Лагард најави можен заеднички буџет на еврозоната


Вашингтон, 9 јули, 2018 - 10:29 (META) 

Шефицата на Меѓународниот монетарен фонд (ММФ), Кристин Лагард најави можен заеднички буџет на еврозоната, кој би бил имплементиран под услов да не стане обичен трансфер на пари од богатите земји на сиромашните членки на ЕУ.

– Буџетот би можел да биде направен без каква било обврски на овие другите – изјави Лагард.

Лидерите на Франција и Германија се слогласија минатиот месец околу предлог за таков буџет, кој би можел да се користи за намалување на економските разлики меѓу земјите од евро зоната и да се стабилизира економијата, меѓутоа со таа идеја не се согласија другите членки на ЕУ, пред се  Холандија која е загрижена како можат парите да се повлечат и да се користат.


Македонците во странство првпат ќе гласаат во Абу Даби


Скопје, 15 ноември, 2016 - 10:47 (META) 

На овие предвремени парламентарни избори, првпат ќе биде отворено гласачко место за македонската дијаспора во Абу Даби, во Обединетите Арапски Емирати, одлучи Државната изборна комисија на вчерашната седница.

Поради големиот број пријавени гласачи од странство, ДИК вчера одлучи да се отворат две гласачки места во Венеција и три во Берн. Според информациите од ДИК, за гласање во Берн, Швајцарија, се пријавиле повеќе од 4.000 македонски државјани, додека во Венеција – речиси 3.000.

Инаку, повеќе од  20.500 македонски државјани во странство ќе можат да го остварат своето право на глас на предвремените парламентарни избори закажани за 11 декември.

Гласачки места со повеќе од илјада пријавени во дијаспората има и во Детроит и во Њујорк, САД, во Мелбурн, Австралија, и во италијанскиот главен град, Рим.

За дополнителните избирачки места допрва ќе се формираат избирачките одбори.

Претседател и заменик-претседател на овие избирачки одбори се вработени во амбасадите и во дипломатско-конзуларните претставништва во земјите каде се отвораат овие места, а другите членови се предложени од партиите.