Нови судски рочишта за „Тотал“ и „Транспортер“


Скопје, 2 јули, 2018 - 9:44 (META) 

Во Кривичниот суд денеска треба да се одржат нови судски рочишта за случаите „Тотал“ и „Транспортер“ на Специјалното јавно обвинителство.

Во „Тотал“ обвинет е новинарот Драган Павловиќ-Латас за затајување на данок во висина од 121.414 евра преку правните лица „Тотал маркетинг”, „Тотал медија центар” и „Медијамакс” и 63.032 евра како физичко лице.

Набавката на опремата за себе ја евидентирал како опрема за фирмите, иако во фирмите немало вработени лица, односно во една фирма имало само еден вработен.

По неколку одложувања поради здравствени и семејни причини на Драган Павловиќ-Латас, судењето за случајот почна на 14 мај годинава.

На обвинителна клупа денеска, исто така, треба да седнат и обвинетите во предметот на СЈО „Транспортер“.

Поранешниот битолски градоначалник Владимир Талески и уште 20-тина лица во овој случај се товарат за злоупотреба на службената положба во врска со организирањето превоз на ученици во Битола, со што е направена проневера на околу 360.000 евра.


Поради лични и семејни причини повторно е одложено рочиштето за „Тотал“


Скопје, 30 мај, 2018 - 11:45 (META) 

На барање на адвокатите на новинарот и уредник Драган Павловиќ – Латас, поради лични и семејни причини денеска повторно беше одложено судското рочиште за предметот „Тотал“.

Во овој случај Павловиќ – Латас е обвинет за затајување на данок во висина од 121.414 евра преку правните лица „Тотал маркетинг“ ДООЕЛ, „Тотал“медија центар” и „Медијамакс” и 63.032 евра како физичко лице.

По неколку одложувања поради здравствени и семејни причини на Павловиќ-Латас, судењето за случајот започна на 14 мај.


Судот ги одби приговорите на Латас, откако претходно му даде транскрипти од „бомбите“


Скопје, 14 мај, 2018 - 14:59 (META) 

По неколку одложувања, денеска во Кривичниот суд почна судењето за предметот „Тотал“ на СЈО во кој обвинет е новинарот Драган Павловиќ – Латас.

На денешното рочиште беше прифатено како доказ вештачењето на Павле Гацов по наредба на СЈО, а во рамките на судскиот процес ќе биде сослушан и вештакот.

Претходно Судот не го прифати предлогот на адвокатите на Латас да не се изведуваат како докази на СЈО 40 „бомби“. Според судот, бомбите се влезени во правниот поредок и за тоа има решение на Апелациониот суд.

За разлика од тоа, барањето на адвокатите на обвинетиот да ги добие транскриптите од 14 прислушувани разговори, кои СЈО ги предлага како доказ во постапката, и покрај противењето на обвинителката Елизабета Јосифовска, која рече дека со тоа се одолговлекува постапката, беше прифатено и Латас ги доби транскриптите од разговорите.

Следното рочиште ќе се одржи на 30 мај.

Во предметот „Тотал“ обвинет е Драган Павловиќ – Латас, заедно со три фирми: „Тотал маркетинг“ ДООЕЛ, „Тотал медиа центар“ и „Медиамакс“, чиј што сопственик и управител е тој.

Според обвинението, Латас во периодот од 2008 до 2015 година одбегнувал плаќање данок, при што тој не пријавил лични приходи, набавката на опрема за себе ја евидентирал како опрема за фирмите, иако во фирмите немало вработени лица, односно во една фирма имало само еден вработен. Дополнително, износите за набавките, не ги внесувал во годишните даночни пријави.


Завршни зборови за „Тенк“, продолжуваат судењата за „Тендери“ и „Тотал“


Скопје, 14 мај, 2018 - 10:18 (META) 

Во Основниот суд Скопје 1 денеска ќе се одржат три судски рочишта за случаите на Специјалното јавно обвинителство, од кои за еден ќе се изнесуваат завршните зборови.

Во судењето за случајот „Тенк“, во кој, за набавката на прескапиот блиндиран „мерцедес“ вреден близу 600.000 евра, на поранешниот премиер Никола Груевски и поранешниот помошник министер во МВР Ѓоко Поповски, треба да бидат изнесени завршните зборови на одбраната. Во овој случај обвинета е и поранешната министерката за внатрешни работи Гордана Јанкулоска, но постапката за неа беше издвоена поради „ризична бременост“.

Во Кривичниот суд покрај овој процес, денеска ќе има рочишта и за  случаите „Тендери“ и „Тотал“. Во првиот случај и се суди на поранешната министерка за култура Елизабета Канческа – Милевска, за тендерот за завршни работи во Музејот на македонската борба за државност и самостојност од проектот „Скопје 2014“. Во овој случај обвинети се уште двајца членови на Комисијата за јавни набавки.

Во случајот „Тотал“, му се суди на новинарот Драган Павловиќ-Латас, кој не присуствуваше на претходните три рочишта поради здравствени, односно семејни причини. Латас се товари дека давал лажни податоци во завршните сметки и даночните пријави при што преку неговите фирми затаил данок во износ од 7.466.981 денар или 121.414 евра, а лично тој затаил 3.876.471 денар или 63.032 евра.


Одложено судењето за „Тотал“, поради отсуство на Драган Павловиќ – Латас


Скопје, 11 април, 2018 - 10:14 (META) 

Главната расправа за предметот на Специјалното јавно обвинителство (СЈО), наречен „Тотал“, во кој главниот обвинет е уредникот Драган Павловиќ-Латас, кој се товари за затајување данок, денеска беше одложена.

На рочиштето во Основен суд Скопје 1, не се појави Латас, со оправдание дека има здравствени и семејни причини.

Рочиштето е одложено за 14 мај. И претходните две рочишта не се одржаа поради истите причини.

Според обвинението на СЈО, осомничениот давал лажни податоци во завршните сметки и даночните пријави, при што преку правните лица затаил данок во износ од 7,46 милиони денари или 121.414 евра, а тој како физичко лице, затаил 3,87 милиони денари, односно 63.032 евра.

Во Кривичен суд денеска треба да се одржат рочишта за уште два случаја на СЈО, предметот „Тенк“ за набавката на блиндираниот мерцедес по цена од близу до 600.000 евра, како и предметот „Тарифа“ во кој се осомничени три лица за злоупотреба на службената положба во постапка по јавна набавка на софтвер – ЕРП Систем за потребите на АД ЕЛЕМ.


Одложено судењето на Драган Павловиќ – Латас, одбраната вели дека е во Германија


Скопје, 30 март, 2018 - 10:30 (META) 

Новото рочиште за случајот на СЈО, „Тотал“ денеска се одложи, оти главниот обвинет, новинарот Драган Павловиќ Латас не се појави во Кривичниот суд. Наредното рочиште е закажано за 11 април.

Како што објаснија адвокатите, Латас поради семејни причини не е во можност да присуствува на рочиштето, бидејќи се наоѓа во Германија. Можно е и да се одложи следното рочиште бидејќи според адвокатите на Латас тој во Германија би требало да се задржи до 10 мај.

Според обвинението, осомничениот давал лажни податоци во завршните сметки и даночните пријави при што преку правните лица затаил данок во износ од 7.466.981 денар или 121.414 евра, а лично физичкото лице затаило 3.876.471 денар или 63.032 евра.

Поради отсуство на Павловиќ-Латас, минатото рочиште исто така беше одложено.


Латас и Јанакиески денеска на судења за „Тотал“ и „Топлик“


Скопје, 30 март, 2018 - 9:50 (META) 

Во Основниот суд денеска треба да се одржат две рочишта од случаите на Специјалното јавно обвинителство (СЈО). Тоа се предметите „Топлик“ и „Тотал“, во кои обвинети се поранешниот министер за транспорт и врски Миле Јанакиески и поранешниот главен уредник на телевизијата „Сител“ и на весникот „Вечер“, Драган Павловиќ – Латас.

Минатото рочиште за  „Топлик“ беше одложено поради болест на обвинетиот Димитар Димовски, за што неговиот адвокат достави лекарска потврда. Во „Топлик“ осомничени се Јанакиески и уште пет лица, кои се товарат за продажба на градежна парцела во скопско Сопиште, односно за комплексот Сончев Град.

Во Кривичен суд Скопје денеска треба да се одржи и главна расправа за предметот „Тотал“, во кој е Латас, а се товари за затајување данок.

Според обвинението, осомничениот давал лажни податоци во завршните сметки и даночните пријави при што преку правните лица затаил данок во износ од 7.466.981 денар или 121.414 евра, а лично физичкото лице затаило 3.876.471 денар или 63.032 евра. Поради отсуство на Павловиќ-Латас, минатото рочиште беше одложено.


Судењето за „Тотал“ одложено за 30 март, Латас не дојде во Кривичен


Скопје, 9 февруари, 2018 - 11:07 (META) 

Новинарот и уредник на „Сител“, Драган Павловиќ – Латас кој е обвинет за даночно затајување во случајот „Тотал“ на СЈО, не дојде на денешното судско рочиште, поради што судијката Славица Наумова – Јосифовска, поради немање услови, главната расправа ја одложи за 30 март.

Одбраната на Павловиќ информираше дека тој не можел да дојде на рочиштето поради семејни причини, а како доказ доставија доказ од Универзитетската клиника во Келн, Германија.

Обвинителот на СЈО, Љубомир Лапе побара од судот да утврди дополнителни термини за нови рочишта заради полесно организирње околу случајот. Судијката го прифати барањето и закажа рочишта и за 11 и за 23 април.

Драган Павловиќ-Латас се товари дека во периодот од 2008 до 2015 година заедно со правните лица „Тотал маркетинг“ ДООЕЛ Скопје, „Медиамакс“ и „Тотал медиа центар“ ДООЕЛ Скопје, со намера да одбегне плаќање даноци, во завршните сметки и во даночните пријави давал лажни податоци. Правните лица го оштетиле буџетот за 121.000 евра, а осомничениот за 63.000 евра.

Инаку, денеска се одложи и рочиштето за случајот „Труст“ на СЈО, во кој првообвинет е бизнисменот Сеад Кочан. Причина за одложувањето беше болест на вештото лице кое требаше да даде исказ пред судот.

Во предметот „Труст“ покрај Кочан, обвинети се уште две физички и три правни лица, меѓу кои и управителите на фирмите „Трансмет“, „Силекс“ и „Вато“ ДООЕЛ. Тие се товарат дека со невистинити и фалсификувани документи добиле тендер на „Електрани на Македонија“ (ЕЛЕМ) вреден 17 милиони евра.

За денеска е закажно рочиште и за случајот „ТНТ“, за рушењето на комплексот „Космос“ на бизнисменот Фијат Цаноски, за што обвинети се поранешниот премиер и лидер на ВМРО-ДПМНЕ, Никола Груевски, поранешниот министер за траснпорт и врски Миле Јанакиески, поранешниот градоначалник на општина Гази Баба Тони Трајковски и уште четири лица.


Одложено судењето за „Тотал“, Латас побара да се снимаат рочиштата


Скопје, 7 декември, 2017 - 12:02 (META) 

Судењето за случајот „Тотал“ на СЈО е одложено откако адвокатите на Драган Павловиќ – Латас, обвинет во случајот, побараа судот да ги снима тонски и визуелно сите судски рочишта, за, како што посочија, да се отстрани каков било сомнеж.

Адвокатите рекоа дека имаат забелешки на записникот од првото рочиште, кое се одржа пред два дена, истакнувајќи дека во него нивните зборови не биле доследно интерпретирани.

Претходно судијката Софче Гаврилова-Ефремова по барање на адвокатите на Павловиќ одлучи да не дозволи новинарските екипи во судницата да направат инсерти од денешното рочиште. Дозволено беше снимање само на обвинителите на Специјалното јавно обвинителство.

Судијката Гаврилова-Ефремова укажа дека капацитетот и можностите на судницата се тие, дека таа суди во мала судница и дека единствено големата судница со број еден во Кривичниот суд е таа што може да обезбеди услови сите да може да седат и целиот судски процес да се снима.

Таа додаде дека откако ќе направи проверка за слободен термин, ќе го соопшти датумот за кога ќе биде закажано ново рочиште.

Драган Павловиќ-Латас се товари дека во периодот од 2008 до 2015 година заедно со правните лица „Тотал маркетинг“ ДООЕЛ Скопје, „Медиамакс“ и „Тотал медиа центар“ ДООЕЛ Скопје, со намера да одбегне плаќање даноци, во завршните сметки и во даночните пријави давал лажни податоци. Правните лица го оштетиле буџетот за 121.000 евра, а осомничениот за 63.000 евра.


Латас: Очекувам брутално судење, му верувам на судот, но не и на судијката


Скопје, 5 декември, 2017 - 11:21 (META) 

Очекувам брутално судење, верувам во судот, но не сум сигурен дека верувам во судијката, изјави Драган Павловиќ – Латас, обвинет во случајот „Тотал“ на СЈО, чие прво рочиште од главната расправа денеска беше одложено бидејќи сè уште не се назначени застапници за две од трите фирми на Павловиќ обвинети во случајот.

Судијката Софче Гаврилова-Ефремова на денешното рочиште појасни дека повеќепати судот доставил барање до Павловиќ како управител на фирмите „Тотал медиа центар“ и „Тотал маркетинг ДОЕЛ“ да назначи адвокати што ќе ги застапуваат фирмите пред судот, но до денешното рочиште тоа не се случило.

Причина за тоа е што Павловиќ се повикува на мерката изречена од судот да не презема никакви активности како управител на фирмите, односно да не потпишува никакви документи.

Гаврилова-Ефремова рече дека тоа е во корист на постапката и ги задолжи адвокатите на Павловиќ, Светлана Савиќ и Анита Бегова, да го известат судот кој ќе ги застапува фирмите, односно да одлучат дали тие ќе бидат адвокати или судот ќе додели адвокат по службена должност.

Одбраната на Павловиќ до судот доставила и барања за изземање на дел од доказите на СЈО, бидејќи, како што посочија, тие се добиени на незаконит начин, алудирајќи на „бомбите“, но судот го одби и ова барање, наведувајќи дека обвинителниот акт веќе бил одобрен од совет и дека во оваа фаза судот не може да одлучува по жалби на одбраната.

Судијката Гаврилова-Ефремова го одби и барањето на адвокатите на Павловиќ за подготвително рочиште, на кое би се расправало во врска со овие барања. Таа посочи дека судот не нашол потреба за одржување на подготвително рочиште, а од друга страна, тоа не било претходно побарано од одбраната.

Обвинетиот Павловиќ по завршување на рочиштето, кое ќе продолжи на 7 декември, рече дека им се ускратени правата од судот и дека судијката „очигледно нема искуство во водење вакви случаи“.

– Ние го бараме тоа што му беше овозможено на Зоран Заев во неговиот случај „Поткуп“ – да поднесе жалба за издвојување на докази – рече Латас.

Латас и фирмите се товарат за даночно затајување, кривично дело за кое, како што посочи и судијката, е предвидена казна затвор од четири години. Поради ова предметот го суди петчлен совет. Како член на советот била назначена и судијката Софија Лаличиќ, која побара да биде изземена од советот.