Адвокатот Миланов казнет со 1.000 евра зошто не се појави на судењето за „Титаник 3“


Скопје, 27 април, 2018 - 11:28 (META) 

Судијката Оља Ристова го казни адвокатот Еленко Миланов со 1.000 евра бидејќи не се појави на судењето за случајот на СЈО „Титаник 3“ во Основен суд Скопје 1. Освен 1.000 евра, Миланов треба да ги надомести трошоците за денешното закажано рочиште.

Специјалното обвинителство изрази сомнеж за оправданоста на причините за денешното одлагање. Обвинителката Фатиме Фетаи рече дека добила информација дека во тетовското обвинителство, каде што се води истрагата во врска со случајот за убиството во Мала Речица, во кој е ангажиран Миланов, дека не се преземаат никакви истражни дејства.

Судењето за овој предмет беше одложено и на 16 март, поради неприсуство на првообвинетиот Ејуп Алими, кој, како што информира тогаш неговиот адвокат, како координатор на пратеничката група на ДУИ, бил на службено патување во Албанија.

Во случајот „Титаник 3“ кој се однесува на уништување на изборен материјал обвинет е пратеникот Ејуп Алими и функционерот на ДУИ, Исмет Гури.


Адвокатот Сашо Дукоски поднел иницијатива до Уставниот суд за Законот за амнестија


Скопје, 6 февруари, 2018 - 13:44 (META) 

Адвокатот Сашо Дукоски денеска поднел иницијатива во Уставниот суд за оценка на уставноста на Законот за амнестија. Според Дукоски, Законот е неуставен бидејќи во него е наведено за кои кривични дела се однесува амнестијата, а за кои не, со што, вели адвокатот, се крши уставното начело за еднаквост на граѓаните пред уставот и законите.

„Денеска поднесов иницијатива за оценка на уставноста на членот 3 од Законот за амнестија каде е наведено за кои кривични дела не важи амнестијата, што ги прави граѓаните (осудениците) нееднакви. За едни граѓани важи законот, а за други не, во однос на тоа за кои кривични дела се осудени. Сметам дека ова имплементирано законско решение е спротивно со уставното начело за еднаквост на граѓаните пред Уставот и законите и начелото за вледеење на правото“, напиша Дукоски на својот фејсбук-профил.

Со Законот, амнестија не е предвидена за осудените за убиство, за кривични дела против изборите и гласањето, за силување, педофилија, посредување во вршење проституција, потоа за кривични дела против државата, за злосторничко здружување, како и за кривичните дела против човечноста и меѓународното право.

Според проценките на Владата, со Законот за амнестија околу 670 лица ќе бидат целосно ослободени од издржување на затворска казна, додека на 3.097 ќе им биде намалена казната за 30 отсто.


ВМРО-ДПМНЕ: Зошто Рашковски молчи и зошто не поднесува оставка


Скопје, 5 октомври, 2017 - 9:40 (META) 

Генералниот секретар на Владата, Драги Рашковски, молчи и не одговара до кога планира да го крши законот и зошто не поднесува оставка, бидејќи е незаконски да се биде генерален секретар на влада, а во исто време и претседател на собрание на акционери на „Македонски телеком“ за хонорар од 500 евра по одржана седница, се вели во соопштението на ВМРО-ДПМНЕ.

Од опозициската партија посочуваат дека Рашковски спротивно на закон се самоназначил на позиција во „Македонски телеком“ за 500 евра хонорар и додаваат дека тој секој месец инкасира повеќе од 1.000 евра плата и по 500 евра од одржана седница во „Македонски телеком“.

– Во согласност со член 18 од Законот за спречување на судир на интереси, службеното лице Драги Рашковски не може да биде член на управен или надзорен орган во трговско друштво, јавни претпријатија, агенции, фондови и сите други организациони облици со доминантен државен капитал, што значи дека Законот за спречување судир на интереси не дозволува Драги Рашковски, како генерален секретар на Владата, да биде назначен и за владин претставник во собранието на акционери на „Македонски телеком“ – се вели во соопштението.

Од ВМРО-ДПМНЕ потсетуваата дека неговата тешта, Елена Начевска, мајка на неговата сопруга Вероника Начевска, беше претседател на Комисијата за жалби.

„Исто така неговиот кум, Дејан Костиќ, беше ангажиран за адвокат на Генералниот секретаријат на Владата и покрај тоа што владата има правна служба. Дрвото на непотизам на Рашковски влечело илјадници евра од државата во приватни џебови и за тоа ќе одговараат. Овие лица треба да ги вратат парите кои ги испумпаа на основа на плати и на хонорари од буџетот“, се додава во соопштението.


Шврговски ќе му биде адвокат на Мијалков во предметите на СЈО


Скопје, 14 јуни, 2017 - 20:06 (META) 

Поранешниот државен обвинител Љупчо Шврговски ќе му биде адвокат на поранешниот шеф на тајната полиција, Сашо Мијалков, во неколку предмети на СЈО – „Таргет“, „Тврдина“, „Трезор“ и „Тортура“, потврдил Шврговски за телевизија „Телма“.

Одбраната на обвинетите од СЈО ќе се дополни и со други познати адвокатски имиња, но засега никој официјално не ја потврдува информацијата дека Никола Додевски, кој досега ги застапуваше речиси сите функционери на ВМРО-ДПМНЕ, повеќе нема да биде нивен бранител во предметите на СЈО.

Шврговски вели дека во конкретните предмети влегува на местото на Додевски, но нема информација дали неговиот колега нема да ги брани и другите функционери на ВМРО-ДПМНЕ. И другите адвокати од тимот на Додевски денеска велат дека немаат информации и не сакаа да коментираат. Додевски претходно беше повикан за сведок во случајот „Талир“ за незаконско финансирање на ВМРО-ДПМНЕ.

„Талир“ и „Таргет“ се дел од истрагите што деновиве ги привршува СЈО и се повикуваат сведоци и осомничени. Поранешниот генерален секретар на ВМРО-ДПМНЕ, Кирил Божиновски, денеска вторпат не дојде на распит за овој предмет поврзан со незаконско финансирање на партијата.


Врховниот суд повторно ја одложи седницата за „Монструм“, еден од адвокатите бил болен


Скопје, 8 јуни, 2017 - 15:03 (META) 

Јавната седница на Врховниот суд на која треба да се разгледуваат жалбите на шестемина осудени на доживотен затвор во случајот „Монструм“, а која беше закажана за утре, повторно е одложена, овојпат на барање на еден од адвокатите, кој бил болен.

Претходно седницата требаше да се одржи на 30 мај, но петчлениот Кривичен совет на Врховниот суд, со кој претседава Јово Вангеловски, ја одложи за 9 јуни поради отстуство на адвокатот Насер Рауфи, кој е бранител на дел од осудените.

Врховниот суд овој предмет го стави на дневен ред 15 месеци откако одбраната на осудените поднесе жалба на пресудите на Кривичниот и на Апелацискиот суд Скопје, со кои шестемина обвинети беа осудени на доживотни затворски казни.


Со нож нападнат адвокат во неговата канцеларија во центарот на Тетово


Тетово, 18 април, 2017 - 17:15 (META) 

Со нож бил нападнат 51-годишниот адвокат Бујар Сабриу. Нападот се случил во неговата адвокатска канцеларија, сместена на првиот кат од градскиот трговски центар во Тетово. Осомничен за нападот е 72-годишниот В.А.

– Осомничениот напаѓач околу 12 часот влегол во канцеларијата каде работел адвокатот. Меѓу нив првин почнала вербална расправија. Во еден момент напаѓачот извадил нож и го прободел адвокатот во прстот од левата рака, a потоа го удрил со столче. Адвокатот некако успеал да се извлече од канцеларијата и се упатил кон тетовскиот Oсновен суд, каде се сокрил. Додека бегал кон тетовскиот суд, напаѓачот трчал по него со ножот. Напаѓачот е приведен – изјави портпаролот на СВР Тетово, Марјан Јосифоски.

Адвокатот е во добра здравствена состојба, а по лекарската интервенција е пуштен на домашно лекување.

Полицијата и Основното јавно обвинителство Тетово извршиле увид и работат на целосно расветлување на случајот.

Неофицијално, според извори на „Мета“, инцидентот настанал како резултат на нерасчистени односи меѓу двајцата околу сопственоста на адвокатската канцеларија каде се случил нападот.


Љупчо Шврговски ќе го брани Бобан С. за кражбата на 3 милиони евра од НЛБ


Скопје, 18 април, 2017 - 14:05 (META) 

Поранешниот државен јавен обвинител Љупчо Шврговски му е адвокат на 40-годишниот Бобан С., осомничен за кражбата на 3 милиони евра од трезорот на НЛБ во Скопје.

Информацијата за „Мета“ ја потврди самиот Шврговски.

– Да, јас сум му адвокат – ни рече Шврговски, но не сакаше да коментира ништо во врска со случајот.

Бобан С., осомничениот за најголемата кражба во историјата на независна Македонија, трезорот на банката го испразнил од 6 до 10 април, соопшти МВР. Против него е поднесена кривична пријава за затајување и во моментов е на издржување на 30-те дена притвор што му ги одреди судот.

Овој случај од почетокот го следат низа контроверзии, а најголема мистерија е што се случило со украдените пари, кои и по речиси 10 дена сè уште не се пронајдени.

Шврговски за државен јавен обвинител беше избран во 2007 година и оваа функција ја извршуваше до 2013 година, кога на негово место беше именуван актуелниот јавен обвинител, Марко Зврлевски.


Груевски не се појави на суд, одложено рочиштето за „Шамари“


Скопје, 10 март, 2017 - 10:54 (META) 

Денешното рочиште од судскиот процес за насилствата пред Општина Центар од јуни 2013 година повторно се одложи, бидејќи во судницата не се појавија поранешниот премиер и актуелниот лидер на ВМРО-ДПМНЕ, Никола Груевски, и другите 13 обвинети во случајот што го отвори СЈО.

На рочиштето повторно дојде до мала расправија помеѓу обвинителката на СЈО, Фатиме Фетаи, и судијката Татјана Михајлова.

Фетаи побара од судијката да каже зошто не ја доставува видеоснимката од рочиштето што се одржа на 16 декември минатата година, за да може СЈО да поведе постапка против Михајлова.

– Снимката од рочиштето одржано 22 февруари 2017 г. беше експресно доставена до Советот на јавни обвинители, а од друга страна снимката од претходното рочиште и покрај неколку дописи од наша страна, сè уште ја немаме добиено. Ве замолувам да имате доблест да ни ја доставите снимката за да може и ние да поведеме постапка за Ваша одговорност – рече Фетаи.

Михајлова ја опомена Фетаи да не се меша при внесувањето на нејзината изјава во записникот од рочиштето. Фетаи, исто така, праша зошто денеска не се дојдени обвинетите, на што Михајлова одговори дека тие биле уредно поканети, но таа не добила никакво известување дека нема да дојдат на денешната расправа.

Специјалната јавна обвинителка, Катица Јанева, дофрли дека судот може и присилно да ги донесе обвинетите.

Адвокатот на Груевски, Никола Додевски, за медиумите рече дека неговите клиенти не се појавиле бидејќи има решение со кое Советот на јавни обвинители бара да бидат назначени нови обвинители во случајот, а за што сè уште не било одлучено, па, според него, нема услови за продолжување на рочиштето.

На прашање дали со ова повторно се одолжува судскиот процес, Јанева одговори дека во моментот се концентрирани на нивните предмети и на подготвување на извештајот на СЈО кој треба да биде презентиран на 15 март и доставен до Собранието и до Советот на јавни обвинители.

Следното рочиште судијката Михајлова го закажа за 3 мај во 10 часот.


„Политико“: Рорабакер е омилениот конгресмен на Путин


Вашингтон, 8 февруари, 2017 - 18:24 (META) 

„Ова лето (2016 година, н.з.) републиканцот Дана Рорабакер искористил информација што ја дoбил директно од руската влада за да промовира еден од главните приоритети на претседателот Владимир Путин: отстранувањето на името на рускиот адвокат Сергеј Магнитски од глобалниот антикорупциски закон“.

Вака почнува текстот со наслов „Омилениот конгресмен на Путин“ на американскиот интернет-магазин „Политико“, објавен на 23 ноември 2016 година, две недели по изборот на Доналд Трамп за претседател на САД.

Имено, повеќе независни истраги ги обвинуваат руските власти за смртаа на Магнитски, кој почина в затвор, откако објавил докази за кражба на околу 230 милиони долари од страна на функционери блиски на режимот на Путин. Во 2012 година, Конгресот им го забрани влезот во САД и користењето на банкарскиот систем на земјата на функционери, наводно, поврзани со убиството на Магнитски. Минатата година, американските законодавци, како што пишува „Политико“, сакале да го прошират антикорупцискиот акт така што ќе опфатат и функционери од други држави одговорни за кршење на човековите права.

Во текстот „Политико“ тврди дека руските власти преку Рорабакер се обиделе да излобираат Конгресот на САД да се откаже од проширениот закон со името на Магнитски на него. Во дел од написот се наведуваат и некои сличности во ставовите на Трамп и на Рорабакер, особено околу тоа дека е потребно затоплување на односите со Русија.

Конгресменот Рорабакер, кој воедно е и претседател на Подкомитетот за европски работи на американскиот претставнички дом, во моментов е актуелен во Македонија по своите изјави во интервјуто за албанската телевизија „Визион плус“, дека „Македонија не е држава“, дека „Косовците и Албанците од Македонија треба да станат дел од Косово“, а „другиот дел од Македонија треба да стане дел од Бугарија или која било друга држава на која сметаат дека ѝ припаѓаат“.

Неговите изјави предизвикаа жестоки реакции во земјава, а македонското Министерство за надворешни работи по тој повод побара став од Стејт департментот на САД за изјвата на конгресменот.


Судот го отфрли обвинението против адвокатот Стеваноски и за графитот „Кај ви е хилтата?“


Прилеп, 3 февруари, 2017 - 12:46 (META) 

Основниот суд Прилеп го отфрлил и второто обвинение против адвокатот и еден од водачите на „Шарената револуција“ во градот, Жарко Стеваноски, поради испишувањето на графитот „Кај ви е хилтата?“ на асфалтот пред старата зграда на Општина Прилеп на 18 мај минатата година, пренесува порталот „Публикум“.

Прилепската полиција го товареше Стеваноски дека графитот што го испишал на асфалтот имитирал, односно личел на сообраќаен знак и со тоа ги збунувал и им го одвраќал вниманието на учесниците во сообраќајот.

Пред еден месец прилепскиот суд го ослободи Стеваноски од прекршочна одговорност и за графитот „Че си лежите“, испишан, исто така, за време на протестите на „Шарената револуција“ во Прилеп.

Прилепската полиција против Стеваноски има поднесено уште четири пријави, кои, како и претходните две, се поради наводно сторен прекршок по член 191 од Законот за безбедност во сообраќајот на патиштата.