Грчките туристички агенции ги суспендираат аранжманите за Турција


Солун, 13 март, 2018 - 11:30 (META) 

Една по една туристичките агенции во северниот дел на Грција ги прекинуваат патните аранжмани за Турција, како протест по апсењето на двајцата грчки војници.

Од солунската туристичка агенција „Зорпидис“ која ги прекина сите организирати тури за Турција, велат дека се решиле на таков чекор „како минимум поддршка“ на уапсените војници.

Во соопштението се вели и дека „Агенцијата ги става во мирување сите организирани патувања во различни делови на Турција се додека ситуацијата не се нормализира“.

Двајцата припадници на грчката Армија минатата недела беа уапсени од турска воена патрола, откако поради лошите временски услови залутале и илегално ја поминале границата меѓу двете земји во реонот на реката Марица.


Туристичката понуда на Охрид беше презентирана на саем во Москва


Охрид, 12 април, 2017 - 16:40 (META) 

Неодамнешните промотивни активности на Општина Охрид за позиционирање на градот на мапата на атрактивни туристички дестинации на Саемот за туризам во Москва, наидоа на голем пласман во руските медиуми.

Меѓу другите медиуми, Охрид се најде и на веб-страницата „Вотпуск“ која дневно ја посетуваат повеќе од 90.000 посетители, меѓу кои најбројни се претставниците на туристичките агенции, тур-оператори и потенцијалните туристи.

Претставници на туристички агенции, тур-оператори и медиуми го најавија своето учество на промотивната тура „Охрид 2017“, која Општина Охрид годинава ја организра во септември, а поканата во Москва ја упати градоначалникот на Охрид, Никола Бакрачески.


Европската комисија одобри 90 милиони евра како поддршка за влез на Албанија во ЕУ


Тирана, 23 декември, 2016 - 19:54 (META) 

Европската комисија одобри околу 90 милиони евра како поддршка на Албанија за нејзиниот пат кон членство во Европска Унија, јавува дописникот на „Мета“ од Тирана.

Програмата наменета за Албанија ја следи политиката на проширување со фокусирање на областите како владеење на правото, економски развој и конкурентност.

Исто така, се поддржува и имплементацијата на албанската стратегија за борба против корупцијата и реформите во судството.

Други области што ќе бидат поддржани преку оваа програма се транспорт, животна средина, граѓанско општество и учеството на Албанија во програмите и во агенциите на ЕУ, како што се „Еразмус  плус“, „Хоризонт 2020“ и „Креативна Европа“.


Безбедноста на интернет во ЈИЕ, тема на состанок на безбедносните агенции


Подгорица, 29 септември, 2016 - 15:23 (META) 

Безбедноста на интерент во регионот на Југоисточна Европа (ЈИЕ) е една од темите на дводневниот форум на националните безбедносни агенции што почна денеска во Подгорица.

Форумот кој го организира Регионалниот совет за соработка (РСС), прераснува во традиционалнен начин на соработка и на градење доверба меѓу безбедносните агенции од земјите од ЈИЕ, меѓу кои и Македонија.

Меѓу темите на оваа конференција, како што е официјално соопштено, ќе бидат и соработката во областите на образованието и на обуката, како и поставување заедничка веб-страница на националните безбедносни агенции од ЈИЕ.

Генералниот секретар на РСС, Горан Свилановиќ, изјави дека форумот на безбедносните агенции не е цел сам по себе, туку дека прераснал во средство за подобра соработка и за зголемување на безбедноста и на довербата.

Шефот на црногорската Национална безбедносна агенција, Саво Вучиниќ, изјави дека иако е забележлив напредокот во безбедносната состојба во регионот, тој сè уште се соочува со значителни предизвици, поради што се потребни размена на искуства, добри практики и идеи.

Регионалниот совет за соработка е оперативно тело на Процесот на соработка во Југоисточна Европа, чиј основач и полноправен член е и Македонија.


Агенциите го намалија кредитниот рејтинг на Велика Британија


Њујорк, 29 јуни, 2016 - 12:39 (META) 

Агенцијата „Стандард и Пурс“ го намали највисокиот кредитен рејтинг ААА на Велика Британија за две нивоа, на АА, и предупреди на можно понатамошно намалување.

„Фич“, пак, го намали рејтингот на Велика Британија за едно ниво, од АА+ на АА, со можност за понатамошно намалување.

Според анализата на овие агенции, Брексит би можел да доведе до влошување на економската состојба што ќе влијае врз финансискиот сектор.

Се очекува и забавување на порастот за британската економија, па така предвидувањата за пораст од 2 отсто се намалија на 0,9 отсто за 2017 и за 2018 година.


ОН: Бегалците во „Винојуг“ и во Табановце живеат како во притвор и во мизерни услови


Скопје, 20 април, 2016 - 16:47 (META) 

Околу 1.000 мигранти и бегалци, кои се сместени во транзитните центри „Винојуг“ и на Табановце, како и во центарот за азил во Скопје, од кои половината се деца, живеат во многу лоши и примитивни услови, со неквалитетна храна и со ограничена слобода на движење, велат агенциите на Обединетите нации.

„Агенциите на Обединетите нации се сериозно загрижени поради условите во кои живеат овие лица. Двата главни центри за сместување се проектирани, изградени и опремени исклучиво како транзитни центри, со можност за згрижување на минувачки посетители најмногу до 24 часа. Тие не се центри за престој. Лицата што престојуваат во речиси празниот камп „Винојуг“ ги користат креветите на кат во контејнерите, но во Табановце има недостиг од кревети и мнозинството луѓе што престојуваат таму спијат на клупи, на подот во колективните засолништа или надвор во шатори. Немаат приватност. Често снемува струја. Греењето, кога надвор студи, и ладењето, кога надвор е топло, се несоодветни. Санитарните услови се примитивни. Слободата на движење е ограничена, што ги принудува луѓето да живеат во услови слични на притвор. Повеќето од луѓето во Табановце живеат во вакви услови повеќе од два месеца. Владата, агенциите на Обединетите нации и невладините организации направија големи напори за да ги приспособат центрите на новите потреби, но тие се сè уште несоодветни за подолг престој“, стои во соопштението на агенциите на ОН.

Условите во центарот во Визбегово за барателите на азил, се додава во соопштението, се исто така незадоволителни, мигрантите добиваат неквалитетна храна и во недоволни количества, хигиената е на ниско ниво, нема топла вода, нема реквизити и можности за рекреација и пристапот до информации е несоодветен.

Агенциите на ОН бараат од Владата да преземе итни мерки за подобрување на состојбата со сместувањето на мигрантите и на бегалците.

„Ваквите тешки услови дополнително го зголемуваат и онака високиот ризик од сексуално и од родово насилство, особено каде што неизвесноста, наметнатата неактивност и материјалните ускратувања доведуваат до фрустрација. На жените и на девојчињата кои се соочуваат со ризик од експлоатација и од трговија со луѓе, треба да им се обезбеди дополнителна заштита. Агенциите на Обединетите нации бараат од Владата да преземе итни мерки за да ја подобри оваа ситуација, а конкретно на бегалците и на мигрантите да им понуди сместување кое е соодветно за подолгорочен престој. Агенциите на Обединетите нации се подготвени да обезбедат и техничка и финансиска поддршка за наоѓање решенија што ќе понудат поголемо почитување на човечкото достоинство и дополнителна заштита за големиот број ранливи лица“, се вели во соопштението.

Во транзитниот центар во Табановце, според ОН, во моментов се сместени 770 лица, а околу 138 престојуваат во центарот „Винојуг“, кај Гевгелија. Дополнително, 61 лице има во центарот за баратели на азил во Визбегово, каде што чекаат одлуки за поднесените барања за азил, а 12 ранливи поединци се сместени во куќа за згрижување во Скопје.


„Блумберг“: Путин ќе направи своја агенција за мерење на кредитни рејтинзи


Москва, 18 март, 2016 - 16:20 (META) 

Русија формираше сопствена бонитет-агенција, бидејќи големите странски агенции за мерење на кредитни рејтинзи почнаа да се повлекуваат од таа земја, пренесува њујоршката агенција „Блумберг.“

Во претходните три недели, „Муди“ (Moody’s Investors Service Inc) и „Фич“ (Fitch Ratings Ltd) соопштиле дека попрво ќе престанат да издаваат рејтинзи во Русија, отколку нивните разграноци во Москва да ги регулира руската влада.

„Стандард енд пурс“ соопштиле дека разговараат со руската централна банка за тоа како да продолжат со работа под новите правила.

Странските кредитни агенции се под притисок во Русија, бидејќи намалувањето на рејтингот на рускиот долг под ниво кое не е ризично, минатата година беше осудено како политички мотивирано, наведува „Блумберг“.

 


Партиите и сега ги мерат рејтинзите, но ги чуваат за пред избори


Скопје, 6 октомври, 2015 - 12:49 (META) 

Политичките партии редовно прават анкети и го мерат пулсот на јавноста, но резултатите ги држат во тајност и ги користат за внатрешна употреба, а не за информирање на јавноста.

Анкетите не се објавуваат и поради тоа што во овој период резултатите може да се многу променливи, или пак поради тоа што сегашните резултати едноставно не им одговараат на партиите.

Иако секогаш е добар период за анкети, освен летните месеци, комуниколозите велат дека идеален би бил периодот откако ќе завршат преговорите меѓу политичките партии, но и непосредно пред избори.

Никола Спасов од агенцијата за истражување на јавното мислење „Рејтинг“ вели дека анкетите што се објавуваат во јавноста не се оние што се нарачани од партиите туку од други организации.

– Сите политички партии постојано спроведуваат анкети, но ги користат за внатрепартиски потреби. Анкетите што се објавуваат во јавноста се оние што се прават по нарачка на други организации и на медиуми, а не на партиите. Овој период нема објавени истражувања затоа што нема нарачка од некој медиум или организација. Периодот за анкети е секогаш добар, но нема кој да ги нарача – вели Спасов.

Аналитичарот Петар Арсовски вели дека причината што нема објавени анкети е затоа што политичките случувања имаат забрзан тек, па резултатите од истражувањата можат да бидат погрешни.

– Сигурен сум дека политичките партии редовно прават анкети, но не ги објавуваат затоа што полтичката ситуација е многу менлива и случувањата имаат брз тек, па резултатите што се добиваат не се меродавни и се подложни на брзи промени. Партиите прават анкети и за да видат кои решенија се најпопуларни меѓу народот, па ги употребуваат во преговорите што ги водат со другите политички партии – вели Арсовски.

Владимир Божиновски од Институтот за политички истражувања (ИПИС) вели дека периодов не прават политички анкети и очекува партиите да се активираат во истражување на јавното мислење откако ќе завршат преговорите.

– Периодов во нашата агенција има многу работа, редовно се прават анкети, но не политички. Најверојатно, партиите подоцна ќе се активираат, откако ќе завршат преговорите за да видат дали преговорите имале некакво влијание врз јавноста пред избори. Поинтересен период за анкети е кога ќе завршат преговорите за да се испита пулсот на јавноста за сите случувања од февруари досега. Нашата агенција, откако ќе завршат преговорите, ќе направи една анкета со која ќе го провери мислењето на јавноста за целата политичка ситуација, но и рејтингот на партиите – вели Божиновски.

Последната објавена анкета со која беше измерен рејтингот на партиите е теренската анкета на американскиот Меѓународен републикански институт (ИРИ) со седиште во Вашингтон, спроведена од 6 до 15 јуни, врз репрезентативен примерок од 1.105 испитаници.

Анкетата покажа дека ВМРО-ДПМНЕ има двојна предност пред СДСМ, односно за ВМРО-ДПМНЕ би гласале 23 отсто од граѓаните, наспроти СДСМ, за кој се одлучиле 11 отсто од анкетираните. За ДУИ се изјасниле 7 проценти, а за ДПА – 3 отсто од испитаниците.

Според истражувањето, во премиерот Никола Груевски тогаш верувале 18 проценти од испитаниците, а во Заев – 7 отсто. Али Ахмети беше веднаш зад него со 6 отсто доверба, а во Менудх Тачи верувале 2 отсто.

Последната анкета нарачана од медиум беше анкетата на Институтот за демократија „Социетас цивилис“ (ИДСЦС) и на Македонскиот центар за меѓународна соработка (МЦМС), во соработка со телевизија „Телма“, за аферата „Прислушување“. Истражувањето беше спроведено во периодот од 19 февруари до 2 март 2015 година, а објавено на 6 март.


Јавната администрација уште се дума за грчките плажи


Скопје, 2 јули, 2015 - 14:17 (META) 

Откажување на туристичките аранжмани за Грција нема, но продажбата во агенциите е послаба во однос на претходните години.

Во оваа насока говори и фактот што во некои од нив, и во шпицот на сезоната, можат да се најдат слободни места за туристичките дестинации што ги нудат, па дури и за најбараните во Грција.

Како што не било случај досега, во ек на сезона, агенциите оставаат простор за калкулација од страна на клиентите, кои можат и пред заминување да го уплатат аранжманот.

Од агенциите велат дека и покрај тоа што за нив најважни за продажба се овие два месеци, аранжманите не се продаваат според очекуваното.

Објаснувањата за оваа состојба, според нив, е воздржаноста на вработените во јавната администрација, кои се нивни клиенти, а сега, поради политичката криза, „калкулираат“ во однос на уплатата за одмор.

И секогаш кога е криза или се некакви избори, ситуацијата во областа на туризмот е иста.


Партиите тајно го мерат и го кријат рејтингот


Скопје, 23 мај, 2015 - 11:03 (META) 

Изминативе неколку дена на социјалните мрежи се појавија резултати од анкети што, наводно, ги правеле политичките партии.

Некаде пишува дека СДСМ е со водство пред ВМРО-ДПНЕ со 21 спрема 13 отсто, а некаде, пак, дека владејачката партија е во предност 26 спрема 18 отсто за опозициската партија.

Според неофицијални информации, рејтингот на ВМРО-ДПМНЕ сè уште е за неколку проценти повисок од тој на опозициската партија. Според нашиот извор, причина за тоа е негативната кампања што СДСМ ја води.

– Со секоја „бомба“ рејтингот на ВМРО-ДПМНЕ опаѓа, но рејтингот на СДСМ останува ист. Тоа е нормално кога една од партиите води негативна кампања – вели нашиот соговорник.

Никој од политичките партии не потврдува јавно дали имаат направено анкети и какви се резултатите.

Се јавивме кај неколку аналитичари и во агенции за истражување на рејтингот за да провериме дали политичарите изминатиов период прават анкети за нивната популарност кај граѓаните.

Никола Спасов од Агенцијата за истражување на јавното мислење „Рејтинг“ ни потврди дека политичките партии нарачувале анкети за мерење на популарноста.

– Да, имаме нарачки за анкети, но не се јавни, туку се само за потребите на партиите – ни одговори Спасов.

Владимир Божиновски од Институтот за политички истражувања вели дека кога ќе заврши оваа ситуација, ќе направат анкета и ќе ги објават податоците за рејтингот на политичките партии.

Аналитичаите Петар Арсовски и Ѓорги Кимов велат дека засега и кај нив нема нарачки на анкети.