Јанушев: СДСМ и ДУИ се натпреваруваат кој ќе направи поголема отстапка за името


Скопје, 10 февруари, 2018 - 18:33 (META) 

СДСМ и ДУИ како да се натпреваруваат кој ќе направи поголема отстапка без да се направи проценка за последиците врз највисоките национални интереси, порача денеска генералниот секретар на ВМРО-ДПМНЕ, Игор Јанушев.

– Пратеникот Артан Груби се пофали дека формата на новото име била договорена. Истиот јавно кажа дека на медијаторот ќе му понудел дополнителни идеи кои ги добил, ни помалку, ни повеќе, туку од грчки авторитети. Да не беше трагично ќе беше смешно македонски претставник да нуди идеи добиени од грчки авторитети. Најзагрижувачки е самиот факт што самиот Груби откри дека не бил најголем проблем само формата на името, туку другиот дел од договорот кој се однесувал на идентитетот, јазикот, националноста, употребата и преводот. Кој лаже? Заев и министерот за надворешни работи Димитров кога велат дека за идентитетот не се преговара или Артан Груби и ДУИ кога велат дека се договара решение за идентитетот, јазикот и националноста – праша Јанушев.

Македонија и македонскиот народ не заслужиле ваков однос од Зоран Заев и владеачката гарнитура, порача генералниот секретар на ВМРО-ДПМНЕ.


Димитров: Преговорите со Грција дефинитивно ќе почнат до крајот на годинава


Берлин, 8 септември, 2017 - 18:00 (META) 

Министерот за надворешни работи, Никола Димитров, во интервју за „Дојче веле“ дадено при неговата посета на Германија, изразува силна увереност дека преговорите со Грција за спорот околу името, кои подолго време беа во застој, ќе продолжат до крајот на годинава.

– За време на посетата на грчкиот министер Никос Коѕиас, минатата среда во Скопје, ги дискутиравме мерките за градење доверба. Сè уште не ги почнавме преговорите. Тие ќе почнат дефинитивно пред крајот на годината. Јас го правам она што мислам дека треба да биде работа на дипломатите: решавање на проблеми, отворање врати и создавање пријатели. Можеби не можеме да ја смениме историјата, но сигурно можеме да се обидеме да влијаеме на иднината и да го направиме животот подобар за нашите граѓани денес. Тоа е нашата цел – вели Димитров.

Тој во интервјуто нагласува дека балканската рута на мигрантите мора да остане затворена.

– Мислам дека треба да направиме сè што е потребно за да остане затворенa, бидејќи сите ние, вклучувајќи ги и бегалците, имаме интерес за организирана помош и мораме да се бориме против илегалната миграција. Она што е навистина важно е ЕУ да продолжи да ја поддржува Турција во финансиска смисла, бидејќи имаат милиони бегалци во нивната земја. Еднакво важно е да продолжиме да ѝ помагаме на Грција и тоа на солидарен начин – единствениот начин на кој треба да се решава ова прашање – вели Димитров.

Прашан дали Македонија е подготвена да прими бегалци кои се во ЕУ, тој вели дека тоа би се случило дури откако земјата ќе стане членка на Унијата.

– Пред сè, во интерес на македонските граѓани е Македонија да влезе во ЕУ, а кога еднаш ќе бидеме дел од ЕУ, тогаш дефинитивно ќе бидеме подготвени да го делиме товарот со ЕУ. Но, пред тоа треба да влеземе во ЕУ, за да може да се даде одговор на ова прашање – вели шефот на македонската дипломатија.


На Мундијалот во 2026 година ќе играат 48 репрезентации, одлучи ФИФА


Цирих, 10 јануари, 2017 - 12:20 (META) 

Светската фудбалска федерација (ФИФА) денеска едногласно одлучи Светското фудбалско првенство да биде проширено и на него да учествуваат 48 репрезентации.

По Светските првенства во Русија во 2018 година и во Катар во 2022 година, на следниот Мундијал во 2026 година, чиј домаќин сè уште не одреден, ќе играат рекорден број репрезентации.

Според усвоениот формат, почетната фаза од Светското првенство ќе брои 16 групи со три репрезентации, а во елиминационата ќе играат 32 национални тимови, кои ќе бидат најдобри во групите. Со новиот формат ќе биде зголем бројот на натпревари на 80, наместо досегашните 64. Сепак, шампионскиот тим, како и досега, ќе треба да одигра седум натпревари за да стигне до титулата.

Турнирот ќе трае, како досега, 32 дена. Траењето на турнирот останува непроменето поради барањата на големите европски клубови, кои реагирале на реформите поради густиот распоред на клупски натпревари.

Инаку, станува збор за прво проширување на Светското првенство во фудбал по она во 1998 година, кога на Мундијалот во Франција настапија 32 репрезентации, колку што ќе играат и на СП во Русија во 2018 и во Катар во 2022 година.

Претходно, од 1954 до 1982 година, на светските првенства учествуваа 16 репрезентации, а од 1986 до 1994 година играа 24 национални селекции.