Адвокатите во Србија една недела во штрајк поради убиството на нивни колега


Белград, 30 јули, 2018 - 11:13 (META) 

Адвокатите во Србија денеска почнаа еднонеделен целосен прекин на работата, поради убиството на нивниот колега Драгослав Миша Огњановиќ во саботата, соопшти Адвокатската комора на Србија. Во соопштението се напоменува дека станува збор за целосен прекин на работата, што значи дека адвокатите нема да примаат ниту итни притворски предмети.
Педесет и седумгодишниот Огњановиќ беше застрелан пред влезот на зградата во која живееше во Нов Белград. При нападот е ранет и неговиот 26-годишен син. Во текот на својата кариера Огњановиќ им беше адвокат на водачот на „Земунскиот клан“, Лука Бојовиќ, на поранешниот српски претседател Слободан Милошевиќ пред Хашкиот трибунал, како и на неговата сопруга Мира Марковиќ.


Адвокатска комора ја намали адвокатската тарифа за нотарските договори за повеќе од 10.000 евра


Скопје, 3 февруари, 2017 - 14:11 (META) 

Адвокатската комора на Република Македонија денеска соопшти дека донела одлука за намалување на адвокатската тарифа за нотарските договори со вредност поголема од 10.000 евра.

„Во интерес на што поголемо растоварување на граѓаните, како и на стопанските субјекти, а како што беше најавено и при донесувањето на Законот за нотаријат, управниот одбор на Адвокатската комора на Република Македонија донесе одлука за намалување на адвокатската тарифа во однос на договорите со вредност поголема од 10.000 евра, кои во согласност со новиот Закон за нотаријат задолжително треба да бидат подготвени од адвокат. Воедно, за состав на овие договори повеќе нема да се пресметува ни износот од 30 отсто на име паушал“, стои во соопштението од Адвокатската комора.

Оттаму додаваат дека, исто така, и во постапките за издавање платен налог, адвокатските трошоци ќе се пресметуваат во износ од 70 отсто од адвокатската награда и нема да се наплатува состав на полномошно и трошковник.

„Доколку ваквиот став на Адвокатската комора на Република Македонија го следат и другите субјекти во постапките, со намалување на надоместоците на нотарите и извршителите во постапките, ќе дојде до значително финансиско олеснување за граѓаните и за правните субјекти во остварување на нивните права во овие постапки“, велат од комората.


Адвокатска комора: Што побргу да се најде решение за штрајкот на УПОЗ


Скопје, 22 јуни, 2016 - 13:32 (META) 

Од Адвокатската комора на Македонија апелираат што поскоро да се најде прифатливо решение за штрајкот на вработените во судската администрација, затоа што, како што велат, и адвокатите трпат последици од неработењето на судовите.

„Адвокатската комора ги поддржува напорите на двете страни за што поскоро наоѓање на прифатливо решение за проблемите што се причина за штрајкот. Со целосно почитување на законското право на штрајк, нагласуваме дека и адвокатите трпат последици од неработењето на судовите, што уште повеќе го изразува интересот на Адвокатската комора за што поскоро завршување на штрајкот“, соопштуваат од Адвокатската комора.

Адвокатската комора го донела овој заклучок на седницата на управниот одбор одржана на 20 јуни и со заклучокот се обратила до Министерството за правда на Република Македонија, Судскиот совет на Република Македонија и до Синдикатот на работниците од управата, правосудните органи и здруженијата на граѓани на Република Македонија (УПОЗ).