Груевски денеска не се појави на суд, адвокатите бараат изземање на Јанева


Скопје, 5 септември, 2018 - 11:17 (META) 

Адвокатите на поранешниот премиер и лидер на ВМРО-ДПМНЕ, Никола Груевски побараа изземање на обвинителката Катица Јанева на денешното продолжение на јавната седница во Апелациониот суд, за жалбата за затворските казни за Груевски и Ѓоко Поповски во предметот „Тенк.“

По ова барање, беше дадена пауза, за Судскиот совет да реши како ќе продолжи седницата.

Груевски вчера на прес-конференција најави дека денеска нема да се појави во суд, бидејќи како што кажа „власта води политичка хајка против него и однапред се знае пресудата“.

На седницата не присуствуваат ниту неговите адвокати, кои го известиле судот дека се спречени да дојдат, бидејќи се ангажирани на другите предмети во Кривичниот суд. Ѓоко Поповски и неговите адвокати пак се присутни на седницата.

Во случајот на СЈО „Тенк“, Груевски во Кривичниот суд беше осуден на две години затвор како поттикнувач на делото за набавка на „мерцедесот“ од 600 илјади евра.


Апелација на роденденот на Груевски решава за пресудата за „Тенк“


Скопје, 31 август, 2018 - 9:51 (META) 

Во Апелациски суд – Скопје за денеска е закажана јавна седница по жалбата на поранешниот премиер Никола Груевски за пресудата од две години затвор во случајот „Тенк”, за набавката на луксузниот блиндиран „мерцедес”.

Инаку, на Груевски денеска му е роденден – полни 48 години.

Јавна седница требаше да се одржува вчера, но Груевски и неговиот адвокати не дојдоа, бидејќи беа на судскиот процес за случајот „Насилство во Општина Центар“.


Сите корисници да се запознаат со правните рамки за слободата на изразување на и вон интернет


Скопје, 13 април, 2018 - 9:52 (META) 

Постои голема потреба знаењата за правните рамки кои ја регулираат слободата на изразување онлајн, но и офлајн, да се усвојат од правосудните органи, правниците и генерално сите корисници на интернет на кои тие влијаат беше еден од заклучоците на денешната работилница организирана од Фондацијата „Метаморфозис“ во Клубот на новинари во Скопје.

 Основа за работилницата беше онлајн-публикацијата „Први чекори во разбирањето на слободата на изразување онлајн и офлајн“ чија подготовка е поддржана од страна на Американска адвокатска комора (АБА РОЛИ) и Стејт департментот, како дел од Проектот за Интернет слобода во Источна Европа и Евроазија која е достапна на осум јазици, меѓу кои и на англискимакедонски и албански.

„Иако голем број книги и правни истражувања за судиите или другите правници се објавени на оваа тема, ние веруваме дека сега има уште поголема потреба да се поедностават и објаснат основите на слободата на изразување, особено оние кои се применува во дигиталниот свет. Сето ова е претставено низ призмата на сегашната судска практика на Европскиот суд за човекови права (ЕСЧП), што треба да биде главната референтна точка за сите европски интернет корисници,“ сметаат уредниците на студијата Богдан Манолеа и Лиана Ганеа од романската организација за дигитални права АпТИ.

Работилницата е дел од серија едукативно-консултативни настани со претставници на државните институции, медиумите, образовниот и граѓанскиот сектор, чија цел е да се подигне јавната свест за основните концепти поврзани со слободата на изразување како и актуелните и релевантните стандарди на ЕСЧП кои се однесуваат на слободата на изразување на и вон интернет.

Дел од учесниците на дискусијата ја истакнаа потребата за континуирана едукација на вработените во правосудството во врска со онлајн светот, посочувајќи го недостатокот на знаења за човековите права и ниската медиумска писменост како основен проблем. Темите опфатени со студијата, одговорноста за содржините и услугите и ограничувањата на слободата на изразување поради низа причини (приватност, национална безбедност, заштита на здравје и морал, судски постапки, авторски права) се актуелни теми во Македонија кои треба да бидат третирани во поширока јавна расправа, а и како дел од образовниот систем уште од најмала возраст.

Во текот на дискусијата за блокирање на интернет, појава карактеристична за земји со авторитарен систем, искусниот новинар Љубомир Костовски посочи дека и во Македонија имаше такви случаи од страна на телеком оператори за политички цели, наведувајќи го случајот на полициската акција за приведување на „Паркобраните“ во 2013 година. Тој укажа дека од МВР е побарано да го истражи тој и сличните случаи на кршење на слободата на изразување во претходните години.

Присутните укажаа на потребата медиумите повеќе да обрнат внимание на овие прашања, потсетувајќи и на преседанот на блокирање на пристапот до Фејсбук во студентските домови од страна на Телеком по барање на МОН по избувнувањето на скандалот со лошите услови за живот во нив во 2014 година, за кој извести само еден домашен медиум („Порталб“).


Одложена расправата за „Титаник“, адвокатите бараат време за увид во доказите


Скопје, 2 април, 2018 - 12:16 (META) 

По речиси два часа изнесување на приговори од адвокатите на обвинитетите, пред почетокот на главната расправа за случајот „Титаник“, судијата Осман Шабани го одложи рочиштето за 12 април, за да им даде на бранителите дополнтелно време за увид во доказниот материјал од Специјалното јавно обвинителство (СЈО).

Четворица од адвокатите приговорија на листите на доказите доставени со цедињата заедно со обвинителниот акт. Тие приговараа дека во тие цедиња имало нови докази или пак недостасувале докази кои им биле приложени во текот на истражната постапка.

На таквите наводи реагираше обвинителката Лиле Стефанова од СЈО која кажа дека поголем дел од адвокатите веќе ги добиле уредно доказите и дека новите приговори се неосновани.

Дополнително, Боро Тасевски, адвокат на дел од обвинитите, меѓу кои и на градоначалникот на Пустец, Едмонд Темелко, побара јавно објавените прислушувани разговори да бидат изземени од доказите, а во прилог на тоа го наведе решението на Кривичниот совет за оценка на обвинителен акт при Основен суд Скопје 1, од ноември 2015 година.

Тој рече дека неговиот клиент Темелко кој за судењата патува од домашен притвор во Ресен, не може да издржи долго време да седи во судницата, поради неговата здравствена состојба.

Судијата Осман Шабани рече дека Судскиот совет тоа го има предвид, и дека секогаш кога на обвинетиот ќе му биде лошо, соодветно ќе реагира.


Адвокатите на Канческа – Милевска ги спорат вештачењата на СЈО, следното рочиште на 13 март


Скопје, 21 февруари, 2018 - 13:02 (META) 

Со приговори на одбраната околу вештачењето на доказите и за надлежноста на Специјалното јавно обвинителство помина првото рочиште од судскиот процес за случајот „Тендери“, во кој првообвинета е поранешната министерка за култура, Елизабета Канческа – Милевска.

Претседателот на судечкиот совет на Кривичниот суд во Скопје, Осман Шабани, го прекина рочиштето и следното го закажа за 13 март, кога ќе треба да се произнесе по приговорите на одбраната.

Адвокатите Сашо Дуковски и Еленко Миланов, на почетокот на денешното рочиште, реагираат до судот околу вештачењето на „ЕОС консалтинг“, кое го оценија како неообјективно. Според нив, станува збор за вештачење на поддржуница на италијанска, односно странска компанија, која не може да врши вештачења. Тие ја оспорија и лиценцата на потписникот на вештачењето, Страхил Глигоровски, која важела до 17 април 2017 година, а вештачењето било изготвено на 30 мај, истата година. Лиценцата на Глигоровски му била продолжена кон средината на јули 2017 година. Поради ова адвокатите бараат изземање на вештачењето и негово издвојување од другите материјали во предметот.

Адвокатката Сања Алексиќ рече дека барале од СЈО да им бидат предадени аудио-материјалите кои се дел од доказите, но, оти тоа не било направено, поради што сега бараат копии од нив. Алексиќ рече дека преку вештаци, кои ќе ангажираат, ќе бараат да се утврди дали прислушуваните разговори се монтирани и дали се целосни или се прекинати.

Адвокатите бараат и да се провери надлежноста на СЈО, односно дали тоа може да постапува во овој случај.

На приговорите на одбраната реагираше обвинителот на СЈО, Стевчо Донев, кој рече дека дел од нив биле изнесени и при поднесувањето на обвинението, но Советот за оценка на обвинителен акт ги одбил како неосновани. Во врска со приговорот за вештачењето, тој наведе дека кога била дадена наредбата за вештачење двајцата вештаци имале важечки лиценци.


Адвокатите се обидуваат да го спречат објавувањето на новата книга за Трамп


Вашингтон, 4 јануари, 2018 - 19:14 (META) 

Адвокатите на американскиот претседател Доналд Трамп се обидуваат да го спречат објавувањето на новата книга за претседателот на САД, во која тој е претставен како неук човек и милијардер-фалбаџија, јавуваат американските медиуми.

Книгата чиј автор е новинарот Мајкл Волф, насловена „Оган и бес: Во Белата куќа на Трамп“, излегува на 9 јануари.

Американскиот претседател вчера соопшти дека ги прекинал сите контакти со својот поранешен главен стратег и советник во неговиот изборен штаб за време на претседателски избори, Стив Бенон поради „навредливите коментари“ на сметка на семејството на Трамп.

„Стив Бенон нема ништо со мене или со моето претседателство. Кога беше отпуштен не само што ја загуби работата, туку го загуби и разумот“, наведе Трамп во соопштението за својот поранешен соработник.

Бенон во книгата, од која делови објави „Вашингтон пост“, наведува дека средбата на соработници и на членови на семејството на Трамп, меѓу кои и неговиот син, Доналд Трамп Јуниор и неговиот зет Џаред Кушнер, со руски претставници во јуни 2016 година во „Кулата Трамп“ во Њујорк била „предавничка“ и „непатриотска“.

„Вашингтон пост“ денеска објави дека адвокатот на Трамп, Чарлс Хардер се обидува да го спречи објавувањето на книгата во која Трамп е претставен како милијардер-фалбаџија кој не ни сакал да стане претседател, туку дека намерата му била со претседателската кампања да го зајакне својот бренд.

За претседателот на САД се наведува дека не знае многу работи и дека не може да сфати сложени проблеми.

Хардер на Волф и на неговата издавачка куќа „Хенри Холт енд Компани“ (Henry Holt and Co) им испратил известување во кое се наведува дека разгледуваат тужби за клевета и се бара „веднаш да запре објавувањето, издавањето или диструбуцијата на книгата и на делови од неа.

Волф, како што пренесуваат медиумите во САД, изјавил дека Трамп бил запознаен со неговата работа и дека им дозволил на своите соработници да разговараат со него.

Во делови од книгата што ги објави магазинот „Њујорк“ се наведува дека авторот имал повеќе од 200 разговори со претседателот и со челнови на неговиот тим во период од 18 месеци.


Досега жалби за само осум притворени за 27 април, адвокатите на другите уште не ги примиле решенијата


Скопје, 3 јануари, 2018 - 13:42 (META) 

Адвокатите на поголемиот дел од осомничените за насилствата во Собранието од 27 април, минатата година сè уште не ги примиле решенијата на Кривичниот суд во Скопје за продолжување притворот поради што досега не доставиле жалби на одлуките.

Инаку, жалбите се поднесуваат преку Кривичниот суд, од каде, по нивното комплетирање се доставуваат во Апелација.

Од Кривичен за „Мета“ велат дека досега кај нив пристигнале осум жалби, кои се комплетирани и во текот на денешниот ден треба да бидат доставени до Апелацискиот суд на разгледување и одлучување.

Претходно од второстепениот суд нѝ изјавија дека досега до нив не стигнала ниту една жалба за продолжениот притвор на осомничените за насилствата во Собранието.

– За дел од адвокатите нема уредна достава дека ги примиле решенијата, а за дел, за кои има уредна достава жалбените предмети се комплетирани и ќе бидат доставени до Апелацискиот суд најверојатно во текот на денешниот ден – ни изјавија од Основниот суд Скопје 1.

Адвокатите кои не поднеле жалба сè уште имаат право да го сторат тоа, бидејќи рокот од 48 часа за поднесување почнува со приемот на решенијата на првостепениот суд.

Кривичниот суд во Скопје на предлог на Јавното обвинителство за гонење на организиран криминал и корупција пред точно една недела, односно на 27 декември 2017 година им го продолжи притворот за нови триесет дена на пратениците Крсто Мукоски, Сашо Василевски и Љубен Арнаудов, на поранешниот министер за внатрешни работи и директорот на Бирото за јавна безбедност Митко Чавков, организаторите на протестите на „За заедничка Македонија“ Игор Дурловски, Борис Дамовски, Богдан Илиевски и на уште шестнаесет лица осомничени за насилствата во Собранието.

Куќниот притвор им е продолжен на пратениците Љупчо Димовски, Јохан Тарчуловски, Жаклина Пешевска и на уште еден осомничен, додека за С.М. и М.М. судот го прифати предлогот на обвинителството за укинување на мерката притвор и определување мерка куќен притвор.


По Груевски и Латас, и Талески бара снимање на судењето за „Транспортер“


Скопје, 13 декември, 2017 - 14:26 (META) 

Поранешниот градоначалник на Битола, Владимир Талески и останатите 20 обвинети во случајот „Транспортер“ на денешното рочиште побараа од Кривичниот суд во Скопје визуелно и тонско снимање на главната расправа за овој предмет.

Претходно, снимање на рочиштата побара и одбраната на поранешниот премиер и лидер на ВМРО-ДПМНЕ, Никола Груевски, поранешниот вицепремиер за економски прашања, Владимир Пешевски и екс министерот за транспорт и врски, Миле Јанакиески за случајот „Траекторија“, како и уредникот во „Сител“, Драган Павловиќ – Латас за „Тотал“.

Адвокатите на Талески и останатите обвинети денеска побараа доказите на Специјалното јавно обвинителство да им бидат дадени во писмена форма, а го побараа и ЦД-то со прислушуваните разговори, без кое, како што рекоа, не можат да дадат одбрана.

Адвокатот Боро Тасевски рече дека ако судот не обезбеди услови за снимање, ќе дава приговор за секој записник од рочиштата.

Обвинителот на СЈО, Трајче Пеливанов, го оцени барањето за снимање на процесот како уште еден изговор на одбраната за одложување на судењето.

– Во досегашната пракса на овој суд јас со истите овие адвокати кои денес инсистираат да се снима судењето сум постапувал и во други предмети и никој не побарал такво нешто. За првпат ова инсистирање за снимање на судските постапки започна да се применува во предметите на СЈО – рече Пеливанов.

Во случајот „Транспортер“ Талески и уште 20 лица се обвинети од СЈО за злоупотреби со превозот на ученици во Битола, тешки околу 300.000 евра.


Двочасовна пауза на рочиштето за „Труст“, СЈО не ги нумерирало доказите за одбраната


Скопје, 23 ноември, 2017 - 11:45 (META) 

Примерокот од листата на докази на СЈО за случајот „Труст“ повторно предизвика застој на денешното рочиште во Кривичниот суд во Скопје, поради што судијката Лидија Зимбовска даде двочасовна пауза.

СЈО денеска почна со изведување на доказите, но адвокатите на одбраната реагираа дека во листата што ја добиле од обвинителството, доказите не се нумерирани и не можат да го следат обвинителот за кои докази зборува.

Поради ова судијката Зимбовска даде два часа пауза, за СЈО повторно да ја испечати листата со докази, кои се наведени на 80 страници, овојпат со редни броеви како што бараат адвокатите.

Инаку, денеска пред судот треба да сведочи Васил Ристовски, управител на „Силекс неметали“, една од трите фирми за кои се води постапка во случајот „Труст“. Ристовски, кој денеска се појави во судот, треба да сведочи попладне, по паузата.

На претходното рочиште сведочеше Фаим Имери – Фичо, сопственик и управител на фирмата „Фичо сервис“, која со години соработува и ѝ продава градежни машини на фирмата „Трансмет“ на бизнисменот Сеад Кочан, обвинет во случајот.

Кочан, Авировиќ и Ватиќ, како и фирмите „Трансмет“, „Силекс неметали“ и „Вато“, СЈО ги товари дека со невистинити и фалсификувани документи добиле тендер на „Електрани на Македонија“ (ЕЛЕМ) вреден 17 милиони евра.


В понеделник завршни зборови за „Тврдина 2“, СЈО очекува осудителна пресуда


Скопје, 2 ноември, 2017 - 16:47 (META) 

На денешното рочиште заврши доказната постапка за случајот „Тврдина 2“, а судијката Лидија Петровска за понеледник ги закажа завршните зборови на Специјалното јавно обвинителство и на одбраната, по што треба да биде донесена пресудата.

На рочиштето денеска се изведени докази, декласифицирани само за судскиот процес, поради што јавноста, односно медиумите беа исклучени од овој дел од расправата, која траеше околу час и половина.

Обвинителката на СЈО, Ленче Ристоска, по завршувањето на рочиштето, изјави оти е уверена дека судот ќе донесе осудителна пресуда за „Тврдина 2“, во која првообвинет е поранешниот началник на петтата управа, Горан Грујовски, заедно со уште шестмина вработени во УБК, кои се товарат за уништување на документацијата поврзана со незаконското прислушување.

– Целосно сме убедени дека судот ќе донесе осудителна пресуда, бидејќи има уверливи докази за тоа – изјави Ристоска.

Претходно, на денешното рочиште, судијката Петровска го одби барањето на Љупчо Шврговски, адвокат на Грујовски, судењето да се одложи на неопределено време, додека не се заврши неговата екстрадицијата од Грција.

Шврговски најави жалба на ваквата одлука на судијката Петровска. Одбраната, како што рече тој, ќе се жали и на решението на Петровска да не им дозволи да докажат дека „предмет на уништување биле безмалку тривијални документи, како лекарски уверенија, потврди за поправка на возила, пристап до чекалната на УБК, решенија за годишни одмори…“, а не докумнти со највисок степен на класификација – државна тајна.

– Не ми е јасно од кои причини судот не сака да се утврди целокупната вистина – рече Шврговски.

Адвокатот Петар Василев рече дека Горан Грујовски и Никола Бошковски, според неговите информации, сè уште издржуваат екстрадициски притвор во близина на Солун, но дека „тие повеќе не се во тој прифатен центар, каде што беа неколку дена“.