Од околу 1.000 дронови во Македонија, регистрирани се само 52 летала


Скопје, 17 август, 2018 - 15:43 (META) 

Во Македонија од цивилни лица и фирми се користат околу 1.000 воздухоплови без екипаж, а од нив до 15 август кај нас се регистрирани само 52, објаснува Драги Стојаноски, раководител на Секторот за безбедност на воздушен сообраќај и воздухопловна навигација во Агенцијата за цивилно воздухопловство (АЦВ).

Казните за неовластено користење, се од 300 евра, ако се плати истиот ден, до 600 евра за плаќање подоцна.

– Се надеваме дека сопствениците на леталата ќе сфатат дека и оваа дејност мора да биде регулирана и ќе си ги извршат обврските да се регистрираат според Уредбата за воздухоплови без екипаж – вели Стојаноски.

Тој вели дека е проблем и тоа што кај осигурителните куќи уште нема слух да изготват понуди за осигурување на овие летала, со што би им се овозможило некакво олеснување и помош и на сопствениците на воздухопловите без екипаж и на луѓето што ќе претрпат некакви повреди или штета од овие летала.

Уредбата, како и потребните формулари за регистрирање на  воздухоплови без екипаж може да се најдат во одделот за воздухоплови без екипаж на веб-страницата на АЦВ.

Регистрираните дронови добиваат маркичка со регистерски број и со QR-код, а сопствениците се задолжени 24 часа пред летањето да пријават со електронско писмо каде планираат да летаат со својот дрон и во кој временски период. Од следната седмица тоа ќе се прави директно на веб-страницата на Агенцијата, каде корисниците ќе се логираат и ќе ги оставаат своите податоци.

– Проверуваме и со МВР и со Министерството за одбрана, оти, на пример, иако за некој објект го знаеме ограничувањето, министерствата може во некои случаи, односно во некои денови, да наложат многу поголема оддалеченост од објектите. Од почетокот на месецот до 15 август имавме 63 пријавени настани и сите можеа да се следат на картата на нашата веб-страница – објаснува Момироски.

Од 63-те лета, по околу една четвртина отпаѓа на Скопје и Охрид, а потоа следуваат Куманово со 17 отсто од летовите, Тетово со 7 отсто, како и Струмица и Македонски Брод со по 5%.

Од Агенцијата апелираат сите сопственици на дронови со долет поголем од 15 метри и максимална височина над 15 метри или тежина при полетување од половина килограм да ги регистрираат овие летала, за да избегнат проблеми со законот.


Дроновите (не)законски влетаа во политиката


Скопје, 24 април, 2017 - 11:31 (META) 

Дроновите станаа политички алатки пар екселанс во Македонија и на Балканот.

Првиот случај на користење дрон во политички цели беше регистриран на средината на октомвври 2014 година на мечот меѓу репрезентациите на Србија и на Албанија во Белград, кога среде натпревар, на стадинот на ФК „Партизан“, се појави дрон на кој беше закачено знаме со мапа на „голема Албанија“. Настанот тогаш ги зовре емоциите меѓу двете држави и неколку недели беше главна тема во медиумите.

Дрон со ист таков плакат на „голема Албанија“ вчера се појавил на стадионот во Чаир во Скопје, на фудбалскиот натпревар меѓу екипите на „Шкупи“ и „Вардар“, што беше повод ВМРО-ДПМНЕ вината за овој случај да ја префрли на СДСМ, кого го обвини дека е поттикнувач на ваквите случувања.

Во изминатиов период, протестите што се одржуваат во Скопје пред Владата и пред Собранието редовно се снимаат од воздух со беспилотни летала (дронови).

Владата на почетокот на 2015 година донесе Уредба за условите под кои воздухоплов без екипаж може да лета во македонскиот воздушен простор.

Во членот 12, став 5 од уредбата стои дека „воздухоплов без екипаж не може да лета во радиус од 500 метри од објектите на Министерството за одбрана и Армијата на Република Македонија, објектите на Министерството за внатрешни работи, Владата на Република Македонија, Собранието на Република Македонија, резиденцијата на Претседателот на државата, дипломатските претставништва, високо ризични натпревари и голем собир на луѓе (протести)“.

„Операциите на воздухоплов без екипаж од став 5 на овој член може да се реализираат само со претходно одобрение од Агенцијата за цивилно воздухопловство, Министреството за внатрешни работи и Министерство за одбрана“, се наведува во став 6 од членот 12 на истата уредба.

Инаку, протестите се снимаат со дрон за потребите на информативната програма на „Телевизија Нова“. Оттаму за „Мета“ велат дека за користењето на дронот ги имаат обезбедено сите дозволи, а секое летање во близина на државните објекти претходно се пријавува во полиција.

Од Агенцијата за цивилно воздухопловство не сакаа да одговорат на прашањето дали од нив била побарана и дали е издадена дозвола за користење на дроновите на протестите.

Истото прашање го испративме и до МВР, но оттаму нè препратија во Агенцијата за цивилно воздухопловство, бидејќи, како што ни рекоа, таа е надлежна за издавање на одобренијата за летање.

Во уредбата на АЦВ, сепак, не се предвидени казни за тие што ќе ги прекршат условите за користење дронови.

Казни треба да има во правилникот за користење на дроновите кој, како што информираа од Агенцијата за цивилно воздухопловство во ноември минатата година, е веќе готов, но го чека новото Собрание да профункционира за да биде донесен.

Инаку, полицијата во декември 2015 година приведе момче кое со дрон го снимаше студентскиот протест во Скопје. Момчето по „информативниот разговор“ беше пуштено, а снимките и дронот беа задржани од полицијата.


Во Македонија има 37 регистрирани воздухоплови, од кои три се приватни летала


Скопје, 4 април, 2017 - 17:04 (META) 

Во Македонија има вкупно 37 регистрирани цивилни воздухоплови, стои во регистарот на впишани воздухоплови на Агенцијата за цивилно воздухопловство, последен пат ревидиран на 13 март оваа година.

Инаку, Специјалното јавно обвинителство денеска соопшти дека го проверува имотот на функционери и на фирми, откако пратеникот во Собранието и член на извршниот комитет на ВМРО-ДПМНЕ, Антонијо Милошоски, на својот фејсбук-профил објави документ испратен до Агенцијата за цивилно воздухопловство, со кој СЈО бара од Агенцијата информации дали Милошоски поседува или поседувал воздухоплов.

Во регистарот на впишани воздухоплови го нема името на Милошоски.

Од она што може да се види, меѓу регистрираните летала се владиниот „лирџет“, потоа два „пајпери“, едниот на име на белградската фирма „Њу ејџ инвестмент“ (New Age Investment), а другиот на „Транс интер ДОО“.

Штипјанецот Раде Ивановски во регистарот е впишан како сопственик на две летала – една „цесна 172Н“ (CESSNA 172N) и едно летало „моран солние МС894А“ (MORANE SAULNIER MS-894-A).

Покрај Ивановски, уште една „цесна“ (CESSNA F172M) е регистрирана на Исмаил Лимани.

Ако се пребара на „Гугл“, за Раде Ивановски може да се најде дека меѓу штипјани важи за познат пилот, кој работел за една авиокомпанија во Руанда, а претходно и за компании во Индија и во Тунис. Тој пред неколку години дошол во Македонија, меѓу другото и за да разговара со Агенцијата за цивилно воздухопловство околу потребата за формирање македонска авиокомпанија.