„Марш за женските права“: Преку родовата рамноправност до силна држава


Скопје, 8 март, 2018 - 14:20 (META) 

Околу 1.000 жени, девојки и активисти се собраа денеска на вториот „Марш за правата на жените” кој се одржа по повод Меѓународниот ден на жената. Од маршот, кој почна во Жена парк, преку плоштадот Македонија, Камениот Мост и заврши на плоштадот Филип Втори беше испратена порака дека родовата еднаквост е важен фактор кон постигнување на демократско и еднакво општество.

Целта на маршот, како што посочија организаторите, била да се подигне свеста на јавноста, но и на носителите на одлуки, за нееднаквата положба во која се наоѓаат жените во нашето општество во 2018 година.

– Во 2018 година во Република Македонија имаме највисока доенечка смртност во Европа. Причините за тоа не треба да се бараат кај жените, туку во системот за здравствена заштита и здравствените услуги кои им следуваат, но секоја година се повеќе и повеќе се скратуваат, во тоа што повеќе од 175.000 жени немаат гинеколог во својата општина, и во тоа што на повеќе од 80 отсто од жените Ромки им наплаќаат ехо прегледи кои треба да им бидат бесплатни. Товарот на неплатените домашни обврски сè уште во голема мера паѓа на грбот на жените, и додека во другите европски земји овие разлики во учеството во домашната работа се намалуваат, кај нас огромните разлики остануваат константни – изјави Снешка Илиќ од невладината „Реактор“.

Министерката за труд и социјална политика, Мила Царовска рече дека владата вистински се залага и активно вложува во родовата рамноправност.

– Наместо подароци и прослави денеска сметам дека секоја жена и секој маж треба длабоко да се запраша, што во минатата година направил за родовата рамноправност и што ќе направи во наредната. Само така ќе постигнеме едно еднакво општество кое што ќе биде инклузивно – рече Царовска.

Вицепремиерката и министерка за одбрана Радмила Шекеринска потенцираше пак, дека само со силни жени со права, права што ги штитат жените, ќе има силна правна држава.

– Како нова влада, покажавме дека на прашањата на женската рамноправност водиме различни политики. Денеска во на овие теми разговараме без комплексот дали правата на жените ќе значат намалување на важноста на семејството или на традиционалните вредности. Покажавме дека сметаме на жените и покажавме дека правата на жените се и наши права – рече Шекеринска.

Активистките на денешниот марш го осудија и насилството врз жените, за кое велат дека во нашето општество се толерира, поттикнува и прикрива, а ако излезе на виделина, неадекватно се осудува и казнува.

За крај, тие побараа родово сензитивни политики повикувајќи на солидарност кон сите жени, и потсетувајќи дека родовата еднаквост е важен фактор кон постигнување на демократско и еднакво општество.


Шекеринска: Бројот на жените во одбраната не е на задоволително ниво


Скопје, 8 март, 2018 - 13:30 (META) 

Состојбата со бројот со жените во АРМ не е доволно добра, но таква е ситуацијата во речиси сите армии и во европските, кои се неколку чекори понапред во однос на Македонија, порача денеска вицепремиерката и министерка за одбрана Радмила Шекеринска на трибината на тема „Родова перспектива во одбраната”, организирана по повод 8 Март – Меѓународниот ден на жената.

Нагласи дека бројот на офицерки во АРМ се зголемува, но не доволно брзо и додаде оти е уверена дека наскоро ќе има подобрување на ова поле.

Министерката истакна дека при приемот на питомците оваа година во Воената академија повеќе од половината од кандидатите биле девојки, кои биле меѓу најдобро пласираните во однос на успехот, тестирањата и физичката подготвеност.

– Ако се откажете од 50 проценти од своето население, со образложение дека таму едноставно не треба да има амбиции, сте се откажале од потенцијално добри офицери, подофицери, војници. Анализите на НАТО во одреден дел од мисиите покажуваат дека има одредени предности, кои ги имаат жените, полесно можат да остварат контакт со локалното население, на пример со жените во некое авганистанско село – посочи Шекеринска.

Потпретседателката на Собранието, Фросина Ташевска – Ременски, на присутните им порача дека се надева дека во блиска иднина на ваквите настани на пример ќе биде промовирана првата жена генерал во Македонија.

– Ќе бев многу посреќна ако денеска тука промовиравме генерал-жена, можеби да испромовираме женска единица за специјални задачи. Можеме да се пофалиме дека направивме голем чекор напред, пробивме многу бариери – порача Ташевска – Ременски.

Вицепремиерот задолжен за европски прашања Бујар Османи истакна дека од процената на состојбата на жените во едно општество може да се направи проекција за можноста за избувнување на конфликт, односно војна.


Во Македонија има 283.834 вработени жени – најголем дел во приватниот сектор


Скопје, 8 март, 2018 - 9:51 (META) 

Државниот завод за статистика објави податоци за жените во Македонија по повод 8 Март, Меѓународниот ден на жената.

Според нивната последна статистика за 2016 година, вкупниот број на вработени жени изнесува 283.834 од кои 74,8 отсто се вработени во приватни компании.

Бројот на дипломирани жени изнесува 6.787 или 58 отсто од вкупниот број на дипломирани студенти. Жени магистри на науки изнсува 1.107 или 58,9 отсто од вкупниот број на магистри, а на доктори на науки 111.

Во текот на денот вработените жени поминуваат 15 отсто на слободни активности, а невработените 21 отсто.

Жените во урбаните средини на забава и култура поминуваат просечно дневно по два часа и 16 минути што е двојно повеќе од жените во руралните средини односно еден час и 13 минути.

Жените во Македонија се почесто се одлучуваат да раѓаат по едно или две деца. Во домаќинствата кои имаат деца, жените просечно дневно поминуваат по еден час и 57 минути во нивно згрижување.

Од сите домашни активности на жените, 16 отсто отпаѓаат на чистење на станот.

Жените живеат 77,4 години или 4 години подолго од мажите.


ССНМ ќе го поддржи Маршот за женски права поради дискриминација на новинарките


Скопје, 7 март, 2017 - 10:59 (META) 
Самостојниот синдикат на новинарите на Македонија (ССНМ) ќе даде поддршка и ќе му се приклучи на Маршот за женски права, во организација на Платформата за родова еднаквост, кој ќе се одржи утре, во 12 часот, пред споменикот „Олимпија“ на плоштадот „Филип Втори“. Маршот е за еднакви права, еднаква плата, достоинствен третман и за должно почитување.
– На 8 март 1977 година, Обединетите нации го востановија Меѓународниот ден со кој се одбележува борбата за правата на жените. Денес, 40 години подоцна, кога сè повеќе новинарки се изложени на дискриминација во однос на работните обврски, во плати, кога се изложени на психичко, физичко, а во последниве години и на интернет-малтретирање, наша одговорност како Синдикат и како новинари е да го подигнеме гласот за родова еднаквост – се вели во соопштението на ССНМ.Оттаму велат дека „ако работничките на „Њусвик“ пред речиси половина век први во историјата поднеле тужба против дискриминација, не смее да се дозволи во 21 век да ни недостига храброст и солидарност“.

– Медиумите не можат да бидат слободни доколку женските гласови се замолчени – велат оттаму.


Цветковска: Синдикално организирани, жените се посилни во одбрана на работничките права


Скопје, 8 март, 2016 - 13:06 (META) 

Секцијата на жени при Конфедрацијата на слободни синдикати на Македонија (КСС), преку летоци ги информираше граѓаните за потребата од нивно синдикално организирање на Меѓународниот ден на жената, 8 Март.

– Не случајно го одбравме овој ден, ден кога се одбележува борбата на жените за економска, политичка и за социјална рамноправност, да дознаеме дали жените се запознаени со тоа што, всушност, синдикатите направиле за нив. Затоа, поставивме штанд во центарот на Скопје каде со сите жени работнички ќе придонесеме за поголеми можности на сите работници – вели Билјана Цветковска, претседател на секцијата на жени при КСС.


По повод 8 Март, КИЦ „Култура 365“ со подарок книга за секоја жена


Охрид, 7 март, 2016 - 12:28 (META) 

Културно-информативниот центар „Култура 365“ од Охрид по повод Меѓународниот ден на жената, 8 Март, ќе спроведе акција под мотото „Книга за секоја жена“.

Утре, во текот на целиот работен ден, секоја жена што ќе го посети КИЦ „Култура 365“ на улица Цар Самоил Охрид, ќе добие подарок книга со проза или поезија по сопствен избор.

Акцијата се спроведува со поддршка од локални автори и издавачи.


Унијата на жени на ВМРО-ДПМНЕ од Охрид со музички настан го одбележа претстојниот 8 Март


Охрид, 6 март, 2016 - 16:20 (META) 

Унијата на жени на ВМРО-ДПМНЕ од Охрид попладнево пред Центарот за култура „Григор Прличев“ го одбележаа претстојниот меѓународен ден на жената 8 Март со културно-уметничка програма на која настапија КУД „Ѓердан“ и познатиот естраден уметник Петар Нечоски.

Како што истакнаа од унијата, целта е на скромен и на достоинствен начин да се одбележи 8 Март и да им се честита празникот на жените.


Зоран Заев од Охрид вети подобрување на положбата на жената


Охрид, 6 март, 2016 - 15:23 (META) 

Ајде сите заедно да го проветриме заедничкиот дом што се вика Македонија и да си ја вратиме земјата на вистинскиот, европскиот пат.

Ова денеска го истакна лидерот на опозицијата, Зоран Заев, во говорот пред жените учеснички на традиционалниот осмомартовски марш во Охрид, организиран од форумот на жени на СДСМ под мотото: „Ти си таа промена – Заедно за Македонија!“.

– Промените се почнати. Влеговме во борба за враќање на човековите вредности, кои беа грубо згазени во нашата земја – рече Заев.

Тој пред жените кои со автобуси и со други превозни средства допатува во Охрид вети воведување регистер за прекувремена работа кај сите работодавци и синдикална заштита на жените, поддршка во руралните средини, флексибилно работно време за младите мајки, втора смена во детските градинки и скратено работно време во годините пред пензионирање.

Координаторката на форумот на жени на СДСМ, Цветанка Ласкова, ги повика жените, членството и симпатизерите на СДСМ, заеднички да се изборат „за излегување од мрачниот тунел“, водени, како што рече, од еден слеп водач на земјата.

Заменик-претседателката на СДСМ, Радмила Шекеринска, рече дека оваа партија со проектот „Вистината за Македонија“ им ги отворила очите на многу луѓе во земјата и во светот. Таа истакна дека светот видел хаос во изборниоте списоци, „со фантоми непознати за нашето соседство“.

Генералниот секретар на СДСМ, Оливер Спасовски, зборуваше за потребата од запирањето на иселувањето од земјата.

– Се залагаме за повеќе правда и за правда за сите. Силата е во граѓаните на Македонија. Само со економски просперитет и со европски вредности, Македонија ќе ја извлечеме од најголемата криза досега – рече Спасовски.


Форумот на жени на СДСМ ќе организира традиционален марш по повод 8 Март


Охрид, 6 март, 2016 - 10:12 (META) 

Форумот на жени на СДСМ денеска во Охрид ќе организира традиционален марш под мотото „Ти си таа промена – Заедно за Македонија!“, по повод меѓународниот Ден на жената, 8 Mарт.

Маршот ќе почнe во 12 часот, од спортскиот центар „Билјанини извори“, ќе продолжи по булеварот Туристичка, низ чаршијата и ќе заврши на плоштадот во близина на пристаништето во Охрид.

По завршување на маршот, свои обраќања ќе имаат координаторката на форумот на жени на СДСМ, Цветанка Ласкова, генералниот секретар на СДСМ, Оливер Спасовски, заменик-претседателката на СДСМ, Радмила Шекеринска, и претседателот на СДСМ, Зоран Заев.

Денеска, исто така, унијата на жени на ВМРО-ДПМНЕ од разгранокот во Охрид во близина на настанот на СДСМ, ќе организира музички настан, кој треба да почне во 14 часот и ќе се одржува пред Домот на култура „Григор Прличев“.