Културата на заплашување во Македонија ги потисна студентските протести


Тетово, 25 декември, 2018 - 16:52 (META) 

Тивко помина т.н. “ултиматум” што студентите од Тетово му го поставија на Тетовскиот универзитет на минатонеделниот протест. Ниту првите ниту вториот не прифаќаат да се изјаснат со цел јавноста да дознае за тоа што се случи со студентските барања, дали некој воопшто ги сослушал, прашува „Порталб.мк“.

Иако не зборуваат јавно за имиња, но организаторите на протестите и некои од демонстранти, потврдуваат за „Порталб.мк“ дека се соочуваат со разни притисоци па до “поздрави” до семејствата на оние кои протестираат, за да не продолжат со барањето на нивните права.

Оваа култура на садење страв во нив ги принуди студентите да замолчат и тивко да го прифатат нивниот пораз против системот кој што го осудија дека е корумпиран и штетен за нивната иднина.

Интересен е дури и фактот што, наместо кон одговорните, студентите критиките ги насочија кон медиумите. Поради тоа и уследи последното објавување на информацијата на последната страница каде што се најавуваа  протестите, кои до пред една недела беа гласни, па дури даваа впечаток дека можеби ќе ја следат масовноста и сериозноста како протестите во Албанија.

“Студентското движење нема документ наречен Ултиматум, туку има барања упатени до универзитетите, Министерството и Владата. Насловите кои се појавуваат во медиумите може да се протолкуваат само како акти на поединци кои ги палат нашите барања, како и држење далеку на политичките партии од оваа КАУЗА!” е чудното соопштение од 23 декември, кој веројатно доаѓа од нивната хаотична организација.

Од друга страна, освен соопштението на Тетовскиот универзитет дека ќе се направи онлајн платформа за студентите, преку која, како велат, ќе “може да се артикулираат сите потреби, барања и нивните проблеми, кои ќе се разгледаат со најголема сериозност од органите на академските единици и на Универзитетот” од оваа институција , но не се кажа ниту еден збор за барањата на студентите.

На континуираните прашања на „Порталб“, за тоа што одлучило раководството, за која ни кажаа дека имале собир и дискутирале, портпаролот ни го даваше истиот одговор “ќе има соопштение”.

И соопштението беше следново, а од него може да се види колку е сериозен Универзитетот и дека “загриженоста на секој студент е нивна грижа”.

“Затоа сите расположливи механизми и средства ги имаме ставено, а ќе продолжиме и понатаму да ги ставаме на располагање во корист на студентската младина, која претставува главен столб на целото општество. Во духот на транспарентност и добро на студентската заедница на Универзитетот во Тетово, во наредните денови ќе подигнеме  онлајн платформа за студентите, преку која ќе може да се артикулираат сите потреби, барања и проблеми, кои ќе се третираат со најголема сериозност од телата на академските единици и на Универзитетот. Универзитет во Тетово ве уверува дека ќе размисли за секое академско и студентско прашање, со цел да се создаде стабилна платформа за иднината на целото општество.”

И со тоа завршува соопштението.


Втор дел од средбите за иновативни туристички пакети во мрежата на СТЕП


Тетово, 21 декември, 2018 - 20:57 (META) 

Во Тетово се одржа вториот дел од заедничките состаноци за идентификување на потенцијална рамка за остатокот од пакетите за делот во Македонија, со учество на бизнисмени, невладини организации и институции кои се занимаваат со туризам во Македонија, На средбата учествуваа и гости од регионот Елбасан, Албанија, да ја видат поврзаноста на потенцијалните заеднички производи.

– Успехот може да биде само резултат на заедничка акција, притоа нудејќи квалитет во уникатните туристички пакети – рече Флорент Бајрами, координатор на проектот за зајакнување на иновативен туризам (СТЕП), финансиран од Европската унија.

Денешната средба, исто така, исфрли на виделина и некои други аспекти на туризмот, како што е можноста за пакет на историскиот пат Виа Игнација, со неговите споредни патишта за снабдување со стока и други ресурси.

Хасан Дражи, претставникот од Советот на округот Елбасан, беше воодушевен од можностите на планинскиот туризам кој го нуди овој регион и се надева дека еден од следните пакети ќе биде Шкумбини (Пена) – едно име, две реки, што ги карактеризира двете страни на границата.

Во прилог на можностите, учесниците исто така наведоа голем број проблеми, кои бараат институционален ангажман, за да се трасира што подобро патот за ефикасен туризам.

Останува во идниот период  да се спроведат неформални состаноци за да се даде почетна рамка за можните прекугранични туристички пакети.


Тетовци протестираа против објектите за игри на среќа во градот


Скопје, 21 декември, 2018 - 15:22 (META) 

Со пароли „Стоп за коцкањето“, на градскиот плоштад во Тетово се собраа група граѓани, како и претставниците на локалната власт, верските заедници и организаторите на протестот – „Движење против казината“. Заедно го изразија револтот од многубројните објекти за игри на среќа во градот.

Велат, младите на тој начин си ги уништуваат животите. Како претставник на тетовско-гостиварската епархија говореше отецот Александар Стојановски.

– Обединети, заедно со исламската верска заедница, и ние од тетовско-гостиварската епархија, сме тука да го поддржиме протестот против казината во Тетово. Коцкањето е едно од најголемите зла, на кое најмногу младите му стануваат робови. На тој начин се изопачуваат вистинските вредности, како што е семејството и посветеноста кон Бога – рече Стојановски.

Од „Движењето против казината“ велат дека имаат предлози за решавање на проблемот.

– Сите казина да бидат на три километри оддалеченост од градот, 5 проценти од добивката на казината да се донира во активности за рехабилитација на жртвите од коцкањето, а интересите на граѓаните секогаш да бидат пред интересите на бизнисите – порача Џемал Абдиу.

Градоначалничката на Општина Тетово, Теута Арифи, истакна дека Советот на општина Тетово, е првиот кој донел одлука за оддалечување на казината надвор од градската средина.

– Штом двете верски заедници се тука, тогаш на овој проблем треба сериозно да се гледа. Ингеренциите на општината во овој случај се лимитирани, но тука сме да ги слушнеме барањата и мислењата на граѓаните. Сметам дека и политичките партии со голема сериозност треба да ги третираат овие барања. Советот на општината донесе одлука за ваквите објекти да бидат надвор од градот, а тоа е многу важен момент – изјави градоначалничката.

Центарот на Тетово веќе подолг период е преполн со објекти за игри на среќа. Пред околу еден месец, се случи и огнена престрелка, токму пред еден од ваквите објекти во централното градско подрачје.


Протест на студентите Албанци денеска во Тетово


Тетово, 18 декември, 2018 - 11:32 (META) 

Денеска во 12.30 часот во центарот „Илирија“ во Тетово ќе се одржи протест на албанските студенти под мотото #MeStudentët (#СоСтудентите).

Тие со ова им се придружуваат на студентските протести во Албанија и ќе истакнат 13 барања, пишува „Порталб.мк“.

Меѓу нив најглавни се барањата за укинување или субвенционирање на цената од 50 евра за двомесечната пракса, укинување на сумата од 100 евра за отпишување, како и објавување на Статутот на Универзитетот во Тетово и извештајот за евалуација на учениците која ја прават професорите на веб-страницата на универзитетот.


Во Елбасан почна подготовката за заеднички туристички производи на членките на СТЕП


Елбасан, 17 декември, 2018 - 9:00 (META) 

Минатата недела на 13 и 14 декември во Елбасан во Албанија се одржа првиот состанок за подготовка на рамка за заеднички туристички производи на членките на мрежата СТЕП (Проект за зајакнување на иновативен туризам) со учесници од Албанија, кои ги претставуваат бизнисот, академските институции, невладини организации, локални и регионални власти и проектниот персонал.

Во работните сесии се дискутираше одредени географски региони со своите можности да бидат дел од потенцијалниот пакет, со посебен акцент на можностите за пакети кои ќе поминуват низ Белеш и неговите езера, во комбинација со градот Елбасан, познатите лиџи (бањи) на Елбасан, историската рута Виа Игнација, потоа туризам ориентиран кон специфични посети, како што се пакетите за посети на познатите пештери, планински туризам во заштитените подрачја од Либражд, како и комбинации на пакети со календар на настани низ целиот регион.

Вториот дел на овие заеднички состаноци треба да се оддржи во Тетово на 20 и 21 декември, со учество на лица од бизнис секторот, невладини организации и институции кои се занимаваат со туризам во Македонија, каде што ќе се идентификува рамката за остатокот од пакетот за делот од Македонија.

Целта на СТЕП е промовирање на енергичен туристички сектор кој ефикасно се прилагодува на потребите на домашните и меѓународните пазари и придонесува за забрзување на растот и стимулирање на отворањето нови работни места во прекуграничната туристичка зона помеѓу Македонија и Албанија.

Проектот е финансиран од Програмата за меѓугранична соработка на Европската Унија.

Проект-партнери се Фондацијата за интернет и општество „Метаморфозис“, Центарот за регионален развој „Полог“ и советот на Округот Елбасан.


Општина Тетово една година не одговара на „Мајка и дете” за Локалниот акциски еколошки план


Тетово, 11 декември, 2018 - 14:51 (META) 

Невладината организација „Мајка и дете“ преку правото овозможено со Законот за слободен пристап до информации од јавен карактер, речиси цела година бара од Општина Тетово увид во Локалниот акциски еколошки план (ЛЕАП) на општината. Но и покрај ветувањето на градоначалничката Теута Арифи дека ќе биде транспарентна, општината испратила само површен одговор а не тоа што е побарано од невладината организација, известува „Порталб“.

Барањето на „Мајка и дете“ било поднесено на 3 ноември минатата година, а од Општина Тетово  одговориле на 28 декември истата година, и тоа, како што велат, со цитат од општинскиот сајт, со таксативно набројување мерки.

Потоа, на 20 јануари годинава, претставници на  здружението „Мајка и дете“ имале средба со претставници од канцеларијата за животна средина кои им ветиле дека општината ќе објави нов ЛЕАП кој ќе биде посоодветен за Тетово. Иако се поминати 11 месеци од оваа средба, постојаните барања од „Мајка и дете“ до Општина Тетово се без одговор, пишува „Порталб“.

Елмедина Абдулаху од здружението вели дека од Општина Тетово воопшто не одговараат ниту на редовните пријави во „Е-репорт“.

– Постојано поднесуваме пријави во Е-репорт но во ниеден случај не видовме резултат. Исто е и со јавувањата на телефонските броеви – сме се обраќала, но состојбата и понатаму е иста – вели Абдулаху.

Слично искуство со Општина Тетово имал и „Порталб“, кога побарале обемна информација за Општинскиот инспекторат, но Општината одговорило кусо, на само многу мал дел од прашањата.


Тетовските средношколци протестираа против загадувањето на воздухот


Тетово, 29 ноември, 2018 - 12:43 (META) 

Група тетовски средношколци денеска го изразија незадоволството од состојбата со аерозагаувањето во градот со мирен протест на градскиот плоштад, од каде се упатија до Општина Тетово. Велат дека локалната власт не презема никакви мерки за подобрување на состојбата и ако продолжи така, ќе почнат со бојкот на наставата.

-Надлежните за седум дена да преземат конкретни мерки или ќе почнеме со бојкот на наставата. Градоначалничката не се појави, бидејќи не ја интересира нашето мислење. Протестот беше пријавен и најавен – истакна еден од средношколците.

Средношколците извикуваа „Чист возух“ и „Стоп на аерозагадувањето“, а беа присутни ученици од македонска настава од економското училиште и гимназијата „Кирил Пејчиновиќ“.

-Дел од директорите и професорите не им дозволија на учениците од другите средни училишта да учествуваат на протестот. Истото се случи и со соучениците од албанска настава. Имаме и информации дека и на дел од родителите им биле вршени притисоци, за нивните деца да не излезат на протест – изјавија среднишколците.

Во понеделникот протестираа и дел од основците во Тетово.


Кучињата се трујат, тетовци бараат хумано решение


Тетово, 26 ноември, 2018 - 12:41 (META) 

Во изминатиов период бројот на кучиња скитници во Тетово е зголемен, a jaвноста беше вознемирена од неколку случаи на затруени кучиња. Експертите велат дека на сето тоа влијаат многу фактори, но најважното прашање е како тие кучиња се нашле на улица и како да се спречи таа појава.

– Честопати фактор е брзоплетата одлука на сопствениците – набавуваат домашно милениче, а потоа кога ќе видат дека тоа бара постојана нега и исхрана, се предомислуваат и го пуштаат на улица. Таму доаѓа до парење и разможување, па бројката постојано се зголемува. Труењето сепак, не е решение, тоа е кривично дело, бидејќи отровот најчесто се вметнува во прехранбени продукти, па не се знае кој тоа ќе го консумира – вели ветеринарот Дарко Кузмановски.

Граѓаните се гневни и возменирени, но воедно и исплашени. Велат дека сликата на отруени кучиња е страшна и бараат од надлежните да преземат мерки за решавање на проблемот со кучињата бездомници.

-Мора проблемот да се реши на цивилизиран начин. Труењето не е хумано, а и не е добро решение. Улиците се преполни со кучиња скитници и никој не презема ништо – реагираат тетовци.

Ветеринарите сметаат дека за овој проблем клучни се институциите и целокупното ангажирање на општеството. Потребно е да се вклучат министерството за земјоделие, Агенцијата за храна и ветеринарство, како и Ветеринарскиот факултет каде што веќе постои тело кое е задолжено да едуцира институции и луѓе, најчесто за оние кои сакаат да отворат азил за животните, апелира Кузмановски.

-Потребно е и луѓето кои сакаат да набават милениче, прво да се консултираат со стручно лице, за да добијат инструкции како треба да се одгледува, да се договорат за стерилизација  доколку не сакаат да се размножува и не можат да се грижат за потомството од миленичето. Улогата на нас, ветеринарите е со грижата за здравјето на животните, индиректно да се грижиме и за здравјето на луѓето – вели Кузмановски.

Експертите велат дека постојат шанси за да се спаси отруено животно, но поради незнаењето за каков отров се работи, често резултатот е фатален. Отровите кои се даваат на животните не се во продажба, но луѓето често се снаоѓаат и дејствуваат на своја рака.


Ослободителна пресуда за гинеколог од Тетово обвинет за смрт на родилка


Тетово, 16 ноември, 2018 - 15:44 (META) 

Гинекологот Казимир Копривњак е ослободен од страна на Основниот суд во Тетово по обвинението за тешки дела против здравјето на луѓето, во врска со смртта на 33- годишната родилка Виолета Кировска во август 2015 година. Клучна улога во ваквата одлука имале трите вештачења спроведени од експерти од врвните здравствени установи во земјава, истакна судијата Садула Изаири. Јавното обвинителство најави жалба на пресудата.

Адвокатот на гинекологот, Гоце Ристески, изјави дека ослободителната пресуда била очекувана од нивна страна.

– Ваквата пресуда беше единствена законита и правилна и произлегуваше од обемниот доказен материјал со коишто располагаше судот – рече Ристески.

Милан Ивановски, застапникот на семејството на почината родилка, рече дека не се задоволни од одлуката на судот.

– Ние сè уште сметаме дека постојат доволно материјални докази што укажуваат на голема низа на пропусти при третирањето на починатата, но судот даде верба на вештачењата, иако и таму имаше констатации за пропусти во функционирање на системот. Во вештачењата околу постапката беа наведени ненавремено земање на крвни слики, пропусти во подготовката на операцијата, ненавремено отпочнување на операцијата, а според нас, тука сигурно има моменти што довеле до смрт на починатата – изјави Ивановски.

Тој најави дека ќе поднесат жалба на пресудата до Апелацискиот суд во Гостивар, како и дека ќе се консултираат со Јавното обвинителство.

Славица Михајловска, мајката на починатата родилка, вели дека веќе три години се соочуваат со, како што рече, циркус од страна на сите што учествувале во овој процес.

-Никој не може да нè разубеди дека сè ова не беше лага и еден голем циркус и ова е еден срам за човештвото и за здравството, почнувајќи од сестрите, па сè до вештаците. Без разлика на пресудата, ние сме повеќе од сигурни дека станува збор за убиство на мојата Виолета – рече Михајловска.

Основното јавно обвинителство – Тетово попладнево соопшти дека е незадоволно од донесената пресуда и ќе вложи жалба во законскиот рок.

„Обвинителството цени дека обвинетиот го сторил кривичното дело кое му се става на товар и дека доказите кои беа обезбедени од страна на обвинителството ги докажуваат наводите во обвинителниот акт“, се вели во соопштението.

Виолета Кировска почина на 25 август 2015 година околу една недела по породувањето во тетовската клиничка болница. Во Тетово бил извршен царски рез од страна на Казимир Копривњак, а поради обилното крварење било извршено и вадење на матката. Следеле неколку трансфузии на крв, но и покрај тоа пациентката западнала во хеморагичен шок. Потоа била пренесена на клиниките во Скопје, каде што починала. Нејзиното новороденче почина околу еден месец потоа.


Проблемот со градежниoт отпад во Тетово уште долго нема да се реши


Тетово, 12 ноември, 2018 - 12:14 (META) 

Проблемот со фрлањето и отстранувањето на градежниот отпад во Тетово нема да се реши наскоро. Oпштинските власти ветија дека во 2019 година ќе го решат ова прашање, но моментално нема проект за изградба на депонија од ваков вид. Владата, пак, ќе  отвора нови депонии по еколошки стандарди, но тие ќе бидат единствено за комуналниот отпад, не и за цврстиот. Стручњаците велат дека просечниот трошок за изградба на материјална депонија за шут е 25 милиони евра, износ кој општините не се во состојба да го покријат, пишува Порталб.мк.

Владата го презеде управувањето со депониите низ земјата, а Министерството за животна средина и просторно планирање (МЖСПП) со средства од ИПА фондовите, ги врши подготовките за изградбата на шест регионални депонии за комунален отпад, кои ќе ги заменат актуелните локации со насобран отпад, кои не ги исполнуваат стандардите. Но изградбата на обичните депонии нема да го реши проблемот со шутот, односно градежниот отпад.

– Шесте регионални депонии кои се планираат да се изградат се само за комунален отпад и во овие депонии не се предвидува изградба на депонии за инертен отпад и за опасен отпад. Депониите за инертни материјали предвидуваат поинакви стандарди и не може на нив да се фрла комунален отпад или опасен отпад – објаснува Беса Татеши од МЖСПП.

Според тоа, ветувањето на градоначалничката на Тетово, Теута Арифи, дека во текот на 2019 година ќе го реши ова прашање, најверојатно нема да се оствари.

– Депонијата за цврст материјал претставува проблем сам по себе и разгледуваме неколку локации, се надеваме дека во текот на 2019 година ќе изнајдеме решение за овој проблем – изјави Арифи на 24 септември, кога со фонд во износ од 7,8 милиони франци од Швајцарија, општините Тетово, Гостивар, Желино и Боговиње заеднички го почнаа проектот за стандардизација на депонијата во Русино.

Инертниот отпад е категорија отпад која не подлегнува на физичка, хемиска и биолошка промена по неговото фрлање, односно не се раствора, не се пали и не се распаѓа сам од себе. Најчест пример се шутот и песокот.

Депонија за инертен материјал може да се изгради со пари од државниот буџет, во соработка на Владата со општините, но и преку наоѓање странски фондови. Во овој момент, за Полошкиот регион нема план за изградба на депонија на шут.

Експертите велат дека цената за една ваква депонија е превисока за локалните власти и затоа треба да интервенира Владата или да се бараат фондови надвор од земјата.

– Систем за управување со градежен отпад чини над 25 милиони евра. Општините немаат можност да покријат такви трошоци ниту одделно, ниту пак ако се организираат на регионално ниво – вели Блаже Јосифовски од организацијата „Ајде Македонијо“.

Од друга страна, универзитетскиот професор и експерт по екологија, Муртезан Исмаили вели дека е потребна е волја од општинското раководство, а нагласува уште неколку критериуми кои треба да се исполнат за да има таква депонија во Тетово.

– Депониите за тврди отпадоци, за да се лоцираат во одреден град, треба да исполнуваат неколку критериуми, како на пример да има соодветно место, бидејќи не се штетни за градот и животната средина но треба да се има доволно простор, од причина што дел од отпадот може и да се рециклира и повторно да се употреби, како се железото и асфалтот, но и деловите од бетон можат да се преработат и да се претворат во песок. Ако погледнеме од овој аспект, ова би било многу поеколошко решение, но доколку е скапо и чини премногу, тогаш би било доволно да има само доволен простор за тврдите отпадоци да се управуваат на организиран начин и да не се фрлаат хаотично и потоа да претставуваат проблем – вели Исмаили.

Во општина Тетово градежниот отпад се фрла со трактори и камиони на јавниот простор, а надлежните на општина Тетово од почетокот на годината до крајот на септември казниле ниту едно лице за фрлање градежен отпад.

„E-report” е апликација со  граѓаните можат до Општина Тетово да пријават неодговорно однесување на правни и физички лица кои со своето однесување ја загадуваат животната средина.