!На 1 февруари 2017 година, заврши промотивниот период на слободно користење на содржините на „Мета“. Во периодот што претстои го воведуваме новиот систем за пристап и за претплата. За начинот на пристап и за претплатата ќе информираме дополнително

Португалија победи на натпреварот за песна на „Евровизија 2017“


Киев, 14 мај, 2017 - 9:48 (META) 

Португалија е победник на годинашниот избор на песна на „Евровизија“, европската мрежа на национални радиодифузери, кој се одржа во Киев, Украина.

Со 758 поени, 27-годишниот Салвадор Собрал со песната „Amar Pelos Dois“ ги освои симпатиите на Европа и на својата земја ѝ ја донесе првата евровизиска победа. Португалија е земја со најдолг стаж како натпреварувач, но досега никогаш го нема освоено ова музичко натпреварување.

За време на својот настап, младиот Салвадор, кој важеше за еден од фаворитите, предизвика огромни овации кај публиката. Песната со која тој ја претстави својата земја е напишана од неговата сестра.
Во финалето се натпреваруваа 26 земји. Меѓу нив не беше Македонија, но беа соседните земји Грција и Бугарија.


Тилерсон и Лавров утре во Вашингтон ќе разговараат за состојбите во Украина и во Сирија


Вашингтон, 9 мај, 2017 - 13:06 (META) 

Државниот секретар на САД, Рекс Тилерсон, утре во Вашингтон ќе се сретне со министерот за надворешни работи на Русија, Сергеј Лавров. Како што соопшти денеска американскиот Стејт департмент, двајцата ќе разговараат за ситуацијата во Украина и во Сирија, како и за билатерални прашања помеѓу САД и Русија.

Во врска со ситуацијата во Украина, Тилерсон и Лавров, стои во соопштението, ќе разговараат за потребата од запирање на насилствата на истокот на земјата и за решавање на конфликтот преку целосна импелентација на Договорот од Минск.

Во врска со Сирија, пак, како што велат од Стејт Департментот, Тилерсон има намера да разговара за напорите за намалување на насилствата, овозможување на хуманитарна помош за населението во Сирија и за подготовка на терен за политичко решавање на конфликтот.


Русија на прославата на Денот на победата ги покажа новите ракети за Арктикот


Москва, 9 мај, 2017 - 12:46 (META) 

На традиционалната голема парада во Москва, на прославата на 72-годишнината од победата на Советскиот Сојуз над нацистичка Германија во Втората светска војна, руските вооружени сили денеска ги прикажаа новите ракети „панцир-СА“. Тие се наменети за противвоздушна одбрана, а се наменети за војување на Арктикот, каде Русија забрзано гради воени бази.

Покрај новите ракети, на парадата на Црвениот плоштад беа презентирани и интерконтиненталните балистички ракети „јарс РС-24“, кои може да носат нуклеарни боеви глави.

Руските ловци, бомбардери и хеликоптери прелетаа преку плоштадот во рамки на парадата, а по него прошета и новата руска национална гарда. Новите единици ќе бидат вооружени со модернизирани пушки „АК-74М“, а задача ќе им биде борбата против тероризмот и организираниот криминал.

Во големата парада учествуваа 10.000 војници и офицери, 135 оклопни возила и 71 летало.

– Ниту една сила не ќе може да доминира со нашиот народ – рече рускиот претседател Владимир Путин, во говорот во кој го осуди уништувањето нанесено од трупите на Хитлерова Германија на Советскиот Сојуз.

Во меѓувреме, украинскиот претседател Петро Порошенко, шеф на уште една држава – наследничка на Советскиот Сојуз, полоожи венец на церемонија во Киев. На украинските војници им порача дека Русија се обидува да ја искористи прославата на победата „за да ги задоволи своите реваншистички, империјалистички и експанзионистички потреби“.

Русија вложува милијарди долари во модернизација на војската среде сè поголемите тензии со НАТО поради конфликтот во Украина, а парадата на Денот на победата послужи за истакнување на воената моќ пред меѓународната публика.


Могерини и Лавров не ги надминаа разликите


Москва, 24 април, 2017 - 18:59 (META) 

Шефовите на дипломатиите на ЕУ и на Русија, Федерика Могернини и Сергеј Лавров, не успеаја во Москва да ги надминат несогласувањата, но се обврзаа на поблиска соработка.

Ова за Могерини беше прва официјална посета на Русија откако стапи на функцијата шефица за надворешна политика во 2014 година. Таа наведе дека соработката помеѓу Брисел и Москва „не е замрзната“, туку закочена со длабоки несогласувања, особено во поглед на Сирија и на Украина.

– Би било надреално да се сметаме за стратешки партнери кога заемно си воведовме санкции – наведе Могерини по средбата со Лавров и додаде дека во интересен е и на Русија и на ЕУ да се подобрат односите.

Могерини наведе дека економските санкции „не се сами за себе цел“ и дека се воведени за да се придонесе за решавање на конфликтот на истокот на Украина, во кој за три години животот го загубија околу 10.000 луѓе.

Рускиот министер за надворешни работи рече дека двете страни повториле дека е неопходно да се примени договорот од Минск за да може да се реши конфликтот во Украина.

Лавров повика на „длабока, брза и транспарентна истрага“ по смртта на еден американски набљудувач на ОБСЕ на истокот од Украина, чие возило наишло на мина.


Нападнат полскиот конзулат во Украина


Киев, 29 март, 2017 - 10:35 (META) 

Неидентификувани лица го нападнаа конзулатот на Полска во западниот украински град Лутск, при што се оштетени покривот и прозорците, јавуваат локалните медиуми, повикувајќи се на очевидци.

Според весникот „Волин 24“, инцидентот се случил околу полноќ, а во нападот нема повредени.

Сè уште не се знае дали на конзулатот е пукано или е гранатиран. Полицијата сè уште се нема огласено во врска со инцидентот.


Европскиот суд на правдата ги поддржа санкциите за „Росњефт“


Луксембург, 28 март, 2017 - 13:50 (META) 

Европскиот суд на правдата денеска пресуди дека се валидни економските санкции кои ЕУ ги воведе за руските компании, вклучувајќи го и рускиот нафтен и гасен гигант„ Росњефт“ поради кризата во Украина.

Одлуката е донесена врз основа на жалба која компанијата „Росњефт“ ја поднесе пред судот.

Европскиот суд на правдата, кој се наоѓа во Луксембург, соопшти дека рестриктивните мерки кои поради кризата во Украина се воведени против руските компании, вклучувајќи го и „Росњефт“ се во согласност со прописите.

„Росњефт“ бара укинување на одлуката на лидерите на ЕУ од јули 2014 година, со кои се ограничуваат некои финансиски трансакции и извоз на осетлива стока, донесени откако Русија го анектирала полуостровот Крим.


Убиен рускиот пратеник Вороненков кој поради Путин побегна од Русија


Киев, 23 март, 2017 - 13:56 (META) 

Рускиот пратеник Денис Вороненков, кој побегна од Москва од страв да не биде убиен од агентите на претседателот Владимир Путин, убиен е во Киев.

Вороненков, кој неодамна ја критикуваше и украинската влада, е убиен на улица сред бел ден.

Четириесет и петгодишниот Русин побегна од својата земја во октомври минатата година, заедно со својата сопруга, оперската певица Марија Максакова.

Тогаш изјави дека му е доста од „шизофренијата“ на руската влада. Вороненков се откажа од руското државјанство и доби украински пасош.


Џонсон: Неприфатливо е мешањето на Русија на Балканот


Брисел, 6 март, 2017 - 15:44 (META) 

Британскиот министер за надворешни работи, Борис Џонсон, изјави дека Русија мора да престане со „неприфатливото“ мешање во прашањата на други држави, особено на Балканот и во Украина, за да има некаква шанса за нов почеток во односите со западните земји.

Џонсон при доаѓањето на состанокот на министрите за надворешни работи и за одбрана на земјите членки на ЕУ во Брисел рече дека „Русија прави многу лоши работи“.

– Тие вршат кибернетички напади, ги поткопуваат земјите од Западен Балкан. Видовте што се случи во Црна Гора, а да не споменувам што се случува во Источна Украина – рече Џонсон.

Шефот на британската дипломатија рече дека однесувањето на Москва е „целосно неприфатливо“ и дека тоа мора да се смени, за Русија да покаже дека може повторно да ѝ се верува.

Џонсон, кој наскоро треба да ја посети Москва, укажа дека никој во Европа и во САД не сака враќање на Студената војна и дека целта мора да биде „разговор со Русите“ за да се „вратат на подобриот пат“.


Прекинот на огнот во Украина не се почитува, соопшти Заниер


Њујорк, 22 февруари, 2017 - 9:57 (META) 

Сè уште има значителни прекршувања на прекинот на огнот во Украина, соопшти во Њујорк генералниот секретар на ОБСЕ, Ламберто Заниер.

Тој додаде дека засега нема докази дека сите страни го повлекуваат тешкото оружје од фронталната линија, како што беше договорено минатата недела.

Заниер, по состанокот со претставниците на Советот за безбедност на ОН, изјави дека мора да се изврши притисок врз двете страни за да се обезбеди согласност.


Вашингтон е подготвен за соработка со Москва, но само во одредени области, порача Тилерсон


Бон, 16 февруари, 2017 - 19:29 (META) 

Вашингтон е подготвен да соработува со Москва, но само во одредени области, кои ќе бидат во интерес на американскиот народ, изјави државниот секретар на САД, Рекс Тилерсон по денешната средба со шефот на руската дипломатија Сергеј Лавров во Бон.

„САД ќе ја разгледаат можноста за соработка со Русија кога ќе најдеме област за практична соработка која ќе биде од корист за американскиот народ. Онаму каде што нема да се сложиме, САД ќе ги потенцира своите интереси и вредности, како и своите сојузници“, изјавил Тилерсон, пренесуваат светските медиуми.

Новиот американски државен секретар ја повика Русија да ги исполни своите обврски во Украина во согласност со договорот од Минск.

„Додека бараме нов заеднички терен, очекуваме Русија да ги почитува своите обврски кон договорот од Минск и да работи на смирување на насилствата во Украина“, изјавил Тилерсон по состанокот со Лавров.

Инаку, ова е прва средба меѓу Тилерсон и Лавров и воедно е прв контакт на највисоко ниво меѓу САД и Русија откако Доналд Трамп ја презеде должноста претседател на САД. Тие се сретнаа на маргините на конференцијата на министрите за надворешни работи на земјите-членки на Г-20 во Бон.

На прашањето дали Русија е загрижена поради превирањата во администрацијата на Трамп, односно по оставката на советникот за национална безбедност на Трамп, Мајкл Флин, Лаворов изјавил дека стандарден став на Москва е „да не се меша во внатрешните работи на други земји. Тој додал дека двете земји имаат „многу прашања“, за кои треба да разговараат, изразувајќи надеж дека ги „воспостават параметрите за идна соработка“.