Доверителите на „Агрокор“ го прифатија договорот со руските банки и спречија банкрот


Загреб, 5 јули, 2018 - 11:14 (META) 

Доверителите на хрватскиот холдинг „Агрокор“ го одoбрија договорот за надмирување на долговите, во што ќе се вклучат руските банки  „Сбербанк“ и “„ВТБ“, кои ќе преземат 46 отсто од акциите.

На овој начин, ќе се избегне банкрот на најголемата компанија на Западен Балкан во која има вработени 60.000 лица и учествува со 15 проценти во домашниот бруто-производ (БДП) на Хрватска.

Холдингот „Агрокор“ натрупа долг од осум милијарди евра, вклучувајќи ја и спорната сума што им ја должи на две руски државни банки.

Според договорот, добавувачите можат да очекуваат да добијат 60 отсто од нивните побарувања, банките ќе добијат до 20 проценти, а сопствениците на обврзници може да очекуваат враќање од 40 до 80 проценти од нивната инвестиција.

Спроведувањето на договорот се очекува да трае меѓу три и четири месеци откако Трговскиот суд и официјално ќе го одобри. 


„Агрокор“ ќе продолжи со работа по 15 јули, постигнат договор со две руски банки


Загреб, 19 април, 2018 - 11:29 (META) 

Претседателот на Хрватската стопанска комора, Лука Буриловиќ изјави денеска дека е постигната спогодба со две руските банки за концернот „Агрокор“, што ќе и овозможи на компанијата непречено да продолжи да работи од 15 јули оваа година.

Буриловиќ истакнал дека договорот ќе биде реализиран на 15 јули, бидејќи тогаш престанува да важи „лекс специјалис“ за „Агрокор“.

– Најважно е дека е постигнат договор и „Агрокор“ после 15 јули ќе продолжи непречено да работи – изјави Буриловиќ.

Според нацртот на договорот, „Спербанк“ и банката „ВТБ“ ќе бидат мнозински сопственици на концернот, бидејќи би имале помеѓу 30 и 46 отсто удел во сопствеништвото.

Акционерите на „Агрокор“ би имале од 23 до 25 отсто од компанијата, домашните банки околу 10 отсто, а добавувачите околу осум отсто.

Владата на Хрватска во „Агрокор“ кој имаше финансиски проблеми воведе принудна управа во април 2017 година. Тој концерн во регионот вработува околу 60.000 луѓе.


Голема акција за апсење во Хрватска поради аферата „Агрокор“


Загреб, 16 октомври, 2017 - 11:41 (META) 

Уапсени се четворица од поранешните клучни раководители на концернот „Агрокор“ во Хрватска, во акцијата што почна рано утрово, а во чии рамки е претресена и „Кулмеровата палата“ во Загреб, сопственост на основачот на „Агрокор“, Ивица Тодориќ.

Според информациите во хрватските медиуми, Ивица Тодориќ не е во Хрватска.

Уапсени се поранешниот шеф на финансии на „Агрокор“, Иван Црњац, поранешниот член на надзорниот одбор на концернот, Томислав Лучиќ, поранешната членка на управата на компанијата, Пирушка Цањуга, и поранешната потпретседателка на „Агрокор“, Љерка Пуљиќ.

Според Државното јавно обвинителство, се води голема истрага под сомнеж за стопански криминал и за фалсификување. Издадени биле повеќе од 60 налози за претрес, а во акцијата се вклучени повеќе од 300 полицајци, велат неслужбените информации.

Во седиштето на „Агрокор“ веќе неколку месеци се државните обвинители и форензичари, кои ја проверуваат документацијата поради сомнежите дека финансиските извештаи и биланските на „Агрокор“ биле лажирани, односно дека концернот вреди 290 милиони евра помалку од тоа што се прикажувало.

Владиниот повереник за „Агрокор“, Анте Рамљак, минатата недела поднесе кривична пријава против одговорните во оваа компанија поради неправилности во работењето, утврдени со ревизијата на финансискиот извештај. Ивица Тодориќ веднаш потоа објави дека ниту едно евро не е отуѓено или скриено.


Долгот на „Агрокор“ изнесува 5,4 милијарди евра


Загреб, 11 мај, 2017 - 17:42 (META) 

Хрватската компанија „Агрокор“ денеска испратила соопштение во кое се наведува дека актуелниот долг на фирмата, заклучно со 31 март 2017 година, изнесува околу 5,4 милијарди евра, пренесува балканскиот сервис на „Радио Слободна Европа“.

Наведената сума на долгови, по доспеани камати, други позајмици, одложено плаќање на даночни обврски и друго, како што било посочено, не ги прикажува долговите на целата групација, туку само тие на најголемите 19 друштва во рамките на „Агрокор“.

Во оваа сума не е прикажан ниту заемот од 80 милиони евра што компанијата го подигна на 13 април оваа година.

Од фирмата навеле дека и понатаму ги проверуваат потенцијалните неправилности во финансиските извештаи и според тоа, можна е ревизија и на овие податоци.

Инаку, на почетокот на април хрватското собрание донесе посебен закон за спасување на „Агрокор“.


Регионален министерски тим ќе ги санира штетите од кризата во „Агрокор“


Белград, 19 април, 2017 - 16:44 (META) 

Министрите за трговија и за економија на Србија, БИХ, Словенија и на Црна Гора денеска на состонок во Белград се договорија да формираат министерски тим за заедно да спречат случајот со хрватскиот концерн „Агрокор“ да биде на шетата на фирмите – ќерки во земјите од регионот.

На состанокот на ресорните министри на регионот за „Агрокор“, присуствувал и премиерот на Србија, Александар Вучиќ, кој потврдил дека Србија нема да дозволи домашните компании да трпат штета поради кризата во „Агрокор“.

Министерскиот тим секојдневно ќе разменува информации за состојбата со фирмите – ќерки на „Агрокор“ во Србија, БИХ, Црна Гора и во Словенија, а ќе се бара и разгвор со претставниците на хрватската влада, која воведе принудна управа во „Агрокор“.

Министерот за трговија и за економски односи на БИХ, Мирко Шаровиќ, по состанокот изјавил дека очекувањата на учесниците од денешниот состанок во Белград се дека сите компании на „Агрокор“ ќе бидат рамноправно третирани при финансиска стабилизација на хрватскиот концерн.

Министерот за трговија на Србија, Расим Љајиќ, изјавил дека Србија е во нешто подобра позиција отколку другите земји во кои „Агрокор“ има компании, бидејќи „Меркатор С“, кој вработува околу 9.000 работници е во мнозинска сопственост на словнечекиот „Меркатор“.

Тој додаде дека договорот за заедничко решение не е насочен против никого туку ќе придонесе за стабилизација на „Агрокор“.

Хрватскиот гигант „Агрокор“ кон крајот на минатиот месец потпиша предстечаен договор со банките и со другите кредитори, на кои им должи околу 10 милијарди евра, за да се направи напор да се задржи ликвидноста на компанијата. Сметките на „Агрокор“ се блокирани поради долг за даноци од околу 10 милиони евра.


Министерски состанок за „Агрокор“ утре во Белград


Белград, 18 април, 2017 - 15:14 (META) 

Во Белград за утре е закажан состанок на министрите за трговија и за економија на Србија, Словенија, Босна и Херцеговина и на Црна Гора, на кој ќе се разговара за случајот со хрватскиот концерн „Агрокор“.

На состанокот, на кој не се поканети претставници од Хрватска, се очекува да се стане збор за тоа како да се задржат работните места во фирмите што се во состав на „Агрокор“, да се заштитат интересите на набавувачите и како да се спречи одлив на пари од фирмите на „Агрокор“ во регионот во матичната компанија.

Во состав на „Агрокор“, чие седиште е во Загреб, има повеќе од 60 фирми од земјите од регионот, кои вработуваат околу 60.000 луѓе.

„Агрокор“ во Србија е сопственик на фирмите „Меркатор С“, „Дијамант“, „Фриком“, „МГ Мивела“, „Кикиндски млин“ и „Нова слога“, кои вработуваат околу 11.000 работници.

Хрватскиот гигант „Агрокор“, кон крајот на минатиот месец потпиша предстечаен договор со банките и со другите кредитори, на кои им должи околу 10 милијарди евра, за да се направи напор да се задржи ликвидноста на компанијата. Сметките на „Агрокор“ се блокирани поради долг за даноци од околу 10 милиони евра.


Светски познат консултант ќе го спасува „Агрокор“


Загреб, 5 април, 2017 - 11:23 (META) 

Антонио Алварез Трети, новоназначениот извршен директор за реструктурирање на хрватскиот гигант „Агрокор“, вчера попладнето пристигна во Загреб и го претстави и својот тим, во кој е само едно лице по потекло од Хрватска, јавија хрватските медиуми.

– Нема никаква гаранција дека ќе успееме, но нема да бидам сам, имам тим што го одбрав. Ќе комуницираме со сите кредитори и компании и очекуваме напредок во целиот процес. Сакаме да создадеме отворен однос. Ќе направиме сè за да ги зачуваме работните места. Мојот прв чекор е да создадам стабилност – вели Алварез.

Хрватскиот гигант „Агрокор“, кој работи и во Србија, БИХ и во Словенија, минатата седмица потпиша предстечаен договор со банките и со другите кредитори, на кои им должи околу 10 милијарди евра, да се направи напор да се задржи ликвидноста на компанијата. Сметките на „Агрокор“ се блокирани од минатата седмица поради долг за даноци од околу 10 милиони евра.

Алварез Трети има 25-годишно искуство и е еден од водечките независни глобални советници за реструктурирање. Тој е извршен директор за реструктурирање во познатата консултантска куќа „Алварез и Маршал“, која работи низ целиот свет, а денес вработува повеќе од 2.900 луѓе во 45 канцеларии во 18 земји на четири континенти.