Македонија и Украина ќе ги укинат визите за краткорочен престој


Скопје, 11 април, 2018 - 12:43 (META) 

Меморандум за заемна соработка меѓу дипломатските академии во министерствата за надворешни работи на Македонија и на Украина и заедничка декларација, денеска потпишаа министрите за надворешни работи на двете земји Никола Димитров и Павло Климкин кој е во дводневна официјална посета на Македонија.

Димитров по средбата информираше дека со неговиот колега се договориле и за возвратна посета во Киев на која ќе се потпише спогодба за патување без визи во двете земји, односно за трајно укинување на визите за краткорочен престој. На средбата се разговарало и за економската соработка за која и двајцата се согласиле дека постои можност за интензивирање.

-Имаме договор за слободна трговија, меѓутоа бројките не соодветствуваат на потенцијалот. Работиме на унапредување на договорот, а процесот е веќе почнат. Имаме заедничка визија за стабилна и просперитетна Европа и во таа смисла реафирмирајќи ја приврзаноста кон европските принципи и вредности се осврнавме на европските и евроатланските аспирации на нашите две држави. Иако имаме специфичен пат и се соочуваме со разни предизвици, Македонија и Украина се подготвени да разменуваат искуства и заемно да се поддржуваат во остварувањето на заедничките цели – рече Димитров.

Климкин изјави дека Македонија е важен партнер за Украина на Балканот и дека двете земји заедно чекорат кон ЕУ и НАТО. Според него, економската размена не треба да ги опфаќа само продуктите и инвестициите, туку дека е потребна и размена меѓу луѓето и науката.

-Сакам да се заблагодарам што Македонија зема за рехабилитација украински војници што за нас претставува нешто што е многу емотивно, реално покажување на пријателството што некогаш е поважно отколку формалните посети – рече Климкин.


Украина донесе закон за реинтеграција на Доњецк и Луганск


Киев, 18 јануари, 2018 - 19:03 (META) 

Украинскиот парламент денеска го усвои законот за реинтеграција на источните региони кои во моментот се под контрола на проруските бунтовници, јавуваат агенциите.

Во законот се наведува дека Русија „привремено ги окупирала“, регионите Доњецк и Луганск на истокот на Украина.

Украинскиот претседател, Петро Порошенко го поздрави усвојувањето на новиот закон, наведувајќи дека тој ќе помогне со политички и дипломатски средства да се врати контролата над истокот на земјата.

Претседателот на комисијата за надворешна работи на горниот дом на рускиот парламент Констатин Косачев оцени дека со новиот закон се минира мировниот договор од Минск, чија примена САД и Европската Унија ја наведуваа како услов за укинување на санкциите кон Русија.

– Киев премина од саботажа на договорот од Минск кон негово погребување – изјавил Косачев, пренесува „Радио Слободна Европа“.

Во судирите на истокот на Украина од април 2014 досега загинаа повеќе од 10 илјади лица. Иако беше постигнат мировен договор во 2015 година кој предвидува прекин на огнот, повлекување на оружјето од првата линија на фронтот и уставни реформи, примирјето постојано се крши, со взаемни обвинувања помеѓу страните во судирот – украинската војска и проруските бунтовници.


Ослободени сите заложници од поштата во Харков, напаѓачот уапсен


Харков, 30 декември, 2017 - 21:11 (META) 

Сите заложници во поштата во украинскиот град Харков се ослободени, а напаѓачот е уапсен. Во инцидентот нема настрадани лица, јавуваат агенциите.

„Успешно заврши операцијата за ослободување на заложниците во поштата во Харков. Сите заложници се ослободени, а напаѓачот е уапсен. Им наложив на локалните власти да им ја обезбедат сета неопходна помош на жртвите“, напиша на „Твитер“ украинскиот претседател, Петро Порошенко.

Претходно, напаѓачот, кој денеска со експлозив околу појасот влезе во поштата и држеше во заложништво 11 лица, ослободи петмина од нив – три жени и две деца.

Според информациите на агенциите, напаѓачот влегол во поштата со намера да ја ограби.


Маж со експлозив држи 11 заложници во пошта во Харков


Харков, 30 декември, 2017 - 18:50 (META) 

Маж за кого се верува дека е вооружен со експлозив држи девет возрасни лица и две деца како заложници во пошта во градот Харков, во североисточниот дел на Украина, соопшти полицијата, јавуваат светските агенции.

Неидентификуваниот маж не изнел некакви барања. Тој, како што пренесуваат агенциите, се однесува мирно и комуницира со полицијата, која го блокираше подрачјето околу поштата.

„Мажот во поштата изрази загриженост околу неодамнешната размена на заробеници меѓу украинските власти и проруските сепаратисти и смета дека треба да се разменат уште заробеници“, изјавил началникот на регионалната полиција, Олег Бех, додавајќи дека полицијата сè уште не знае што тој бара.

Украина и проруските сепаратисти во средата, оваа недела, разменија стотици заробеници, што е најголема размена од избувнувањето на судирите во источен Донбас, во кои досега се убиени повеќе од 10.000 лица.


ОН усвои резолуција за Крим


Њујорк, 20 декември, 2017 - 10:45 (META) 

Генералното Собрание на Обединетите нации усвои резолуција со која остро се осудува кршењето на човековите права на полуостровот Крим, кој Русија го анектираше во 2014 година.

Резолуцијата, во Русија се наведува како „окупаторска сила“, ја поднесе Украина со поддршка од 30 земји и беше одобрена од 70 држави членки. Дваесет и шест земји, меѓу кои и Русија, Белорусија, Казахстан, Србија и Кина, гласаа против, а 76 држави биле воздржани.

Од делегацијата на Украина соопштија дека резолуцијата го потврдува постоењето на вооружен судир меѓу Украина и Русија и оти се осудува ретроактивната употреба на законот на Русија на територијата на Крим. која официјална Москва ја анектираше во 2014 година.


Уапсен Михаил Саакашвили, поддржувачите протестираат во Киев


Киев, 9 декември, 2017 - 10:27 (META) 

Во главниот град на Украина, Киев, доцна синоќа беше уапсен поранешниот грузиски претседател, исто така и поранешен гувернер на областа Одеса во Украина и актуелен лидер на украинското опозициско Движење на новите сили, Михаил Саакашвили, соопшти јавниот обвинител на Украина, Јуриј Луценко.

Саакашвили се наоѓа во изолација, објави Луценко, додавајќи дека безбедносните сили при тоа сториле сè за да се избегне насилство и крвопролевање.

Група негови поддржувачи се собрале пред седиштето на Службата за безбедност во Украина по веста за неговото апсење.

Ова беше трет обид за апсење на Саакашвили, откако во претходните два неговите приврзаници не им дозволија на полицијата да го лишат од слобода.

Тој се товари за обид за уривање на уставниот поредок откако минатиот викенд организираше протести против украинскиот претседател Петро Порошенко.


Турски авион принудно слетал во Украина поради сомнителна торба во тоалетот


Одеса, 31 октомври, 2017 - 19:37 (META) 

Турски авион „ербас А320“, кој полетал од меѓународниот аеродром „Домодедово“, југоисточно од Москва, извршил принудно слетување на украинскиот град Одеса, јавуваат украинските медиуми.

Шефот на регионалната полиција во Одеса, Руслан Форостјак, соопшти дека одлуката за принудно слетување е донесена откако сомнителна торба е пронајдена во тоалетот на авионот.

– Еден патник се жалел на стомачни тегоби и останал малку подолго во тоалетот, што на членовите на екипажот им било сомнително – рече Форостјак.

Шефот на регионалната полицијата додаде дека сомнителна торба е пронајдена при претресот на тоалетот. По проверка на торбата е утврдено дека во неа се наоѓаат само личните работи на патникот и оти во неа немало никаква опасна направа.


НАТО и Русија и понатаму имаат сосема различни ставови за судирите во Украина


Брисел, 26 октомври, 2017 - 16:23 (META) 

Генералниот секретар на НАТО, Јенс Столтенберг, изјави дека западниот воен сојуз и Русија и понатаму имаат сосема различни ставови околу судирите во Украина.

Столтенберг го изјави ова по состанокот на амбасадорите на НАТО со рускиот претставник Александар Грушко во Брисел.

Првиот човек на Алијансата го опиша состанокот меѓу Советот на НАТО и претставниците на Русија како искрена и отворена дискусија за Украина, Авганистан, за транспарентноста, како и за намалување на ризиците.

Односите на Москва и на Западот се влошија по руската анексија на Крим во март 2014 година и поддршката на Русија на сепаратистите во Источна Украина.

Од почетокот на судирите меѓу силите на Киев и проруските бунтовници, загинаа повеќе од 10.000 лица.


Русија го постави главниот лак на мостот за Крим


Симферопол, 13 октомври, 2017 - 15:31 (META) 

Цели пет часа ноќеска траел зафатот на подигнување на главниот лак, тежок 5.000 тони, на мостот за Крим, по што тој е успешно прицврстен на столбовите според плановите, јави „Раша бијонд“.

Лакот е подигнат со 12 кранови, од кои секој може да подигне до 650 тони. Лакот со должина од 45 метри вчера е поставен на височина од 35 метри над морската површина, а во текот на денешниот ден треба да заврши неговото конечно зацврстување.

Со тоа Русија се приближи чекор поблиску до својот план целосно да овозможи пристап до анектираниот полуостров, кој од 2014 година, по референдумот, повеќе не го признава суверенитетот на Украина, а наскоро беше анектиран од Русија.

Гигантскиот мост долг 19 километри ќе значи директен пристап од територијата на Русија, од Таманскиот Полустров, до Керчанскиот Полуостров на Крим, со што целосно ќе се заобиколи територијата на Украина. Во еден дел мостот е поставен на островот Тузиа.

Според планот, патниот сообраќај преку мостот ќе биде пуштен веќе во декември 2018 година, а првите возови преку Керченскиот теснец ќе поминат во декември 2019 година.


Состанок на САД и на Русија во Србија за Украина


Белград, 6 октомври, 2017 - 11:59 (META) 

Портпаролот на американскиот Стејт департмент за „Гласот на Америка“ потврди дека специјалниот претставник на САД за ставање крај на судирите во Донбас, Курт Волкер, и помошникот на рускиот претседател, Владислав Сурков, на 7 октомври ќе се сретнат во Белград.

Како што наведуваат од Стејт департментот, тема на разговорот е имплементацијата на договорот од Минск.

Волкер вчера на својот твитер-профил го најави белградскиот состанок со помошникот на рускиот претседател во Белград.
„Ќе се сретнам со рускиот колега во октомври во Белград, за да разговараме за побрза имплементација на договорот од Минск и обновувањето на територијалниот интегритет на Украина“, наведе Волкер.

Спогодбата од Минск од февруари 2015 година предвидува прекин на огнот во источниот де на Украина, Донбас, и понатамошни чекори за ставање крај на судирите, но во голема мера не се применува.

Амбасадорот на Украина во Србија, Олекандр Александровиќ, за балканскиот сервис на „Радио Слободна Европа“ изјави дека Белград веројатно е избран затоа што Сурков е на листата на ЕУ на санкционирани лица, поради што му е забрането патување во овие земји.