ВМРО-ДПМНЕ бара невладините да не издаваат препораки за членовите на Советите на ААВМУ и МРТ


Скопје, 17 мај, 2018 - 17:17 (META) 

Во собраниската Комисија за транспорт, врски и екологија денеска се одржа четвртото продолжение на амандманската расправа за Предлог-законот за изменување и дополнување на Законот за аудио и аудиовизуелни медиумски услуги, во второ читање. Се дискутираше за 5-от амандман на ВМРО-ДПМНЕ, со кој се бара да се избрише ставот од предложениот закон со кој се предвидува кандидатите за членови во Советот на Агенцијата за аудио и аудиовизуелни медиумски услуги (ААВМУ) и на Македонска радио телевизија (МРТ) да достават писмо за поддршка од две невладини организации.

Според Благоја Деспотовски од ВМРО-ДПМНЕ, нема независни граѓански организации, бидејќи се или со едната или со другата политичка опција.

Со ова темпо на долги дискусии  опозицијата го блокира носењето на законот со цел да ги задржат партиските членови во советите, порача министерот за информатичко општество и администрација, Дамјан Манчевски, кој беше на седницата како претставник на предлагачот на законот, односно на Владата.

Во четирите досегашни продолженија на седницата на собраниската комисија се дискутираше за пет амандмани, а остануваат уште 70.

За помалку од еден месец, на четирите  амандмански продолженија на седниците на Комисијата за транспорт и врски, пратениците поминаа едвај 5  амандмани од над седумдесетина кои ги поднесе ВМРО-ДПМНЕ.

 
foom-logo-disklejmerТекстот е изработен во рамки на проектот „Опсерваторија на медиумските реформи“, што го спроведуваат Фондацијата за интернет и општество „Метаморфозис“, „Агора“ Центар за промовирање на граѓански вредности и Платформата за истражувачко новинарство и анализи (ПИНА), со финансиска поддршка на Фондацијата Отворено општество – Македонија.
Содржината на текстот е единствена одговорност на авторите и на ниту еден начин не може да се смета дека ги одразува гледиштата на Фондацијата Отворено општество – Македонија.


ААВМУ ја одзеде дозволата на радиото „Слободна Македонија“


Скопје, 17 мај, 2018 - 15:51 (META) 

Советот на Агенцијата за аудио и аудиовизуелни медиумски услуги (ААВМУ) на својата денешна седница ја одзеде дозволата за емитување на радиото „Слободна Македонија“.

Одлуката беше донесена едногласно, а по гласањето претседателот на Советот, Лазо Петрушевски, изрази жалење за вработените, кои како што рече, сигурно веќе подолго време се без работа.

– Сепак, Советот нема друга можност освен да постапи по законите, а медиумот има други можности, по судски пат да се обиде да ја продолжи битката – рече Петрушевски.

Постапката почна уште минатиот месец, откако стручните служби на ААВМУ по извршениот вонреден надзор констатирале дека оваа радиодифузна куќа повеќе не ги исполнува минималните кадровски услови за добивање дозвола за радио и телевизиско емитување и му препорачаа на директорот на ААВМУ да достави предлог до Советот на ААВМУ за покренување постапка за одземање на дозволата за радио емитување.

Постапката за одземање на дозволата почна на 4 мај, кога претседателот на Советот рече дека останува законскиот рок од 15 дена откако радиодифузерот ќе ја добие одлуката, да преземе мерки за да ги исполни условите.

Но, како што рече тогаш директорот на ААВМУ, Зоран Трајчевски уште од 8 февруари годинава, кога се упатени првите предупредувања дека не се исполнува програмскиот концепт за кој е издадена дозволата за емитување, односно најмалку 40 отсто говорна програма, не е преземено речиси ништо, а од тогаш „ролетните во редакцијата се постојано спуштени“.


Манчевски: Владата сака независна МРТ и професионални регулаторни тела


Скопје, 11 мај, 2018 - 15:24 (META) 

Владата се залага за создавање медиумски простор за непристрасно и објективно информирање на граѓаните. Наша цел е МРТ да биде целосно непристрасен и независен медиум, а регулаторните тела да бидат транспарентни, професионални и компетентни. Особено е важно во регулаторните тела и националниот радиодифузер да не членуваат високи партиски функционери, поранешни пратеници, кандидати за градоначалници и роднини на партиски функционери, како што е тоа сега. Регулаторните тела и МРТ треба да се остават на медиумските работници. Медиумите треба да се остават на медиумските работници, порача денеска министерот за информатичко општество и администрација Дамјан Манчевски.

Тој се обрати на завршниот панел на Петтата конференција за медиуми на Југоисточна Европа, што изминатите два дена се одржуваше во Струга, во организација на Канцеларијата на претставникот за слобода на медиумите на ОБСЕ, Арлем Дезир со поддршка на теренските операции на ОБСЕ во Југоисточна Европа.

Манчевски се осврна на измените на Законот за АВМУ, за кој рече дека дава шанса политичарите да ги тргнат рацете од медиумите и ја повика опозицијата да овозможи чистење на сферата од партиските влијанија.

– Во моментот Законот е во Собраниска процедура. Јас се уште искрено сакам да верувам дека колегите од опозицијата ќе ја увидат потребата од што поскоро носење на овој закон. Но, за жал тоа по се изгледа не е така. Токму вчера бевме сведоци на амандманска расправа во Комисијата за транспорт и врски во Собранието, каде пратениците од опозицијата беа против јавно претставување на кандидатите за членови на Советот на АВМУ и Програмскиот совет на МРТВ. Да се биде против транспарентност и јавност во изборот на независни регулаторни тела, е да се биде против демократските вредности и слободата на медиуми. Тоа нема да го дозволиме. Никогаш повеќе нема да дозволиме политичарите да се пазарат зад затворени врати, а граѓаните да дознаваат за одлуките, откако тие веќе ќе бидат донесени. Се надевам дека и опозицијата ќе го сфати тоа – информираше министерот Манчевски.

Во својот завршен говор министерот Манчевски, даде осврт на дигитализацијата и слободата на говор, како и на глобалниот проблем со „лажните вести“. Како што рече тој, не смее повеќе да се дозволи меѓународната заедница да ги исправа работите, туку треба медиумската дејност да се остави на професионалците.

– Медиумите и медиумските работници се тие кои треба да бидат мотор на промените. Не смееме да се доведеме во состојба каде поради нарушените медиумски слободи, политичарите, партиите или меѓународната заедница да интервенира, како што беше тоа случај изминатите 2-3 години. Доброто владеење и слободата на медиумите се меѓусебно зависни. Само кога новинарите ќе добијат простор да работат слободно, да набљудуваат, да поставуваат прашања и да известуваат, без страв од притисоци и закани, само тогаш сите граѓани можат да бидат сигурни дека носителите на одлуки ќе се придржуваат до највисоките стандарди – заклучи министерот за информатичко општество и администрација.
 
foom-logo-disklejmerТекстот е изработен во рамки на проектот „Опсерваторија на медиумските реформи“, што го спроведуваат Фондацијата за интернет и општество „Метаморфозис“, „Агора“ Центар за промовирање на граѓански вредности и Платформата за истражувачко новинарство и анализи (ПИНА), со финансиска поддршка на Фондацијата Отворено општество – Македонија.
Содржината на текстот е единствена одговорност на авторите и на ниту еден начин не може да се смета дека ги одразува гледиштата на Фондацијата Отворено општество – Македонија.


ААВМУ опомена 24 телевизии и радија


Скопје, 11 мај, 2018 - 10:56 (META) 

Агенцијата за аудио и аудиовизуелни медиумски услуги (ААВМУ) вчера изрече опомени за 24 радиодифузери – телевизии и радија – поради непочитување на обврската до 31 март годинава да достават писмен извештај за спроведувањето на обврските утврдени во дозволата за радио и ТВ емитување, како и за недоставување информација за техничките средства преку кои се емитува или реемитува нивниот програмски сервис во земјава или надвор од неа.

Радиодифузерите добија 45 дена рок да ги достават извештаите и информациите.

Меѓу радијата е и Радио Слободна Македонија, за кое на 4 мај беше почната постапката за одземање на дозволата поради неисполнување на условите во поглед на програмата што се емитува.


ТВ „24“ и ТВ „21“ не добија национална дозвола, радиото „Слободна Македонија“ згаснува,


Скопје, 4 мај, 2018 - 17:22 (META) 

На денешната седница на Советот на Агенцијата за аудио и аудиовизуелни медиумски услуги (ААВМУ) едногласно беше донесена одлуката да почне постапката за одземање на дозволата на радиото „Слободна Македонија“. Како што напомена претседателот на Советот, Лазо Петрушевски, останува можноста во законскиот рок од 15 дена откако радиодифузерот ќе ја добие одлуката, да преземе мерки за да ги исполни условите.

Но, како што рече Зоран Трајчевски, директор на ААВМУ, уште од 8 февруари годинава, кога се упатени првите предупредувања дека не се исполнува програмскиот концепт за кој е издадена дозволата за емитување, односно најмалку 40 отсто говорна програма, не е преземено речиси ништо, а од тогаш „ролетните во редакцијата се постојано спуштени“.

Истовремено, членовите на Советот едногласно донесоа одлука да не се издаде дозвола за национален дигитален терестријален мултиплекс, односно емитување преку етер на целата територија за телевизиите „24“ и „21“. Како причина за тоа се наведе препораката од студијата што според законската обврска ААВМУ ја нарачала од „Маркет Вижн“, односно, како што рече Трајчевски, заклучоците се дека во услови на намалување на маркетиншкиот колач како и стагнананта економска ситуација, не треба да се објави конкурс за доделување дозволи за национално емитување, односно да не се доделат дозволи на телевизиите.

Исто така едногласно, членовите на Советот на ААВМУ донесоа одлука да се додели дозвола за емитување програма преку кабел во регионот на општините Дебар, Центар Жупа и Маврово – Ростуше на Виктор Серафимов од Скопје. Според барањето, ќе станува збор за телевизија со претежно забавен општ формат, што ќе емитува преку јавна електронска комуникациска мрежа што не користи ограничен ресурс.

foom-logo-disklejmerТекстот е изработен во рамки на проектот „Опсерваторија на медиумските реформи“, што го спроведуваат Фондацијата за интернет и општество „Метаморфозис“, „Агора“ Центар за промовирање на граѓански вредности и Платформата за истражувачко новинарство и анализи (ПИНА), со финансиска поддршка на Фондацијата Отворено општество – Македонија.
Содржината на текстот е единствена одговорност на авторите и на ниту еден начин не може да се смета дека ги одразува гледиштата на Фондацијата Отворено општество – Македонија.


Медиумските закони денеска на собраниска комисија


Скопје, 2 мај, 2018 - 13:40 (META) 

Во Комисијата за транспорт, врски и екологија во Собранието денеска ќе се расправа за предлог – закон за изменување и дополнување на Законот за аудио и аудиовизуелни медиумски услуги и за предлог – закон за изменување и дополнување на Законот за основање на Јавно претпријатие Македонска радиодифузија, и двата во второ читање. Со законите се овозможува, според Владата, која ги предлага законите, професионализација и независност на Советите на Агенцијата за аудио и аудиовизуелни медиумски услуги (ААВМУ) и на јавниот радиодифузер Македонска радио телевизија (МРТ).

Освен тоа, во Собранието, членовите на Комисијата за надворешна политика ќе расправаат по предлог-законите за ратификација на Спогодбата меѓу Република Македонија и Република Бугарија за соработка во случај на катастрофи и за ратификација на изменувањата на протоколот 2 кон договорот за слободна трговија меѓу Република Македонија и Република Турција.

Овие точки се на дневен ред и на Законодавно-правната комисија.

На седницата на собраниската Комисија за еднакви можности на жените и мажите ќе се одржи јавна расправа на тема „Извештај за напредокот на Република Македонија од страна на Европската комисија за 2018 година, со посебен осврт на делот за родова рамноправност“.


Почна постапката за гаснење на Радио Слободна Македонија


Скопје, 27 април, 2018 - 16:43 (META) 

Стручните служби на Агенцијата за аудио и аудиовизелни медиумски услуги (ААВМУ) по извршениот вонреден надзор на Радио Слободна Македонија констатирале дека оваа радиодифузна куќа повеќе не ги исполнува минималните кадровски услови за добивање дозвола за радио и телевизиско емитување и му препорачуваат на директорот на ААВМУ да достави предлог до Советот на ААВМУ за покренување постапка за одземање на дозволата за радио емитување.

Во извештајот објавен денеска на веб-страницата на ААВМУ се вели дека 12 март годинава на барање на агенцијата Радио Слободна Македонија доставило документи за бројот на ангажирани лица, односно еден договор за вработување на неопределено време и девет авторски договори. Бидејќи авторските договори имале важност до 11 април, од ААВМУ било повторно побарано да се достават документи за бројот на ангажирани лица, но тоа не се случило, па ААВМУ му предлага на директорот Зоран Трајчевски да ја почне постапката за одземање на дозволата.


ААВМУ ја опомена ТВ „Нова“ да емитува нова програма, а не репризи


Скопје, 24 април, 2018 - 10:12 (META) 

Агенцијата за аудио и аудиовизуелни медиумски услуги (ААВМУ) вчера презела две мерки против телевизијата „Нова“, како и против телевизијата „Шења“ и магазинот „Леона“.

На телевизиите „Нова“ и „Шења“ им е изречена опомена поради необјавување импресум, а на магазинот „Леона“ опомена поради не објавени податоци за адресата на издавачот на медиумот, податоци за печатницата и датумот на печатење или препечатување.

Дополнително, телевизијата „Нова“ на Сеад Кочан ќе добие опомена поради тоа што речиси и не создава програма, туку емитува репризи.

Агенцијата по службена должност извршила вонреден програмски надзор врз „Нова“ за почитувањето на член 67 став 6 од Законот за аудио и аудиовизуелни медиумски услуги, според кој радиодифузерот е должен во текот на една недела да исполни 80% од програмскиот концепт за кој му е доделена дозволата за телевизиско емитување.

Се утврдило дека на програмата на „Нова“, во период од 19 до 25 март 2018 година, воопшто не е спроведуван програмскиот концепт за кој и е издадена дозволата за телевизиско емитување.

„Беше целосно надвор од форматот за којшто му е издадена дозволата, речиси вкупно емитуваната програма беше составена од репризи на претходно емитувани програми, а во програмите со информативна функција отсуствуваше дневен или актуелен новинарски ангажман“, се вели во извештајот на ААВМУ.

Поради тоа, радиодифузерот ќе биде опоменат да ги исправи неправилностите, а дали тоа ќе се случи ќе се утврди со нов вонреден надзор.
foom-logo-disklejmerТекстот е изработен во рамки на проектот „Опсерваторија на медиумските реформи“, што го спроведуваат Фондацијата за интернет и општество „Метаморфозис“, „Агора“ Центар за промовирање на граѓански вредности и Платформата за истражувачко новинарство и анализи (ПИНА), со финансиска поддршка на Фондацијата Отворено општество – Македонија.
Содржината на текстот е единствена одговорност на авторите и на ниту еден начин не може да се смета дека ги одразува гледиштата на Фондацијата Отворено општество – Македонија.


ЕК: Има напредок во слободата на изразување, намален е притисокот врз новинарите


Скопје, 18 април, 2018 - 14:16 (META) 

Климата за слободата на медиумите и слободата на изразување е подобрена, со поотворена политичка дебата и покритичко известување во медиумите. Забележан е пад во притисокот врз новинарите. Известувањето од изборните кампањи и поизбалансирано од порано. Владиното рекламирање е прекинато. Клучно е власта да практикува нулта толеранција кон сите инциденти на физички и вербални напади или закани врз новинарите, се вели во Извештајот на Европската Комисија за напредокот на Македонија, кој беше објавен вчера.

Според делот за слободата на говорот, Македонија е на одредено ниво на подготвеност во областа на слободата на изразувањето и постигнала значителен напредок од средината на 2017 година.

„Законодавната рамка во голем дел е усогласена и со acquis и со меѓународните стандарди. Измените на Законот за аудио и аудиовизуелни медиумски услуги се подготвени во консултации со релевантните заинтересирани страни. Постои подобрена клима за медиумите и новинарите се поподготвени да ги критикуваат злоупотребите на јавните личности и цензурата. Сепак, опстануваат предизвици и мора да се спроведува нулта толеранција за физичкото и вербалното малтретирање или заканите кон новинарите. Јавниот радиодифузен сервис треба да се реформи и да се зајакне неговата независност. Земјата делумно ги спроведе препораките од извештајот за 2016 година, пред сè со укинување на владиното рекламирање и намалување на притисокот врз новинарите и медиумите, што овозможи побалансирано известување“, се наведува во извештајот.

Европската Комисија препорачува продолжување на реформите на јавниот радиодифузен сервис и засилување на неговата независност. Се посочува и на преземање мерки за да се поттикне објективното известување и разноликост на гледиштата во медиумите, како и да се охрабрува професионалното однесување од страна на сите медиумски чинители.

Се посочува и на соодветно постапување на органите на редот и на судските власти за случаите на насилство врз новинарите.

Европската Комисија наведува дека Владата направила напори да биде потранспарентна и новинарите сега бесплатно добиваат достап до информации и документи, што е зацртано во Итните реформски приоритети.

Во поглед на заканите кон новинарите, се одбележува дека се јавува пад на притисокот врз новинарите, како резултат на подобрената политичка клима. Се одбележува договорот на власта со Здружението на новинарите од декември минатата година за истрага за случаите на нападнатите новинари. Сепак, како што се наведува во Извештајот за напредокот на Македонија, регистрирањето на напади врз новинари е несоодветно и покренати се многу малку истраги.

„Клучно е властите да спроведуваат нулта толеранција кон сите инциденти на физичко и вербално насилство или закани кон новинарите и тие соодвено да бидат третирани  од страна на полицијата и Јавното обвинителство. Има 21 новопријавен случај на заплашување на новинари и 13 судски процеси во кои се вклучени новинари. Неколку новинари беа меѓу повредените во насилставата во Парламентот на 27 април. Агенцијата за аудио и аудиовизуелни медиумски услуги забележа непрофесинално известување од страна на јавниот радиодифузен сервис и приватна телевизија во врска со овие настани“, вели Европската Комисија.

Во поглед на измените на законот за аудио и аудиовизуелни медиумски услуги кои владата во февруари годинава ги одобри и сега предлог-законот е во Собраниска процедура, се напоменува дека некои вклучени страни го изразиле своето несогласување со некои измени, посебно во поглед на финансирањето од државниот буџет. Законската рамка за говорот на омраза според ЕК е генерално усогласена со меѓународните стандарди, но нивното спроведување треба да биде подобрено. Говорот на омраза онлајн и понатаму е нерегулиран.

За Агенцијата за аудио и аудиовизуелни медиумски услуги (ААВМУ) се вели дека својата надгледна улога ја врши поефикасно, вклучувајќи го тука и периодот на изборите. Се напоменува дека ААВМУ почнала процедури за небалансираното известување и прекршување на ограничувањата за платено политичко рекламирање.

Во поглед на известувањето на некои приватни телевизии се вели дека квалитетот напреднал, но сепак во некои медиуми се уште има лошо ниво на професионалните стандарди, со што се нарушува објективноста на информирањето.

„Набљудувањето на Советот за етика во медиумите на Македонија покажува дека е потребна понатамошна работа за подобрување на етичките стандарди. ЕК одбележува дека истражувачкото новинарство е уште во ограничени рамки, како и дека се јавува пад на случаите на навреди и клевета против новинари, со 13 нови случаи во 2017“, стои во Извештајот.

Известувањето на јавниот радиодифузер МРТ било поизбалансирано во последните изборни кампањи споредено со минатото, а се одбележува и дека куќата усвоила Етички кодекс. Сепак, потребни се дополнителни напори и долгорочна стратегија за да се засилат независноста и објективноста во информирањето, како и финансиската одржливост на МРТ.

Во поглед на нејзините финансии, во контекст на финансирањето на буџетот, се вели дека мора постојано да се следи спроведувањето на реформите за да се спречи директно или индиректно политички влијание што би ја поткопало независноста на куќата и би обеззбедило стабилно, предвидливо и достаточно обезбедување средства.

За ААВМУ и другите институции се вели дека немаат капацитети да ги идентификуваат и спречат соработките меѓу медиумските сопственици и политичарите, што пак влијае на уредувачката политика.

Одбележувајќи дека новата влада го сопре владиното рекламирање на комерцијалните медиуми, се вели и дека се намалил бројот на медиуми, со затворањето на МПМ.

Во поглед на професионалните организации, се вели дека нема напредок во заштитата од страна на синдикатот за работните услови на новинарите, поради што, новинарите практикуваат самоцензура и работат со договори на одредено време.

foom-logo-disklejmerТекстот е изработен во рамки на проектот „Опсерваторија на медиумските реформи“, што го спроведуваат Фондацијата за интернет и општество „Метаморфозис“, „Агора“ Центар за промовирање на граѓански вредности и Платформата за истражувачко новинарство и анализи (ПИНА), со финансиска поддршка на Фондацијата Отворено општество – Македонија.
Содржината на текстот е единствена одговорност на авторите и на ниту еден начин не може да се смета дека ги одразува гледиштата на Фондацијата Отворено општество – Македонија.


Предлог-законот за АВМУ повторно на мета на експертите и фелата


Скопје, 12 април, 2018 - 17:42 (META) 

На денешната јавна расправа за предлог-законот за аудио и аудиовизуелни медиумски услуги, која беше организирана од Комисијата за транспорт, врски и екологија при Собранието, експертите, новинарските здруженија и луѓе од медиумските дејности критикуваа решенија од текстот, за кои велат дека ќе ги влошат состојбите.

Според претседателот на Здружението на новинари на Македонија, Насер Селмани, тоа што за МРТ како јавен радиодифузен сервис се предвидени помалку пари ќе ја оневозможи куќата да ја извршува својата функција во целост.

– Јавните сервиси треба да информираат, да едуцираат и да забавуваат. Приватните телевизии не мораат тоа да го прават. Добро би било да го прават, но не се обврзани. Единствено, МТВ е обврзана, а не може да го прави тоа ако има помалку пари. Дали забележувате дека вестите на МРТВ почнуваат и завршуваат со информации од Скопје? Нема да слушнете вести од други градови се додека не се развие дописничката мрежа. МРТВ нема дописничка мрежа, ќе треба да се вработат најмалку уште 100 луѓе – новинари и камермани – рече Селмани.

Тој вели дека отворањето на нови канали, за кои владата треба да обезбедува пари надвор од предвидениот буџет за МРТ, ќе ја наруши независноста на јавниот радиодифузен сервис

– Со новите законски измени ќе се отворат нови канали, а од друга страна ние ги намалуваме средствата. Таа одредба која вели дека „ако има потреба ние би дале за техничко опремување“, тоа е сериозен упад во автономијата на јавниот сервис – рече претседателот на ЗНМ.

Претседателот на  Советот на Агенцијата за аудио и аудиовизуелни медиумски услуги (ААВМУ),  Лазо Петрушевски, пак, смета дека професионалното вработување на членовите на Советот ќе предизвика промена на карактерот на ова регулаторно тело.

– Тоа ќе биде нешто помеѓу агенција и совет за радиодифузија, нема да функционира и ќе направи проблеми – рече Петрушевски.

Програмскиот совет на МРТ го спори член 46 од Законот, кој исто така се однесува на финансирањето.

– Во него се вели дека за 2018 година тоа ќе бидат 0,7 проценти од Буџетот, а до 2021 1 процент. Во овој член има и став кој вели дека процентите од став 1 на овој член ќе се реализираат доколку со тоа не се нарушува праведната распределба на буџетските средства. Мислиме дека овој став дозволува политичко влијание. Се кажуваат процентите, но потоа се релативизираат. Предлагаме овој став да се избрише – рече Смилка Јаневска – Саркањац, претседател од Програмскиот совет.

Министерот за информатичко општество и администрација, Дамјан Манчевски истакна дека Законот со кој, како што вели, целта е да се тргнат рацете на политичарите од медиумите,  ќе биде појдовна основа за реформите во областа. Побара да се даде шанса за законското решение за кое, како што рече, досега има 38 објавени и дебатирани верзии, и пак има 200 отворени прашања.

Сите конструктивни забелешки кои произлегоа од дискутантите учесници на јавната расправа во однос на Предлог-законот  ќе се земат предвид и ќе се поднесат во форма на амандмани од страна на овластени предлагачи во второ читање на Комисијата закажана за 16 април 2018 година, информираат од Собранието.
foom-logo-disklejmerТекстот е изработен во рамки на проектот „Опсерваторија на медиумските реформи“, што го спроведуваат Фондацијата за интернет и општество „Метаморфозис“, „Агора“ Центар за промовирање на граѓански вредности и Платформата за истражувачко новинарство и анализи (ПИНА), со финансиска поддршка на Фондацијата Отворено општество – Македонија.
Содржината на текстот е единствена одговорност на авторите и на ниту еден начин не може да се смета дека ги одразува гледиштата на Фондацијата Отворено општество – Македонија.