!На 1 февруари 2017 година, завршува промотивниот период на слободно користење, без регистрација и без претплата, на содржините на „Мета“, кое беше воведено за да им овозможиме полесен пристап на корисниците до навремени и проверени вести. За начинот на пристап и за претплата, од 1 февруари 2017 година ќе информираме дополнително. При пренесувањето и преземањето на содржините од „Мета“, задолжително е атрибуирање и линкување.

Пет лица се убиени во напад на аеродром во Флорида


Мајами, 7 јануари, 2017 - 10:33 (META) 

Најмалку пет лица загинаа, откако напаѓач вчера попладнето отвори оган на меѓународниот аеродром Форт Лодердејл, на Флорида, пренесуват британските медиуми, повикувајќи се на официјални претставници и на сведоци.

– Во инцидентот пет лица се убиени, а осуммина се ранети – соопштија од канцеларијата на локалниот шериф.

Телевизијата „Ем-ес-ен-би-си“, повикувајќи се на очевидци, јавува дека напаѓачот е маж во 20-тите години и оти директно пукал во патниците кои го чекале багажот. Полицијата го застрелала кога се обидел да избега, по што е приведен.

Американските медиуми, повикувајќи се на претставник на американските правосудни власти, јавуваат дека напаѓачот е идентификуван. Станува збор за 26-годишниот Естебан Сантијаго, кој за ФБИ во ноември минатата година изјавил дека владата го контролира неговиот ум и го принудува да гледа видеоснимки на групата Исламска држава.

Роднини на напаѓачот изјавиле дека Сантијаго имал психички проблеми, од кои некои се појавиле по завршување на неговата мисија во Ирак, за што почнал да добива лекување во својот дом на Аљаска.

Веднаш по апсењето, Сантијаго е однесен на психијатриска проценка.

Напаѓачот во Форт Лодердејл пристигнал со лет од Енкориџ, а оружјето што кое употребил било скриено во неговиот единствен пријавен багаж. Полицијата вели дека не е необично патници на аеродромот со багажот да го чекираат и своето огнено оружје, затоа што во регионот има многу ловци.


Шест лица убиени на аеродромот во Кандахар


Кандахар, 17 декември, 2016 - 13:14 (META) 

Најмалку шест лица се убиени на аеродромот во авганистанската провинција Кандахар. Најмалку тројца вооружени мотоциклисти отвориле оган врз автомобилот со кој службенички оделе на работа.

Како што соопшти директорот на аеродромот, службеничките работеле за приватна авиокомпанија, која го прегледувала багажот и по потреба ги претресувале патниците на аеродромот.

Засега никој не ја презеде одговорноста за нападот.


Ишаран штабот на НСДП во општина Аеродром по синоќешниот митинг на опозицијата


Скопје, 23 ноември, 2016 - 13:46 (META) 

Изборниот штаб на НСДП во скопската општина Аеродром, лоциран во трговскиот центар „Бисер“, ноќеска бил ишаран со пораки со политичка содржина. Партијата го пријавила инцидентот во МВР.

„Имајќи предвид дека овој вандалски чин се случи непосредно по завршувањето на големиот предизборен митинг на здружената опозиција, како и самата содржина на пораките, очигледно е дека станува збор за политички мотивиран настан кој зборува за паниката и за нервозата во владејачката партија од резултатите на претстојните избори“, велат од НСДП.

Од партијата додаваат дека познато е дека демолирањето партиски штабови, насилството и вандализмот се дел од политичкиот арсенал на ВМРО-ДПМНЕ, кон кој посегнува во клучни политички моменти.

Од НСДП порачуваат дека инцидентите, пораките на заплашување или вандалското однесување на кои било политички фактори во земјава, нема ја обесхрабрат партијата да се вложи максимум во поразот на, како што велат, авторитарната власт во Македонија.


Престрелка на аеродромот во Оклахома, убиен еден вработен


Оклахома, 16 ноември, 2016 - 10:07 (META) 

Едно лице е убиено во пукање на главниот аеродром во Оклахома Сити, „Вил Роџерс“, поради што е прекинат авионскиот сообраќај. Американските медиуми јавуваат дека престрелката настанала на паркиралиштето и оти убеиниот бил вработен на аеродром.

Претставници на полицијата рекоа дека сите околни улици се блокирани и ги предупредија жителите да го избегнуваат тој дел од градот.

Според последните информации, осомничениот напаѓач е пронајден мртов во возило. Полицијата соопшти дека тој добил прострелна рана за време на престрелката и оти подоцона им подлегнал на повредите.


„Рајската градина“, иако недовршена, дење е рај за прошетки, ноќе место за пеколни забави


Скопје, 1 ноември, 2016 - 9:50 (META) 

Недовршената рајска градина во општината Аеродром преку ден е рај за прошетки на родители и на деца, а навечер е место за пеколни забави на младите.

Тендерот за проектот за паркот неодамна беше поништен, а градежните активности се прекинати. Тоа што може да се забележи на локацијата се големи тревници, неколку летниковци, непоплочени патеки, клупи за седење, канти за отпадоци и поставени бандери за улично осветлување без светилки. Преку ден граѓаните честопати го користат недовршениот парк за прошетка, а поради широкото зелено пространство, има и летачи на дронови.

„Она што загрижува е тоа што се случува во паркот навечер. Се собираат млади луѓе, ги користат летниковците како место за дружење и притоа не внимаваат на хигиената. Понекогаш дури и ги паркираат автомобилите во паркот за да слушаат музика. Изгледа тоа е ноќната шема на младите овде“, вели жител на Лисиче, кој живее во непосредна близина на недовршениот парк.

Урбаната опрема во паркот не е оштетена. Клупите и летниковците се во добра состојба, а тревниците се гледа дека се редовно одржувани. Но, она што паѓа в очи се многубројните отпадоци, меѓу кои и празни шишиња од алкохолни пијалоци.

Од Општина Аеродром велат дека сè уште нема информации за конкретни планови за иднината на тој парк.


„Виз ер“ воведува нова линија Скопје – Хановер


Скопје, 28 октомври, 2016 - 13:27 (META) 

„Виз ер“ ќе воведе нова авиолинија на релација Скопје – Хановер од 31 октомври. Летовите ќе се одвиваат во понеделник и во петок од аеродромот „Александар Велики“ кон Хановер и во вторник и во сабота до Скопје.

Хановер е 23. дестинација со која „Виз ер“ оперира од скопскиот аеродром „Александар Велики“, а истовремено деветта дестинација од Скопје и од Македонија до Германија.

– Очекуваме оваа авиолинија да се покаже како успешна и да ги поврзува нашите патници со Германија, од деловни и образовни причини или, пак, за одмор и за релаксација, а во исто време да донесе и германски туристи и бизнисмени во Македонија – истакна генералениот директор на „ТАВ Македонија“, Зоран Крстевски.

Скопскиот аеродром „Александар Велики“ нуди директни линии до 33 дестинации, а заедно со охридскиот аеродром „Св. Апостол Павле“, Македонија во моментов има авионска врска со вкупно 35 дестинации.

Првите девет месеци имало 17 проценти повеќе патници превезени на двата македонски аеродрома „Александар Велики“ во Скопје и „Св. Апостол Павле“ во Охрид, споредено со истиот период минатата година, достигнувајќи вкупно 1.382.714 патници.


Русинка уапсена на аеродромот во Атина со 2,2 милиони евра


Москва, 15 октомври, 2016 - 15:28 (META) 

Државјанка на Русија била уапсена на аеродромот во Атина откако цариниците кај неа пронашле повеќе од 2,2 милиони евра и 58.900 долари во готовина.

Русинката во Атина пристигнала од Москва со летот на руската авиокомпанија „Аерофлот“, пренесе грчката новинска агенција АНА.

Цариниците веднаш ѝ одзеле 25 отсто од парите кои ги имала со себе, казна предвидена со законот.

Органите задолжени за истражување на случаите со перење пари ќе спроведат истрага и доколку руската државјанка не докаже дека парите потекнуваат од легални извори, ќе ѝ бидат одземени сите пари.


Шест лица загинаа во падот на италијанскиот авион


Скопје, 7 септември, 2016 - 9:02 (META) 

Шест лица, од кои пет мажи и една жена загинаа во падот на авионот „пајпер“ што вчера попладне се урна во близина на скопскиот аеродром „Александар Велики“, во атарот на селото Кожле.

Како што објавија италијанските медиуми, авионот го управувал пилотот Франческо Монтањер, претседател на аероклубот во Тревизо, а во него биле уште потпретседателот на клубот Дарио Бастасин, како и Лука Дале Муле, Италијанката Илариа Берти, Ангело Калегари и Косовецот со италијански пасош Висар Бегај.

Според рутата, авионот требало од Тревизо да слета во Скопје за да наполни гориво, а потоа да се упати кон Приштина, но два километра пред пистата леталото се губи од радарот.

Истрагата е во тек и засега нема информации што довело до падот на авионот.


Обвинителството работи на расветлување на авионската несреќа


Скопје, 6 септември, 2016 - 21:28 (META) 

Јавното обвинителство презема дејства за расветлување на авионската несреќа што попладнево се случи во близина на Скопје.

„По добиените сознанија, обвинителството во координација со надлежните институции презема мерки за утврдување на местото на несреќата, негово обезбедување и за понатамошно постапување. Истовремено се прибираат податоци и релевантни факти во насока на утврдување на причините за несреќата. Со подетални информации јавноста ќе биде дополнително запознаена“, стои во соопштението од обвинителството.


Полицијата ги пронајде остатоците од урнатиот авион


Скопје, 6 септември, 2016 - 21:21 (META) 

Полицијата ги пронајде остатоците од урнатиот авион во близина на селото Кожле, Катлановско. Сè уште се трага по патниците.

Авионот попладнево исчезна од радарите на скопскиот аеродром, a неофицијално се дознава дека во авионот имало шест патници.

Жителите на околните села чуле силна експлозија, по што повикале полиција.

Авион со приватен комерцијален лет попладнево исчезнал од радарот во близина на скопскиот аеродром. Како што се дознава, станува збор за авион кој летал од Италија и исчезнал во близина на Скопје.