Вкупно 139.009 вработени во јавниот сектор


Скопје, 30 март, 2018 - 12:58 (META) 

Во државната администрација, во локалната самоуправа, во јавните претпријатија, во акционерските друштва во државна сопственост вкупно се евидентирани 139.009 вработени. Без привремените вработувања и без вработените во акционерските друштва, има 128.722 вработени во 1.299 институции, соопшти министерот за информатичко општество и администрација, Дамјан Манчевски, на денешниот брифинг.

Иако не е целосно функционален Регистарот на вработените во јавниот сектор, за чие воспоставување во 2014 и 2015 година се дадени 2,15 милиони евра, Министерството за информатичко општество и администрација (МИОА), бројките ги добило со вкрстување на податоците од Управата за јавни приходи (УЈП), Агенцијата за вработување, агенциите за привремени вработувања и Фондот за здравствено осигурување.

Граф

Без АРМ, МВР и Агенцијата за разузнавање, бројката на вработените од државата и локалните власти изнесува 109.304, додека во акционерските друштва во државна сопственост се вработени 8.633 луѓе од вкупната бројка.

Според податоците, од вкупната бројка од 139.009 луѓе кои добиваат плата од буџетот, 59,96 отсто се вработени на локално ниво, а 40,03 на централно. Од нив, 54 отсто се жени, а 46 отсто мажи.

По националност, 75,36 отсто се Македонци, 19,31 отсто Албанци, Турци се 1,84 отсто, Роми, 1,14 отсто. По образование, 42,45 се со факултетска диплома, со средно се 34,81 отсто, а со осново се 9,67 отст. Магистри се 4,45 отсто.

Најмногу вработени има во образованието – 32 отсто, во здравството се 18 отсто, а во државната управа се 15 отсто, додека во локалната власт се 5 отсто.

– Ова е првпат да се објави вкупната бројка на вработени во јавниот сектор, вклучително и оние привремено вработени и вработените во акционерските друштва во државна сопственост.  Притоа, со привремени вработувања сега се 1.624 луѓе, за разлика од април 2017 година, кога биле 2.064 – рече Манчевски.
Граф4

Тој и државниот секретар во МИОА, Јахи Јахија објаснија дека се очекува наскоро да профункционира целосно Регистарот на вработените во јавниот сектор, а според нив, доаѓањето до овие бројки не било лесно, затоа што голем број од корисниците на буџетот или не знаеле како да внесат податоци или пак не го сметале тоа за важно.

Како што рече Јахија, новите мерки да се ограничи исплаќањето на платата доколку не се достават податоците бил клучниот потег за да се дојде до податоците.

– Со молење, инспекции, стимулација и обука, притискавме да се достават податоци. Решението да се ограничи исплатата на платата е екстремно решение, но е единствениот начин – рече Јахија.

Граф2ж3

Според Манчевски, од стапувањето на новата власт, нема партиски вработувања и сега се вработува само според потребите на институциите, а не според потребите на партијата, поради што во текот на владеењето на ВМРО-ДПМНЕ се правеле и нелогични систематизации на работните места.

– Во текот на претходната власт, членовите на тогашните опозициски партии не смееја да помислат дека ќе бидат примени во јавниот сектор. За разлика од тогаш, сега шансите им се отворени да конкурираат, но истовремено се вработуваат и луѓе од ВМРО-ДПМНЕ – рече министерот.

Манчевски најави и дека во мај и јуни треба да почне создавањето на Централниот регистар на население, кој би профункционирал до крајот на годината.


Бројката на административци ќе биде објавена в петок


Скопје, 28 март, 2018 - 14:27 (META) 

Пребројувањето и анализата на состојбите во администрацијата е завршена и в петок ќе бидат презентирани бројките и состојбата, најави министерот за информатичко општество и администрација Дамјан Манчевски на денешниот брифинг.

Извештајот за состојбата во администрацијата се најавува уште од стапувањето на функција на новата Влада.


ВМРО-ДПМНЕ: Манчевски нема кредибилитет да зборува за реформи во администрацијата


Скопје, 21 февруари, 2018 - 14:26 (META) 

СДСМ и Дамјан Манчевски ја дефокусираат јавноста од партизацијата на администрацијата, која забрзано ја спроведуваат, реагираат од опозициската ВМРО-ДПМНЕ на денешната прес-конференција на министерот за информатичко општество и администрација.

„За која професионализација на администрацијата зборува Манчевски, кога во првиот месец од доаѓањето на власт во владата ги вработија истакнатите кадри на СДСМ и од т.н. шарена револуција, како Бојан Маричиќ, Марјан Забрчанец, Влатко Васиљ, Никола Наумовски, Бубо Каров и плејада на други активисти. Манчевски нема кредибилитет да зборува за реформи во администрацијата. Манчевски пред нецела седмица јавно призна дека спроведува партизација во администрацијата. Манчевски отворено кажа дека сите затекнати договори за привремено вработување биле прекинати, но и дека сега власта распишува нови“, стои во соопштението на ВМРО-ДПМНЕ.

Од опозицискста партија велат дека стратегијата на СДСМ е партизирање на администрацијата преку договори за привремено вработување без јавен оглас, кои за три месеци се трансформираат во договори на неопределено време.

„СДСМ од доаѓањето на власт до сега има распишано неколку милионски огласи за привремени вработувања. 20 милиони денари се потрошени само за привремени вработувања во Владата, Службата за општи и заеднички работи (СОЗР), Бирото за јавни набавки и Собранието“, велат од ВМРО-ДПМНЕ.


Бизнисмените бараат побрза и поефикасна комуникација со администрaцијата


Скопје, 15 јануари, 2018 - 16:27 (META) 

Планот за економски раст на Владата ги содржи барањата на бизнис-заедницата, информираше денеска директорката на Стопанска комора на Македонија, Елена Милевска Штрбевска.

Таа додаде дека од јуни до крајот на 2017 година, од Стопанска комора до Владата поднеле 19 иницијативи и ниту една од нив не е одбиена, но реализацијата, како што кажа, треба да биде побрза.

– Генерална оценка на соработката со Владата е дека постои силна волја за соработка и воспоставен е јавно-приватниот дијалог на највисоко, но има реални потреби за подобрување на комуникацијата и на оперативно ниво со министерствата и со другите органи на управата. Без намалување на бирократизацијата и без професионална администрација, не може да одиме напред и да очекуваме брза реализација на нашите иницијативи кои се во интерес на унапредување на деловната клима во државата – изјави Милевска Штрбевска.

Стопанската комора на Македонија укажа на потребата, на секои три месеци, јавно и транспарентно да се прави пресек на проектираните наспроти реализираните активности во делот на капиталните инвестиции и да се понесе одговорност доколку не се реализираат проектираните капитални инвестиции.


Администрацијата најмалку одговара на новинарските прашања


Скопје, 19 декември, 2017 - 13:47 (META) 

Има реална потреба од менување на Законот за слободен пристап до информациите од јавен карактер иако попроблематична е неговата примена отколку самиот закон – беше констатирано на денешната јавна расправа за овој закон што ја организираше Министерството за правда.

Законот треба да се менува во роковите, во исклучокот да не се даде информацијата, и во  надлежностите што ги има Комисијата за заштита на ова право, беше речено на расправата одржана во Скопје.

Според статистичките бројки што беа изнесени, администрацијата најмногу го избегнува ова право кога станува збор за медиумите.

– Доколку новинарите поставуваaт прашања, процентот на одговор од администрацијата е околу 37 отсто, доколку тоа го прават граѓаните, тогаш процентот е 50 отсто, а доколку прашува невладина организација, тогаш администрацијата одговара во над 70 отсто случаи – изјави Герман Филков од Центарот за граѓански иницијативи, истакнувајќи ги нивните искуства кои се големи, зашто годишно поставуваат околу 1000 прашања до институциите и имателите на информации од јавен карактер.

Бројките покажуваат дека има потреба од менување во законот, изјави Тамара Чаусидис од Самостојниот синдикат на новинари и медиумски работници, потсетувајќи дека ССНМ и други четири новинарски организации ова барање го имаат испратено и официјално до Владата уште пред повеќе месеци.

Претседателот на Комисијата за заштита на правото на слободен пристап до информации од јавен карактер. Ѓорѓи Сламков. изјави дека Комисијата, исто така, има свои забелешки на законот и тоа во три насоки – нормативен дел од законот, роковите за постапување и надлежностите на Комисијата и капацитетите на самата Комисија.

Тој потенцираше дека Комисијата останала само со тројца членови, а за да ги исполнат роковите од законот и поради големиот број барања држат седници секоја недела преку цела година.

Сламков истакна дека во однос на администрацијата, најдобро зборува податокот дека, од околу 700 жалби во текот на годинава, преку 500 се однесувале на молкот на институциите.

foom-logo-disklejmerТекстот е изработен во рамки на проектот „Опсерваторија на медиумските реформи“, што го спроведуваат Фондацијата за интернет и општество „Метаморфозис“, „Агора“ Центар за промовирање на граѓански вредности и Платформата за истражувачко новинарство и анализи (ПИНА), со финансиска поддршка на „Фондацијата Отворено општество – Македонија“.
Содржината на текстот е единствена одговорност на авторите и на ниту еден начин не може да се смета дека ги одразува гледиштата на „Фондацијата Отворено општество – Македонија“.


Манчевски: Вработувањата во администрацијата ќе бидат транспарентни


Скопје, 19 декември, 2017 - 11:55 (META) 

Отпуштања од јавната администрација нема да има, а вработувања ќе има согласно потребите и процесот ќе биде транспарентен, одговори на новинарско прашање министерот за информатичко општество и администрација, Дамјан Манчевски на промоцијата на проектот „Една точка на услуги“.

Тој додаде дека, веќе има природен одлив од администрацијата, односно намален е бројот на вработени, а точниот број ќе се знае во март, кога министерството законски е обврзано да даде извештај за вкупниот број на вработени од претходната година.

– Немаме доволен број на високо-квалификувани луѓе за да ги преземат раководните места во администрацијата –  истакна Манчевски.

Министерот потенцираше дека во администрацијата недостасуваат инженери, архитекти и правници. Оттука, во првите шест месеци од следната година треба да се вработат електроинженери за да се имплменетира централниот електронски регистар на население.


МИОА следната година ќе ја реформира администрацијата преку електронски проекти


Скопје, 6 декември, 2017 - 16:56 (META) 

Очекувам новата стратегија за реформа на јавната администрација да биде испратена до Владата пред крајот на оваа година, рече министерот Дамјан Манчевски на денешната презентација на буџетот за 2018 година на Министерството за информатичко општество и администрација (МИОА).

Тој  вели дека реформата на администрацијата следната година ќе се насочи главно кон дигитализацијата на администрацијата, преку неколку проекти, на кои ќе се потрошат 146,5 милиони денари, односно 2,37 милиони евра. Меѓу нив се унапредување на Единствениот национален електронски регистар на прописи (ЕНЕР), како и надградба на постојниот електронски систем за управување со документи, а ќе се воведе и целосно нов систем за електронска наплата на административните такси.

Сепак, главни од реформите на администрацијата ќе бидат создавање централен електронски регистар на население и нов национален портал за е-услуги.

– Граѓаните ќе добијат сопствен електронски идентитет со кој ќе може да се идентификуваат и да добиваат електронски услуги од институциите. Електронскиот регистар на население ќе ги реши бројните проблеми на граѓаните што ги имаа со многу различни бази на податоци, на различни институции. Меѓу другите, конечно и дефинитивно ќе го решиме проблемот со избирачкиот список – рече Манчевски.

И тој и новиот национален портал за е-услуги ќе се развиваат заедно со ЕУ, појасни Манчевски.

Порталот за е-услуги, кој е целосно нов, ќе биде пуштен следната година.

–  Значително ќе се зголеми бројот на услугите што државата ги нуди на граѓаните по електронски пат. Овој проект опфаќа сериозни инвестиции во опрема, но исто така и сериозни зафати во делот на законската регулатива – порача министерот за информатичко општество и администрација.

Тој појасни и дека се планира да се инвестира во нова побезбедна систем-сала, во која ќе се смести најголемиот дел од опремата во државна сопственост, која е чувстителна од аспект на националната безбедност и заштитата на податоците на граѓаните.


ИДСЦ: Планот „3-6-9“ е несоодветно подреден, а „тројката“ е нецелосно исполнета


Скопје, 28 ноември, 2017 - 13:36 (META) 

Наспроти тоа што го кажа Владата, дека делот „3“ од планот „3-6-9“ е целосно исполнет, активностите предвидени за првите три месеци од реформскиот план се само делумно реализирани. Исто така, во планот има несоодветно подредување на приоритетите, па некои побитни се сместени подолу во редоследот на важноста, велат од Институтот за демократија „Социетас цивилис“ од каде го презентираа својот прв извештај за првиот дел од владиниот план.

Oд вкупно 73 наведени активности што треба да се реализираат во првите три месеци, целосно се исполнети 41 отсто, додека делумно исполнети се 16 отсто, а неисполнети 14 проценти од активностите. Исто така, 29 отсто од активностите се оценети како немерливи, бидејќи или се работи што се редовна работа на владата или нема веродостојни извори според кои ќе може да се утврди дека се реализирани или, пак, се активности што не може јасно да се измерат.

Како пример за тоа беше нагласено дека како мерка, се наведува препорака „Владата го  охрабрува Судскиот совет да ги поттикне судиите да пријавуваат политички или друг вид притисок“.

Дополнително, и во областа на медиумите, делот „3“ предвидува преглед на сите досегашни случаи на физички и вербални напади и притисоци врз новинарите, но не кажува ништо за тоа како ќе се постапи со случаите на тужби за клевета кон новинарите од страна на политичарите, кои често се употребуваат како притисок врз медиумите, се вели во извештајот.

Владата, исто така, има несоодветно редење на приоритетите, па наместо на осмото место, реформите на судството би требало да се најдат на првото, рече на презентацијата на извештајот Марко Трошановски од „Социетас цивилис“. Според него, втора по приоритет треба да биде реформата на администрацијата, а веднаш потоа и неопходните активности за разузнавачките служби.

Во извештајот подготвен од Зоран Нечев и од Иван Николовски, се нагласува и дека Собранието, односно пратениците, мора да поттикнат реформи кои ќе придонесат за негово поефикасно и посуштинско функционирање, односно законодавниот дом да ја врати својата улога на контролор и токму таму да се постигне натпартиска сплотеност за неопходните чекори за добивање безусловна препорака од Европската комисија за почеток на преговорите.

Дали Македонија во јуни следната година ќе може да ги почне преговорите за придружување на Европската Унија, како што најави вицепремиерот Бујар Османи, според Трошановски зависи од квалитетот и од брзината на исполнувањето на целите препорачани пред сè во првиот извештај од експертската група на Прибе.


Груевски: Вториот круг помина со масовен поткуп, системски закани и со уцени


Скопје, 29 октомври, 2017 - 19:11 (META) 

Колку што имаше нерегуларности во првиот круг на гласањето, тие уште повеќе се зајакнаа во вториот круг, рече лидерот на ВМРО-ДПМНЕ, Никола Груевски, откако гласаше во ОУ „Кузман Јосифовски-Питу“ во Општина Кисела Вода.

– Демократската атмосфера, за жал, во овој период не можеме да ја видиме. Имаше масовен поткуп на граѓаните како никогаш досега во Македонија, како и закани, притисоци и уцени врз луѓето, претежно кон наши активисти од страна на СДСМ – изјави Груевски.

Лидерот на ВМРО-ДПМНЕ рече дека и во минатото се случувале обиди за поткуп, но биле изолирани, ретки и мали, а сега, како што рече, „станува збор за масовен поткуп што е под заштита на полицијата, контролирана од СДСМ“.

– Луѓето отворено се уценуваат со губење работно место, особено администрацијата, со кривични пријави, недобивање субвенции. Тоа е масовно, организирано, системски – рече Груевски.

Тој порача дека ВМРО-ДПМНЕ нема да биде скршена, туку нивната борба допрва почнува.


Невладините бараат од Владата информации за администрацијата и поголема отвореност


Скопје, 27 октомври, 2017 - 21:04 (META) 

Граѓанскиот сектор бара дополнителна ефикасност и транспарентност во поглед на регистарот на вработени во јавните институции, соопшти владината служба за информирање.

Од граѓанските организации, на денешната средба со работни групи од министерствата, било побарано да се подобри ефикасноста на примената на Законот за пристап до информации од јавен карактер и да се обезбеди поголема транспарентност на податоците за привремените вработувања.

Денешната средба е дел од процесот за консултации со граѓанските организации за планот „3-6-9“ за итни реформи.

Во наредниот период, сметаат граѓанските организации, неопходно е тие да бидат поактивно вклучени во работата на собраниските комисии, односно нивното учество да биде загарантирано.

Во однос на независните регулаторни тела, граѓанските организации побарале поголема транспарентност, a директорите, освен обврската пред Собранието, да ги презентираат извештаите за нивната работа и јавно и да носат и одговорност за нивната работа.

Во исто време сметаат дека е неопходна ревизија на Изборниот законик, соодветна систематизација во Државната изборна комисија, како и нова методологија за следење на избирачкиот список.