри на Тирана“ и дека е „последниот преживеан историски белег на главниот град“.

Градоначалниот го избриша твитот и коментарите под него од граѓаните кои го критикуваа.


Спасов: Глумците што одбија да ја играат „Ничија земја“ ќе бидат казнети


Скопје, 2 декември, 2017 - 13:43 (META) 

Вршителот на должност директор на Македонски народен театар (МНТ), Драган Спасов – Дац, најави дека, глумците, кои синоќа одбиле да ја играат претставата „Ничија земја“, ќе бидат казнети.

„Покрај мојата сугестија и наредба да се игра претстава, глумците своеволно одбија да ја играат претставата „Ничија земја“, како поддршка за приведените глумци што беа инволвирани во случувањата од 27 април во Собранието. Сите до еден ќе бидат казнети за непослушноста и по разговорот со мене, свесни се за проблемот што го направија. Театарот постои за публиката и така ќе остане. Ова го почувствував како атак кон мене и кон нашата публика“, напиша Спасов на својот фејсбук-профил.

Министерот за култура, Роберт Алаѓозовски, коментирајќи го овој случај, на денешната прес-конференција во МНТ праша „со кого и со што точно се солидаризираа актерите вчера?“

– Сметам дека секоја слична намера во иднина нема да биде добра ниту по развојот на културата ниту, пак, во однос на демократизацијата на културните институции – рече Алаѓозовски.

Глумците ја откажаа синоќешната претстава „Ничија земја“ солидаризирајќи се со нивниот колега Владо Јовановски, кој е во истражниот затвор во Шуто Оризари, бидејќи се товари за терористичко загрозување на уставниот поредок и на безбедноста на државата за настаните од 27 април во Собранието.


Раде Шербеџија утре пристигнува на „Браќа Манаки“


Битола, 9 септември, 2016 - 11:41 (META) 

Битола ги прави последните подготовки за утрешното свечено отворање на 37. издание на Интернационалниот фестивал на филмска камера „Браќа Манаки“.

Црвениот ќилим пред Центарот за култура се очекува да биде поставен утре, а на него ќе зачекорат светски познати кинематографи, актери и вљубеници во филмот од Македонија и од светот. Оргинизаторите се подготвени да го пречакаат славниот австралиски директор на фотографија Џон Сил, со неговата сопруга, кој ќе ја прими наградата за животно дело „Златна камера 300“.

Утре во градот на браќата Манаки се очекува да пристигне и големиот актер и режисер Раде Шербеџија, кој на гала-отворањето и на премиерата на филмот „Ослободување на Скопје“ ќе дојде со сопругата и со ќерката.

Александра Бубевска, портпарол на фестивалот, вели дека голем дел од гостите на фестивалот пристигнале во Битола, а како ретко кога оваа година „Манаки“ ќе го следат повеќе од стотина новинари од Македонија и од светот.

– Имаме акредитирано голем број домашни и странски новинари што ќе го следат фестивалот. Веќе имаме новинарски екипи и од Словенија, Грција, Франција, БИХ, Србија. Фестивалската атмосфера се чувствува, се работи забрзано и адреналински, бидејќи се прават последните подготовки – вели Бубевска.

Сите гости годинава ќе бидат сместени во хотелите и во помалите сместувачки капацитети во Битола. На располагање помеѓу филмските прокеции ќе бидат ставени вредните музејски поставки во Завод и музеј Битола, како и античкиот локалитет Хераклеја.


Премиера на претставата „На дното“ на Пројковски во штипскиот театар


Штип, 2 септември, 2016 - 16:13 (META) 

Претставата „На дното“ по делото на Максим Горки во режија на Дејан Пројковски премиерно ќе се игра в недела во алтернативниот простор на фундусот на сцената на Домот на културата во Штип.

Пројковски оваа претстава на денешната прес-конференција ја нарече „патетика на баналното“, работена во екстремно радикална форма.

– Претставата е метафора за луѓето кои ја губат вербата во себе, а не застануваат да се погледнат пред огледало. Водата во која играаат актерите е симбол на калта во која се заглавени – изјави Пројковски.

Дванаесет актери учествуваат во претставата, меѓу кои и студенти на Пројковски. Во актерската екипа е и пензионираниот актер Стојан Арев, кој во деновите на подготовките рече дека се чувствувал буквално како да го пливале Охридскиот маратон по десетте часа интензивна работа.

Костимите и сценографијата се на Валентин Светозарев, а музиката ја работеше традиционалниот соработник на Пројковски, Горан Трајкоски.

Оваа екипа ја работеше и најтрофејната претстава на Народниот театар од Штип, „Бегалка“, во која актерката, која и сега игра, Рујиш Беговска, стана лауреат на Театарскиот фестивал „Војдан Чернодрински“.


Скорсезе, Де Ниро и Ди Каприо во најскапата реклама за казино


Макао, 28 октомври, 2015 - 11:38 (META) 

Холивудските легенди Мартин Скорсезе, Роберт де Ниро и Леонардо ди Каприо во вторникот вечерта беа најславните личности што присуствуваа на отворање на казино во Макао, каде што презентираа 15-минутен краток филм што медиумите го нарекоа најскапата реклама во историјата, пренесе „Денар.мк“.

Во филмот „Аудиција“, што го режираше Скорсезе, Де Ниро и Ди Каприо се натпреваруваат за иста улога, а во него кратко се појавува и Бред Пит.

Иако не е потврдено, медиумите шпекулираат дека продукцијата на филмот чинела 70 милиони долари. Зад целиот проект стои австралискиот мултимилијардер Џејмс Пакер, кој сакаше најдобра можна промоција на својата нова коцкарница во Макао.

Пакер заедно со холивудските ѕвезди се појави на црвениот тепих вечерта, за време на отворањето на казиното „Студио сити“ (Studio City), кое е тематски посветено на Холивуд и чија изградба чинеше 3,2 милијарди долари.

На отворањето настапи и партнерката на Пакер, пејачката Мараја Кери.


Џон Траволта и Том Круз во љубовна врска 30 години?!


Лос Анџелес, 27 март, 2015 - 15:32 (META) 

Како што пишуваат голем број таблоиди во Холивуд, актерите Том Круз и Џон Траволта биле во 30-годишна љубовна врска!

Џон Траволта за младиот актер Круз, наводно, се заинтересирал уште пред неколку децении, во 1983 година, кога тој го симал филмот „Ризичен бизнис“.

Наводно, Траволта го повикал младиот актер на неколкудневно патување, што предизвикало нивно зближување и зачувување во строга тајна на 30-годишната врска.


Филмот „Момчештво“ со најмногу награди „Златен глобус“


Лос Анџелес, 12 јануари, 2015 - 14:54 (META) 

Филмот „Момчештво“, кој се снимаше 12 години, освои најмногу награди на годинешниот „Златен глобус“, што се одржа вчеравечер во хотелот „Беверли Хилтон“ во Беверели Хилс.

„Момчештво“ освои награда за најдобра драма, на режисерот Ричард Линклејтер му донесе награда за најдобар режисер и на актерката Патриша Аркет – награда за најдобра актерка во споредна улога.

Наградата за најдобро сценарио му припадна на Алехандро Гонзалез за „Брдмен“, за најдобра комедија/мјузикл награда освои филмот на Вес Андерсон, „Гранд хотел Будимпешта“, а за најдобар анимиран филм вториот дел на „Како да го тренираш твојот змеј“. Рускиот филм „Левијатан“ е прогласен за најдобар странски филм.

За најдобра актерка беше прогласена Џулиен Мур во драмата „Сè уште Алис“, а за најдобра актерка во мјузикл/комедија наградата ја освои Ејми Адамс за филмот „Големи очи“. Најдобар актер во драма е Еди Редмејн за биографскиот филм за Стивен Хокинг „Теоријата за сè“, а со наградата најдобар актер во мјузикл/комедија се закити Мајкл Китон за улогата во „Брдмен“. За најдобра ТВ-драма е прогласена серијата „Афера“, а за најдобра ТВ-серија во категоријата комедија/мјузикл наградата ја доби „Транспрент“.

Кевин Спејси за улогата во „Куќа од карти“ ја доби најградата најдобар актер во телевизиска драма, а Рут Вилсон за најдобра актерка во ТВ-драма за серијата „Афера“.
Џорџ Клуни, кој ја доби наградата за животно дело, носеше беџ со натписот „Јас сум Шарли“.

Церемонијата ја водеа Тина Феј и Ејми Полер.


Џони Деп и Амбер Херд ќе се венчаат


Лос Анџелес, 24 декември, 2014 - 11:34 (META) 

Откако Џони Деп (51) и Амбер Херд (28) ги поканија своите блиски пријатели на прослава на Нова година на Бахамите, низ јавноста почнаа шпекулации дека тие тој ден го планираат за да стапат во брак.

Џони Деп по само една години oд забавување ја запроси Амбер, а свршувачката беше неочекувана. Актерот се раздели од Венеса Паради , со која беше во врска 14 години и со која има две деца.