БЕСА на Африм Гаши: Ние ќе гласаме за уставните измени


Скопје, 11 јануари, 2019 - 14:05 (META) 

Тројцата пратеници од БЕСА кои припаѓаат на делот што за претседател го признава Африм Гаши, а не Биљал Касами, ќе гласаат за уставните измени.

Како што соопшти Гаши, тие се цврсто решени за евроинтеграциите и ќе ги поддржат измените на Уставот заради исполнување на обврските од Преспанскиот договор. Тоа е од висок интерес за Албанците, нагласи тој.

„БЕСА со своите три пратеници останува силно посветена на усвојување на уставните измени и членството на земјата во НАТО, убедена дека на тој начин се реализира и еден дел од нашата програма, но и еден висок интерес на Албанците во Македонија, кој воедно е и стратешка цел на државата.Сега, кога е актуелна улогата на пратениците за очекуваните уставни измени, а двајца пратеници, дојдени некогаш од една друга партија во Движењето БЕСА му се спротивставуваат на овој процес, бараме од медиумите да имаат разбирање за овие разлики и секогаш кога треба да информираат за ставот ПРОТИВ на тие пратеници, да ги споменуваат преку нивните лични имиња или преку фракцијата која ја претставуваат“, порача Гаши.


Алијанса за Албанците и БЕСА на Касами ќе поднесат амандмани за Албанците


Скопје, 22 октомври, 2018 - 17:11 (META) 

Алијанса за Албанците (АА) и крилото на БЕСА предводено од Биљал Касами ќе поднесат амандмани за албанскиот јазик и за преамбулата, во текот на расправата за уставните измени кои се прават поради исполнување на обврските од Преспанскиот договор, јави „Порталб“.

ДУИ, крилото на БЕСА предводено од Африм Гаши, НДП и ДПА сметаат дека сега не е време за поднесување амандмани, туку е многу побитно да се отвори евроатлантскиот пат за Македонија. Артан Груби од ДУИ дури најавите за „албански амандмани“ ги нарече „неписмен, незналечки фолклоризам на ситните партии, отсуство на политичко-партиски идентитет, недостиг на знаење, некреативност и за неуспешен обид да се наметнат како фактор на мала врата, но го немаат клучот да го отклучат“.

БЕСА на Касами ќе поднесе амандмани за целосна еднаквост на Албанците во Македонија и целосна официjализација на албанскиот јазик, а не како што се наведува сега, за „јазикот што го зборуваат 20 отсто од граѓаните“.

-Како политичка партија најавивме дека ќе бидеме дел од процесот на усвојување на уставните измени, при што ќе интервенираме со уставни амандмани за подобрување на правата на Албанците. Не можеме да прифатиме по 27 години да ги оставаме овие права за „подобри времиња“. Цениме дека сега е времето да се отворат овие прашања. Го поддржуваме Договорот од Преспа, но напоредно ќе интервенираме со амандмани откако Владата ќе го достави предлогот. Не кажуваме ништо ново, нема нови работи. Ќе бараме целосна еднаквост на Албанците во Македонија, Албанците не може да се третираат како малцинство и ќе бараме албанскиот јазик да биде официјален – вели Фадил Зендели, заменик на Касами, за „Порталб“.

Тој не кажува дали својата поддршка за другите амандмани ќе ја условат со поддршката на нивните.

И Алијанса за Албанците, како што претходно најавуваше, ќе поднесе амандмани за албанскиот јазик и за преамбулата на Уставот.

– Ние предупредивме дека ќе поднесеме амандмани, но првин ќе го видиме владиниот предлог, за да видиме што содржи, и потоа ќе решиме. Ќе поднесеме амандмани за преамбулата и за албанскиот јазик – изјави пратеникот Сурија Рашиди за „Порталб“.

Албанските партии од владината коалиција, пак, порачуваат дека сега е најважно да се донесат уставните измени за да стапи на сила Договорот од Преспа и да се отвори евроатлантската патека на Македонија. Артан Груби од ДУИ порачува дека амандмани за албанското јазично прашање и за менување на преамбулата ќе бидат само дневно-политичка пропаганда и се „продавање магла“.

-Амандмани треба да се поднесуваат само за предложените членови на Уставот, а не и за други нешта. Овој неписмен, незналечки фолклоризам на ситните партии зборува за отсуство на политичко-партиски идентитет и зборува за недостиг на знаење, некреативност и за неуспешен обид да се наметнат како фактор на мала врата, но го немаат клучот да ја отклучат. Оние што ги затвораа очите и молчеа кога се остваруваа националните права, денес, заостанати и со незнаење, откако преспаа 15 години, се обидуваат да продаваат магла. Патот на земјата кон НАТО и ЕУ не смее на никој начин да биде попречен, а најмалку за сувопарна пропаганда – вели Груби во изјава за „Порталб“.

И од БЕСА на Африм Гаши велат дека е битно да се усвои Преспанскиот договор и, според нив, сега нема поголем интерес за Албанците од влезот на Македонија во НАТО.

Весел Мемеди од НДП, вели дека не треба процесот на спроведување на Договорот од Преспа да се условува со други амандмани, оти тоа би им служело на деструктивните сили во земјава и во регионот.

И од ДПА велат дека не е променет нивниот став дека ќе го поддржат Договорот од Преспа, пишува „Порталб“.


Не работевме против референдумот, го демантираат Коѕиас двете крила на БЕСА


Скопје, 4 октомври, 2018 - 13:51 (META) 

И двете крила на движењето Беса реагираа на изјавата на грчкиот министер за надворешни работи Никос Коѕиас дека движењето БЕСА водело кампања против референдумот, порачувајќи дека тоа не е точно, јави „Порталб“.

– Помалите албански партии, како партијата БЕСА, за која турскиот печат вели дека е финансирана од Турција, повика на бојкот на референдумот. Нашите граѓани треба да се запрашаат дали тоа е поврзан со црни сценарија од Турција – рече Коѕиас во интервјуто за грчката државна телевизија ЕРТ.

– Во овој момент нема да се спуштиме на тоа ниво на комуникација со првиот човек на грчката дипломатија. Бројот на Албанците што излегоа на референдумот е точно или приближно колку на парламентарните избори, па сметаме дека Коѕиас е дезинформиран во врска со движењето БЕСА и неговата вистинска вклученост во референдумската кампања – вели за „Порталб“ Елмедин Мемиши, портпарол на крилото на БЕСА предводено од Биљал Касами.

Другото крило, предводено од Африм Гаши, исто така реагира на изјавата на Коѕиас, посочувајќи дека ги вклучиле сите капацитети во поддршка на референдумот. Дополнително, ќе испратат и протестна нота до грчката Канцеларија за врски во Скопје.

– Покрај тоа што е ова недостојно за еден министер за надворешни работи – бидејќи движењето БЕСА, како партија од владината коалиција ги вклучи сите капацитети за поддршка на референдумот во сите области каде има освоено гласови, а референдумот надмина 50%, несериозноста на грчката дипломатија да гради дипломатски ставови врз основа на медиумски шпекулации и оцрнување на домашните политички опоненти во Македонија, Движењето БЕСА денеска ќе испрати протестна нота до грчката амбасада во Скопје и ќе побара министерот Коѕиас да се извини или да приложи докази за кои би ја поткрепиле неговата изјава. Ако се зборува за бројките, треба да се запрашаме какво странско влијание имаше во Кичево и Струга, каде БЕСА нема стабилно гласачко тело – велат од крилото на Гаши.


Апелација донела одлука во корист на Беса на Африм Гаши


Скопје, 8 јуни, 2018 - 16:04 (META) 

Апелациониот суд донел одлука во корист на крилото на Беса предводено од Африм Гаши, од каде што велат дека правдата, конечно, се вратила и дека се потврдило дека Движењето Беса им припаѓа на своите основачи.

– Апелациониот суд донесе одлука елаборирана на пет страници за поништување на првостепената судска одлука и предметот да се врати на разгледување во Основниот суд. Притоа, Апелациониот суд дава и десетина забелешки и препораки, кои Основниот суд не ги зел предвид во првостепената одлука, а тие се клучни за донесување пресуда за предметот. Затоа, денес сум тука да ви кажам дека и покрај сите измислици, шпекулации и невистини, кои беа поттикнати од тие што фалсификуваа и имиња на личности во нивна корист, сепак правдата дојде на своето место – порача генералниот секретар на партијата, Скендер Реџепи.

Од крилото на Касами реагираа дека судот донел скандалозна одлука, врз основа на фалсификувани документи, под политичко влијание откако одредени лица влегле во владата.

-Фактот дека Апелациониот суд примил фалсификувани докази, кои не се претставени во првостепена постапка, и ги примил документите со печат, кој Движењето Беса го прогласил за неважечки, докажува дека овој процес сега се трансформира во чисто политички процес. Јавно ги прашуваме судиите на Апелациониот суд – што ги поттикна да донесуваат таква скандалозна одлука на денот кога се гласаше Владата? Дали учеството во Владата на одредени лица влијаело на нивната одлука, која може да се нарече сè, но не правна и законска одлука – изјави портпаролот Абдуш Демири.

Движењето Беса се подели на две крила, едното предводено од Билал Касами, кое остана во опозиција, а другото за претседател го избра Африм Гаши и од пред една недела стана дела од владејачката гарнитура.


Касами бара Гаши да го врати пратеничкиот мандат


Струга, 22 мај, 2018 - 11:52 (META) 

Билал Касами, претседател на тетовското крило на Беса, вчера од Струга му порача на Африм Гаши, претседател на скопското крило на Беса да формира нова партија доколку има барем малку достоинство.

– Пратеникот Африм Гаши ако има минимално достоинство треба да го врати мандатот, да формира свој политички субјект, да се натпреварува на изборите и да ги бара гласовите од електоратот – рече Касами за „Струга експрес“ на прашање која Беса е посилна, таа на Касами или на Гаши.

Касами е дециден дека има само една Беса.


БЕСА: Ќе раководиме со Министерството за култура, името допрва ќе го соопштиме


Скопје, 16 мај, 2018 - 11:01 (META) 

Движењето БЕСА односно крилото на Африм Гаши потврди дека ќе стане дел од владината коалиција и дека го добила ресорот култура во новиот владин кабинет.

По состанокот на Централното претседателство на Движењето БЕСА и Централното собрание беше соопштено дека е позитивно одговорено на понудата на премиерот да станат дел од парламентарното мнозинство и на извршната власт.

Името на идниот министер за култура не е соопштено, а од БЕСА појаснија дека Централното собрание го овластило Централното претседателство да направи избор од листата предлози од партиските структури.

Зекирија Ибрахими, кандидат за градоначалник на Чаир на последните локални избори вчера рече дека не сака да ја преземе министерската функција.


Ибрахими: И да ме предложат, нема да прифатам да бидам министер!


Скопје, 15 мај, 2018 - 12:07 (META) 

Нема да прифатам министерска функција ако ме предложат, вели Зеќирија Ибрахими, член на Централното претседателство на движењето БЕСА, поточно на крилото на Африм Гаши, на прашањето од „Порталб“ дали се точни пишувањата во медиумите дека тој ќе биде новиот министер за култура.

– Уште не сме дошле до таа фаза, но дури и да ме предложат, нема да прифатам да бидам министер – одговори Ибрахими на прашањето од новинарот на „Порталб“.

Според пишувањата на медиумите вчеравечер и денеска, Ибрахими би го зел ресорот Култура во владата на Зоран Заев по реконструкцијата. Тоа, според шпекулациите, било договорено во преговорите на премиерот со парламентарните партии што сега се надвор од владината коалиција.

Се очекува денеска да се произнесе и ДПА на Мендух Тачи, за која исто така се шпекулира дека добила едно министерско место во новиот владин кабинет.

Реконструкцијата Заев ја најави уште во февруари.


Касами објави дека со судска одлука останува претседател на Беса, Гаши вели дека лаже


Скопје, 3 април, 2018 - 16:14 (META) 

Препукување меѓу двете крила на Движењето Беса се случи денеска, откако Биљал Касами објави дека со судска одлука, тој е претседател на Беса. Набргу одговори водачот на спротивставеното крило, Африм Гаши, кој тие наводи ги нарече измама. Тој рече дека работите ќе ги утврди вистински Управниот суд. Гаши отиде и чекор понатаму и го нарече противничкиот табор „фалсификатори“ и најави дека ќе поднесе тужба за фалсификат пред Управниот суд, како и кривична пријава во Јавното обвинителство.

Билал Касами, претседателот на Беса сè до поделбите во јануари годинава, откако стои на чело на едното од двете крила, денеска на прес конференција објави дека Основниот суд Скопје 2 донел одлука која како што рече потврдила дека Движењето Беса е единствена партија, односно дека неговото крило е легитимниот претставник на партијата.

Според решението од Основен суд Скопје 2 што го презентираше Касами, барањето за упис на промени во Судскиот регистар на политички партии поднесено од крилото на Африм Гаши, со кое се доставени записници од првиот конгрес на движењето на 18 феруари години и изборот на претседател на партијата, е одбиено. Со тоа, според Касами, тој е единствениот претседател на партијата.

– Движењето Беса е едно, а тоа сме ние. Со оваа одлука на судот се отфрла неоснованото барање на неформалната група, што укажува на тоа дека партиските тела ги избираат нејзините членови, а не од сомнителни кругови кои не го сакаат доброто на Албанците и кои не се во служба на Албанците – рече Касами.

Досегашниот претседател ги повика сите сопартијци да се вратат во Беса каде им се отворени вратите.

По повеќе од час и половина прес-конференција одржа и Африм Гаши, кој рече дека одлуката на Основен суд Скопје 2 е само првостепена одлука. Тој крилото на Касами го нарече фалсификатори и порача дека вистинската ситуација ќе ја одреди Управниот суд, кој ќе треба да решава за фалсификат, а најави и кривична пријава до Јавното обвинителство.

-Всушност се работи само за првостепена одлука, која е донесена врз фалсификуваните документи од претходниот правен застапник на Беса. Но, судскиот спор продолжува. Тука сме да објасниме и дека Основниот суд повторно и многу брзо ќе се произнесе пак, по одлуката на Управниот суд за фалсификување на документи и нивно поништување, а се очекува и разрешница од кривичната пријава доставена до Јавното обвинителство кон Фалсификаторот, со што несомнено би следело и промена на првостепената одлука – рече Африм Гаши.

Тој го повика  членството и подржувачите на Движењето Беса „да не подлегнуваат на измамите на тие кои знаат да фалсификуваат сешто и на крај стануваат заложници на нивното фалсификување“.


Села, Гаши и Мухиќ тврдат дека гласале за Законот, но системот не ги регистрирал


Скопје, 15 март, 2018 - 13:10 (META) 

Пратениците Ферид Мухиќ, Африм Гаши и Зијадин Села на денешната собраниска седница рекоа дека вчера гласале за Законот за употреба на јазиците, a електронскиот систем не ги регистрирал.

Мухиќ, кој е пратеник од СДСМ, рече дека е целосно уверен дека Законот е добар за граѓаните и затоа гласал, иако на стенограмот не го пишува тоа.

– Ме прашуваат зошто не сум гласал, кога јасно се гледа дека кренав рака кога се гласаше по Бадентер. Она што се случило не може никој да направи како да не се случило. Со оваа изјава сакам да го изразам целото мое уверување дека овој Закон е уставен и е за доброто на сите граѓани и за државата – рече Мухиќ.

Иста забелешка имаше и Гаши од Беса кој додаде дека тој гласал и во првото и во второто читање и потенцираше дека го подржува Законот.

– Изразената волја на еден пратеник е поважна од електронското гласање. Гласав за овој Закон и стојам зад него. Дека гласав се гледа и на снимката за време на гласањето на немнозинските заедници кога кренав рака – рече Гаши.

Лидерот на Алијансата за Албанците, побара од собраниските служби да му достават видео материјали на кои се гледа дека тој гласа „за“.

– Барам подетално да се разгледа постапката на гласање. Тука бев преку целиот ден и гласав за Законот за употреба на јазиците. Јас за овој Закон гласав во секоја фаза, и за бадентеровото мнозинство кренав рака. Вие како претседател на Собранието ќе треба да го објасните ова. Сакам да им честитам на сите пратеници кои гласаа за Законот и на целото општество да му порачам дека преку овој закон сме побогати и поправични и дека овие средства не треба да се користат за лечење на фрустрации – рече Села.

Претседателот на Собранието, Талат Џафери, рече дека сега технички не може да се направи некаква исправка, но дека на снимките јасно се гледа дека пратениците гласале при второто гласање според бадентерово мнозинство со кревање на рака, бидејќи, како што рече, била истурена вода на електронскиот систем за гласање.


Тетовското крило на Беса в сабота ќе бира лидер, скопското вчера го избра Гаши


Скопје, 19 февруари, 2018 - 14:04 (META) 

Крилото на досегашниот претседател на Движењето Беса, Билал Касами, објави дека партијата ќе го одржи својот прв партиски конгрес на 24 февруари. Вчера, пак, скопското крило одржа конгрес на кој за претседател беше избран Африм Гаши.

Абдуш Демири, најавувајќи го конгресот на денешната прес-конференција на партијата во седиштето во Скопје, рече дека нема да коментираат собири на „други партии и групи“.

-Ние не коментираме собири на други партии и групи. Овде сме да коментираме само ставови на движењето Беса. Политичките партии се регистрирани во централниот регистар и можат да имаат само еден конгрес. После завршувањето на конгресот, ние целокупната документација од конгресот, ќе ја доставиме до судот. Движењето Беса има само еден конгрес и тој ќе се одржи на 24 февруари во Скопје – потенцираше Демири.

Тој рече дека секој кој што сака да се кандидира за претседател на Беса, треба да собере најмалку една десетина од вкупниот број на пријавени делегати за конгресот на 24 февруари.

– За првиот конгрес евидентирани се вкупно 505 делегати со територијална распределба врз основа на пропорцијата предвидена во Деловникот за организирање на конгрес. Бидејќи се знае листата на делегатите, ние ги охрабруваме сите кандидати во согласност со статутарните норми, да собираат потписи и да се натпреваруваат за функцијата – додаде Демири.

Скопското крило на Движењето Беса вчера го избра Африм Гаши за нов претседател. Од вкупно 575 делегати, за него на конгресот во Тетово гласале 522. Гаши вети дека отсега БЕСА ќе биде партија на сите народи што живеат во Македонија и што ги бараат своите права. Тој потенцираше дека приоритет ќе бидат евроатлантската интеграција на земјата, подобар живот за граѓаните и еднаква правда за сите.

И од скопскиот и тетовскиот огранок на Беса велат дека чекаат судска одлука, за тоа кое крило ќе ги задржи името, логото и печатот на партијата.