!Во периодот што претстои работиме на воведување систем за пристап и за претплата. За начинот на пристап и за претплатата ќе информираме дополнително. Содржините на „Мета“ до тогаш се слободни за преземање со задолжително цитирање и атрибуирање.

Свечено врачени наградите „13 Ноември“ за 2017 година


Скопје, 14 ноември, 2017 - 11:37 (META) 

Синоќа, во Македонската опера и балет, се одржа свеченоста по повод одбележување на 13 Ноември – Денот на ослободувањето на Скопје, на која градоначалникот на Град Скопје, Петре Шилегов, на годинешните добитници им ги врачи наградите „13 Ноември“ за 2017 година.

– Денеска одбележуваме 73 години од ослободувањето на градот од фашистичките окупатори, победа којашто со пожртвувана борба ја извојуваа врз посупериорниот противник, генерациите коишто го почнаа градењето на самостојната држава во која нејзините граѓани ќе ги остваруваат своите идеали. Знам дека граѓаните на Скопје избраа живот во модерна Европа, но знам дека овој град е со многу предизвици и јас сум свесен за предизвикот кој го имам пред мене, загадувањето е секако најголемиот, но има и многу други проблеми и во инфраструктурата, урбанизмот, зеленилото…Но, заедно со мојата администрација сме подготвени да инвестираме во заедничката иднина на Скопје и да го направиме функционален град – рече Шилегов.

Добитници на Наградата „13 Ноември“ на Град Скопје, за 2017 година се Хаки Имери и Горан Кондов за наука, Јадранка Клисарова за образование и воспитание, Димитар Башевски и Пунторие Муча Зиба за култура и публицистика, Васил Атанасов и Стефан Хаџи-Николов за уметност, Раде Илиевски и Жан Митрев за здравствена заштита и хуманитарната активност и Чедомир Јаневски и Атанас Николовски за спорт.


Скопје го одбележува 13 Ноември – Денот на ослободувањето на градот


Скопје, 13 ноември, 2017 - 10:47 (META) 

Денеска се одбележува 13 Ноември – Денот на ослободувањето на Скопје во Втората светска војна. На 13 ноември, пред 73 години борците од 42. и 50. Народнослободителна дивизија на македонската војска и 16. Македонска бригада го ослободија Скопје од фашистичка окупација.

По неколкудневни тешки борби со припадниците на 22. гренадирска германска дивизија, составена од 47. и 65. полк и делови од 11. воздухопловна десантна дивизија, како и со германската тврдинска бригада „Ангермилер“, која беше распоредена пред Качаничката клисура, борците на Народноослободителната војска со победоносен марш влегоа во Скопје.

Ослободувањето на Скопје ќе биде одбележан со повеќе култирни, хуманитарни и спортски манифестации.

По тој повод, градоначалникот на Град Скопје, Петре Шилегов ќе се сретне со претставници на Градскиот одбор на Сојузот на борци од Народноослободителната антифашистичка војна на Македонија.

Делегации на Собранието на Република Македонија и на Градот Скопје ќе положат цвеќе пред Споменикот на ослободителите на Скопје на Партизанските гробишта и пред споменикот на генерал Михајло Апостолски на Градските гробишта „Бутел“.

Во 12.30 часот, пред Споменикот на ослободителите на Скопје, на платото пред Владата, државни делегации, борци од НОВ, претставници од Армијата на Република Македонија, од општините на Град Скопје, членови на други институции, како и официјалната делегација од Град Скопје ќе положат цвеќиња.

Чествувањето на Денот на ослободување на Скопје ќе продолжи вечерва во Музејот на Скопје каде ќе биде промовирана книгата „На Скопје со љубов“ на архитектот Живко Поповски.

Во фоајето на Македонската опрера и балет (МОБ) ќе бидат изложени дела од 12. Меѓународна ликовна колонија „Скопје 2017“. Во МОБ свечено ќе биде одбележан празникот и ќе биде доделена наградата „13 Ноември“ на Град Скопје.

Од спортските манифестации, досега се одржаа Меѓународен шаховски турнир на слепи и лица со оштетен вид, финални борби доделување на „Златниот гонг“ и ноќна атлетска трка „Низ улиците на Скопје“.

До крајот на месецов се предвидени повеќе активности, по повод Денот на ослободувањето на Скопје.


Град Скопје ги објави имињата на добитниците на наградата „13 Ноември“


Скопје, 1 ноември, 2016 - 16:22 (META) 

Имињата на годинешните добитници на наградата „13 Ноември“ денеска беа обелоденети во просториите на Град Скопје. Добитниците се професори, научници, уметници, студенти и ученици кои работат и творат во различни области.

Од областа на науката награди добија професорите Михаил Гаревски и Аслан Хамили. Награда за образование и за воспитание доби пензионираниот професор Томислав Димишковски. Заслуга за културата и уметноста имаат писателот Александар Кујунџиски, актерката Мушереф Лозана Прекиќ и хорската диригентка Летка Полизова-Димовска. Архитектот Вангел Божиновски доби награда за неговото досегашно работење во областа на публицистиката и на архитектурата.

Студентката Алмина Алиловиќ беше наградена за покажана хуманост и за спасување човечки живот, а учениците Ева Карамановска и Марко Наумовски добија награда за континуирани успешни постигнувања во наставните и во активностите надвор од наставата.

Наградата „13 Ноември“ на Град Скопје се доделува на физички и на правни лица како знак на признание на Градот Скопје за остварувања во стопанството, науката, уметноста, културата, воспитанието и образованието, здравствената и социјалната заштита, спортот и физичката култура, техничката култура, заштита и унапредувањето на животната средина и природата, како и во други сегменти на животот, трудот и творештвото, што претставуваат посебен придонес за развојот на градот Скопје и за неговиот севкупен напредок и афирмација во Република Македонија и во светот.

Признанијата се доделени по пат на тајно гласање, кое беше спроведено од комисија што ја именува одборот за доделување на наградите, а членовите се Бранко Цветкоски, д-р Стојан Киселиновски, д-р Марко Китевски, д-р Михаил Груневски, Никола Фиданоски, Авни Халими, Петар Гичаровски, Санде Стојчевски, д-р Изаим Муртезани, д-р Скендер Асани и проф. д-р Људмил Спасов.


Спасовски: Секој што е професионалец во МВР ќе биде ценет


Скопје, 13 ноември, 2015 - 15:15 (META) 

Не им престануваат сите надлежности на раководителите во МВР, тука тоа е одлука за пренесување на надлежностите, изјави министерот за внатрешни работи, Оливер Спасовски, денеска по церемонијата за одбележување на 13 Ноември, Денот на ослободувањето на Скопје.

– Тоа е нормална постапка, да видиме во каква позиција влегуваме. Денеска дел од надлежностите ќе бидат вратени на структурите во МВР, така што нормално функционира, нема потреба никој да биде загрижен во министерството. Секој што е професионалец, ќе биде ценет. Во тој дух ќе биде мојата понатамошна активност – рече Спасовски.

Според него, ова е пренесување на надлежностите, нема кадровски промени засега во МВР.

– Не сум размислувал за промени на нови кадри, влезот е да ја видиме состојбата во министерството, да видиме каква е финасиската состојба, какви се човечките ресурси, па прво да ги видам овие работи, а понатаму со јавноста ќе се споделат сите информации. Професионализацијата во МВР е врвен приоритет, таму има многу луѓе кои се професионалци, благодарение на кои функционира Министерството за внатрешни работи и јас сакам апсолутно да продолжам да работам со сите професионалци во министерството – изјави Спасовски.

За обвинувањата за луксузни возила, Спасовски кажа дека не станува збор за никакви возила, туку за возило кое според законот е ставено на располагање на новиот министер.


Денеска се одбележуваат 71 година од ослободувањето на Скопје


Скопје, 13 ноември, 2015 - 10:25 (META) 

Со низа активности и свечености денеска се одбележува 71-годишнината од ослободувањето на градот Скопје.

На партизанските гробишта во Бутел, владина и делегација од Градот ќе положат свежо цвеќе. Исто така, свежо цвеќе ќе се положи и пред споменикот на генералот Михајло Апостолски, како и пред споменикот на ослободителите на градот, кој се наоѓа на платото пред Владата на РМ.

Претходно градоначалникот на Скопје, Коце Трајановски, ќе одржи средба со членовите на градскиот одбор на Сојузот на борците на НОВ.

Во фоајето на Македонската опера и балет, вечерва свечено ќе бидат врачени наградите „13 Ноември“, а ќе биде отворена и изложба на која ќе бидат презентирани ликовни дела создадени на Меѓународната ликовна колонија „Скопје 2015“.

Свеченоста ќе биде дополнета и со концерт на првенците на МОБ.


Доделени наградите „13 Ноември“


Скопје, 14 ноември, 2014 - 10:36 (META) 

Во рамки на свеченоста, градоначалникот на Град Скопје, Коце Трајановски, на добитниците на признанието „13 Ноември“ на Град Скопје, за 2014 година, им ги врачи наградите.

Годинешни добитници на наградата „13 Ноември“ на Град Скопје за 2014 година се: од областа на науката и здравствената заштита  Илија Велев и Африм Османи, од областа на образованието и на воспитувањето – Ѓулумсев Касапи, од областа на културата и на публицистиката – Симон Беличанец и Стојан Тарапуза, од областа на уметноста – Славица Петровска Галиќ и Дејан Пројковски, од областа на спортот – Бранислав Давитковски и ученици и студенти – Маја Бошковска и Вејчеслав Поповски.

По повод одбележувањето на 70-годишнината од 13 Ноември, Денот на ослободувањето на Скопје, во НУ Македонски народен театар се одржа музичко-сценската изведба „Скопје слободно чекори напред“.


СДСМ: Градската организација подготви еднонеделно одбележување на 13 Ноември


Скопје, 9 ноември, 2014 - 14:31 (META) 

Живееме период во кој актуелната власт наметнува искривена слика за антифашистичката борба на Македонија. Придонесот на НОБ и на учесниците се понижува и се фрла во заборав со креирање лажна историја. 13 Ноември е можност да покажеме дека СДСМ се спротивставува на обидот за пресметка со историските горостаси, творците на независна Македонија, истакна Софија Куновска, претседателка на Градската организација на СДСМ, на денешната прес-конференција.

– Јубилејот 70 години 13 Ноември, Денот на ослободувањето на Скопје од фашизмот, СДСМ ќе го одбележи достоинтвено, со што ќе ја оддадеме должната почит кон хериоте што ги испишаа најсветлите страници на македонската историја. Градската организација на СДСМ подготви еднонеделно одбележување на 13 Ноември, кој го сметаме не само за празник што ја слави победата над фашизмот, туку е и симбол на човековата слобода, слободната мисла и говор, слободата на избор. Скопје денес ниту е слободно, ниту чекори напред. Фашизмот е победен пред 70 години, но ние имаме должност одново и одново да го препознаваме и да го победуваме. Затоа, нашата порака за овој 13 Ноември е: Херои од НОБ, Ви благодариме. Битката за слобода продолжува! Ова се исто така два симбола што наредната недела ние, социјалдемократите, ќе ги носиме на нашите ревери: Црвениот цвет со што ќе оддадеме почит на сите кои се бореа за победа на хуманоста над диктатурата, оние кои ја изборија слободата и црвената петокрака за да потсетиме на симболот под којшто таа победа беше оставарена. Наредните седум дена, од понеделник до недела, на 15 пунктови низ Скопје, младите социјалдемократи ќе им подарат вакви симболи на граѓаните на Скопје, кои заедно со нас ќе празнуваат. На самиот ден, четврток, 13 Ноември, во секоја општина ќе посетиме по неколку семејства на ветерани од НОБ, на кои со букет свежо цвеќе ќе им ја изразиме нашата почит и ќе им го честитаме јубилејот. Ќе одржиме и трибина со наслов „Антифашизмот 1944 и денес“, на којашто свое учество ќе земат и борците од НОБ. 70 активисти кои ќе симболизираат 70 години победа над фашизмот, во секоја општина во Скопје со пригодна прошетка ќе ги обиколат дел од обележјата од НОБ и ќе положат цвеќе. Ќе положиме свежо цвеќе на Партизанските гробишта во Бутел, на гробот на генералот Михајло Апостолски, како и на споменикот на ослободителите на Скопје, на платото пред Владата на Република Македонија. Почитувани граѓани, Ве повикуваме да се вклучите во ова достоинствено одбележување на 13 Ноември, Ден на ослободувањето на Скопје од фашизмот. Заедно да им оддадеме почит на борците од НОБ, кои го поставија темелот на независна Македонија – рече Куновска.

 


80 настани за прославата на 13 Ноември


Скопје, 5 ноември, 2014 - 15:33 (META) 

Симон Беличанец, Стојан Тарапуза, Славица Петровска-Галиќ, Дејан Пројковски, Бранислав Давитковски, Ѓулумер Касапи, Африм Османи, Илија Велев, Маја Бошковска и Вејчеслав Поповски се добитниците на годинешните награди на Град Скопје „13 Ноември“.

Наградите ќе им бидат врачени на 13 Ноември, во Македонскиот народен театар во 19.30 часот. По доделувањето, ќе се одржи музичко- сценска изведба „Скопје слободно чекори напред“ во режија на Наташа Поплавска. Мотото на годинешната прослава ќе биде „70 години Скопје слободно чекори напред“. Оваа година во програмата се предвидени 80 настани.

На денот на ослободувањето на Скопје, ќе се положат цвеќиња пред споменикот на ослободителите на Секопје, кој се наоѓа пред платото на Владата и пред споменикот на генерал Михајло Апостолски на Градските гробишта во Бутел.