!Во периодот што претстои работиме на воведување систем за пристап и за претплата. За начинот на пристап и за претплатата ќе информираме дополнително. Содржините на „Мета“ до тогаш се слободни за преземање со задолжително цитирање и атрибуирање.

Академијата за судии и јавни обвинители го поништи огласот поради лажните сертификати


Скопје, 18 декември, 2017 - 10:19 (META) 

Огласот за прием на 60 слушатели на почетна обука-кандидати за јавни обвинители е поништен поради истражната постапка која Основното јавно обвинителство (ОЈО) ја се води против дел од пријавените кандидати, соопшти Академијата за судии и јавни обвинители „Павел Шатев“.

„Управниот одбор на Академијата за судии и јавни обвинители „Павел Шатев“ на седницата одржана на 11 декември 2017 година донесе одлука за поништување на јавниот оглас на Академијата за прием на 60 слушатели на почетна обука-кандидати за јавни обвинители, објавен во Службен весник на Република Македонија од 30.08.2016 година и во дневните весници „Лајм“ и „Нова Македонија“, стои во одлуката, објавена на веб страницата на Академијата.

Четириесет и едно лице од пријавените доставиле фалсификувани сертификати за англиски, поради што ОЈО покрена кривично дело „фалсификување исправа“.


Арнаудовска го обвини Советот за реформи во правосудството дека работи нетранспарентно


Скопје, 13 декември, 2017 - 13:24 (META) 

Советот за реформи во правосудството работи многу нетранспарентно, изјави денеска за медиумите директорката на Академијата за судии и јавни обвинители, Анета Арнаудовска пред почетокот на дводневната Меѓународна работилница за стандардите на Европската Унија за обука на судии и јавни обвинители што се одржува во Скопје.

Таа изјави дека во Нацрт-стратегијата за реформи во судството Академијата воопшто не била вклучена и покрај, како што рече, пораките од новата Влада дека ќе биде транспаретна.

Арнаудовска посочи дека во Нацрт-стратегијата било предвидено дека одреден процент од судиите ќе бидат избрани со незавршена Академија, што, како што рече, не било прифатено во извештајот на експертската група на Рајнхард прибе од 14 септември, оваа година.

– Иако во Нацртот на стратегијата се почна со еден многу дискредитирачки вокабулар за Академијата дека произведува неспособни кадри, дека има незадоволителни резултат во работењето…по нашите забелешки до Европската комисија овој вокабулар беше отстранет – рече Арнаудовска.

Сепак, според неа останува сомнението што ќе биде со изборот на судиите и дали ќе остане процентот што бил заговаран во Стратегијата за реформи, бидејќи, како што рече, минатата недела на состанок на Академиите во Брисел претставник од Министерство за правда изјавил дека се подготвуваат измени во Законот за судови и дека процентот за избор на судии со завршена Академија и на судии надвор од Академијата ќе биде 60 према 40.

Арнаудовска изрази незадоволство и поради тоа што Академијата за судии и јавни обвинители, како и никој од органите на оваа институција, не е вкучен, ниту пак е консултиран за имените за законот за Академијата што се подготвуваат.


Франција ќе ја одликува директорката на Академијата за судии и јавни обвинители


Скопје, 19 мај, 2017 - 17:54 (META) 

Амбасадорот на Франција во Македонија, Кристијан Тимоние, во име на претседателот на Република Франција, в понеделник ќе ја одликува директорката на Академијата за судии и јавни обвинители, Анета Арнаудовска со орден Витез на Националниот ред за заслуги, соопштија денеска од француската амбасада.

„Како директор на Академијата за судии и јавни обвинители, г-ѓата Арнаудовска постојано се залагаше во последните десет години за развој на соработката помеѓу Франција и Македонија во областа на обуката на судиите и на јавните обвинители, како клучна за зајакнување на владеењето на правото преку примена на европски стандарди од доменот на кривичното, на граѓанското право и на индивидуалните слободи. Со својата компетентност и непристрасност, г-ѓа Арнаудовска, поддржувајќи ја обуката на судиите и јавните обвинители преку постојана соработка со Националната школа за судии и јавни обвинители на Бордо, даде свој придонес за развојот на односите со Франција, како и за иднината на европската интеграција на земјата“, стои во соопштението.

Инаку, орденот за Национални заслуги на Франција, воспоставен во 1963 година од страна на генералот Жарл Де Гол, е едно од најпрестижните француски одликувања. Со него се наградуваат воени или цивилни лица, Французи или странци, коишто имаат особени заслуги за Република Франција. Одликувањето се доделува со указ на претседателот на Франција.


СЈО бара да има член во управниот одбор на Академијата за судии и јавни обвинители


Скопје, 28 февруари, 2017 - 10:26 (META) 

Специјалното јавно обвинителство (СЈО) бара измени на Законот за Академијата на судии и јавни обвинители, со кои на СЈО ќе му биде овозможено да има член во управниот одбор на Академијата и да учествува во носењето одлуки.

Од СЈО до Академијата за судии и јавни обвинители „Павел Шатев“ вчера испратиле допис со барањата за законски измени. Во дописот од СЈО се наведува дека „врз основа на законски пропишани обврски, Академијата има должност да остварува професионална соработка со Специјалното јавно обвинителство исто како и со другите јавни обвинителства“.

Во дописот се наведува дека Академијата не ги вклучила обвинителите на СЈО во годишната програма за обуки и не го доставила годишниот каталог за задолжителни обуки до Специјалното јавно обвинителство.