!Во периодот што претстои работиме на воведување систем за пристап и за претплата. За начинот на пристап и за претплатата ќе информираме дополнително. Содржините на „Мета“ до тогаш се слободни за преземање со задолжително цитирање и атрибуирање.

АЕК и ААВМУ да работат медиумите да не бидат инструментализирани од политиката


Скопје, 13 декември, 2017 - 14:27 (META) 

Недоволно или несоодветно информирање на граѓаните за нивната работа или за алатките преку кои граѓаните може да реагираат на работењето на медиумите или телекомуникациските оператори е главната забелешка што беше изнесена за работата на Агенцијата за електронски комуникации (АЕК) и Агенцијата за аудио и аудиовизуелни медиумски услуги (ААВМУ). На денешната презентација на четвртиот мониторинг извештај за работата на двете агенции, подготвен од Евротинк – Центар за европски стратегии, НВО Инфоцентар, Транспарентност Македонија и Хелсиншкиот комитет за човекови права, беа посочени и чекорите што треба да се преземат за тоа да се надмине.

Според Славица Билјарска, специјалист за односи со јавност, нелогично е АЕК да има три веб-страници, бидејќи така им се отежнува на граѓаните доаѓањето до бараната информација, а проблем кај веб-страницата на ААВМУ е тоа што голем дел од битните информации се ставени во формат со кој се оневозможува граѓанинот да дојде до информацијата преку интернет-пребарувачите.

– Ме израдува тоа што на веб-страницата на ААВМУ има наведено доволен број контакти, за да знаат граѓаните кому точно да му се обратат, за разлика од сајтот на АЕК, каде што има само контакт-формулар нема доволно други канали за комуникација, односно присутност на социјалните мрежи. Направете стратегии за комуникација и бидете поприсутни на социјалните мрежи, а потоа низ искуство ќе видите кој канал на комуникација ќе биде најефективен и ќе се посветите потоа најмногу на него, во зависност од тоа која ви е таргет-групата – рече Билјарска, давајќи им сугестиии на двете агенции.

За разлика од претходните три извештаи, изготвувачите на најновиот сакале да дознаат колку граѓаните се информирани за двете агенции, и како што истакна Горан Лазаров од Евротинк, резулатите биле вчудовидувачки – голем дел од вкупно 29 граѓани што одговарале на различни прашања не знаеле дека двете агенции не се финансираат од државниот буџет, но исто така ги гледале како зависни од политиката.

Според експертот за медиуми, Снежана Трпевска, посебно ААВМУ како регулатор, мора да работи интензивно за да се создаде атмосфера медиумите да не бидат инструментализирани од политиката.

foom-logo-disklejmerТекстот е изработен во рамки на проектот „Опсерваторија на медиумските реформи“, што го спроведуваат Фондацијата за интернет и општество „Метаморфозис“, „Агора“ Центар за промовирање на граѓански вредности и Платформата за истражувачко новинарство и анализи (ПИНА), со финансиска поддршка на „Фондацијата Отворено општество – Македонија“.
Содржината на текстот е единствена одговорност на авторите и на ниту еден начин не може да се смета дека ги одразува гледиштата на „Фондацијата Отворено општество – Македонија“.


Манчевски: Најголем дел од буџетот – 19,3 милиони евра – ќе одат за МРТ, МРД и за ААВМУ


Скопје, 6 декември, 2017 - 15:28 (META) 

Најголемиот дел од буџетот на Министерството за информатичко општество и администрација (МИОА) во 2018 година ќе се потроши за „Македонската радио-телевизија“ (МРТ), Македонска радиодифузија (МРД) и за Агенцијата за аудио и аудиовизуелни медиумски услуги (ААВМУ), посочи денеска министерот Дамјан Манчевски.

Тој појасни дека вкупниот буџет на Министерството за следната година изнесува 1,486 милијарда денари, односно 24,088 милиони евра, и е три и пол пати поголем од претходниот. Најголемиот дел од тие пари, односно 1,19 милијарда денари (19,290 милиони евра), ќе бидат за МРТ, МРД и за ААВМУ.

– Со ова обезбедивме, пред сè, стабилно и независно финансирање на овие три чинители од радиодифузната дејност. Ова одржливо финансирање, конечно на МРТВ ќе ѝ даде шанса за развој на автономна и независна уредувачка политика – рече Манчевски.

foom-logo-disklejmerТекстот е изработен во рамки на проектот „Опсерваторија на медиумските реформи“, што го спроведуваат Фондацијата за интернет и општество „Метаморфозис“, „Агора“ Центар за промовирање на граѓански вредности и Платформата за истражувачко новинарство и анализи (ПИНА), со финансиска поддршка на „Фондацијата Отворено општество – Македонија“.
Содржината на текстот е единствена одговорност на авторите и на ниту еден начин не може да се смета дека ги одразува гледиштата на „Фондацијата Отворено општество – Македонија“.


Советот на ААВМУ едногласно го отфрли барањето да се одземе лиценцата на ТВ „24 Вести“


Скопје, 5 декември, 2017 - 15:40 (META) 

Едногласно, иако претходно имаше одредени дилеми кај некои членови, Советот на Агенцијата за аудио и аудиовизуелни медиумски услуги (ААВМУ) на денешната седница го одби барањето од „Канал 77“ да се одземе лиценцата на телевизијата „24 Вести“.

Прифаќајќи ја информацијата од стручните служби, Советот го отфрли барањето на предлагачот, чиј идентитет се криеше до самиот крај на решавањето за оваа точка од дневниот, а во однос на дилемите на некои членови, директорот на ААВМУ, Зоран Трајчевски, појасни дека стручните служби веднаш ќе извршат проверка дали постои поврзаност на телевизијата „24 Вести“ со фирма од Австрија што врши радиодифузна дејност, со што би се создала недозволена медиумска концентрација.

Во дискусијата, пред да се пристапи кон гласањето, и Трајчевски и претседателот на Советот, Лазо Петрушевски, појаснија дека во однос на барањето за одземање на лиценцата, не е можно тоа да се стори затоа што дури и да постои недозволена медиумска концентрација, првин се дава долг рок на радиодифузерот да го отстрани проблемот, а дури потоа може да се одземе лиценца.

– Ако денешната информација биде прифатена, не значи дека Агенцијата во иднина нема да истражува за сопственичката структура. Ние тоа го правиме редовно за секој медиум. Но, ако имаме основа за сомневања, ќе се почне постапка за недозволена медиумска концентрација, а не за одземање лиценца. Ние пред две години имавме постапка кај истиот што е предлагач и му дадовме рок да го реши тоа – рече Трајчевски.

На самиот крај, пред гласањето, на претседателот на Советот, Лазо Петрушевски, му се испушти дека „Канал 77“ стои зад барањето да се одземе лиценцата на „24 Вести“.

Инаку, расправајќи по претходна точка, Советот не дозволи промена на сопственичката структура на телевизијата.

Ако тоа се одобри, како што кажаа од стручната служба, би се создала недозволена медиумска концентрација зашто физичкото лице од барањето да стане и единствен основач и управител на телевизијата „24 Вести“ е директен роднина на сопственикот на оператор што реемитува програми, односно кабелскиот оператор „Телекабел“.

foom-logo-disklejmerТекстот е изработен во рамки на проектот „Опсерваторија на медиумските реформи“, што го спроведуваат Фондацијата за интернет и општество „Метаморфозис“, „Агора“ Центар за промовирање на граѓански вредности и Платформата за истражувачко новинарство и анализи (ПИНА), со финансиска поддршка на „Фондацијата Отворено општество – Македонија“.
Содржината на текстот е единствена одговорност на авторите и на ниту еден начин не може да се смета дека ги одразува гледиштата на „Фондацијата Отворено општество – Македонија“.


Советот на ААВМУ денеска расправа за барањето за одземање лиценца на ТВ „24 Вести“


Скопје, 5 декември, 2017 - 10:59 (META) 

На денешната седница на Советот на Агенцијата за аудио и аудиовизуелни услуги (ААВМУ) на дневниот ред, меѓу другите точки, е информацијата во врска со доставено барање за одземање лиценца на Телевизија „24 Вести“, стои во најавата објавена на веб-страницата на ААВМУ.

Точката на дневниот ред е веднаш по предлог-одлука за промена на сопственичката структура на Телевизија „24 Вести“ од Штип.

Како што дознава „Мета“ од извори во ААВМУ, барањето за одземање на лиценцата на ТВ „24 Вести“ е поднесено од сопственик на медиум, но, велат нашите извори, барањето е неосновано и сосема сигурно е дека на седницата што почнува во 14 часот ова барање за одземање на лиценцата на конкурентен медиум нема да биде прифатено.


Останувањето на Трајчевски на чело на ААВМУ е сензитивна тема, вели Османи


Скопје, 24 ноември, 2017 - 13:44 (META) 

Европската комисија и Владата се многу сензитивни во поглед на каков било реваншизам врз партиска и политичка основа, рече денеска вицепремиерот за европски прашања, Бујар Османи, прашан дали има препорака од Европската Унија, за директорот на ААВМУ, Зоран Трајчевски, и понатаму да остане на челната функција на агенцијата.

– Целта на реформата на јавната администрација е таа да се задснова на системот за унапредување преку заслуги, односно преку квалитет во работењето. Во одредени институции што сме ги утврдиле како најсензитивни, ќе се внимава во делот на именување – рече Османи, додавајќи дека сите именувања мора да бидат според законската процедура, транспарентни и без никакви елементи на политички и на партиски реваншизам.

Зоран Трајчевски беше назначен за директор на ААВМУ во април 2012 година, а шестгодишниот мандат му завршува во април следната година.

Стратегијата за деполитизација и за професионализација на јавната администрација треба да биде донесена до крајот на годинава, а истовремено треба да биде формиран и совет што ќе го координира спроведувањето на стратегијата.


Манчевски: За законот за ААВМУ не ни се брза, а за законот за медиуми – апсолутно не се брза


Скопје, 22 ноември, 2017 - 13:14 (META) 

Ако за законот за ААВМУ не ни се брза, за законот за медиуми – апсолутно не ни се брза да го донесеме, изјави денеска министерот за информатичко општество и за администрација, Дамјан Манчевски, во паузата на 13. Kонференција „Е-општество“, организирана од Фондацијата за интернет и општество „Метаморфозис“.

– Законот за ААВМУ веќе три години се дебатира и нема да се брза, а во однос на закон за медиуми, пак, апсолутно не брзаме и ќе се договориме заедно со медиумите кога да ја почнеме дебатата – рече Манчевски.

Тој додаде дека интернет-медиумите се предмет на законот за медиуми, но дека Министерството само ќе отвори дебата во тој поглед.

– Нема да излеземе со конкретни предози. Веднаш по законот за ААВМУ, ќе отвориме дебата за законот за медиуми. Личен став ми е дека минимум што интернет-портал треба да декларира е кој му е главен уредник – истакна Манчевски.

Според него, Владата не смее да биде моторот на реформите во медиумската сфера.

– Иронично е да се каже Владата да биде мотор на реформи во медиумите. Тоа треба да бидат медиумските работници и самите медиуми. Нам, како Влада, единствена амбиција ни е да им обезбедиме простор, дебата и механизам. Ние сме алатка за спроведување на тоа што тие сметаат дека треба да се спроведе – изјави Манчевски.

Министерот рече дека Владата е тука за да чуе какви измени се потребни, но оти дебата треба да биде полезна и да не трае до недоглед бидејќи треба да се носат одлуки и решенија.

foom-logo-disklejmerТекстот е изработен во рамки на проектот „Опсерваторија на медиумските реформи“, што го спроведуваат Фондацијата за интернет и општество „Метаморфозис“, „Агора“ Центар за промовирање на граѓански вредности и Платформата за истражувачко новинарство и анализи (ПИНА), со финансиска поддршка на „Фондацијата Отворено општество – Македонија“.
Содржината на текстот е единствена одговорност на авторите и на ниту еден начин не може да се смета дека ги одразува гледиштата на „Фондацијата Отворено општество – Македонија“.


Манчевски: МРТ нема да одговара пред Владата, само пред Собранието


Скопје, 15 ноември, 2017 - 11:26 (META) 

Министерот за информатичко општество и администрација, Дамјан Манчевски и амбасадорот на Шведска во Македонија, Матс Стефансон разговараа за реформите во медиумската сфера, измените на Законот за аудио и аудиовизуелни медиумски услуги, како и за јавниот радиодифузен сервис.

Манчевски се осврна на промените во начинот на финансирање на МРТ и на воведувањето на четврти канал за малцинските заедници.

– МРТ нема повеќе да биде доведена во состојба да бара дополнителна финансиска поддршка од Владата, како што беше тоа случај кога средствата собрани од радиодифузната такса не беа доволни. Ова ќе придонесе кон стабилно финансирање на МРТ, МРД и АВМУ, односно тие повеќе нема да зависат од процентот на наплата на радиодифузната такса. На овој начин МРТ повеќе нема да треба да одговара пред Владата, туку со својата програма одговара само пред Собранието – истакнал Манчевски.

Амбасадорот Стефансон ги поздрави заложбите на МИОА за реформите кои ќе придонесат кон независен и силен јавен радиодифузен сервис.


АВМУ ги обжалила казните за изборни прекршоци на радиодифузерите како „недоволни“


Скопје, 9 ноември, 2017 - 16:25 (META) 

Во извештајот на ОБСЕ и ОДИХР од 29 октомври 2017 година се вели дека Основниот суд донел одлуки во два случаи од првиот изборен круг, пресудувајќи казни пониски од пропишаните во Изборниот законик (ИЗ) за прекршување на изборениот молк и неизбалансирано известување.

Во првичните наоди и заклучоци на ОБСЕ и ОДИХР се вели дека иако ИЗ пропишува парична казна од 8.000 евра и 4.000 евра за вакви прекршоци, биле пресудени казни од само 4.500 евра, односно 2.250 евра.

Агенцијата за аудио и аудио-визуелни медиумски услуги (ААВМУ) поведе две прекршочни постапки против некои радиодифузери во тек на вториот круг. Случаите за однесуваат на кршење на одредбите од ИЗ за лимитите за платено политичко рекламирање и за неизбалансирано известување. Основниот суд донесе одлуки во два случаи од првиот круг, пресудувајќи казни пониски од пропишаните во ИЗ. Обете беа обжалени од ААВМУ врз основа на недоволноста на казните. Судовите допрва треба да решаваат за ова во жалбена постапка.

Зоран Трајчевски, директорот на ААВМУ, ги потврдува овие наводи, но вели дека не станува збор само за две обжалени постапки, туку дека ААВМУ „ги обжалила сите одлуки на судот“.

Трајчевски укажа и на некои чудни образложенија на судот за ниските казни, односно дека „една телевизија имала дури 17 казни, па затоа и е пресудена пониска казна“.

foom-logo-disklejmerТекстот е изработен во рамки на проектот „Опсерваторија на медиумските реформи“, што го спроведуваат Фондацијата за интернет и општество „Метаморфозис“, „Агора“ Центар за промовирање на граѓански вредности и Платформата за истражувачко новинарство и анализи (ПИНА), со финансиска поддршка на „Фондацијата Отворено општество – Македонија“.
Содржината на текстот е единствена одговорност на авторите и на ниту еден начин не може да се смета дека ги одразува гледиштата на „Фондацијата Отворено општество – Македонија“.


Радијата ја повлекуваат кампањата „пре-еманципирани жени“ по реакцијата на ААВМУ


Скопје, 2 ноември, 2017 - 19:56 (META) 

„Сити радио“, „Клуб ФМ“ и „Метрополис радио-мрежа“ ја повлекуваат кампањата наречена „пре-еманципирани жени“, која неколку дена беше емитувана на овие три радио-станици.

Повлекувањето на аудиопораките од кампањата следува откако Агенцијата за аудио и аудиовизуелни медиумски услуги (ААВМУ) констатираше дека преку нив се шири мизогинија и сексизам.

Од радио-станиците велат дека воопшто немале намера да го навредат интегритетот на жената, ниту пак некого да дискриминираат.

„Напротив, целта на овој, за нашата публика нов, медиумски наратив, беше сите кои претеруваат, со посебен акцент на оние кои газат сè пред себе (за кои впрочем е и наменета кампањата), да се потсетат што е етичко, што сакаат, колку можат и колку треба. Овие медиуми имаат огромна публика која ја разбира, ја поддржува и се забавува со нестандардната реторика на овие џинглови, но, почитувајќи ја и останатата публика, која јасно се спротивстави на кампањата, медиумите одлучија да одговорат со извинување до сите кои се почувствувале посочени и навредени. За таа цел, овие три радија ја повлекуваат кампањата од етер“, стои во известувањето на трите радио-страници објавено на „Фејсбук“.


ААВМУ констатирала мизогинија и сексизам на програмите на три радио-станици


Скопје, 2 ноември, 2017 - 17:36 (META) 

Агенцијата за аудио и аудиовизуелни медиумски услуги (ААВМУ) констатирала ширење на мизогинија и сексизам во аудиопораки од заедничката кампања, во сопствена продукција на „Сити радио“, „Клуб ФМ“ и „Метрополис радио-мрежа“, која, како што се вели во нив, е наменета за „сите пре-еманципирани жени“, а која деновиве се емитува на трите радио-станици.

Според Агенцијата, кампањата претставува дискриминација врз основа на пол, ширење мизогинија и сексизам што е флагрантно кршење на Законот за аудио и аудиовизуелни медиумски услуги. Трите радиодифузери што ја продуцирале оваа кампања, стои во соопштението на ААВМУ, се однесуваат на начин кој е непоимлив и целосно спротивен на професионално однесување.

„Имено, во кампањата, еманципацијата на жените и на мажите се поставуваат како два процеси кои меѓусебно се исклучуваат, еманципацијата и стремежот на жените да го достигнат максимумот во своите кариери се претставува како негативна појава, успешните жени се подложуваат на потсмев и на омраза, а на децата и младите од обата пола им се испраќа порака дека не се еднакви и дека не треба да се стремат кон еднаквост“, велат од ААВМУ.

Од Агенцијата информираат дека до трите радио-станици се упатени известувања за констатираното прекршување на Законот, а извештајот од надзорот ќе биде испратен и до Комисијата за заштита од дискриминација.

Инаку, мизогинија е омраза или предрасуда кон жени или девојки и може да се манифестира на повеќе начини, вклучувајќи ја и половата дискриминација, оцрнувањето на жените, насилството врз жените, како и третирање на жените единствено како сексуални предмети.

Сексизам или полова дискриминација е предрасуда или дискриминација врз основа на полот на една личност и го вклучува верувањето дека лице од еден пол е суштински супериорно во однос на лице од другиот пол.