Mакедонскиот проект „М“ награден на Филмски фестивал во Солун


Солун, 12 ноември, 2018 - 10:07 (META) 

Филмскиот фестивал во Солун синоќа го финализираше неговото 59. издание со доделувањето на наградите на филмовите од натпреварувачката конкуренција кои беа селектирани во малку необичен контекст за етаблирани фестивали.

Имено, 15 први или филмови на автори од целиот свет беа дел од посветата на тн. „римско милосрдие“ („caritas romana“), класичниот мотив во уметноста инспириран од грижата на Перо за нејзиниот татко Симон.

Фестивалското жири составено од Сандра ден Хамер (директорка на Филмскиот музеј во Амстердам), романскиот режисер Раду Жуде, иранската актерка Фатемех Мотамед-Арја, грчката историчарка на уметноста Сираго Сијара и шпанскиот композитор на филмска и театарска музика Алфонсо де Вилалонга, одлучи дека филмот „Реј и Лиз“ на британскиот режисер Ричард Билингем ја заслужил наградата „Златен Александар“ со необичниот поглед на темата за римското милосрдие. Се работи за своевидна лична визуелна „сеанса“ на авторот, кој низ три приказни го рекреира неговото мачно детство во семејство од ниската работничка класа  во Англија во седумдесеттите години од минатиот век.

„Сребрениот Александар“ му припадна на „Сè е добро“ на германската режисерка Ева Тробиш за сторијата на девојката која решила со супериорно молчење да го преброди силувањето од познаник. Главната актерка Ане Шварц од овој филм ја сподели и наградата за најдобра актерка со Мариша Триантафулиду од Грција, која, пак, имаше впечатлива ролја во „Нејзината работа“ на Никос Лабот.

„Бронзениот Александар“, односно награда за најдобар режисер , му припадна на тајландскиот режисер Футифонг Аронфенг за филмот „Манта реј“ („Ѓаволска риба“), реализиран во минималистички манир, како и фотографијата на кинематограферот Наворофат Трунгфибунсофит.

Актерот Јакоб Седергрен уште по првата проекција на данскиот филм „Виновен“ на Густав Мелер беше виден како најголем претендент за наградата за најдобар актер, па прогнозите се остварија. Симпатичниот „Криумчарење на Хендрикс“ на грчкиот режисер Мариос Пиперидес доби специјално признание од жирито. И тоа, како и публиката, беа слатко насмеани од сторијата за барањето на едно кученце на границата која ги дели грчкиот и турскиот дел од Кипар: иако формално се работи за куче, сепак приказната е потрагата по „најмалиот заеднички содржател“ на поделениот остров.

Наградата ФИПРЕСЦИ од интернационалната програма ја доби „Софија“ на мароканско-француската авторка Мерием Бенм’Барек. Додека, пак, наградата на критиката во грчката селекција отиде во рацете на режисерката Тоња Мишиали за филмот „Пауза“, сторија за проблемите, но и предизвиците, на жените во менопауза.

Публиката, пак, освен „Виновен“, како свои фаворити ги издвои и ги награди „Пеперутки“ на турската режисерка Толга Карачелик, сторија за браќа и сестри кои го бараат таткото кој одамна ги напуштил (во селекцијата „Балкански преглед“), потоа „Дванаесетгодишна ноќ“ на шпанскиот автор Алваро Бречнер, како и на „Бегалци, втор дел: Патека од мраз“ на грчкиот режисер Христос Николерис.

Вреди да се истакне и еден момент од делот на фестивалот наменет за филмските продуценти и режисери кои се натпреваруваа за грантови за развој на нивните проекти. На копродукцискиот форум беше награден македонскиот проект „М“ на режисерот Вардан Тозија и продуцентот Дарко Попов, кои добија постпродукциски пакет за нивниот филм во развој. Образложението на жирито гласи: „Наградата му ја доделивме на филм со одредена визуелна амбиција што ја носи автор кој ни се чини дека го отелотворува сето она што треба да биде еден режисер: раскажувач, но и техничар“.

Одлично за крај на овој извештај, но веројатно уште подобро за идниот живот на новиот проект на Тозија, кој го најавува неговиот нов филм како футуристичка бајка за одраснувањето на едно момче. Обично проекти во развој кои биле наградувани на солунскиот копродукциски форум се враќале на овој фестивал во голем стил, со награди.


Завршен краткометражниот нем филм „Љубовникот“ на Игор Иванов – Изи


Скопје, 14 август, 2018 - 11:57 (META) 

Краткометражниот  филм  „Љубовникот“,  снимен  во  манирот  на  старите  неми филмови, по сценарио и во режија на Игор Иванов – Изи, а во продукција на „Скопје филм  студио“,  е  во  завршна  фаза  на  пост-продукција.

Филмот  пред  неполни  два месеца  беше  снимен  на  локација  во  Скопје  во  населбата  Карпош  2,  каде  што  со креативна сценографија,  костимографија и приод на камерата беше создаден автентичен амбиент за работа на нем филм од 30-тите години на минатиот век.

Актерската игра со препознатливата нагласена гестикулакција својствена за немите филмови шармантно ни пренесува приказна за еден љубовен триаголник. Оваа нетипична филмска авантура за актуелното време има амбиција да потсети на филмската естетика од минатото.

Улогите ги толкуваат Игор Ангелов, Наталија Теодосиева и Сашо Петровски. Кинематографери на филмот се:  доајенот на македонскиот филм Драган Салковски, Дејан Димески и Томи Салковски, костимограф е Емилија Атанасовска, монтажата е на Владимир Павловски, а продуцент е Томи Салковски.

Филмот е во продукција на „Скопје Филм Студио“а е подржан од Агенцијата за филм.


Издавачот на стрипови „Бонели“ најавува ТВ-серии, почнувајќи со Дилан Дог


Милано, 10 август, 2018 - 13:39 (META) 

Водечкиот италијанскиот издавач на стрипови „Серџо Бонели едиторе“ најавил развој на продукција на ТВ-серии со некои од своите најпознати брендови, почнувајќи со популарниот истражувач на натприродни појави, Дилан Дог.

Според „Варајети“, „Бонели“ основа компанија-ќерка посветена на филмска продукција наречена „Бонели ентертејнмент“ преку која планира адаптации на некои од своите стрипови, како Марти Мистерија, Натан Невер, Дампир и Драгонеро, при што би имале и контрола врз крајниот производ. Сериите наводно ќе бидат достапни на светско ниво преку сервиси за стриминг преку интернет.

Во 2011 година една американската независна продукција направи филм за Дилан Дог кој доживеа неуспех на киноблагајните, заработувајќи само 4,6 милиони долари на светско ниво. Филмот беше оценет како катастрофален и неинспиративен и од филмските критичари и од љубителите на стрипот, кои сметаа дека не ги пренесува основните карактеристики кои стрипот го направија омилен во десетици земји.

Дилан Дог е дело на италијанскиот стрип-сценарист Тицијано Склави, кој „Бонели“ почна да го објавува од 1986 година во Италија, a набрзо потоа и во бивша Југославија во издание на новосадски „Дневник“. По распадот на СФРЈ се појавија посебни изданија во Хрватска, Србија и Македонија.

„Дилан Дог“ е присутен на македонскиот пазар во издание на „М-комикс“ од април 2014 година. Тоа не е прво издание на популарниот стрип на македонски јазик, но се покажа како најдолговечно со релативно стабилен ритам на излегување на новите броеви (24 до сега).


Феми Кути премиерно со Македонската филхармонија во Градски парк


Скопје, 5 јуни, 2018 - 12:56 (META) 

Реномираниот џез-музичар Феми Кути со Македонска филхармонија ќе одржи концерт на 7 јуни, информираа денеска на прес-конференција градоначалникот на Град Скопје, Петре Шилегов и директорот Македонската филхармонија, Виктор Илиески.

Шилегов го најави и утрешното емитување на македонскиот филм Исцелител, на отворена сцена во Градскиот парк. Филмот е добитник на 9 меѓународни награди, од кои 5 за најдобар филм.

– Исцелител е најпродаван филм, а овој пат на граѓаните им овозможуваме да го гледаат бесплатно. Проекцијата на филмот ќе биде во стариот дел од Градскиот парк, зад споменикот на Гоце Делчев каде што МКЦ ќе постави перници за седење – рече Шилегов.

Македонска филхармонија ќе одржи концерт во Градски парк и на 22 јуни, а ќе се изведуваат нумерите на светски познатиот бенд Квин.


По светските фестивали, „Исцелител“ повторно во кината низ Македонија


Скопје, 8 мај, 2018 - 12:13 (META) 

По шестмесечната успешна фестивалска турнеја на филмот „Исцелител“ на младиот Ѓорче Ставрески на светските филмски фестивали, филмот повторно ќе се прикажува во киното „Синеплекс“ во Скопје, а ќе биде и на репертоарот на МКЦ „Козјак“ во Куманово и во Домот на млади во Штип.

„Исцелител“ од својата премиера на 9 ноември досега, за само шест месеци, се прикажуваше на 23 светски филмски фестивали, од кои два беа од А категорија. Филмот освои 9 меѓународни награди, меѓу кои 5 беа за најдобар филм. Истовремено, некои од најугледните светски списанија за филм објавија одлични рецензии за него.

„Исцелител“ е прв македонски филм добитник на награда на филмскиот фестивал во Солун во 58 годишното постоење на фестивалот. Тој е добитник и на наградите за најдобар филм во Санта Барбара, САД; Бергамо Филм Митинг, Италија; Филмскиот фестивал во Обањ, Франција и на фестивалот Let’s CEE во Виена.

„Исцелител“ беше прикажан на три филмски фестивали во САД, исто толку во Индија, на најголемиот фестивал во Иран, на еден од најголемите фестивали во Кина, на фестивал во Колумбија, на престижниот „Црни ноќи“ во Естонија и на многу други европски филмски фестивали.

Скопската премиера на „Исцелител“ беше на 19 ноември 2017 на затворањето на „Синедејс“ а од 20 ноември до 12 февруари се прикажуваше во кината Милениум и Синеплекс, филмот беше прикажан и во склоп на „Контра кадар“ и „Академска сцена“ во кино „Култура“ и на ФДУ.

Освен во Скопје филмот се прикажуваше во Битола, Штип, Кочани и Кичево. Во кината низ Македонија, „Исцелител“ во првиот турнус прикажување го гледаа повеќе од 12.000 гледачи.

Во Синеплекс во Скопје „Исцелител“ започнува да се прикажува в четврток, во МКЦ „Козјак“, Куманово на 17 мај, а во летното кино на Домот на млади во Штип, филмот ќе биде прикажана во последниот викенд од мај.


Македонскиот „Види ја ти неа“ најдобар интернационален краток филм на „Санденс“


Парк Сити, 24 јануари, 2018 - 12:25 (META) 

Краткиот филм „Види ја ти неа“ во режија на Горан Столевски и продукција на Скопје Филм Студио и Црна Мачка Продукција на 34-от Филмски фестивал Санденс, најголемиот американски фестивал на независен филм, ја освои наградата Најдобар интернационален игран филм во категоријата кратки филмови. Во конкуренција за наградата беа 17 наслови од целиот свет.

„Види ја ти неа“ е приказна за младата девојка Анета, која се обидува да ги реши проблемите во семејството и училиштето вклучувајќи се во еден исклучиво машки верски ритуал, скокање по крстот за Водици.

Улогите во филмот ги толкуваат Сара Климоска, Игор Ангелов, Пируника Киселички и други. Сценарист е режисерот Столевски, кинематографер е Наум Доксевски, сценограф Влатко Чачоровски а костимограф Жаклина Крстевска.

Филмот е финансиски поддржан од Агенцијата за филм на Република Македонија.

Горан Столевски е роден во Македонија, а живее и работи на релација Австралија – Велика Британија. Своето образование го стекнал на Универзитетот во Мелбурн и Викторијанскиот колеџ за уметности во Мелбурн. Столевски веќе има реализирано над дваесет кратки филмови, прикажани и наградувани на голем број фестивали низ целиот свет.


Филмови за душа и тело на филмскиот фестивал во Солун


Солун, 5 ноември, 2017 - 19:10 (META) 

Потрагата по корените, не само на филмската уметност, е една од димензиите на педесет и осмото издание на Интернационалниот филмски фестивал во Солун, кој беше отворен во четвртокот, 2 ноември, со „За душа и тело“ на унгарската режисерка Илдико Енједи, и ќе трае до 12 ноември, кога се затвора со филмот „Забава“ на уште една особена авторка, британската режисерка Сели Потер.

По традиција, на солунскиот фестивал ќе бидат прикажани повеќе од 250 наслови, селектирани во десетина програми. По многу години, во угледната и популарна програма „Балкански преглед“, на солунскиот фестивал се најде и еден македонски филм, „Исцелител“ на Ѓорче Ставрески (неговиот интернационален наслов е „Secret ingredient“ или „Тајната состојка“, што беше и негов работен наслов за време на продукцијата). Дебито на Ставрески, чија светска премиера е токму на овој фестивал, е работено во копродукција со Грција. Неговата сторија говори за млад човек кој нема пари за скапи лекови за тешката болест (рак) на неговиот татко, па краде марихуана која е „тајната состојка“ со која прави колач. Болеста на таткото е како со рака однесена, но тоа се расчуло меѓу соседите и другите паталци по чудотворен лек за тешки болести, па сега момчето е под опсада од барања за рецептот од разни намерници, но е и мета на локалната мафија, бидејки нивна била марихуаната… Сценариото е на Ставрески, главните ролји во филмот ги толкуваат Благој Веселинов, Анастас Тановски и Аксел Мехмет, а директор на фотографија е Дејан Димески.
Во официјалната натпреварувачка програма на фестивалот, која селектира први и втори филмови на автори, годинава се 14 конкуренти од домаќинот Грција, европските земји, Русија, Латинска Америка, САД, Иран и од Филипините. Авторите се борат за двете главни награди, „Златен Александар“ и „Сребрен Александар“. По само три дена од почетокот на фестивалот, неблагодарно е да се даваат какви било прогнози за евентуалните шанси за награди на конкурентите.

Меѓу популарните содржини на Солунскиот фестивал е и програмата „Отворени хоризонти“, со десетици наслови од сите светски меридијани. Ако ѕвезда на отворањето на фестивалот беше Илдико Енједи со нејзиниот особено успешен филм „За душа и тело“, кој во февруари ја доби „Златната мечка“ на Берлинале, беше апсолутен фестивалски хит годинава, стана и унгарски претставник за „Оскар“ во категоријата странски филм, а директорот на фотографија Мате Хернаи ја доби и првата награда на годинешното издание на Интернационалниот фестивал на филмската камера „Браќа Манаки“ во Битола, тогаш фестивалска ѕвезда наредниве денови сигурно ќе бидат Александар Пејн и Рубен Остлунд. Пејн е американски режисер од грчко потекло, кој е двоен оскаровец за сценарио и го претставува неговиот најнов светски успех, „Смалување“. Тоа е „мал“ филм со битен наратив – што ќе се случи ако навистина се оствари експериментот на група норвешки научници, кои во потрага по решение за пренаселеноста на Земјата, бараат начин да ги смалат луѓето? Одговорот го има Пејн, а кастингот во неговиот филм го предводат ѕвездите Мет Дејмон и Кристоф Волц.

Солунскиот фестивал годинава им прави омаж на четири исклучителни автор(к)и: Илдико Енједи, Рубет Остлунд, Ида Лупино и Арман Гати. „Плоштад“ на Остлунд е актуелниот добитник на канската „Златна палма“, а и тој, како и Енједи, спаѓа меѓу современиците што можеби немаат богата филмографија, но секако кај нив квалитетот е далеку пред квантитетот. Ида Лупино беше позната како актерка, но и како една од првите жени што застана зад филмската камера како режисерка, веднаш по Втората светска војна. Арман Гати, пак, е еден од позначајните интелектуалци на француската политичка левица пред и по Втората светска војна (во војната бил затворен во нацистички концентрационен логор, од каде што побегнал и се приклучил на британските специјални воени сили САС). По војната бил ангажиран новинар, театарски и филмски автор.

Секој фестивал кој пледира да остане актуелен, освен што може да ја одржува благородната мисија на потрага по корените на филмската уметност, мора да биде и во дослух со новите технолошки тенденции. Затоа годинава Солунскиот фестивал почна со необична селекција насловена „Виртуелна реалност“, која содржи десет специјално продуцирани филмови кои се гледаат со специјална опрема. Станува ли филмот, на тој начин, веќе класична уметност? Ќе видиме…

Од Солун: Стојан Синадинов


Светска премиера на „Бикини Мун“ на Манчевски на фестивалот во Сао Пауло


Сао Пауло, 22 октомври, 2017 - 20:16 (META) 

Петтиот игран филм на Милчо Манчевски, „Бикини Мун“, вчера ја имаше светската премиера на фестивалот во Сао Пауло, Бразил.

Филмот го претстави директорката на фестивалот, Рената де Алмеида, и ќе има вкупно пет проекции во програмата за специјални презентации. Манчевски пред премиерата учествуваше на дебата на тема „Моралноста и документарниот филм“, а по проекциите имаше разговор со бразилската публика.

– Многу ме израдува бразилската публика: ангажирана, фокусирана, активна, подготвена за учена дискусија, за прашања, за опсервации и за пофалби. Разговорот навистина беше одличен, длабок. „Бикини Мун“ е филм кој бара многу од публиката, не е филм кој се гледа со едно око и публиката во Сао Пауло потврди зошто одлучивме баш тука да ја имаме светската премиера. За филмот допрва почнува животот, ама за мене заврши ова поглавје на најубав начин – изјави режисерот Милчо Манчевски.

Манчевски е популарен во Бразил уште од својот прв филм „Пред дождот“, кој освои награда токму во Сао Пауло и беше филм на годината во оваа и во други земји во Латинска Америка. Во Сао Пауло јужноамериканска премиера имале и сите филмови на Манчевски, а на универзитетите во Бразил и во Латинска Америка неговите филмови се дел од образовната програма.

Новиот филм на Манчевски е за Бикини, харизматична, темпераментна и неспокојна поранешна жена – маринец, која се враќа од Ирак и ненамерно станува центар на документарен филм, додека се обидува одново да се интегрира во општеството и да си го поврати старателството врз малата ќерка.

Манчевски вели дека „Бикини Мун“, кој има формат на лажен документарец, зборува за експлоатација на единката од страна на медиумите.

Во насловната улога настапува Кондола Рашад, позната од новата ТВ-серија во САД „Милијарди“ и од бродвејската верзија на Шекспировата „Ромео и Јулија“ со Орландо Блум. Рашад е, инаку, ќерка на позната глумица Фелиша Рашад, која се прослави со серијата „Козби шоу“.

Другите главни улоги Манчевски им ги додели на актерите во подем Сара Голдберг, Вил Џеновиц и Сатја Сридхаран.

Директор на фотографија е Џошуа Вајнстин, а продукциски дизајнер е Дејвид Манс од Лондон, верниот соработник на Манчевски кој соработува со него на сите негови филмови.

„Бикини Мун“ е снимен во Њујорк и е копродукција меѓу САД, Германија и Канада. Ова е првиот филм на Манчевски во кој не учествува Македонија.


Фестивалот „Скопје синема сити“ ќе се одржи од 15 до 19 јуни


Скопје, 5 јуни, 2017 - 16:45 (META) 

Третото издание на филмскиот фестивал за музички документарни филмови „Скопје синема сити“ ќе се одржи од 15 до 19 јуни во Кинотека на Македонија.

Фестивалот ќе се отвори со филм за „Крафтверк“, односно „Поп арт“, во традиција на претходните изданија кога фестивалот им оддаде почит на Дејвид Боуви и на Леонард Коен.

Фестивалот ќе заврши со портрет на Дејвид Боуви, преку неговите интервјуа и снимки за „Би-Би-Си“, вклучувајќи и негови настапи снимени во разни периоди од неговата кариера за овој национален сервис.


Битолските советници даваат „двојазични“ и „криминални“ сугестии за филмот за Талески


Битола, 10 март, 2017 - 14:41 (META) 

Кавгите во битолскиот Совет за документарниот филм на градоначалникот Владимир Талески ги премина локалните граници. На советничката говорница се развиори македонското знаме и се покажуваа лажни банкноти отпечатени на албански јазик.

Откако опозицијата не успеа да го запре снимањето на филмот за трите мандати на битолскиот градоначалник Владимир Талески, таа побара во филмот барем да биде делот за криминалите и за притворот на Талески, кој е под истрага на СЈО. Тогаш на говорницата излезе советникот на ВМРО-ДПМНЕ , Пеце Милевски, го растегна македонското знаме и извади лажни банкноти од 50 и 100 денари напишани на албански јазик.

– За ова ли сакате да снимаме филм, за двојазичноста на Заев и за парите што ќе бидат на албански јазик? Или сакате да снимаме филм за протестите сега, за унитарна Македонија, а? – праша Милевски, предизвикувајќи бурна реакција кај советниците од двете страни.

На Милевски му реплицираше советникот на СДСМ, Томе Наумов, кој го обвини за антипатриотизам.

– Вие не сте против Албанците, Вие сте против Македонците – рече Наумов.

Претседателката на Советот, Силвана Ангелевска, уште еднаш ја прекина седницата, за да ги смири страстите, опоменувајќи ги советниците да се фокусираат на кварталниот извештај за буџетот на Општина Битола и на завршната сметка за 2016 година бидејќи, како што рече, ако не се изгласа до 15 март, потоа не ќе може, зошто ќе се распушти Советот.