Зекири во судница препозна двајца напаѓачи на Села, кои барале „албанска крв“


Скопје, 16 април, 2018 - 14:02 (META) 

Пратеникот на СДСМ, Мухамед Зекири, во сведочењето во Основен суд Скопје 1 за обидот за убиство на Зијадин Села што се случи на 27 април минатата година во Собранието, рече дека во обвинетите препознал двајца што го извлекле Села од групата пратеници.  Друг сведок пак рече дека од насилниците се слушало дека бараат „албанска крв“.

Закири рече дека човекот што го одвоил Села од другите пратеници е обвинетиот Александар Јанески – Тоста. Рече дека му помогнале уште двајца во извлекувањето на Села од толпата, опишувајќи ги по облеката, едниот со црно елече, а другиот со качулка. Тој со црното елече е меѓу присутните обвинети, рече Зеќири, покажувајќи кон обвинетиот Сашо Сенков – Сенко.

Зекири рече дека откако Села бил извлечен на страна, салата се преполовила, и притисокот врз останатите пратеници спласнал.

Претходно сведочеше полицаецот Абдулфетах Алими, кој рече оти слушнал дека насилниците барале „албанска крв“.

– Во салата во која се одржуваше прес-конференцијата видов бесни демонстранти кои со тврди предмети гаѓаа кон пратениците. Слушнав како велеа дека бараат албанска крв, меѓу кои и на Зијадин Села, Талат Џафери и Зоран Заев. Ние се обидовме да ги заштитиме, но ситуацијата излезе од контрола – изјави Алими, кој во моментов се наоѓа во притвор.


Притворен припадник на собраниското обезбедување поради 27 април


Скопје, 11 декември, 2017 - 14:09 (META) 

Кривичниот суд во Скопје му одреди мерка притвор од 30 дена на припадник на обезбедувањето на Собранието, кој е дел од осомничените за насилствата од 27 април, оваа година.

Како што пренесуваат медиумите станува збор за Абдулфетах Алими, кој се товари за непостапување во службата, односно е осомничен дека ги дал клучевите од вратите на Собранието.

Тој денеска сам се пријавил во судот, придружуван од адвокат, а по распитот пред судија на претходна постапка, со комбе бил пренесен во истражниот затвор „Скопје“ во населбата Шуто Оризари.

Според медиумите, кои се повикуваат на видео-снимките од настаните во Собранието, Алими бил членот на собраниското обезбедување кој го спасил пратеникот Зијадин Села од напаѓачите.