!Во периодот што претстои работиме на воведување систем за пристап и за претплата. За начинот на пристап и за претплатата ќе информираме дополнително. Содржините на „Мета“ до тогаш се слободни за преземање со задолжително цитирање и атрибуирање.

Филмови за душа и тело на филмскиот фестивал во Солун


Солун, 5 ноември, 2017 - 19:10 (META) 

Потрагата по корените, не само на филмската уметност, е една од димензиите на педесет и осмото издание на Интернационалниот филмски фестивал во Солун, кој беше отворен во четвртокот, 2 ноември, со „За душа и тело“ на унгарската режисерка Илдико Енједи, и ќе трае до 12 ноември, кога се затвора со филмот „Забава“ на уште една особена авторка, британската режисерка Сели Потер.

По традиција, на солунскиот фестивал ќе бидат прикажани повеќе од 250 наслови, селектирани во десетина програми. По многу години, во угледната и популарна програма „Балкански преглед“, на солунскиот фестивал се најде и еден македонски филм, „Исцелител“ на Ѓорче Ставрески (неговиот интернационален наслов е „Secret ingredient“ или „Тајната состојка“, што беше и негов работен наслов за време на продукцијата). Дебито на Ставрески, чија светска премиера е токму на овој фестивал, е работено во копродукција со Грција. Неговата сторија говори за млад човек кој нема пари за скапи лекови за тешката болест (рак) на неговиот татко, па краде марихуана која е „тајната состојка“ со која прави колач. Болеста на таткото е како со рака однесена, но тоа се расчуло меѓу соседите и другите паталци по чудотворен лек за тешки болести, па сега момчето е под опсада од барања за рецептот од разни намерници, но е и мета на локалната мафија, бидејки нивна била марихуаната… Сценариото е на Ставрески, главните ролји во филмот ги толкуваат Благој Веселинов, Анастас Тановски и Аксел Мехмет, а директор на фотографија е Дејан Димески.
Во официјалната натпреварувачка програма на фестивалот, која селектира први и втори филмови на автори, годинава се 14 конкуренти од домаќинот Грција, европските земји, Русија, Латинска Америка, САД, Иран и од Филипините. Авторите се борат за двете главни награди, „Златен Александар“ и „Сребрен Александар“. По само три дена од почетокот на фестивалот, неблагодарно е да се даваат какви било прогнози за евентуалните шанси за награди на конкурентите.

Меѓу популарните содржини на Солунскиот фестивал е и програмата „Отворени хоризонти“, со десетици наслови од сите светски меридијани. Ако ѕвезда на отворањето на фестивалот беше Илдико Енједи со нејзиниот особено успешен филм „За душа и тело“, кој во февруари ја доби „Златната мечка“ на Берлинале, беше апсолутен фестивалски хит годинава, стана и унгарски претставник за „Оскар“ во категоријата странски филм, а директорот на фотографија Мате Хернаи ја доби и првата награда на годинешното издание на Интернационалниот фестивал на филмската камера „Браќа Манаки“ во Битола, тогаш фестивалска ѕвезда наредниве денови сигурно ќе бидат Александар Пејн и Рубен Остлунд. Пејн е американски режисер од грчко потекло, кој е двоен оскаровец за сценарио и го претставува неговиот најнов светски успех, „Смалување“. Тоа е „мал“ филм со битен наратив – што ќе се случи ако навистина се оствари експериментот на група норвешки научници, кои во потрага по решение за пренаселеноста на Земјата, бараат начин да ги смалат луѓето? Одговорот го има Пејн, а кастингот во неговиот филм го предводат ѕвездите Мет Дејмон и Кристоф Волц.

Солунскиот фестивал годинава им прави омаж на четири исклучителни автор(к)и: Илдико Енједи, Рубет Остлунд, Ида Лупино и Арман Гати. „Плоштад“ на Остлунд е актуелниот добитник на канската „Златна палма“, а и тој, како и Енједи, спаѓа меѓу современиците што можеби немаат богата филмографија, но секако кај нив квалитетот е далеку пред квантитетот. Ида Лупино беше позната како актерка, но и како една од првите жени што застана зад филмската камера како режисерка, веднаш по Втората светска војна. Арман Гати, пак, е еден од позначајните интелектуалци на француската политичка левица пред и по Втората светска војна (во војната бил затворен во нацистички концентрационен логор, од каде што побегнал и се приклучил на британските специјални воени сили САС). По војната бил ангажиран новинар, театарски и филмски автор.

Секој фестивал кој пледира да остане актуелен, освен што може да ја одржува благородната мисија на потрага по корените на филмската уметност, мора да биде и во дослух со новите технолошки тенденции. Затоа годинава Солунскиот фестивал почна со необична селекција насловена „Виртуелна реалност“, која содржи десет специјално продуцирани филмови кои се гледаат со специјална опрема. Станува ли филмот, на тој начин, веќе класична уметност? Ќе видиме…

Од Солун: Стојан Синадинов


Отворен првиот Истражувачки филмски фестивал Скопје


Скопје, 4 ноември, 2017 - 16:43 (META) 

Со проекција на францускиот истражувачки филм „Да се биде укажувач“ и дебата на тема „Укажувачи: „тајни“ играчи кои може да ја променат историјата“, вчеравечер во киното „Култура“ беше отворено првото издание на Истражувачкиот филмски фестивал Скопје.

Големо внимание на дебатата привлече македонскиот укажувач Ѓорѓи Лазаревски, поранешниот началник од УБК, кој ги обелодени таканаречените „бомби“ со што директно влијаеше на промените кои потоа настапија во нашата земја. Тој го раскажа своето искуство и со какви притисоци и предизвици се соочувал пред и откако ги откри снимките од нелегално прислушкуваните разговори.

Лазаревски истакна дека сега е невработен и бара работа, но нагласи дека иако животот комплетно му се сменил, повторно би го направил истото. Публиката во киносалата двапати го награди со стоечки овации.

На дебатата преку „скајп“ се обрати и Бети Медсгер, легендарната американска новинарка која во 1971 година објавувајќи ги анонимно доставените документи земени од канцеларија на ФБИ, застана на страната на укажувачите и предизвика промена на законите и моќта што разузнавачките служби дотогаш ја имале врз народот.

Модератор на дебатата беше македонската новинарка Сашка Цветковска, а неа говореа и Денис Ампев од „Гласен текстилец“, адвокатката Павлина Зефиќ и Алесија Черантола и Беноа Бринже, истражувачки новинари кои беа дел од тимот репортери што работеше на истражувачката сторија „Панамските документи“, која ја освои Пулицерова награда.


Прв филмски фестивал посветен на истражувачкото новинарство


Скопје, 28 октомври, 2017 - 15:18 (META) 

Платформата за истражувачко нoвинарство и анализи (ПИНА) во соработка со Фондацијата „Фридрих Еберт“ ќе го организира првото издание на Истражувачки филмски фестивал (ИФФС), што ќе се одржи од 3 до 5 ноември во кино „Култура“, Скопје.

„Тридневната фестивалска програма вклучува прикажување на документарни филмови, работилници, дискусии и дебати со гости од Македонија, регионот и од светот. Отворањето на првото фестивалско издание е посветено на укажувачите, храбрите поединци кои обелоденуваат информации во име на општото добро“, се вели во соопштението на организаторите.

Помеѓу учесниците на дебатата посветена на таканаречените укажувачи, што ќе ја води македонската новинарка Сашка Цветковска, е и Бети Медсгер, легендарната американска новинарка која во 1971 година, објавувајќи ги анонимно доставените документи земени од канцеларија на ФБИ, застана на страната на укажувачите и предизвика промена на законите и моќта што разузнавачките служби дотогаш ја имале врз народот. Таа ќе се обрати преку „скајп“.

„За промените до кои може да доведат укажувачите и за храброста потребна за тој чин, на дебатата ќе зборува и Ѓорѓи Лазаревски, поранешниот началник од Управата за безбедност и контраразузнавање, кој ги обелодени таканаречените „бомби“, со што директно влијаеше на промените кои потоа настапија во нашата земја. На истата дебата ќе говорат и Алесија Черантола и Беноа Бринже, истражувачки новинари кои беа дел од тимот репортери што работеше на истражувачката сторија „Панамските документи“, која ја освои Пулицерова награда“, се додава во соопштението.

На фестивалот ќе има и гостин од Велес, 19-годишниот Антонио, кој работел во индустријата за лажни вести, кој јавно ќе говори за тоа на дебатата посветена на лажните вести.

Платформата за истражувачко новинарство и анализи (ПИНА) е новоформирана организација од млади новинари, ентузијасти и професионалци, која се залага за промоција и за зајакнување на истражувачкото новинарство и на професионалноста во медиумската средина во Македонија. Освен тоа, ПИНА се залага и за подобрување и за унапредување на состојбата на новинарките во медиумите.


Фестивал на новиот германски филм во Прилеп


Прилеп, 10 октомври, 2017 - 10:09 (META) 

Од 12 до 14 октомври во киното „Мис Стон“ во Прилеп ќе се одржи Фестивал на новиот германски филм, во соорганизација на Центарот за култура „Марко Цепенков“ и на Амбасадата на Германија.

Свеченото отворање е в четврток, во 20 часот, а на него ќе присуствуваат и претставници на Амбасадата на Германија. Ќе се прикажува филмот „Чик“, кој е од жанрот драма и комедија, а е снимен во режија на Фатих Акан. Филмот е за публика над 12 години.

В петок, со почеток во 18 часот, ќе се проектира трагикомедијата „Тони Ердман“ на режисерот Марен Аде, кој исто така е за публика над 12 години. Од 20 часот ќе почне проекцијата на „Херберт“, во режија на Томас Штубер.

В сабота од 16 часот ќе се проектира детскиот филм „Авантурата на Нели“, во режија на Доминик Весели. Од 18 часот ќе се проектира филмот за младинци „На иста висина“, во режија на Јоаким Долхопф, а од 20 часот ќе биде прикажан филмот „24 недели“, драма наменета за публика над 12 години, во режија на Ане Зохра Берахед.


ИФФК „Браќа Манаки“ почна синоќа, доделени наградите за животно дело на Лом и на Ротуно


Битола, 24 септември, 2017 - 10:36 (META) 

Интернационалниот фестивал на филмска камера „Браќа Манаки“ почна синоќа во Центарот за култура во Битола.

На отворањето на фестивалот беа доделени двете награди за животно дело „Златна камера 300“, на великаните на светската кинематографија, Пјер Лом и Џузепе Ротуно.

Славниот италијански кинематограф Џузепе Ротуно не беше во можност да дојде во Битола. Во име на Ротуно, заслужен за повеќе од 80 филмови кои ја дефинираа европската кинематографија, наградата ја прими неговиот некогашен студент, а сега и самиот кинематограф, Лука Коасин.

Втората награда за животно дело „Златна камера 300“ му припадна на францускиот и светски кинематограф Пјер Лом, а му беше врачена од страна на претседателот, Ѓорѓе Иванов.

Наградата „Голема ѕвезда на македонскиот филм“, пак, која ја доделува Друштвото на филмски работници на Македонија (ДФРМ) оваа година првпат ѝ припадна на институција, а не на личност. Претседателот на ДФРМ, Роберт Насков, ѝ ја посвети наградата на најстарата продуцентска куќа во Македонија, „Вардар филм“, која оваа година одбележува 70 години од формирањето.

– За жал, „Вардар филм“ веќе не постои, па затоа нема кој да ја прими наградава. Ова е, на некој начин, постхумно доделување на наградата и тоа ја покажува нашата негрижа за културата и за традицијата. Со оваа награда ДПФМ сака да им оддаде почит на сите кои биле вработени во „Вардар филм“ и на тој начин придонеле за развојот на македонската кинематографија – рече Насков.

Синоќешното издание на фестивалот заврши со проекциите на филмовите „Крајот на времето“ на режисерот Милчо Манчевски и „Насоки“ на режисерот Стефан Комадарев и на кинематографот Веселин Христов, прв од главната селекција.


Французинот Пиер Лом е добитник на наградата за животно дело на „Браќа Манаки“


Скопје, 22 август, 2017 - 14:44 (META) 

Францускиот кинематографер од светски глас Пјер Лом е добитникот на наградата Златна камера 300 за животно дело на годинашното 38. издание на меѓународниот фестивал на филмска камера „Браќа Манаки“. Фестивалот ќе се одржи од 23 до 30 септември во Битола, а Лом, иако е во поодминати години, ќе присуствува на фестивалот.

– Пиер Лом е легенда на француската и европската кинематографија, она што е најзначајно и карактеристично во опусот на овој кинематографер е што тој соработувал со значајни и големи имиња на француската кинематографија, а тој со својата вештина да се адаптира на сечиј стил беше еднакво успешен и во соработките со неколкумина странци, како што е на пример, американскиот режисер Џејмс Ајвори, со кого има снимено четири, многу важни  филмови за неговото творештво. Во неговата 40-годишна кариера тој ги има снимено некои од ремек делата на француската кинематографија, вклучувајќи го и филмот „Сирано де Бержерак“. Ние со гордост го очекуваме да биде наш ценет гостин, иако е во поодминати години, тој во својата прва реакција веднаш најави дека ќе биде наш гостин заедно со својата сопруга Рене – изјави директорот на Фестивалот, Благоја Куновски – Доре, на денешната прес конференција во ЕУ Инфо Центарот во Скопје.

На годинашното издание на „Браќа Манаки“ за наградите Златна, Сребрена и Бронзена Камера 300 на годинашниот фестивал ќе решава петчлено жири, составено од Пол Рене Ростад, кинематографер од  Норвешка и актуелен претседател на ИМАГО, како и Лука Коасин, кинематографер од Италија, Јани-Петери Паси, кинематографер од Финска, Даријан Пејовски, режисер и сценарист од Македонија и Ерол Зубчевиќ, кинематографер од Босна и Херцеговина.


Почна „Баскерфест 2017“


Скопје, 17 јуни, 2017 - 14:22 (META) 

Со парада составена од сите учесници на фестивалот, Градскиот дувачки оркестар и од девојките од танцовиот клуб „Еурека“, што тргна од градскиот плоштад, се движеше по улица Македонија и се врати на плоштадот Македонија, вчеравечер почна Фестивалот на уличен театар под отворено небо „Баскерфест 2017“.

Фестивалот ќе трае до 25 јуни, при што на плоштадот Македонија на трите поставени сцени ќе се одвива програмата на фестивалот секојдневно од 19 до 23 часот.

Има и детско катче за најмалите, каде што децата може да се вклучат во различни забавни активности секојдневно од 18.30 до  20 часот, а музичката програма ќе биде застапена секој ден од 22 часот до 1 часот по полноќ.


Протест против одлуката на жирито на театарскиот фестивал во Прилеп


Прилеп, 17 јуни, 2017 - 13:41 (META) 

Ансамблот на Народниот театар „Војдан Чернодрински“ од Прилеп на синоќешното затворање на истоимениот фестивал, протестираше против одлуките на жирито. Во име на актерите од ансамблот, Владимир Ѓорѓијоски кажа дека публиката заслужува многу повеќе од каприците и од личните интереси на членовите на жирито, јави „Десет без десет“.

Тој вели дека се поклонуваат на публиката како единствен меродавен оценувач, со надеж дека нештата во македонскиот театар ќе тргнат на подобро.

52. издание на Македонскиот театарски фестивал „Војдан Чернодрински“ вчера заврши во Прилеп, со мјузиклот „Тајно моја“ на Македонската опера и балет.

Наградата за животно дело на фестивалот му беше доделена на академик Митко Маџунков, кој е претседател на жирито. Членови на жирито се уште Слободан Деспотовски и Братислав Димитров.

Најмногу награди на „Војдан Чернодрински“ собра Театар „Комедија“. Претставата „Трудна приказна“ на театар „Комедија“ ја понесе наградата за најдобра претстава, а беа доделени и четири признанија – за главна женска улога, која беше доделена на директорката на театарот, Јелена Жугиќ, како и  наградите за споредна машка и женска улога и за текст.

Во седумте фестивалски дена на 52. издание на МТФ „Војдан Чернодрински“, публиката виде 20 претстави, промоции на театарска литература и изложби.


Фестивалот на улична уметност „Баскерфест“ ќе почне утре


Скопје, 15 јуни, 2017 - 10:54 (META) 

Фестивалот на улична уметност „Баскерфест 2017“ почнува утре и ќе трае до 25 јуни. За време на одржувањето на фестивалот, градскиот плоштад Македонија во Скопје традиционално ќе се претвори во театар под отворено небо.

На отворањето ќе учествуваат педесетина изведувачи од светот, акробати, жонглери, танчери, магионичари, кловнови и музичари.

На плоштадот Македонија точките на артистите ќе се одвиваат на три локации во периодот од 18 часот до 1 часот по полноќ.


Филмови за Крафтверк и за Жан Мишел Жар на отворањето на „Скопје синема сити“


Скопје, 2 јуни, 2017 - 13:23 (META) 

Филмскиот фестивал за музички документарни филмови „Скопје синема сити“, кој ќе се одржи од 15 до 19 јуни во Кинотека на Македонија, за отворањето ги најавува филмовите за пионерите на електронската музика Крафтверк, „Поп Арт“, и „Жан Мишел Жар – Историја на електронската музика“.

Воедно, фестивалот го објавува својот прв промотивен видеозапис како најава за своето отворање.

Едно од главните начела на фестивалот е да го прикаже богатството на музичкиот свет преку популарните документарни филмови. Тоа што ќе се случува во текот на петте фестивалски дена е богатство од добра музика и приказни зад неа. Следната недела ќе биде објавена комплетната програма на фестивалот со сите потребни информации.