!На 1 февруари 2017 година, заврши промотивниот период на слободно користење на содржините на „Мета“. Во периодот што претстои го воведуваме новиот систем за пристап и за претплата. За начинот на пристап и за претплатата ќе информираме дополнително

ГРОМ со спинови го храбри Иванов за нови аболиции


Скопје, 26 јануари, 2017 - 11:52 (META) 

Пренџов од ГРОМ нема право кога вели дека „образложението на СЈО за тоа зошто се откажува од обвинителниот акт е обична „евтина манипулација“ со аргументи кои, наводно, само тие ги знаат и никој друг во државата“, а изјавата дека „критизерите на аболициите го губат моралното право да критикуваат евентуално нови аболиции од страна на Иванов“, ја сметаме за недоследна, пишува „Вистиномер“.

„Ваквиот став на ГРОМ претставен на прес-конференција што ја оддржа организациониот секретар на партијата, Љупчо Пренџов, го сметаме за недоследен, бидејќи де факто ѝ се обраќа на јавноста со порака дека Иванов не би требало да има морален проблем ако повторно објави некоја аболиција поврзана со истрагите или обвиненијата што ги спроведува СЈО. Се разбира, реченицата формално и де јуре е внимателно срочена, но де факто, пораката е таа – Претседателе, можете повторно да аболирате и никој не смее да ве критикува поради тоа“, се вели во анализата на „Вистиномер“.

(Целиот текст од „Вистиномер“ можете да го прочитате и да го преземете ТУКА)


Повторно одложено судењето на Савески и на Куновски од Левица


Скопје, 1 декември, 2016 - 11:20 (META) 

Поради болест на Владимир Куновски, кој заедно со Здравко Савески се обвинети за демолирање на народната канцеларија на претседателот на државата, Ѓорге Иванов, денеска повторно беше одложено рочиштето од судењето на двајцата членови на Левица, пренесува „24 Вести“.

Судењето е презакажано за 18 јануари следната година.

Инаку, Савески и Куновски се товарат дека на 13 април учествувале во демолирањето на народната канцеларија, за време на протестите против одлуката на претседателот Иванов да аболира 56 лица – политичари и нивни соработници.

Јавното правобранителство штетата ја процени на 522.000 денари, односно околу 8.500 евра.


Кој е Никола Ивановски, новиот и „најбрзиот“ претседател на Уставниот суд во историјата


Скопје, 17 октомври, 2016 - 14:11 (META) 

Никола Ивановски е новиот претседател на Уставниот суд, кој денеска на колегиумот на судот е избран со двотретинско мнозинство. Тој ја наследи Елена Гошева, чиј мандат завршува на 1 ноември.

Ивановски, кој важеше за фаворит на Гошева, за уставен судија е избран во 2012 година.

Новиот претседател на Уставниот суд, Никола Ивановски, пред да стане член на судот (1 јуни 2012 година), својата кариера ја почнал во 1984 година како приправник и стручен соработник во Окружниот стопански суд во Скопје. Четири години подоцна, како што може да се види од неговата биографија, станал истражен и извршен судија во Основниот суд Скопје 1.

На ова место се задржал до 1996 година, кога почнал да работи како адвокат во адвокатска канцеларија во Скопје. Во 1999 година е именуван за кривичен судија во Основниот суд Скопје 1 и оваа функција ја извршувал до август 2008 година, кога е избран за член на Советот на јавни обвинители.

Истата година за член на Советот на јавни обвинители е избрана и досегашната претседателка на Уставниот суд Елена Гошева, која две години подоцна станува и претседател на Советот. Гошева и Ивановски во иста година (2012 г.) се избрани за судии во Уставниот суд. Гошева во мај, Ивановски во јуни.

Ивановски годинава беше судија известител по иницијативата за оценка на уставноста и на законитоста на измените на Законот за помилување од 2009 година, со кои на претседателот на државата му се забранува да помилува лица осудени за изборни нерегуларности, педофилија, трговија со дрога и дела против човештвото. Предлогот за одлучување по иницијативата, судијата Ивановски експресно го стави на дневен ред на седница на Уставниот суд. Како што пренесоа дел од медиумите, предлогот на Ивановски е најбрзо донесената одлука во историјата на Уставниот суд. На 16 март, судиите со мнозинство гласови ги укинаа измените на Законот и повторно му овозможија на претседателот на државата да помилува лица за изборни нерегуларности.

– Според Законот, законодавецот не дал објаснување зошто токму за наведените кривични дела не може да се даде помилување. Да не се разбереме погрешно, општествената опасност од сторителите на овие кривични е неспорна. Но, само за 4 глави од 35, не е предвидено помилување. Ова, според мене, е една апсурдна ситуација бидејќи за сите кривични дела може да се дава помилување и не може да се ограничуваат осудените лица за кои кривични дела може или не може да бараат помилување – рече тогаш Ивановски, при изнесувањето на својот реферат на седницата на Уставниот суд.

Укинувањето на овие членови од Законот беа увертира во одлуката на претседателот Ѓорге Иванов од 12 април годинава, за помилување на 56 политичари и нивни соработници.

Опозицискиот СДСМ, на 15 март го обвини судијата Ивановски дека кај него постои „многу повеќе од конфликт на интереси“ за да може да одлучува законски и непристрасно. Петре Шилегов на прес-конференција обвини дека против братот на судијата Ивановски, Илија Ивановски, во 2013 година е поднесена кривична пријава врз основа на член 398 од Кривичниот законик, што подразбира казна за неовластено организирање комар или друга игра на среќа што е забранета.

„До денеска, иако поминаа три години, за оваа кривична пријава не се знае ништо. Каде е заглавена кривичната пријава за Ивановски три години? Јавноста со право прашува дали намерно се држи во нечија фиока кривичната пријава за да се испорачуваат партиски налози од ВМРО-ДПМНЕ? Кај судиите Гошева и Јован Јософовски постои конфликт на интереси. Очигледно кај судијата Ивановски постои многу повеќе од конфликт на интереси“, изјави Шилегов тогаш.

Од анкетниот лист на судијата Ивановски, депониран во Државната комисија за спречување на корупција, може да се види дека тој, како личен имот, поседува барака и два стана од 147 и од 48 квадратни метри во Скопје, кои ги стекнал како наследство. Тој поседува два автомобили, „шкода јети“ и „фолксваген пасат“, а од банкарски депозити, во анкетниот лист стои дека има нула денари на трансакциската сметка и има кредит од 1,1 милион денари.


ВМРО-ДПМНЕ апелира притисоците и нападите врз судот да престанат


Скопје, 26 септември, 2016 - 14:36 (META) 

ВМРО-ДПМНЕ ги осудува обидите на аболираниот криминалец Зоран Заев, преку напади и закани врз судот да изврши притисоци и да ги заплаши судиите да одлучуваат во согласност со законот, се вели во реакцијата на ВМРО-ДПМНЕ по повод боењето на Кривичниот суд од страна на „Шарена револуција“.

„Срамниот ноќен вандалски чин на хулиганите од платеничката револуција на СДСМ и на Сорос е резултат на желбите на аболираниот криминалец Зоран Заев да бидат заплашени судиите кои треба да го судат за барањето поткуп и за случајот „Пуч“, порачувајќи им дека дивите орди кои се под негова команда ќе дејствуваат секогаш кога ќе биде донесена одлука што не е по негова волја“, се вели во соопштението на ВМРО-ДПМНЕ.

Од партијата на власт апелираат „притисоците и нападите врз судот да престанат, а членството на СДСМ да се дистанцира од неразумните чекори на аболираниот Зоран Заев“.


ВМРО-ДПМНЕ: Заев е главен статист во фарсата која ја играат со Катица Јанева


Скопје, 16 септември, 2016 - 16:40 (META) 

Аболираниот криминалец Зоран Заев повторно ја излажа јавноста. Претседателот на ВМРО-ДПМНЕ, Никола Груевски не добил покана да сведочи за предметот „Пуч“, така што изјавите дека тоа е причината за одложување на денешното рочиште се само уште една во низата манипулации.

Политичкото слепило и непознавањето на процедурите од страна на Зоран Заев и Катица Јанева добиваат драматични размери па и двајцата мислат дека се и обвинители и судии, реагираат од ВМРО-ДПМНЕ на денешните изјави на специјалната јавна обвинителка и на лидерот на опозицијата.

„Аболираниот криминалец Зоран Заев е човекот кој јавно ги погази македонските судови, изјавувајќи дека нема намера да ги почитува нивните наредби и одлуки. Истиот тој аболиран криминалец сега е главен статист во фарсата која што ја играат со Катица Јанева. Заев е комотен затоа што знае дека има заштита од Катица Јанева. Аболираниот криминалец Заев е комотен затоа што доби јавна благодарност од Соња Верушевска бидејќи Катица Јанева го ослободила од притвор Зоран Верушевски“, пишува во соопштението на ВМРО-ДПМНЕ.

Во соопштението се вели дека тоа се двојните аршини кои политички ги наметнува Катица Јанева.

„Благодарение на Катица Јанева, битолскиот градоначалник Владимир Талевски е трет месец во притвор, а аболираниот криминалец Зоран Заев на слобода“, реагираат од владејачката партија.


Одложено судење на Савески и на Куновски, судот чека податоци од МВР


Скопје, 13 септември, 2016 - 12:01 (META) 

Судијката Весна Петровска-Тагасовска денеска го одложи судењето на членовите на Левица, Здравко Савески и Владимир Куновски, обвинети дека учестувале во демолирањето на народната канцеларија на претседателот Ѓорге Иванов на 13 април, за време на протестите, ден по неговата одлука за аболиција на 56 лица, политичари и нивни соработници.

Рочиштето е одложено бидејќи, како што пренесува „Академик“, судот ги чека податоците од МВР за прекршочните постапки што се водат за истото дело.

Судењето е презакажано за 18 октомври. Јавното правобранителство процени дека штетата на канцеларијата на Иванов изнесува 522.000 денари или околу 8.500 евра.

Савески пред Кривичниот суд изјави дека иако судот им ги вратил пасошите, сè уште не им е тргната забраната за напуштање на државата, што, според него, е изживување на полицијата врз борците за слобода.


Клучна недела за СЈО: В четврток нов извештај, в петок судење за „Пуч“


Скопје, 11 септември, 2016 - 9:54 (META) 

Неделава, според досега најавената агенда, се закажани два клучни  настани поврзани со работата на Специјалното јавно обвинителство. Првиот е поднесувањето на новиот шестмесечен извештај за работата на СЈО, на 15 септември, а вториот е закажаното рочиште во Кривичниот суд за случајот „Пуч“, следниот ден.

Јанева вториот извештај ќе го поднесе на годишнината од нејзиното назначување за специјална јавна обвинителка и од основањето на СЈО.

„Јавниот обвинител ќе поднесува извештај секои шест месеци за неговите, односно нејзините активности, вклучувајќи и опис за напредок во која било истрага или гонење преземено од јавниот обвинител. Во таквиот извештај може да бидат изоставени материјали кои според јавниот обвинител треба да се чуваат како доверливи, но ќе обезбеди соодвети информации за да ги оправда трошоците“, стои во ставот 2 од члнот 7 на Законот за СЈО.

Првиот извештај на специјалната јавна обвинителка Катица Јанева, од 15 март, беше повод за жестоки расправии меѓу СЈО и Советот на јавни обвинители. Советот инсистираше Јанева лично да образложи делови од извештајот, поради што седниците за негово разгледување беа неколкупати одложувани. Истото го бараше и пратеничката група на ВМРО-ДПМНЕ во Собранието. Пратениците на владејачкото мнозинство ја обвинија Јанева дека со нејзиното недоаѓање не ги почитува институциите и се става над Собранието и над Уставот. Недоаѓањето на Јанева беше повод за кавга меѓу пратениците на ВМРО-ДПМНЕ и на СДСМ.

„Сметам дека извештајот содржи сè што е потребно. Не станува збор за некој обемен документ. Доколку претставниците на овие институции имаат некакви забелешки, нив можат да ги достават до СЈО, а ние ќе ги разгледаме и може да ги вклучиме во наредниот шестмесечен извештај“, изјави  тогаш Јанева и неколкупати нагласи дека нема намера да се појави во овие институции за извештајот.

Во врска со судењето за „Пуч“, во кој меѓу обвинетите се лидерот на СДСМ, Зоран Заев, и поранешниот директор на Управата за безбедност и контраразузнавање, Зоран Верушевски, последното рочиште се одржа на 2 март.

Специјалната обвинителка тогаш бараше одложување на расправата бидејќи, како што рече, на судењата не доаѓа сведокот, кој е оштетен во случајот и дека од судот не им се доставени копиите од списите и електронските докази што им се потребни за да ги подготват воведните говори. Јанева не го кажа името на сведокот, но јасно е дека станува збор за поранешниот премиер и актуелен лидер на ВМРО-ДПМНЕ, Никола Груевски.

Следното рочиште беше закажно за 3 мај, но тоа воопшто не се одржа бидејќи во меѓувреме се случи аболицијата на 56 политичари и нивни соработници, која на 12 април ја донесе, а потоа ја укина претседателот на државата, Ѓорге Иванов.

На почетокот на јуни, по укинувањето на аболицијата, Апелацискиот суд Скопје ги прифати жалбите на СЈО и на обвинетите во „Пуч“ против одлуката на Кривичниот суд за запирање на процесот и донесе одлука судењето да продолжи. Апелацискиот суд претходно донесе одлука со која му наложи на Кривичниот суд да ѝ ги даде на Јанева копиите и доказите, но од првостепениот суд одговорија дека тие немаат обврска да ги дадат копиите и покрај одлуката на Апелација која, според нив, не е обврзувачка.


Гордана Јанкулоска дојде на распит во СЈО


Скопје, 17 август, 2016 - 13:18 (META) 

Поранешната министерка за внатрешни работи Гордана Јанкулоска денеска во 13 часот пристигна во Специјалното јавно обвинителство.

Пред да влезе таа не даде изјава за медиумите, но најави дека тоа ќе го стори по распитот.

Јанкулоска е осомничена во случајот „Тврдина“ што СЈО го отвори за уништувањето на опремата од незаконското прислушување, како и во случајот „Титаник“ за изборни манипулации.

Во СЈО денеска е и Тони Јакимовски,  второосомничен во случајот „Тврдина“. Тој беше еф на кабинет на поранешниот директор на Управата за безбедност и контраразузнавање, Сашо Мијалков.


Орав: Збогум и помагајте му на СЈО


Скопје, 5 август, 2016 - 15:41 (META) 

Евроамбасадорот Аиво Орав преку порака на својот твитер-профил и официјално се збогува од функцијата шеф на Мисијата на Европската Унија во Македонија.

Тој попладнево твитна „збогум“ (bye) со негова фотографија пред резиденцијата на ЕУ во Пржино.

Орав на функцијата амбасадор на ЕУ во Македонија беше именуван во 2012 година, а сега е делегиран за шеф на мисијата во Црна Гора.

 

Orav tvitЗа време на неговиот мандат во Македонија, Орав беше вклучен во решавањето на најтешките политички кризи во историјата на земјава, од кои најсложената, актуелната политичка криза, сè уште чека разврска по една година исцрпувачки преговори и по два договори.

Орав е оптимист дека условите од последниот договор меѓу политичките партии ќе бидат исполнети и дека до крајот на годината ќе се стави крај на политичката криза.

„Има неколку елементи што мора да се спроведат пред 31 август, кога лидерите ќе се сретнат и ќе речат „да, сè е направено“ и подоцна годинава да се оди на избори. Верувам дека никој нема да има никакво оправдување да се повлече од договорот и се надевам дека кризата ќе заврши оваа година. Друго прашање е што ќе се случи по изборите, бидејќи ова е само едно поглавје и она што треба да се направи сега се многу сериозни реформи за да се напредува кон ЕУ“, вели Орав во интервју за порталот „МКД.мк“

На прашањето кои се опасностите ако политичките партии не ги почитуваат роковите, тој вели дека „во тој случај повторно ќе има бескрајни преговори“.

Како најтежок момент во преговорите за излез од политичката криза, Орав ја посочува аболицијата на 56 политичари и нивни соработници од претседателот Ѓорге Иванов, за која вели дека била „нуклеарна експлозија која никој не ја очекуваше“.

„Зборуваме за земја-кандидат, а за да се приклучите кон ЕУ и да напредувате, би сакале да видиме демократски реформи. Овој акт од претседателот не може да се вклучи во оваа категорија… Тоа беше како нуклеарна експлозија која никој не ја очекуваше. Таа одлука ја одолжи многу кризата. Потоа, имаше многу моменти кога роковите не се почитуваа, што беше многу фрустрирачки и повторно многу доцнења… Мислам дека ќе се памети и ќе се анализира долго време“, вели Орав.

Околу изјавите на Иванов дека „македонските политичари треба помалку да одат во странските амбасади“, евроамбасадорот во заминување одговара оти смета дека „би било подобро ако претседателот на државата беше тој што ќе посредуваше во решавање на кризата во последните четири години“.

И кратењето на средствата од ИПА-фондовите од страна на ЕУ пред еден месец, Орав мошне експлицитно го поврзува со аболицијата.

„Овие пари, пред сè, одат до владата за инфраструктура, за јавна администрација, за екологија, за земјоделство, како и за граѓанското општество. Една од клучните работи е владеењето на правото. За жал, пред неколку месеци видовме нешто прилично интересно, негативно изненадување – аболицијата од претседателот, а потоа и парцијалното повлекување на аболицијата. Ова не е нешто што ЕУ го спонзорира овде, ако зборуваме за концептот на владеење на правото. Сакаме да видиме напредок и кога се случи кратењето на ИПА-фондовите, имаше многу различни причини зошто е тоа направено, но политичката ситуација беше еден од елементите, јасно. Но, морам да кажам дека изјавите во јавноста дека ЕУ не дава пари за вашата земја, воопшто не се корисни, бидејќи, како што реков, даваме 100 милиони евра годишно. Второ, не е многу корисно ако ЕУ финансира големи инфраструктурни проекти, а од медиумите добиваме впечаток дека овие пари доаѓаат од државата. Кога ги даваме парите, треба да бидеме сигурни дека се трошат коректно. Сега многу пари одат за судството, но видовме проблеми во реформите во судството, односно како се користат тие пари. Потоа дојде аболицијата, што беше навистина шокантно. Тоа не е нешто што ЕУ може да го прифати или да го разбере“, вели Орав.

За работа на Специјалното јавно обвинителство, Орав вели дека од аспект на ЕУ, развојот на настаните околу СЈО и финализирањето на негивата работа ќе биде еден од клучните тестови за демократијата во земјава.

„Се грижиме за тоа многу и многу внимателно набљудуваме како ќе продолжи тој процес. Има многу тешкотии и мислам дека политичарите треба да овозможат да се заврши работата на СЈО, сите државни институции треба да го поддржат СЈО како што го поддржуваат и Јавното обвинителство и само на тој начин е можно да се стави крај на кризата. Кога велам „поддршка“, мислам да не се прават опструкции на работата на СЈО, но повторно ќе кажам дека има многу емоции. Емоциите треба да исчезнат“, вели евроамбасадорот.


Три месеци по смртта на Крпач, ОЈО Скопје чека уште едно вештачење и податоци од СЈО


Скопје, 27 јули, 2016 - 15:35 (META) 

Точно три месеци поминаа од смртта на Коста Крпач, кој на 27 април беше пронајден мртов во својот стан во населбата Капиштец, со прострелна рана во градите. Скопското јавно обвинителство сè уште не ја завршило истрагата што треба да ги утврди причините и околностите за смртта на Крпач. Од Јавното обвинителство за „Мета“ велат дека се очекуваат резултатите од уште едно вештачење, но и податоци од други институции „кои во јавноста излегоа со тврдења дека поседуваат информации за случајот“.

Од Обвинителството посочуваат на податоци од Специјалното јавно обвинителство, кои, според нив, иако ги побарале, не им биле доставени.

Од Обвинителството не прецизираат дали е завршена предистражната постапка за случајот, иако поминаа три месеци од настанот, и наведуваат дека постапката за истражување на причните и на околностите за смртта на Крпач е во тек.

„Во текот на предистражната постапка во предметот за починатото лице, беше утврдено дека станува збор за самоубиство. Притоа, Основното јавно обвинителство – Скопје продолжува и понатаму да работи на утврдување на причините и на околностите под кои настапила смртта на лицето К.К. Во таа насока, се очекуваат резултатите од уште едно вештачење, но и податоци од други институции кои во јавноста излегоа со тврдења дека поседуваат информации за случајот. Меѓу објавите, беше и соопштението дадено од Јавното обвинителство за гонење кривични дела поврзани и кои произлегуваат од незаконското следење на комуникациите, во кое истакнува дека, цитираме: „Воедно Ве известуваме дека ова јавно обвинителство поседува докази за многу релевантни околности, вклучително и за притисокот под кој се наоѓаше лицето Коста Крпач…“. Неопходно е да истакнеме дека од Јавното обвинителство за гонење кривични дела поврзани и кои произлегуваат од незаконското следење на комуникациите и по повторна ургенција не е доставен ниту еден доказ ниту, пак, било каква релевантна информација во таа насока“, стои во одговорот од Обвинителството на нашите прашања дали е завршена предистражната постапка за случајот, дали се добиени сите побарани податоци и вештачења и кога Јавното обвинителство ќе излезе со официјални информации во јавноста во врска со случајот.

Од СЈО за „Мета“ велат дека не добиле ново барање од Основното јавно обвинителство и дека остануваат на ставот што го соопштија претходно дека до Обвинителството се доставени податоци што можат да помогнат во расчистувањето на случајот, освен оние кои не се повразни со испитувањето на околнолностите за смртта на Крпач, а се дел од предистражна постапка што ја води СЈО.

Коста Крпач беше едно од 56-те лица што се најдоа на списокот на помилувани од претседателот Ѓорге Иванов на 12 април годинава.

Неговото тело беше најдено на 27 април, неколку часа откако тој пукал од својот балкон кон комби паркирано на околу 50 метри од неговата зграда.

СЈО побара, но како што велат оттаму, сè уште не добиле одговор од претседателот Ѓорге Иванов од каде му се податоците од нивните тајни истраги и за лицата што се најдоа на списокот на помилувани, меѓу кои беше и Коста Крпач.